হকশেল অমসুং য়াইফ য়ুম্বালগী কেন্দ্রগী মন্ত্রী দাঃ হর্শ বর্ধন্না ঙসি ভিদিও কনফরেন্সিংগী খুত্থাংদা ইন্দিয়ন রেদ ক্রোস সোসাইতী (আই.সি.আর.এস.)না শাবা মোবাইল এপ ‘ই. ব্লদসর্বিসেস’ হৌদোকখ্রে। কেন্দ্রগী মন্ত্রী অসি ইন্দিয়ন রেদ ক্রোস সোসাইতীগী চেয়রমেন্সু ওইরিবনি।

এপ্লিকেসন অসি প্রধান মন্ত্রী শ্রী নরেন্দ্র মোদীনা ইং ২০১৫দা হৌদোকখিবা দিজিতেল ইন্দিয়া স্কিমগী মখাদা সেন্তর ফোর দিবেলপমেন্ত ওফ এদবান্সদ কম্প্যুতিংগী ই.-রক্তকোশ তিম্না শাবনি। প্রধান মন্ত্রীগী মীয়ামগী য়াইফনবা থম্বা মিৎয়েংগী মতুং ইন্না দিজিতেল ইন্দিয়া অসি মীপুম খুদিংগী পুন্সিদা চংদ্রবা য়াদ্রবা অমা ওইরে হায়না দাঃ হর্শ বর্ধন্না হায়খি। মসিগী ঈ পীবগী এপ অসি দিজিতেল ইন্দিয়ানা মতৌ করম্না ঈগী শেবা তঙাই ফদবশিংদা তেংবাংবগে হায়বগী ময়েক লারবা খুদম অমনি হায়খি। মীওই খরদি মখোয়গী ইমুং মনুংগী ওইবা করিগুম্বা মেদিকেল ফিভম অমদগী ঈগী মরী লৈনবা সেবা কয়া তোয়না তঙাই ফদবা লৈ হায়না মহাক্না মখা তাখি। এপ অসিগী খুত্থাংদা মতম অমতদা ঈগী য়ুনিৎ ৪ ফাওবদি লৌবা য়াই অমসুং ব্লদ বেঙ্কনা মীওইদুনা ঈ লৌখিনবা পুং ১২ ফাওবা ঙাইগনি। মসিগী এপ অসিনা আই.আর.সি.এস. এন.ঐচ.ক্যু.দগী তঙাই ফদবা ঈগী য়ুনিৎ লৌনবা হায়জবদা অরায়বা অমা ওইহল্লি। লৈবাক অসিনা লায়চৎ থেংনরিঙৈ মতমসিদা এপ অসিনা ঈ য়াম্না তঙাই ফদবা মীওইশিংদা ঈ পীগনি হায়না হায়খি।

এপ অসিদা হেক হায়জবগা ই.-রক্তকোশকী দেশবোর্দতা থোক্লিবা আই.আর.সি.এস. এন.ঐচ.ক্যু.গী ব্লদ বেঙ্কতা হায়রক্লিবা ঈগী য়ুনিৎ মশিং অসি উবা ফংই অমসুং মসিনা অকক্নবা মতমগী মনুংদা ঈ মতম চানা য়ৌহনবা ঙম্মি। মসিগী মওং অসিনা ঈ থীবা মীওই অমদা ঈ ফংহনবদা লায়হল্লি অমসুং সেবা অসি ফংনবা ময়েক লাবা পথাপ অমসুং সিঙ্গল ৱিন্দো সর্বিসসু পীবা ঙম্মি।

দাঃ হর্শ বর্ধন্না হৌজিক কোবিদ-১৯ শন্দোক্লিঙৈ মতমসিদা মশান য়ানা ঈ পীরিবা মীওইশিংসু থাগৎপা ফোংদোকখি। রেদ ক্রোসনা ঈ পীনিংবশিংগী চত্থোক চৎশিন তৌনবা পাম্বৈ শিল লাংদুনা অমসুং মশাগী ময়ুমদগী ঈ পীবা য়ানবা ব্লদ কলেক্সন মোবাইল ভানসু শিজিন্নরি।

