মমিং লৈরবা য়ুনিভর্সিতী অসিগী ২৫শুবা ফাউন্দেসন দে থৌরম হৌদোকপা অসি ঐ য়াম্না হরাওই। য়ুনিভর্সিতী অসিদা থবক তৌরিবা মেদিকেল অমসুং সাইন্সকী মীওই খুদিংমক ঐনা থাগৎলি।

চহি কয়া মেদিসিন তম্বীবা অমসুং ত্রেনীংগী লমদা নখোয়না অঙকপা থবক কয়া পাংথোক্তুনা লাক্লি।

চহি ২৫ শুরে হায়বসি মসিগী য়ুনিভর্সিতী অসি পাখঙ মপুং ফারে হায়বনি। মসিগী চহি মতাং অসি হেন্না চাউখৎনবা অমসুং হেন্না অফবা ওইনা খনবা মতমনি। তুংদা য়ুনিভর্সিতী মখা তানা হেন্না চাউখৎলক্কনি হায়না ঐনা থাজবা থম্লি। কোবিদ-১৯ লাকশিন্নবা কর্নাতাকা সরকারনা পায়খৎলিবা থবকশিং ঐনা থাগৎলি। মরূপশিং, অতৈ মতমদদি, থৌরমশিং অসি য়াম্না চাউনা পাংথোক্লমগনি। মালেমগী লাইচৎ অসি লৈরমদ্রবদি, মসিগী অখন্নবা নুমিৎ অসিদা ঐ নখোয় ময়ামগা লোয়ননা বেঙ্গলুরুদা থৌরম য়াওরমগনি।

মালেমগী লাঞ্জাউ অনিগী মতুংদা ঙসি মালেম অসিনা খ্বাইদগী শাথিবা অৱাবা অমা মায়োক্নরি। মালেমগী লাঞ্জাউশিংগী মমাং অমসুং মতুংদা মালেম অসি অহোংবা লাকখিবা অদুগুম্না, কোবিদ মতুংদা মালেমগী অহোংবা লাক্কনি।

মরূপশিং, অসিগুম্বা মতম অসিদা, মালেম অসিনা ঐখোয়গী দোক্তরশিং, নর্সশিং, মেদিকেলগী স্তাফশিং অমসুং সাইন্সকী মীওইশিংদা থাজবা থম্লি। নখোয় ময়াম্না মালেম অসি কনগনি হায়না ঙাইনরি।

মরূপশিং,

মেদিকেলগী মীওইশিং অমসুং কোরোনা লান্মীশিংনা থবক কন্না শুদুনা ভারতনা কোবিদ-১৯গী মায়োক্তা অকনবা লাল শোক্নরি। তশেংনা, দোক্তরশিং অমসুং মেদিকেলগী মীওইশিং অসি লান্মীগী য়ুনিফোর্ম শেৎতবা লান্মীশিংনি। ভাইরস অসি উবা ঙমদবা য়েক্নবা অমনি, অদুগা ঐখোয়গী কোরোনা লান্মীশিং অমসুং দোক্তরশিং অসি মাইথিবা পীবা ঙম্লোইদবা ঙাক্তনি। উবা ঙমদবা ভাইরস অমসুং মাইথিবা পীবা ঙম্লোইদবা অনিগী লালফম অসিদা ঐখোয়গী মেদিকেলগী মীওইশিংনা শোইদনা মাইপাক্কনি। মমাংদদি, গ্লোবেলাইজেসনগী ৱাফম অসি শেন-থুমগী হিরমশিংদা খন্নখি। হৌজিক মীওইবা খুন্নাই চাউখৎনবা হিরমশিংদা মালেম অসি অমতা ওইনা পুনগদবনি।

হৌখিবা চহি ৬ অসিদা ভারত্তা অনা-লায়েং অমসুং মেদিকেল ইজুকেসনগী থবক কয়া পায়খৎলে।

ঐখোয়না চাউরাক্না য়ুম্বী মরিদা থবক পায়খৎলি :

