লায়চৎ অসিনা মরম ওইদুনা মীরমদগী হল্লক্লিবা মীওইশিংগী খুৎ-শা হৈ-শিংবশিংগী খুদোংচাবশিং লৌবগী পান্দমদা ভারত সরকারনা স্বাদেস (স্কিল্দ ৱর্করস এরাইবেল দেতাবেজ ফোর ইমপ্লোইমেন্ত সপ্পোর্ত) হায়বা অনৌবা খোংথাং অমা হৌদোক্তুনা বন্দে ভারত মিসনগী শরুক অমা ওইনা য়ুমদা হল্লক্লিবা মীওইশিংগী স্কিল মেপিং তৌবগী থবক পাংথোক্লি। মসি স্কিল দিবেলপমেন্ত অমসুং ইন্তরপ্রিনরশিপ মন্ত্রালয়, সিবিল এবিএসন অমসুং এক্সতর্নেল এফিয়ার্স মন্ত্রালয়না পুন্না পায়খৎপা খোংথাংনি অমসুং মসিনা হল্লক্লিবা মীওইশিংগী খুৎ-শা হৈবগী মরোলশিং খংজিন্দুনা ভারতকী অমসুং মীরমগী কম্পেনীশিংগী দিমান্দ থেংনবা ঙম্নবা হোৎনগনি।

মসিগী মতুং ইন্না খোমজিল্লবা ৱারোলশিং অসি কম্পেনীশিংদা পীদুনা লৈবাক অসিগী মনুংদা চান্নবা মফমদা থবক পীনবা হোৎনগনি। হল্লক্লিবা মীওইশিংনা ওনলাইন্দা ফংবা স্বাদেস স্কিল কার্দকী ফোর্ম মেনগদবনি। কার্দ অসিনা রাজ্য সরকারশিং, ইন্দস্ত্রীগী লুপশিং অমসুং থবক পীবশিংনচিংবা মরু ওইবা স্তেকহোলদরশিংগা পাউ ফাওনদুনা অমসুং ৱা তাথোক তাশিন তৌদুনা নিংথিনা য়াৎথোক্লবা থৌওং অমগী মতুং ইন্না হল্লক্লিবা মীওইশিং অসিদা চান্নবা থবক পীবদা মতেং পাংগনি। এম.এস.দি.ই.গী থবক তৌবগী মশা ওইরিবা নেস্নেল স্কিল দিবেলপমেন্ত কোর্পোরেসন (এন.এস.দি.সি.)না প্রোজেক্ত অসি থবক ওইনা পাংথোকপদা মতেং পাংগনি।

খুৎশম্নরিবা অসিগী মতাংদা ৱা ঙাংবদা দাক্তর মহেন্দ্র নাথ পান্দে, কেন্দ্রগী স্কিল দিবেলপমেন্ত অমসুং ইন্তরপ্রিনরশিপ মন্ত্রীনা হায়খিবদা, “মতম অসি চাংয়েংগী মতম্নি অমসুং লৈবাক পুম্বনা কেন্দ্র সরকারনা কোবিদ-১৯না শেন্মিৎলোন্দা শোকহল্লিবা অসিবু য়েংশিল্লিবা অসিদা মতেং পাংবগী য়াম্না তঙাইফদবা অমা লৈরে হায়খি। ঐখোয়না সিবিল এবিএসন মন্ত্রালয় অমসুং এক্সতর্নেল এফিয়ার্সকী মন্ত্রালয়গা খুৎশম্নদুনা বন্দে ভারত মিসনগী শরুক অমা ওইনা মীরমদগী হল্লক্লিবা ভারত মচাশিংগী স্কিল মেপিং তৌমিন্নরিবা অসিগীদমক্তা নুংঙাইবা ফাওই। প্রধান মন্ত্রী শ্রী নরেন্দ্র মোদীগী ঙাক-শেনবা অমসুং শাহৌ লৌবগী মংলান অসিনা ইথিল পীদুনা স্বাদেস স্কিল কার্দকী খুথাংদা খুৎ-শা হৈবশিংগী ৱারোল খোমজিল্লিবা অসিনা মীয়ামদা থবক পীদুনা দিমান্দ-সপ্লাই গেপ অসি শম্নহনবা ঙমগনি”।

মালেম শিনবা থুংনা কোবিদ-১৯ শন্দোরকপা অসিনা মীওই কয়াগী থবক মাংহনবা অমসুং মালেমগী কম্পেনী কয়া অমা থিংজিনখিবা অসিনা শেন্মিৎলোন্দা অচৌবা চৈথেং অমা পীরি। বন্দে ভারত মিসনগী শরুক অমা ওইনা মীরমদগী হল্লক্লিবা ভারত মচাশিংসু অসিগী চৈথেংশিং অসি ফংদবা নত্তে। মীওই লাখ কয়ানা মনাক নকপদা লৈবা ভারতকী মিসনশিংদা য়ুমদা হনবা য়াহনবিনবা ৱাকৎ কয়া লাকখি অমসুং হৌজিক ফাওবগী ওইনা মীওই ৫৭,০০০ হেনবদি ভারত্তা হল্লকখ্রে।