মীয়াম্না মশানা য়ানা ঈ পীবা মীওই ওইহন্নিংবগী ৱাফম পল্লদুনা দাঃ হর্শ বর্ধন্না চহী ৬৫গী মনুংদা লৈবা মীওই অমা হেক্তনা চহী অমদা ঈ মরিরক পীবা য়াই হায়না হায়খি। তোয়না ঈ পীবনা কা হেন্না নোয়খৎপা, থম্মোয়গী লায়নাশিং অমসুং অতোপ্পা নূংঙাইতবা কয়া হন্থহল্লি। মসিদা নত্তনা ঈ পীবা অসি মীওইবা খুন্নাইবু তেংবাংবা য়াবা স্পিরিচুএল ওইবা লম্বী অমসু ওই হায়না মখা তানা হায়খি।

এপ পুথোক্লবা মতুংদা দাঃ হর্শ বর্ধন্না ইন্দিয়ন রেদ ক্রোস সোসাইতীগী জেনেরেল বোদি মীফম অমসু লুচিংখি। আই.আর.সি.এস.কী হোৎনবশিং অসি থাগৎপা ফোংদোক্লদুনা দাঃ হর্শ বর্ধন্না হায়খিবদা আই.আর.সি.এস.না মরু ওইবা থৌওং অমা ওইনা ঈ পীবগী কেম্প শিন্দুনা, ঈ পীবা মীওইশিংদা চত্থোক চৎশিন তৌবগী পাস পীদুনা মতিক চাবা ঈ ৱাৎহন্দনবা লৈনবা হোৎনদুনা সরকারগা লোয়নদুনা কোবিদ-১৯গী লায়চৎ অসিগী মনুংদা মশক থোকপা থৌদাং কয়া পাংথোক্লি হায়খি। লৈবাক শিনবা থুংনা লৈরিবা আই.আর.সি.এস.কী ব্লদ বেঙ্ক ৮৯ অমসুং মসিগী মশা ১১০০না লোকদাউন মনুংদা য়ুমদা চত্তুনা অমসুং ঈ পীবগী কেম্প ২০০০মুক শিল লাংদুনা মশিং য়াম্লবা ঈগী য়ুনিৎ ১,০০,০০০ হেন্না খোমজিনবা ঙমখি। মসিগী মথক্তা এন.ঐচ.ক্যু. ব্লদ বেঙ্কতা মশানা য়ানা ঈ পীজবা মীওই ৩৮০০০ হেনবনা রেজিস্তর তৌরকখিবশিংবু পাউ ফাওদুনা অমসুং ইথিল পীদুনা ঈ পীহনখি।

এন.ঐচ.ক্যু. ব্লদ বেঙ্কনা ঈ পীবগী কেম্প ৫৫ শিন্দুনা ঈগী য়ুনিৎ ২৮৯৬ খোমজিনবা ঙমখি। লোকদাউন মনুংদা পুন্না ঈগী য়ুনিৎ ৫২২১ খোমজিনবা ঙমখি। থালাসেমিক অনাবা ২৯২৩ য়াওনা অনাবা ৭১১৩দা ঈ পীখিবতা নত্তনা এ.আই.আই.এম.এস. দিল্লী (য়ুনিৎ ৩৭৮) অমসুং লেদী হারদিঞ্জ (য়ুনিৎ ৬২৪)গুম্বা সরকারগী হোস্পিতালশিংদসু ঈ পীখি।

মসিগা লোয়ননা আই.আর.সি.এস.না থোংদোক্লবা চাক ৩,০০,০০,০০০ হেনবা অমসুং ইমুং ১১,০০,০০০দা রাসনসু পীখি।

*****