ভিদিও কনফরেন্সকী খুৎথাংদা ঙসি রজীব গান্ধী য়ুনিভর্সিতী ওফ হেল্থ সাইন্সেসগী ২৫শুবা ফাউন্দেসন দেগী থৌরমদা প্রধান মন্ত্রী নরেন্দ্র মোদী ৱা ঙাংখ্রে। কোবিদ-১৯ লাকশিন্নবা কর্নাতাকা সরকারনা পায়খৎলিবা থবকশিং প্রধান মন্ত্রীনা থাগৎখ্রে।

প্রধান মন্ত্রীনা হায়খি মালেমগী লাঞ্জাউ অনিগী মতুংদা ঙসি মালেম অসিনা খ্বাইদগী শাথিবা অৱাবা অমা মায়োক্নরি। মালেমগী লাঞ্জাউশিংগী মমাং অমসুং মতুংদা মালেম অসি অহোংবা লাকখিবা অদুগুম্না কোবিদ মতুংদা মালেমগী অহোংবা লাক্কনি।

মহাক্না হায়খি মেদিকেলগী মীওইশিং অমসুং কোরোনা লান্মীশিংনা থবক কন্না শুদুনা ভারতনা কোবিদ-১৯গী মায়োক্তা অকনবা লাল শোক্নরি। তশেংনা, দোক্তরশিং অমসুং মেদিকেলগী মীওইশিং অসি লান্মীগী য়ুনিফোর্ম শেৎতবা লান্মীশিংনি। ভাইরস অসি উবা ঙমদবা য়েক্নবা অমনি, অদুগা ঐখোয়গী কোরোনা লান্মীশিং অমসুং দোক্তরশিং অসি মাইথিবা পীবা ঙম্লোইদবা ঙাক্তনি। উবা ঙমদবা ভাইরস অমসুং মাইথিবা পীবা ঙম্লোইদবা অনিগী লালফম অসিদা ঐখোয়গী মেদিকেলগী মীওইশিংনা শোইদনা মাইপাক্কনি।

মীয়ামগী ইরাং শাগৎতুনা মাংজিল থানা থবক তৌরিবা মীওইশিংদা হিংশাগী থবকশিং চৎথরকপদা প্রধান মন্ত্রীনা নুংনাংবা ফোংদোকখি অমসুং হায়খি মখোয় অদু লাকশিন্নবা সরকারনা থবক কয়া পায়খৎলে। মাংজিল থাদুনা থবক তৌরিবশিংগীদমক লুপা লাখ ৫০গী ইন্সুরেন্স অমা ঐখোয়না পীরে।

গ্লোবেলাইজেসনগী মতম অসিদা শেন-থুমগী মতাংদা মরৈ য়েৎনবগী মহুৎতা মীওইবা খুন্নাগী য়াইফনবা মরী লৈনবা থবকশিং চাউখৎহন্নবা মিৎয়েং থম্নবা প্রধান মন্ত্রীনা ফোংদোকখি।

মহাক্না হায়খি লৈবাক অসিদা মমাংদা লৈরমবা ফিবমদগী হকশেলগী লমদা য়াম্না ফগৎলে অমসুং হৌখিবা চহি ৬ অসিদা সরকারনা অনা-লায়েংগী অমসুং মেদিকেল এজুকেসনগী ফিবম ফগৎহন্নবা থবক কয়া পায়খৎলে।

অনা-লায়েং, মসিগী মচাক-মথুমশিং অমসুং মী খুদিংমক কান্নবা ফংহন্নবা য়ুম্বী মখোঙ মরিগী লাল্লোং অমা পায়খৎনবা প্রধান মন্ত্রীনা থমখি।

মহাক্না হায়খি অহানবা য়ুম্বী অসি নাদ্রিঙৈদা পায়খৎকদবা অনা-লায়েংগী থবকশিংনা ওইগনি, মসিদা য়োগ, আয়ুর্বেদ অমসুং হকচাং ফনা থম্বা য়াওগনি। পুন্সি মহিংগা মরী লৈনবা লায়নাশিং লাকশিন্নবা পান্দম অমগী মখাদা ৱেলনেস সেন্তর লিশিং ৪০ হেন্না হাংদোক্লে। নাদ্রিঙৈদা ঙাকথোক্নবা পায়খৎলিবা থবকশিং মনুংদা শ্বচ্ছ ভারত মিশন মাইপাকপা অসিসু শরুক অমনি।