থৌরাং অসিগী মতাংদা পল্লদুনা শ্রী হরদীপ সিংহ পুরি, কেন্দ্রগী সিবিল এবিএসন মন্ত্রীনা হায়খিবদা মখোয়না বন্দে ভারত মিসন হৌদোকখিবা মতমদা মীরমদগী থবক লৈতবদগী হল্লক্লিবা মীওইশিং অসিগী মরক্তা  মখুৎ-মশা য়াম্না হৈবা মীওই কয়া অমা য়াওরি অমসুং মসিনা লমদমসিগী অমসুং মালেমগী কৈথেলদা অচৌবা মমলগী থবক পীবা ঙমগনি। ঐখোয়না স্বাদেস্তা হায়দুনা অসিগুম্বা মীওইশিংগী ৱারোল খোমজিন্নবা হায়খি। স্বাদেস স্কিল কার্দকী ৱাফমশিংবু মীওই খুদিংদা খংহনবা ঙম্নবা হায়দুনা বন্দে ভারত মিসনগী ফ্লাইৎ পায়রিবা এয়র ইন্দিয়া অমসুং এয়র ইন্দিয়ন এক্সপ্রেস্না ফ্লাইৎ মনুংদা লাঊথোক্তুনা পেসেঞ্জরশিংদা খংহনখি। এয়রপোর্ত ওথোরিতী ওফ ইন্দিয়া অমসুং অতোপ্পা লন্নাইগী এয়রপোর্তশিংদা বেন্নর/স্তেন্দীশিং অমসুং দিজিতেল সাইনেজ থমদুনা মীরমদগী লাক্লিবা ঐখোয়গী লমগী মীওইশিংনা থৌদাং অসিগী মরমদা খংহন্নবা হোৎনখি।

দাক্তর সুব্রমনিয়ম জয়শঙ্কর, এক্সতর্নেল এফিয়ার্সকী মন্ত্রীনা হায়খি, “মালেম শিনবা থুংনা অকিবা মওংদা নোবেল কোরোনাভাইরস শন্দোরক্লিবা অসি য়েংলদুনা মীরমদগী হল্লক্লিবা মীওইশিংনা থবক লৈতবদগী থেংনগদৌরিবা খুদোংচাদবশিং খুদিংদা ঐখোয়না মতেং পাংগনি। ঐখোয়না স্বাদেস স্কিল কার্দকী খোংথাং অসি তোঙান তোঙানবা লৈবাকশিংদা লৈরিবা ঐখোয়গী ইম্বেসি/হাই কমিসন/কন্স্যুলেৎশিংগী খুত্থাংদা খুমাং চাউশিলহনগনি। খোংথাং অসিনা হল্লক্লিবা মীওইশিংদা মখোয়গী চান্নবা মহৈ অমসুং খুৎ-শা হৈবগী মতুং ইন্না থবক শিনবদা মতেং পাংগনি”।

ওনলাইন ফোর্ম অসি www.nsdcindia.org/swades তা ফংগনি অমসুং মসি হল্লক্লিবা মীওই খুদিংগী ৱারোল খংনবগীদমক্তা শেমখিবনি। ফোর্ম অসিদা মখোয়গী থবক্কী সেক্তর, থবক মমিং, থবক তৌবগী মরম, থবক তৌরকপগী মতমগী মতাংদা য়াওরি। ফোর্ম অসি মেনবা মতমদা খংদবা কয়াবু হায়নবগীদমক তোল ফ্রীগী কোল সেন্তর অমসু লৈরে।

 স্বাদেস স্কিল ফোর্ম (ওনলাইন) অসি মে ৩০, ২০২০দগী লাইব ওইখি অমসুং জুন ৩, ২০২০ (নুংথিলগী পুং ২) ফাওবদা মীইও ৭০০০না রেজিস্ত্রেসন তৌরকখ্রে। হৌজিক ফাওবদা খোম্লকপা দেতাগী মতুং ইন্না ভারত মচাশিংনা হল্লক্লিবা লৈবাকশিং অসি য়ু.এ.ই., ওমান, কতার, কুৱেৎ অমসুং সাউদি অরাবিয়ানি। স্কিল মেপিং তৌবগী মতুং ইন্না মীওইশিং অসি মরু ওইনা থাও অমসুং গ্যাস, য়ুমশাবা, লমকোইবা অমসুং লমকোইমী সেবা তৌবা অমসুং ওতোমোতিব অমসুং এবিএসন সেক্তরদগী লাকপনা অয়াম্বনি। দেতা অসিগী মতুং ইন্না হল্লক্লিবা অয়াম্বা মীওইশিং অসি কেরলা, তমিল নাদু, মহারস্ত্রা, কর্নাতকা অমসুং তেলঙ্গানাদগীনি।

*****