নুমীৎ ৭০নিগী লোকদাউনগী মতুংদা অনলোক ১.০ থবক ওইনা পাংথোকপা হৌখ্রে। জুন ১, ২০২০দগী ওফিসিএল ওইনা হৌগদৌরিবা লোকদাউন ৫.০দগীদি শেনমিৎলোন অমসুং মহৌশাগী পুন্সি অসি চেকশিনবা অমসুং তাঙ্কক নায়না হান্নগুম্না হঞ্জিল্লক্লগনি। মসিনা অনৌবা মহৌশাগী পুন্সিগী অহৌবা ওইরগনি। মসি য়াম্না শাংবা খোঙকাপ অমদি ওইগনি। অখং অহৈ অমসুং ওফিসিএলশিংনা “ঐখোয় ভাইরস অসিগা লৈমিন্নবা তমগদবনি” হায়না হায়নরি। বেক্সিন পুথোকপদা থা কয়া ৱাৎখিগদবা অসিনা ঐখোয়না অনৌবা মহৌশাগী পুন্সি অমা হৌবা তাই। ইন্দিয়া সাইন্স ৱায়রদা ৱা ঙাংবদা ভারত সরকারগী প্রিন্সিপল সাইন্তিফিক এদবাইজর প্রোফেসর কে. বিজয় রাঘবন্না ‘ভাইরসকা লৈমিন্নবগী’ পাম্বৈ খরা হায়খি।

“ঐখোয়না ভাইরস অসি শেমদোকপা নত্ত্রগা ঐখোয় ইশা শেমদোকচগদবনি; ভাইরস অসি শেমদোকপদদি মতম শাংনা চংখিগনি” হায়না প্রোফেসর বিজয় রাঘবন্না হায়খি। হিদাক অমসুং বেক্সিন শাবগী থবক অসি কন্না চত্থরি অদুবু মখোয়শিং অসি ক্লিনিকেল ত্রায়েল তৌরবা মতুংদা মীয়াম্না পাক শন্না শিজিন্নবা ফংবগী ওইনদি মতম শাংনা চংখিগনি। মীয়াম পুম্বগী ওইনা হিদাক অমসুং বেক্সিন পুত্থোকপদা মতম য়াম্না চংগনি। মতমদু ফাওবগীদি ঐখোয়না ইশাবু হোংদোক্তুনা লায়চৎ অসি থেংনবা ঙম্নবা হোৎনবা তাই।

প্রোফেসর রাঘবন্না পীখিবা পাম্বৈ মঙা অদুদিঃ

১. য়ুমদগী থোকপা মতমদা মাস্ক উপ্পা

মীওই অমনা ৱা ঙাংবগী চিন কাথোকপা মতমদা তিনগী অপিকা মরিক ১০০০মুক থোকই হায়বসি নৌনা থিজিন হুমজিনবদা খংবা ঙমখ্রে। করিগুম্বা মীওই অদু নোবেল কোরোনাভাইরসনা নাবা ওইরবদি তিন মরিক অমদা মহিক-মতাই লিশীং লিশীংদা য়াওগনি। তিন মরিক অচৌবদি মীতর ১গী অরাপ্পদা লৈবা লৈমাইদা তাগনি। অদুবু তিন মরিক মচাশিংদি, নুংশিৎ নুংশা চংদবা মফম ওইরগদি, নুংশিত্তা মতম কুইনা পায়দুনা লৈ। ভাইরস অসিনা শোকহল্লবা মীওই কয়া অমদি লাইওং উত্তে। মরম অদুনা মখোয় মশা ফাওবদা ভাইরস অসিনা শোকহল্লে হায়বসি খংজদে। করিগুম্বা ঐখোয়দা ভাইরস অসি চংলবদি মাস্ক উপ্পনা ইশা ঙাকথোকপদা নত্তনা অতোপ্পা মীওইবুসু ঙাকথোকই। ঐখোয়না ইশাগী মায় ঙাকথোক্নবা য়ুমদা মাস্ক করম্না শাগদগে হায়বগী লাইরিক অমসু ফোংলে হায়না প্রোফেসর রাঘবন্না হায়খি।

২. খুৎ-শা নান্না লৈহনবগী হৈনবী লৈবা

দবল্যু.ঐচ.ও.না লুচিংদুনা চাইনাগী কোবিদ-১৯ কেস ৭৫,৪৬৫ নৈনবদা কোরোনাভাইরস অসি নিংশা হোনবদা য়াওবা মহি অমসুং শোক্ন-শম্নবদা মরু ওইনা শন্দোকই হায়বা খংবা ঙম্লে। মরম অদুনা অনাবা মীওই অমগা হকথেংননা শোক্ন-শম্নবদা কোবিদ-১৯গী ভাইরস অসি শন্দোকই নত্ত্রগা অনাবা মীওই অমগী অকোইবা অমসুং মহাক্না শিজিন্নরম্বা পোৎ-চৈশিং (থোং পাইফম অমসুং অমাংশংগী কোন্সিল) শোক্লুবা মতমদা শন্দোকই। ঐখোয়না মায়দা য়াম্না পায়নিংবগী ইথিল অমা লৈ। ঐখোয়না য়ামদ্রবদা সেকেন্দ ৩০ চংনা শাপোন শিজিন্নদুনা খুৎ হাম্বা মতমদা করিগুম্বা খুত্তা ভাইরস পক্লম্বা থোক্লবদি ভাইরস হিংবা ঙমদে। ভাইরস অসি মায়-মীত্তগী নত্ত্রগা চিন্দগীসু শন্দোকপা য়াই হায়বসি খংলে, মরম অদুনা খোং-খুৎ হামদোকপসু ফৈ হায়না প্রোফেসর রাঘবন্না হায়খি।