অহানবদা- নাদ্রিঙৈদা ঙাকথোক্নবা থবকশিং। মসিদা য়োগা শানবা, অয়ুর্বেদা অমসুং অতৈ শাজেলশিং য়াওরি। পুন্সি মহিংগা মরী লৈনবা লায়নাশিং লাকশিন্নবা পান্দম অমগী মখাদা ৱেলনেস সেন্তর লিশিং ৪০ হেন্না হাংদোক্লে। নাদ্রিঙৈদা ঙাকথোক্নবা পায়খৎলিবা থবকশিং মনুংদা শ্বাছ ভারত মিসন মাইপাকপা অসিসু শরুক অমনি।

অনিসুবদা অনা-লায়েংগী থবক মমল হোংনা ফংহনবা। ভারত্তা মালেমদা খ্বাইদগী চাউবা অনা-লায়েংগী স্কিম অয়ুস্মান ভারত স্কিম পায়খৎলি। চহি অনিগী মনুংদা, মীওই ক্রোর ১ হেন্না মসিগী স্কিম অসিগী কান্নবা ফংখ্রে। খুঙ্গংশিংগী নুপীশিং অমসুং অঙাংশিং স্কিম অসিগী কান্নবা ফংলবশিংগী মরক্তা য়াওরি।

অহুমশুবা মখোঙনা অনা-লায়েংগী থবক ফগৎহনবনি। ঐখোয়গী লৈবাক অসিদা মতিক চাবা মেদিকেল ইনফ্রাস্ত্রকচর অমসুং মেদিকেল ইজুকেসন ইনফ্রাস্ত্রকচর শেমগৎকদবা লৈরি। লৈবাক অসিগী জিলা খুদিংমক্তা মেদিকেল কোলেজ অমা নৎত্রগা পোস্ত গ্রেজুয়েদ মেদিকেল ইন্সতিতুৎ অমা থম্নবা থবক পায়খৎলি।

মখা তানা এ.এ.আই.এম.এস. ২২ লিংখৎনবা লৈবাক অসি য়াংনা থবক পায়খৎলি। হৌখিবা চহি ৫দা ঐখোয়না এম.বি.বি.এস. শীৎ লিশিং ৩৫ অমসুং পোস্ত গ্রেজুয়েসন শীৎ লিশিং ১৫ হেন্না হাপচিনখ্রে। মসি নীংতম্লবা মতুংদা সরকার অমগী চহি ৫গী মতমদা শীৎ খ্বাইদগী য়াম্না হেনগৎপনি। সংসদকী এক্ত অমগী মখাদা মেদিকেল কাউন্সিল ওফ ইন্দিয়াগী মহুৎ অনৌবা নেসনেল মেদিকেল কম্মিসন্না মহুৎ শীল্লে। মালেমগী লৈনরিবা থাকশিং য়ৌনবা লৈবাক অসিদা মগুন লৈবা মেদিকেল ইজুকেসন ফংহন্নবা পায়খৎকদবা থবক য়াম্না লৈরি।

মরিশুবা য়ুম্বীনা পান্দম অমগী মখাদা থবকশিং পায়খৎপনি। চেদা লৈবা অফবা ৱাখল অমা হায়বসি শুপ্নগী অফবা ৱাখল্লোল অমনি। মদুগী অফবা ৱাখল্লোল অদু ফজনা থবক ওইনা পায়খৎলবা মতমদা অফবা ওইরকই। মরম অদুনা থবক ওইনা পায়খৎপা অসি অরুবা অমনি।

