লৈবাক্কী মীয়ামদা শন্দোকপা মহাক্কী থাগী ৱারোল মন কী বাত থৌরমদা অয়ুশ মন্ত্রালয় অমসুং ইন্দিয়ন কাউন্সিল ফোর কলচরেল রিলেসন্সনা পুন্না পায়খৎপা “মাই লাইফ মাই যোগ” ভিদিও ব্লোগ্গিং চাংদম্নবা শরুক য়ানবা ঙসি ভারতকী প্রধান মন্ত্রী নরেন্দ্র মোদীনা মীয়ামদা তকশিনখি। চাংদম্নবা অসিগী পান্দমদি লনাই মীওইশিংগী পুন্সিদা যোগগী কান্নবা ফংহনবা অমসুং ২০২০গী জুন ২১দা পাংথোক্কদৌরিবা তরুকসুবা মালেমগী যোগ নুমিৎকী শরুক অমা ওইনা পাংথোকপনি। ঙসি ২০২০গী মে ৩১দগী অয়ুশ মন্ত্রালয়গী সোসিয়েল মীদিয়া হেন্দলশিংদা চাংদম্নবা অসি লাইব থারে।

মীয়াম শরুক য়াদুনা যোগ শানবা উৎতুনা হৌখিবা চহি কয়াদগী মালেমগী যোগ নুমিৎ পাংথোক্তুনা লাক্লি। কোবিদ-১৯ লাইচৎ অসিনা মরম ওইদুনা চহি অসিগী ওইনা মীয়াম পুনবা থৌরম অমতা পাংথোক্লরোই। চহি অসিগী ওইনা মীয়াম্না মখোয়গী য়ুমদা ইমুং-মনুংগী মীওইশিংগা লোয়ননা যোগ পাংথোক্নবা মন্ত্রালয়না হায়রি। “মাই লাইফ মাই যোগ” ভিদিও ব্লোগ্গিং চাংদম্নবা অসিগী খুৎথাংদা মীয়াম যোগগী মরমদা খঙহন্নবা অমসুং মালেমগী যোগ নুমিৎ ২০২০ শরুক য়ানবা অয়ুশ মন্ত্রালয় অমসুং আই.সি.সি.আর.না হোৎনরি। চাংদম্নবা অসি মীয়াম্না ফেসবুক, ত্বিতর অমসুং ইন্সতাগ্রামদা শরুক য়াবা য়াগনি। লৈবাক খুদিংমক্না ভিদিও চাংদম্নবা অসি শরুক য়াবা য়াগনি ।

চাংদম্নবা অসি তাঙ্কক অনি থোক্না পাংথোক্কনি। অহানবদা মালেমগী ভিদিও ব্লোগ্গিং চাংদম্নবা অসিদা লৈবাক অমগী মনুংদা মাইপাক্লবশিং খনগৎকনি। মসিগী মতুংদা তোঙান-তোঙানবা লৈবাকশিংদগী খনগৎলকপা মাইপাক্লবশিংগী মনুংদগী মালেমগী মনা ফংগদবা মীওইশিং খনগনি।

চাংদম্নবা অসিদা কাংলুপ অহুম থোক্না হায়বদি নহারোলশিং (চহি ১৮গী মখা), অহলশিং (চহি ১৮গী মথক) অমসুং যোগ শান্নরোইশিং অমসুং নুপা অমসুং নুপী তোখাইনা শরুক য়াবা য়াগনি। মসিদা পুন্না কাংলুপ ৬ থোক্লি। লৈবাক মনুংগী ওইনা অহানবা চাংদম্নবা অসিগী অহানবা, অনিসুবা অমসুং অহুমসুবা তাবগী মনাশিং লুপা মথংশিৎনা লুপা লাখ ১, লিশিং ৫০ অমসুং লিশিং ২৫ ওইগনি। মালেমগী মনাশিংগী অকুপ্পা মরোলশিং অথুবদা অয়ুশ মন্ত্রালয়গী পোর্তেলদা লাউথোকলগনি।

মসিগী চাংদম্নবা অসি মালেম শীনবা থুংনা শরুক য়াবা য়াগনি। চাংদম্নবা অসি য়াওনবা শরুক য়ারিবা মীওইশিংনা যোগ মশান্না অহুম (ক্রিয়া অসন, প্রনায়ম, বন্ধা নৎত্রগা মুদ্রা) শানবগী মিনিত অহুমগী ভিদিও অমা থাগৎলক্কদবনি অমসুং মসিদা যোগ শানবনা কমদৌনা মখোয়গী পুন্সিদা কান্নবা পীবগে হায়বগী ভিদিও পাউজেল অমা য়াওহনগদবনি। চাংদম্নবা অসিগী হেজতেগ #MyLifeMyYogaINDIA গা লোয়ননা ভিদিও অদু ফেসবুক, ত্বিতর নৎত্রগা ইন্সতাগ্রামদা অপলোদ তৌরক্কদবনি। শরুক য়ানবা অকুপ্পা মরোলশিং অয়ুশ মন্ত্রালয়গী পোর্তেল (https://yoga.ayush.gov.in/yoga/) দগী খঙবা য়াগনি।

প্রধান মন্ত্রীনা চাংদম্নবা অসি লাউথোকপদা মীয়াম মথুম-মরাং হৌখি অমসুং মসি শরুক য়ানিংখি। মসিনা মীয়ামগী হকশেলগী কান্নবা অমা ওইগনি অমসুং কোবিদ-১৯ লাইচৎ লাকশিনবদা যোগনা অফবা ফল পীগনি হায়বগী থাজবা অয়ুশ মন্ত্রালয়না থম্লি।

******