ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ
ଆସନ୍ତାକାଲି ଆତ୍ମନିର୍ଭର ଉତ୍ତରପ୍ରଦେଶ ରୋଜଗାର ଅଭିଯାନର ଶୁଭାରମ୍ଭ କରିବେ ପ୍ରଧାନମନ୍ତ୍ରୀ
Posted On:
25 JUN 2020 2:49PM by PIB Bhubaneshwar
କୋଭିଡ-19 ବୈଶ୍ଵିକ ମହାମାରୀ ଶ୍ରମିକ ଗୋଷ୍ଠୀ ତଥା ବିଶେଷକରି ପ୍ରବାସୀ ଶ୍ରମିକମାନଙ୍କ ଜୀବନଜୀବିକା ଉପରେ ଗୁରୁତର ପ୍ରଭାବ ପକାଇଛି । ଅନେକ ପ୍ରବାସୀ ଶ୍ରମିକ ଇତିମଧ୍ୟରେ ବିଭିନ୍ନ ରାଜ୍ୟକୁ ଫେରିଛନ୍ତି । କୋଭିଡ ମହାମାରୀ ପରିଚାଳନା ସାଙ୍ଗକୁ ଏହି ପ୍ରବାସୀ ଓ ଗ୍ରାମାଞ୍ଚଳ ଶ୍ରମିକମାନଙ୍କୁ ଜୀବନଜୀବିକା ଯୋଗାଇବା ଏକ ବଡ ସମସ୍ୟା ଭାବେ ଉଭା ହୋଇଛି । ଭାରତ ସରକାର ବିଭିନ୍ନ କ୍ଷେତ୍ରକୁ ଅଧିକ ସକ୍ରିୟ କରିବା ପାଇଁ ଆତ୍ମନିର୍ଭର ଭାରତ ପ୍ୟାକେଜ ଘୋଷଣା କରିଛନ୍ତି । ତେବେ ଦେଶର ଅନଗ୍ରସର ଅଞ୍ଚଳଗୁଡିକରେ କର୍ମନିଯୁକ୍ତି ସୁଯୋଗ ସୃଷ୍ଟି ସହ ସ୍ଥାୟୀ ଭିତ୍ତିଭୂମି ପ୍ରସ୍ତୁତ ପାଇଁ ଗରିବ କଲ୍ୟାଣ ରୋଜଗାର ଅଭିଯାନ ଗତ 20 ତାରିଖ ଠାରୁ ଆରମ୍ଭ କରିଛନ୍ତି ।
କେବଳ ଉତ୍ତରପ୍ରଦେଶକୁ ପ୍ରାୟ 30 ଲକ୍ଷ ପ୍ରବାସୀ ଶ୍ରମିକ ଫେରିଛନ୍ତି । ଉତ୍ତରପ୍ରଦେଶର 31ଟି ଜିଲ୍ଲାରେ 25 ହଜାରରୁ ଉର୍ଦ୍ଧ୍ଵ ପ୍ରବାସୀ ଶ୍ରମିକ ଅଛନ୍ତି । ସେଗୁଡିକ ମଧ୍ୟରୁ 5ଟି ଆକାଂକ୍ଷୀ ଜିଲ୍ଲା ରହିଛି । ଏଗୁଡ଼ିକୁ ଦୃଷ୍ଟିରେ ରଖି ଉତ୍ତରପ୍ରଦେଶ ସରକାର ଆତ୍ମନିର୍ଭର ଉତ୍ତରପ୍ରଦେଶ ରୋଜଗାର ଅଭିଯାନ ଆରମ୍ଭ କରିଛନ୍ତି । ଏଥିରେ ଭାରତ ସରକାରଙ୍କ ବିଭିନ୍ନ କାର୍ଯ୍ୟକ୍ରମ ସହ ବିଭିନ୍ନ ଶିଳ୍ପ ଓ ଅନ୍ୟାନ୍ୟ ସଂଗଠନ ମଧ୍ୟ ଅଂଶୀଦାର ରହିବେ । ଏହି ଅଭିଯାନ କର୍ମ ନିଯୁକ୍ତି ସୃଷ୍ଟି କରିବା ସହ ସ୍ଥାନୀୟ ଉଦ୍ୟୋଗୀ ମଧ୍ୟ ସୃଷ୍ଟି କରିବ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ଦିନ 11ଟା ବେଳେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ଭିଡିଓ କନଫରେନ୍ସ ଜରିଆରେ ଅଭିଯାନର ଶୁଭାରମ୍ଭ କରିବେ । ଏହାଛଡା ଅଭିଯାନ ସହିତ ସଂଶ୍ଳିଷ୍ଟ ଉତ୍ତରପ୍ରଦେଶ ସରକାରଙ୍କ ବିଭାଗୀୟ ମନ୍ତ୍ରୀମାନେ ମଧ୍ୟ ଏଥିରେ ଉପସ୍ଥିତ ରହିବେ । ପ୍ରଧାନମନ୍ତ୍ରୀ 6ଟି ଜିଲ୍ଲାର ଗ୍ରାମବାସୀଙ୍କ ସହ ମଧ୍ୟ ମତ ବିନିମୟ କରିବେ । ଉତ୍ତରପ୍ରଦେଶର ସମସ୍ତ ଜିଲ୍ଲାଗୁଡିକ ଏହି ଯୋଜନା ସହ ଗ୍ରାହକ ସେବା କେନ୍ଦ୍ର ଓ କୃଷି କେନ୍ଦ୍ର ଜରିଆରେ ସାମିଲ ରହିବେ । ତେବେ ସେମାନଙ୍କୁ କୋଭିଡ-19 ବୈଶ୍ଵିକ ମହାମାରୀ ପାଇଁ ଆବଶ୍ୟକ ସାମାଜିକ ଦୂରତ୍ଵ ଭଳି ନିୟମାବଳିକୁ ପାନକ କରିବାକୁ ପଡିବ ।
***********
(Release ID: 1634306)
Visitor Counter : 216
Read this release in:
Assamese
,
English
,
Urdu
,
Marathi
,
Hindi
,
Manipuri
,
Bengali
,
Punjabi
,
Gujarati
,
Tamil
,
Telugu
,
Kannada
,
Malayalam