অনিশুবা য়ুম্বী অসি মমল হোংবা অনা-লায়েংগী থবকনি। প্রধান মন্ত্রীনা হায়খি ভারত্তা মালেমদা খ্বাইদগী চাউবা অনা-লায়েংগী স্কিম আয়ুশ্মান ভারত স্কিম পায়খৎলি। চহি অনিগী মনুংদা, মীওই করোর ১ হেন্না মসিগী স্কিম অসিগী কান্নবা ফংখ্রে। খুঙ্গংশিংগী নুপীশিং অমসুং অঙাংশিং স্কিম অসিগী কান্নবা ফংলবশিংগী মরক্তা য়াওরি।

অহুমশুবা য়ুম্বীনা খুদোংচাবা ফংহনবগী থবক ফগৎহনবনি। প্রধান মন্ত্রীনা হায়খি ভারতগুম্বা লৈবাক অমদা মতিক চাবা মেদিকেল ইনফ্রাস্ত্রকচর অমসুং মেদিকেল এজুকেসন ইনফ্রাস্ত্রকচর শেমগৎকদবা লৈরি।

মহাক্না হায়খি লৈবাক অসিগী জিলা খুদিংমক্তা মেদিকেল কোলেজ অমা নৎত্রগা পোস্ত গ্রেজুয়েদ মেদিকেল ইন্সতিতুৎ অমা থম্নবা থবক পায়খৎলি। লৈবাক অসিদা মখা তানা এ.এ.আই.এম.এস. ২২ লিংখৎনবা য়াংনা থবক পায়খৎলি। হৌখিবা চহি ৫দা ঐখোয়না এম.বি.বি.এস. শীৎ লিশিং ৩০ অমসুং পোস্ত গ্রেজুসন শীৎ লিশিং ১৫ হেন্না হাপচিনখ্রে। মসি নীংতম্লবা মতুংদা সরকার অমগী চহি ৫গী মতমদা শীৎ খ্বাইদগী য়াম্না হেনগৎপনি। সংসদকী এক্ত অমগী মখাদা মেদিকেল কাউন্সিল ওফ ইন্দিয়াগী মহুৎ অনৌবা নেসনেল মেদিকেল কম্মিসন্না মহুৎ শিল্লে

মরিশুবা য়ুম্বীগী মতাংদা মহাক্না হায়খি স্কিমশিং অসি মিশনগী মওংদা পায়খৎকদবনি অমসুং অফবা ৱাখল অমা থবক ওইনা মাইপাক্না পায়খৎপা অসি য়াম্না লুবা অমনি।

মহাক্না হায়খি নেসনেল নিউত্রিসন মিশন মাইপাক্না পায়খৎতুনা অঙাংশিং অমসুং মমাশিং মতেং পাংলি অমসুং ২০১৫দা তি.বি. মুৎথৎনবা ভারতনা থবক কন্না পায়খৎলি। মালেমগী ওইনা ২০৩০দা পান্দম থম্লিবা অদুদগী চহি ৫ ঙনখৎনা ২০১৫দা তি.বি. মুৎথৎনবা ভারতনা থবক কন্না পায়খৎলি।

মিশন ইন্দ্রধনুসনা ঐখোয়গী চহিদা তিকা থাবগী চাং শরুক মরিদা হেনগৎহল্লে হায়না প্রধান মন্ত্রীনা ফোংদোকখি।

প্রধান মন্ত্রীনা হায়খি অনা-লায়েং অমসুং মসিগা মরী লৈনবা শীনফম ৫০গী এজুকেসন পাকথোক চাউথোক্নবা অনৌবা আইন অমা হন্দক কেন্দ্র সরকারনা অয়াবা পীরে। লো অসি পাস হেক তৌবগা লৈবাক অসিদা পেরা-মেদিকেলগী মীওইশিং ৱাৎলিবা অসি মেনখৎপা ঙম্লগনি।

ৱাফম অহুমদা হায়বদি হকশেলগী থবকশিংদা তেলি-মেদিসিন, মেক ইন ইন্দিয়া অমসুং আই.তি.দা য়ুম্ফম ওইবা হকশেলগী থবকশিং কমদৌনাফগৎহনগদগে হায়বগী লম্বীশিং খন্ন-নৈন্নবা মহাক্না তকশিনখি।

ঐখোয়গী লৈবাক্কী কম্পেনীশিংনা পি.পি.ই.শিং পুথোকপা হৌরে অমসুং কোবিদ লান্মীশিংদা পি.পি.ই. করোর ১ হেন্না ফংহনখ্রে। ঐখোয়না ‘মেক ইন ইন্দিয়া’গী এন-৯৫ মাক্স করোর ১.২ রাজ্যশিংদা ফংহল্লে হায়না প্রধান মন্ত্রীনা ফোংদোকখি।

কোরোনা ভাইরসগী মায়োক্তা লান্থেংনবদা অরোগ্য সেতু এপ্পনা মতেং পাংবদা প্রধান মন্ত্রীনা থাগৎখি।

***