কোবিদ-১৯গী মতাংদা ফম্বা অৱাংবা থাক্কী মন্ত্রী কাংলুপ (জি.ও.এম.)গী ১৬শুবা মীফমদা ঙসি মফম অসিমক্তদা হকশেল অমসুং য়াইফ-য়ুম্বাল কেন্দ্রগী মন্ত্রী দা. হর্শ বর্ধন্না ভিদিও কনফরেন্স অমগী খুত্থাংদা ময়াই তাংবল লৌখি। মহাক্কা লোইননা মপাল থৌরম পুবা মন্ত্রী দা. এস. জয়শঙ্কর, সিবিল এবিএসন মন্ত্রী শ্রী হর্দিপ সিংহ পুরি, গৃহ রাজ্য মন্ত্রী শ্রী নিত্যানন্দ রাই, সিপ্পিং, অমসুং কেমিকেল অমসুং ফর্তিলাইজর রাজ্য মন্ত্রী শ্রী মন্সুখ লাল মান্দবিয়া, হকশেল অমসুং য়াইফ-য়ুম্বালগী রাজ্য মন্ত্রী শ্রী অশ্বিন কুমার চৌবেগা লোইননা চীফ ওব দিফেন্স স্তাফ শ্রী বিপিন রাৱৎসু শরুক য়াখি। মন্ত্রী কাংলুপ অসিগী ইকাইখুম্ননিংঙাই ওইরবা মীহুৎশিং অমসুং ওফিসরশিংনা ফিজিকেল দিস্তেন্সিংগী কাংলোনশিং ইনবগা লোইননা শরুক য়াখি।

মন্ত্রী কাংলুপ অসিদা লৈবাক অসিদা লৈরিবা কোবিদ-১৯গী ওইবা খ্বাইদগী নৌবা ফিবম, পায়খৎলিবা থৌরাংশিং অমসুং শিল-লাঙলিবশিংগী মতাংদা থমখি। মন্ত্রী কাংলুপ অসিদা লোকদাউন তপ্না-তপ্না কোমহনলকপগী হাইরপ মান্নবা তাংককশিং অতোপ্পা লৈবাকশিংগা চাংদম্নবদা ভারতকী ওইরিবা ফিবম, লোকদাউন অসিদগী ফংখিবা কান্নবশিং, অমসুং লাইচৎ অসি লাকশিনবদা করম্না মসিদগী খুদোংচাবা লৌগদগে হায়বগী মতাংদা তেন্তক্না থমখি। মন্ত্রী কাংলুপ অসিদা ইম্পাৱার্দ গ্রুপ ১১দা শিন্নখিবা থবকশিংগী খুমাং চাউশিনবগী হৌজিক ওইরিবা ফিবমসু পাউদমখি। হকশেল অমসুং য়াইফ-য়ুম্বাল মন্ত্রালয়না মীয়ামগীদমক অমসুং সেমি-পব্লিক এনবাইরোন্মেন্তকীদমক পীবা এস.ও.পি.শিংনা কোবিদ-১৯ লাকশিন্নবা লৌখৎলিবা চেকশিল-থৌরাংশিং কাইহন্দনা শেল-থুমগা মরী লৈনবা থবকশিং করম্না পায়খৎপা য়াহনগদগে হায়বগী মতাংদসু মন্ত্রী কাংলুপ অসিদা পাউদমখি।

মন্ত্রী কাংলুপ অসিগী চিয়রমেন ওইরিবা দা. হর্শ বর্ধন্না হায়খি মদুদি, ঐখোয়না অথিংবশিং কোমহনলক্লিবা অমসুং লৌথোক্লক্লিবা অনলোক ১.০গী তাংকক্তা চংলক্লবনা, ঐখোয়না কোবিদকা মরী লৈনবা লমচৎ-শাজৎশিংবু মীয়াম তিনবা মফমদা অমগা-অমগা থাপতোক্নবগী কাংলোনশিং, মাস্ক অমসুং মাই খুম্নবশিং শীজিন্নদুনা, খুৎশা হামদোকপগী কাংলোনশিং চেৎনা ইন্দুনা অমসুং নিংশা হোনবগী চৎনবীগী প্রোতোকোলশিং ঙাক্না চৎপা তঙাই ফদে। ঐখোয়না পেন্থোক্তুনা লৈবগী মতম লৈতে হায়না মহাক্না কন্না পুক্নিং চিংশিল্লক্লি। হৌজিক্তি সরকারগী লোইশঙ পুম্নমক হাংলবনা, বিভাগশিং অসিগী মকোক ওইরিবা হেদ ওব দিপার্ত্মেন্তশিংগী পুক্নিং চিংশিল্লদুনা হায়ঃ "ঐখোয়না কোবিদ-১৯গী মাইয়োক্তা লান্থেংননবগীদমক অমগা-অমগগী মরক্তা অথাপ্পা থমদুনা, খুৎ-শা লুনা-নান্না থমদুনা অমসুং মাস্ক নত্ত্রগা মাই খুম্বগী চৎনবী চেৎনা ঙাক্তুনা 'সোসিএল ভেক্সিন' কাউথোক্লোইদবনি।" মহাক্না মীপুম খুদিংমক্তা ইশানা হকচাংগী ফিবম য়েংজবদা মতএং ওইগদবা অমসুং কোবিদ-১৯দগী ঙাকথোকপদা মতেং ওইগদৌরিবা আরোগ্যা সেতু এপ দাউনলোদ তৌবীনবা নিংশিংখি। লৈবাক অসিগী মীওই কোতি ১২.৫৫ হেনবনা হৌজিকফাওবদা এপ অসিবু দাউনলোদ তৌখ্রে।