নহাশিং অমসুং মমাশিং মতেং পাংলিবা ভারতকী নেসনেল নিউত্রিসন মিসনগী মাইপাকপশিং ফোংদোকপা ঐনা পাম্মি। ২০১৫দা তি বি মুৎথৎনবা ভারতনা থবক কন্না পায়খৎলি। মসি মালেমগী ওইনা ২০৩০দা পান্দম থম্লিবা অদুদগী চহি ৫ ঙনখৎলবনি। মিসন ইন্দ্রধনুসনা ঐখোয়গী চহিদা তিকা থাবগী চাং শরুক মরিদা হেনগৎহল্লে। অনা-লায়েংগী থবক তৌরিবা মীওইশিংগী ইজুকেসন পাকথোক চাউথোক্নবা অনৌবা আইন অমা হন্দক কেন্দ্র সরকারনা অয়াবা পীরে। লো অসি পাস হেক তৌবগা লৈবাক অসিদা পেরা-মেদিকেলগী মীওইশিং ৱাৎলিবা অসি মেনখৎপা ঙম্লগনি। মসিনা ভারতনা মপান লৈবাকশিংদা হৈশিংলবা মীওইশিং পীবা ঙম্লগনি।

মরূপশিং, ফজনা খন্নগদবা অমসুং শরুক য়ানবা ঐনা তকশিনগদবা থবক অহুম লৈরে।

অহানবদা, তেলি-মেদিসিনগী থবকশিং চাউখৎহনবনি। তেলি-মেদিসিন অসি পাকচাউনা পায়খৎনবা ঐখোয়না অনৌবা নমুনাশিং পুথোকপা য়াগনি।

অতোপ্পা অমনা, হকশেলগী লমদা ‘মেক ইন ইন্দিয়া’ পায়খৎপনি। ঐখোয়গী লৈবাক্কী কম্পেনিশিংনা পি.পি.ইশিং পুথোকপা হৌরে অমসুং কোবিদ লান্মীশিংদা পি.পি.ই ক্রোর ১ হেন্না ফংহনখ্রে। ঐখোয়না ‘মেক ইন ইন্দিয়া’গী এন-৯৫ মাক্স ক্রোর ১.২ রাজ্যশিংদা ফংহল্লে।

অহুমশুবনা হেন্না মশা ফবা খুন্নাইশিং ওইহন্নবা আই তিগা মরী লৈনবা খুৎলায়শিং শীজিন্নবনি। নখোয়গী মোবাইলশিংদা অরোগ্যা সেতু এপ্প য়াওরমগনি হায়না ঐনা থাজবা থমলি। হকশেলগী খনবা মীওই ক্রোর ১২না এপ্প অসি লৌথখ্রে।মসি কোরোনাভাইরস থেংনবদা য়াম্না কান্নগনি।

মরূপশিং, নখোয় ময়াম্না লাংতক্নরিবা হিরম অমা ঐ খঙলে। মীয়ামগী ইরাং শাগৎপগী থবকশিংনা, মাংজিল থাদুনা থবক তৌরিবা দোক্তরশিং, নর্সশিং, সাফাই শিন্মীশিং অমসুং অতোপ্পশিং হিংশাগী থবকশিং মায়োক্নরি। হিংশা অমসুং নাতৈ চাদবা থবকশিং অসি য়াবা ঙম্লোই হায়না ঐনা নাখৈ শেংনা হায়রি। মখল খুদিংমক্কী মীহাৎ-মীপুনগী থবকশিং থিংনবা থবকশিং পায়খৎলে। মাংজিল থাদুনা থবক তৌরিবশিংগীদমক লুপা লাখ ৫০গী ইন্সুরেন্স অমা ঐখোয়না পীরে।

ৱারবা মতম অসিদা লায়রবশিং অমসুং তোল্লবশিং লায়েংলিবা মেদিকেল অমসুং পেরা-মেদিকেলগী মীওই লিশিং কয়া হৌখিবা চহি ২৫ অসিদা পুথোকখিবা য়ুনিভর্সিতী অসিগী মহৈ য়াল্লবা খোঙচৎ অসি উবদা ঐ হরাওই। য়ুনিভর্সিতী অসিনা মখা তানা মগুন লৈবা হকশেলগী মীওইশিং পুথোক্কনি অমসুং মখোয়গী থবকশিং অদুনা রাজ্য অমসুং লৈবাক অসি চাউথোকচবা পোক্কনি হায়বগী থাজবা ঐনা থম্লি। অদোম থাগৎচরি।

***