ঙসি ভিদিও কনফরেন্সকী খুৎথাংদা ভারত-চাইনাগী ঙমখৈগী মফমশিংদা ওইরিবা ফিবম খন্ননবা প্রধান মন্ত্রী নরেন্দ্র মোদীনা দল খুদিংমক্কী মীফম পাংথোকখ্রে। মীফম অদুদা তোঙান-তোঙানবা রাজনীতি দলশিংগী প্রসিদেন্তশিংনা শরুক য়াখি।

আর্মদ ফোর্সকী থৌনা

প্রধান মন্ত্রীনা হায়খি ঐখোয়গী ঙমখৈশিং ঙাক্লিবা লান্মীশিংগী ঙসি ঐখোয় অমত্তা ওইনা লেপ্লি অমসুং মখোয়গী থৌনাদা মপুংফানা থাজবা থম্লি। দল খুদিংমক্কী মীফম অসিগী খুৎথাংদা, মখোয়গীদমক লৈবাক অসিনা লেপ্লি হায়বা অথৌবশিংগী ইমুং-মনুংশিংদা থাজবা পীবা মহাক্না পাম্মি।

ঐখোয়গী ঙমখৈ মনুংদা কনাগুম্বা অমত্তা লৈতে নৎত্রগা ঐখোয়গী পোস্ত অমত্তা লৌশিন্দে হায়না অহানবদা প্রধান মন্ত্রীনা শেংদোকখি। মহাক্না হায়খি লৈবাক্কীদমক লদাখতা ঐখোয়গী থৌনা ফরবা লান্মী ২০ থৱায় কৎখ্রে অদুবু ঐখোয়গী ইমা লৈবাক্তা শিংনরকপশিংদা পারা অমসু তম্বীখ্রে। মখোয়গী থৌনা অমসুং কৎথোকপা লৈবাক অসিনা মতম চুপ্পা নীংশিংদুনা লৈহৌরগনি।

প্রধান মন্ত্রীনা হায়খি এল.এ.সি.দা চাইনানা চৎথরক্লিবা থবকশিংদা লৈবাক শীনবা থুংনা নুংঙাইত্রে অমসুং শাওরে। লৈবাক অসি ঙাক্নবা ঐখোয়গী আর্মদ ফোর্সশিংনা পায়খৎপা য়াবা থবকশিং পায়খৎলি। লান্মী থাজিনবদা, লান্দাবা নৎত্রগা ঙাকথোকপদা ওইগেরা, কংফাল, সমুদ্র নৎত্রগা নোংথক্তা, লৈবাক অসি ঙাক্নবা ঐখোয়গী ফোর্সশিংনা দরকার ওইবা থবকশিং লৌখৎলি। ঙসিদি লৈবাক অসি মপাঙ্গল কল্লে মদুদি কনাগুম্বা অমতনা ঐখোয়গী লমদা ইঞ্চী অমা ফাওবা চংশিল্লকপা ঙমদ্রে। ঙসিদি ভারতকী ফোর্সশিং মাইকৈ খুদিংমক্তা পুন্না থবক তৌমিন্নবা ঙম্লে। অমরোমদা, দরকার ওইবা থবকশিং পায়খৎনবা লান্মীদা মনীংতমহল্লে, দিপ্লোমেতিক্কী পাম্বৈশিং শিজিন্নদুনা ভারতকী ফিবম চাইনাদা ময়েক শেংনা খঙহনখ্রে।

ঙমখৈগী মচাক-মথুমশিং ফগৎহনবা

প্রধান মন্ত্রীনা হায়খি ভারতনা শান্তি অমসুং মরূপ-মপাং ওইবা পাম্মি, অদুবু সোভরেন্তী ঙাকপনা হেন্না মরুওই। ঐখোয়গী ঙমখৈগী মফমশিং হেন্না শাফনবা ঙমখৈগী শরুকশিংদা মচাক-মথুমশিং শেমগৎনবা সরকারনা পুক্নীং চঙলে। ঐখোয়গী লান্মীশিংদা ফাইত্তর প্লেনশিং, অনৌবা হেলিকোপ্তরশিং, মিসাইল দিফেন্স সিস্তেমশিং অমসুং অতোপ্পা দরকার ওইবশিং ফংহল্লে। হন্দক মচাক-মথুমশিং শেমগৎতুনা এল.এ.সি.দা পেত্রোল্লিংগী থবক কনখৎহল্লে, মসিদগী এল.এ.সি.দা ওইরিবা ফিবমশিংগী মতাংদা ঐখোয় ই-পাউ ফজনা ফংলে অমসুং য়েংশিনবা ঙম্লে অমসুং মতিক চাবা পাউখুম পীরে। মমাংদা অথিংবা অমত্তা পীদনবা চৎথোক-চৎশিন তৌরম্বশিং হৌজিক ঐখোয়গী লান্মীশিংনা অথিংবা পীরকপদগী উংখৎনবা লাকখিবনি।