লৈবাক অসিদা হিদাক লাংথক্কী ওইবা ইনফ্রাস্ত্রকচরশিং খুমাং চাউশিল্লক্লিবা অসিগী মতাংদা অমসুং জুন ৯, ২০২০ ফাওবদা, কোবিদকা মরী লৈনবা হকশেলগী ইনফ্রাস্ত্রকচরশিং অসি কোবিদ খক্তগী ওইবা হোস্পিতাল ৯৫৮তা আইসোলেসন বেদ ১,৬৭,৮৮৩, আই.সি.য়ু. বেদ ২১,৬১৪ অমসুং ওক্সিজেন লৈবা ফমুং ৭৩,৪৬৯ থমদুনা মপাঙ্গল কনখৎলে হায়না মন্ত্রী কাংলুপ অসিদা পাউদমখি। কোবিদ খক্তগী ওইবা হকশেলগী সেন্তর ২,৩১৩দা আইসোলেসন বেদ ১,৩৩,০৩৭; আই.সি.য়ু. বেদ ১০,৭৪৮ অমসুং ওক্সিজেন লৈবা ৪৬,৬৩৫ থমদুনা মথৌ তৌখ্রে। মসিগীসু মথক্তা, কোবিদ কেয়র সেন্তর ৭,৫২৫তা ফমুং ৭,১০,৬৪২গা লোইননা লৈবাক অসিদা কোবিদ-১৯ লান্থেংনরি। কোবিদকী ফমুংশিংদা থম্বা ভেন্তিলেতরনা মশীং ২১,৪৯৪।

কেন্দ্র সরকারনা রাজ্য/য়ু.তি./সেন্ত্রেল ইন্সতিত্যুৎশিংদা এন.৯৫ মাস্ক লাখ ১২৮.৪৮ অমসুং পর্সনেল প্রোতেক্তিব ইক্বিপমেন্ত (পি.পি.ই.) লাখ ১০৪.৭৪ পীখ্রে। কেন্দ্র সরকারনা অহেনবা ভেন্তিলেতর ৬০,৮৪৮ থমখ্রে। আই.সি.এম.আর.গী তেস্ত তৌবা ঙম্বগী মশীংসু সরকারগী লেবোরেতরীদা ৫৫৩ অমসুং প্রাইবেৎ লেবতনা ২৩১ (অপুনবা ওইনা ৭৮৪ লেব) হেনকৎখ্রে। হৌজিকফাওবদা ক্যুমুলেতিব তেস্ত লাখ ৪৯ হেন্না তৌখ্রে। মসিগী মথক্তা হৌখিবা পুং ২৪ অসিদা সেম্পল ১,৪১,৬৮২ তেস্ত তৌখি।

ইম্পাৱর্দ গ্রুপ-৫কী চিয়রমেন শ্রী পরামেস্বরন আইয়রনা ই.জি. অসিনা লৈবাক অসিদা লাইচৎ অসিগা লেন্থেংননবা হোৎনবদা চংবা তঙাইফদবা অরুবা পোৎলমশিং ফংহনবগা লোইননা লোকদাউনগী পোৎলুম খরা য়াংহন্নবগীদমক লৌখৎখিবা অহকপা থৌরাংশিংগী মতাংদা পাউদমখি।

আই.সি.এম.আর.গী মাইকৈদগী দা. রামন গঙ্গাখেদকরনা তেস্তিং লেবশিং, লৈবাক শীনবা থুংনা মশীং হেন্না তেস্ত তৌবা ঙম্লক্লিবশিংগী মতাংদা শুগাইনা পাউদমখি, অমসুং মন্ত্রী কাংলুপ অসিবু ঐচ.সি.ক্যু., রেমদেসির, অমসুং সেরো-সর্বিলিএন্স স্তদিজগা মরী লৈননা থেংনরিবা খুদোংচাদবশিংগী মতাংদা খঙহনখি।

হৌজিকফাওবদা, মীওই ১,২৯,২১৪ নাবা ফখ্রে। হৌখিবা পুং ২৪ অসিদা অনাবা মীওই ৪,৭৮৫ নাবা ফখ্রে। মসিনা ঐখোয়গী অপুনবা নাবা ফবগী চাং ৪৮.৪৭% য়ৌখ্রে। হৌজিকফাওবদা অপুনবা এক্তিব কেস মশীং অসি ১,২৯,৯১৭নি।

কেন্দ্রগী হকশেলগী সেক্রেতরী শ্রীমতি প্রীতি সুদান, হকশেল অমসুং য়াইফ-য়ুম্বাল মন্ত্রালয়দা ও.এস.দি. ওইরিবা শ্রী রাজেশ ভুশান, এদিসনেল সেক্রেতরী (হেলথ) শ্রীমতি আরতি অহুজা অমসুং আই.সি.এম.আর.দগী দা. রমন গঙ্গাখেদকরনা মন্ত্রী কাংলুপ অদুগা লোইননা ভিদিও কনফরেন্সিংগী খুথাংদা শরুক য়াখি।

*****