৩. সোসিএল দিস্তেন্সিং তৌবা

অনাবা মীওই অমদগী থোক্লকপা তিনগা থেংনরুবা নত্ত্রগা নিংশা হোঞ্জিনবদা লায়না অসি অয়াম্বা মতমদা শন্দোকই। অনাবা মীওই অমদগী তিন মরিক অসি অয়াম্বা মতমদা মীতর অমা লাপ্না পায়থোক্কল্লি। কৈথেল, লোয়শংশিং অমসুং মীয়ামগী চত্থোক চৎশিন তৌনবা মফমশিংদা মীতর অমা লাপ্ননা লৈবনা কান্নবা পীগনি। নহা ওইবা মীওইশিংদা লাইওং উত্তনা ভাইরস অসি চংবা য়াই অমসুং মখোয়না অমুক অহল ওইবশিংদা অমুক শন্দোকপা য়াই। মরম অদুনা ঐখোয়না য়াম্না মরু ওইনা লায়না তিলনা নাগনবা অহলশিংদগী লাপ্ননবা সোসিএল দিস্তেন্সিং তৌদুনা চেকশিনগদবনি হায়না প্রোফেসর রাঘবন্না হায়খি।

৪. তেস্ত অমসুং ত্রেক্কিং তৌবা

“করিগুম্বা মীওই অমা কোবিদ-১৯ পোজিতিব ওইরবদি, মীওই অদুগা শোক্ন শম্নরুবশিং থিগত্তুনা মশক খংদোক্লবা মতুংদা তেস্ত তৌথোক্কদবনি” হায়না প্রোফেসর রাঘবন্না হায়খি। মহিক চংলবা মীওই খক্তনা লায়না শন্দোকপা ঙম্মি অমসুং থেংনরুবা লৈমায়শিংদা মহিক পকহন্দুনা লায়চৎ অসি শন্দোকহনগনি। করিগুম্বা মহিক চংলবা মীওইশিং অসি মশক খংদোকপা ঙম্লবদি ভাইরস অসি লাকশিনবা অমসুং মতুং তানা শন্দোকহন্দনবা হোৎনবদা অরায়বা অমা ওইগনি।

৫. তোঙান্না লৈবা

প্রোফেসর রাঘবন্না পোজিতিব কেস ওইরে খংলবা মীওইশিংদি তোঙান্না লৈগদবনি হায়খি। তোঙান্না হেক লৈহনবগা নারিবা মীওই অদুদা মেদিকেলগী মীৎয়েং নিংথিনা চংবা য়ারগনি। মখা তানা তোঙান্না লৈবনা নারিবা মীওইদুনা অতোপ্পদসু লায়না অসি শন্দোকহন্দে। মতৌ অসুম্না লায়না শন্দোকপগী মশা অসি ককথৎপা য়াগনি।

অরোইবগী অসি করিগুম্বা খোংজেল থুনা পাংথোকপা ঙমদুনা হায়রিবা পুম্নমকসি ইন্দুনা চৎলবদি ঐখোয়না হিদাক অমসুং বেক্সিন ঙাইনা-ঙাইনা মহৌশাগী পুন্সিগা মান্নবা মওংদা হিংবা ঙমগনি। করিগুম্বা ইনবা ঙমদ্রগদি নত্ত্রগা হায়রিবশিং অসিগী মরক্তগী অমা ইনদবা থোক্লগদি ঐখোয় পুম্নমক খুদোংথীবা তাগনি হায়না প্রোফেসর রাঘবন্না হায়খি।

নোংচুপলোমগী লৈবাক্কা ঐখোয়গী ভারতকগী মরক্তা খেৎনবা খরা লৈ হায়বসি মহাক্না হায়খি। মুম্বাইগী মী য়াম্না কুংনা তাবা ধারাবিগুম্বা মফমদা ফিজিকেল দিস্তেন্সিং তৌবসি য়াম্না অরুবা থবক অমনি। মখা তানা, ভারত্তদি ইমুং অমদা চারোন শুরোন অহুম্মুক পুন্দুনা অদুম লৈমিন্নৈ। মরম অসিনা ফিজিকেল দিস্তেন্সিং তৌবা অসি খুদোংচাদবা অমসু ওই। অদুনা অসিগুম্বা ফিভমশিং অসিবু নিংথিনা থেংননবা অনৌবা পাম্বৈ খরা পুথোকপা তঙাই ফদ্রে হায়না প্রোফেসর রাঘবন্না হায়খি।

“ঐখোয়না করি তৌফম থোকপগে হায়না খনবগী থাক য়াম্না লৈ। খ্বাইদগী মরু ওইবদি ঐখোয়না হায়নরিবা অমসুং অমগা অমগা পাউ ফাওনরিবা ৱাফমশিং অসি থবক ওইনা পাংথোকপনি হায়না প্রোফেসর রাঘবন্না হায়খি।

ভারত সরকারগী প্রিন্সিপাল সাইন্তিফিক এদবাইজরগী লোয়শংনা মী কুংনা তাবা মফমশিংদা লু-নান্না লৈনবা অমসুং সেনিতেসনগী গাইদবুক অমা শেম্লে অমসুং য়ুমদা মায় অমসুং চিন কুপ্নবা শাজনবগী মেনুএল অমসু ফোংলে। হায়রিবশিং অসি http://psa.gov.in/information-related-covid-19 দা ভারতকী লোন অয়াম্বদা ফংগনি অমসুং লেম্না দাউনলোদ তৌবসু য়াগনি।

*****