نئی دہلی،10 جون  : 

وزیر اعظم نے آج ویڈیو کانفرنسنگ کے ذریعے اتراکھنڈ کی ریاستی حکومت کے ساتھ کیدار ناتھ دھام ترقیاتی اور تعمیر نو منصوبے کا جائزہ لیا۔

اس تیرتھ استھل کی تعمیر نو سے متعلق اپنے ویژن کو پیش کرتے ہوئے وزیر اعظم نے کہا کہ ریاستی حکومت کو کیدار ناتھ اور بدری ناتھ جیسے مقدس مقامات کے لئے ترقیاتی منصوبوں کے تصور کے ساتھ اس کا ڈیزائن اس طرح تیار کرنا چاہئے جو وقت کی کسوٹی پر کھرا اترے، ماحولیات دوست ہو اور اس کے گردونواح کے ماحول کے ساتھ ہم آہنگ ہو سکے۔

موجودہ صورتحال اور ان تیرتھ استھلوں میں سیاحوں اور عقیدت مندوں کی تعداد میں نسبتا آئی کمی کو مدنظر رکھتے ہوئے وزیر اعظم نے مشورہ دیا کہ موجودہ تعمیراتی وقت کا استعمال مزدوروں کی مناسب تقسیم کے ذریعہ زیر التواء کاموں کو مکمل کرنے کے لئے کیا جاسکتا ہے لیکن ساتھ ہی ہمیں مناسب دوری بنائے رکھنے کے ضابطوں کو بھی دھیان میں رکھنا ہو گا۔ اس سے آنے والے سالوں میں سیاحوں کی تعداد میں اضافہ جاری رکھنے کے لئے بہتر بنیادی ڈھانچہ اور سہولتیں تیار کرنے میں مدد ملے گی۔

کچھ مخصوص تجاویز کے ایک حصے کے طور پر وزیر اعظم نے رامبن سے کیدار ناتھ تک کے درمیان دیگر وراثتی اور مذہبی مقامات کی مزید ترقی کی ہدایت دی۔ یہ کام کیدار ناتھ میں اصل مندر کی دوبارہ ترقی کے علاوہ ہوگا۔

اس میٹنگ میں عقیدت مندوں کے خیرمقدم کے لئے برہما کمل واٹیکا (باغ) اور میوزیم کی ترقی کی حیثیت سے متعلق موضوعات پر بھی تفصیلی تبادلہ خیال ہوا جو واسکی تال کے راستے میں ہے۔ ساتھ ہی پرانے شہر کے مکانات اور اصلی فن تعمیرات کے نقطہ نظر سے تاریخی اہمیت کے املاک کی دوبارہ ترقی کے علاوہ دیگر سہولتوں جیسے مندر سے مناسب دوری پر اور مستقل وقفے سے ماحولیات دوست پارکنگ مقامات کے بارے میں بھی بات چیت ہوئی۔

اتراکھنڈ کے وزیر اعلی شری تریویندر سنگھ راوت اور دیگر اعلی عہدیداروں نے بھی اس بات چیت میں حصہ لیا۔

*************

م ن۔ن ا ۔م ف 

U:3173