মহাক্না হায়খি হেন্না ফবা মচাক-মথুমশিং, তঙাইফদবা পোৎলমশিং ফংহনবদগী খুদোংথিনীংঙাই ওইবা মফমশিংদা ঐখোয়গী লান্মীশিংনা ইরাই লাইনা চঙবা ঙম্লে।

প্রধান মন্ত্রীনা হায়খি ললোন-ইতিক, চৎথোক-চৎশিন নৎত্রগা তেরোরিজম থেংনবগী থবকশিংদা মপান্দগী পীরকপা ইথিলশিং সরকার অসিনা মতম চুপ্পদা থেংনদুনা লাকলি।লৈবাক্কী ঙাকশেনগী দরকার ওইবা থবকশিং পায়খৎনবা অমসুং মচাক-মথুমশিং শেমগৎনবা য়াংনা থবক মখা চৎথরগনি। ঐখোয়গী ঙমখৈশিং ঙাক্নবা লান্মীশিংগী তৌবা ঙম্বা হেনগৎহল্লে অমসুং দরকার ওইবা থবকশিং পায়খৎনবা মখোয়দা মনীংতমহল্লে হায়না মহাক্না লুচিংবশিংদা থাজবা পীখি।

দিফেন্স মিনিস্তর রাজনাথ সিংহনা হায়খি অথৌবশিং কৎথোকপা লৈবাক অসিনা কৈদৌঙৈদা কাউবা ঙম্লোই। ভারত অমসুং চাইনাগী মরক্তা ঙমখৈগী মতাংদা য়ানখিবশিং এক্সতরনেল এফেয়ার্স মিনিস্তর দোক্তর এস. জয়সনকরনা পাউদমখি, মশক খঙদোক্লবা ঙমখৈগী শরুকশিং শেমগৎনবা ২০১৪দা প্রধান মন্ত্রীনা পাউতাক পীখিবা অমসুং ১৯৯৯দা মন্ত্রীমন্দলনা অয়াবা পীখিবগী মতাংদা অকুপ্পা মরোলশিং পাউদমখি।

রাজনীতি দলশিংগী লুচিংবশিং ৱা ঙাংখি

লদাখতা লান্মীশিংনা উৎখিবা থৌনা অদু রাজনীতি দলশিংগী লুচিংবশিংনা থাগৎখি। চিরবা তানফম অসিদা প্রধান মন্ত্রীগী লুচিংবদা মখোয়না থাজবা থমখি অমসুং সরকারগা অমত্তা ওইনা লেপকনি হায়না থাজবা পীখি। ফিবম অসি লাকশিন্নবা মখোয়গী ৱাখল্লোলশিং মখোয়না ফোংদোকখি।

মমাতা বেনর্জীনা হায়খি মহাক্কী দলনা সরকারগা অমত্তা ওইনা লেপ্লি। নীতিস কুমারনা হায়খি লুচিংবশিংগী মরক্তা খেন্নবা অমত্তা থম্লোইদবনি অমসুং অতোপ্পা লৈবাকশিংনা খুদোংচাবা লৌখিগদবা তোখাই তাবা থবক অমত্তা দলশিংনা অয়াবা পীরোইদবনি। চিরাগ পাসৱান্না হায়খি প্রধান মন্ত্রীগী লুচিং মখাদা লৈবাক অসি অশোই-অঙাম থোক্তনা লৈরি। প্রধান মন্ত্রী থাগৎলদুনা উদ্ধব থাকেরেনা হায়খি প্রধান মন্ত্রীগা লোয়ননা লৈবাক অসি অমত্তা ওইনা লৈরি।

সোনিয়া গান্ধীনা হায়খি হৌজিক ফাওবা লুচিংবশিং অকুপ্পা ৱাফমশিং খঙদ্রি অমসুং ইন্তিলিজেন্স রিপোর্তশিং অমসুং অতৈ মরী লৈনবশিংগী মতাংদা সরকারদা ৱাহং হংলি। সরত পৱারনা হায়খি লান্মীশিংনা নোংমৈ পুবা নৎত্রগা পুদবগী ৱাফমশিং মালেমগী য়ানবশিং লৈখ্রে অমসুং অসিগুম্বা ৱাফমশিংদা লৈবাকশিংনা ইকায়খুম্নবা উৎকদবনি। কোনরাদ সঙমানা হায়খি অৱাং-নোংপোক্কী মচাক-মথুমশিং শেমগৎনবা প্রধান মন্ত্রীনা থবক পায়খৎলি অমসুং মখা চৎথগদবনি। ময়াৱাতিনা হায়খি হৌজিক রাজনীতি তৌবা মতম নত্তে অমসুং প্রধান মন্ত্রীনা লৌরকপা ৱারেপশিং মহাক্না শৌগৎলি। থৌদোক অসিগী মতাংদা হন্দক প্রধান মন্ত্রীনা ফোংদোকখিবা ৱাফমশিং এম.কে স্তেলিন্না তরাম্না ওকখি।

মীফম শরুক য়াবা অমসুং মখোয়গী ৱাখল্লোনশিং ফোংদোকপগীদমক প্রধান মন্ত্রীনা লুচিংবশিংবু থাগৎখি।

***