କେନ୍ଦ୍ର ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରୀ ଶ୍ରୀ ରାମ ବିଳାସ ପାସୱାନ ଆଜି ରାଜ୍ୟ ଓ କେନ୍ଦ୍ରଶାସିତ କ୍ଷେତ୍ରର ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରୀମାନଙ୍କ ସହ ଭିଡ଼ିଓ କନଫରେନ୍ସିଂ ମାଧ୍ୟମରେ ଏକ ସମୀକ୍ଷା ବୈଠକ କରିଛନ୍ତି । ଏହି ବୈଠକରେ ମନ୍ତ୍ରୀ ଶ୍ରୀ ପାସୱାନ ରାଜ୍ୟ ତଥା କେନ୍ଦ୍ରଶାସିତ କ୍ଷେତ୍ରମାନଙ୍କରେ ଖାଦ୍ୟ ଓ ସାଧାରଣ ବଣ୍ଟନ ବିଭାଗର ପ୍ରମୁଖ କାର୍ଯ୍ୟକ୍ରମମାନ କୋଭିଡ଼-19 ମହାମାରୀ ସମୟରେ କିଭଳି ଭାବେ ପ୍ରବର୍ତ୍ତନ କରାଯାଉଛି ସେ ସଂପର୍କରେ ସମୀକ୍ଷା କରିଥିଲେ । ଦେଶର ବିଭିନ୍ନ ରାଜ୍ୟର ଖାଦ୍ୟ ମନ୍ତ୍ରୀମାନେ ଏଭଳି ଲକଡାଉନ ସମୟରେ କେନ୍ଦ୍ର, ଭାରତୀୟ ଖାଦ୍ୟ ନିଗମ (FCI), ଏବଂ ନାଫେଡ଼ ପକ୍ଷରୁ ଯୋଗାଇ ଦିଆଯାଉଥିବା ଖାଦ୍ୟଶସ୍ୟ ଓ ଡ଼ାଲି ପାଇଁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ମନ୍ତ୍ରୀ ଶ୍ରୀ ପାସୱାନଙ୍କ ପ୍ରତି କୃତଜ୍ଞତା ଜ୍ଞାପନ କରିଥିଲେ ।  ଆତ୍ମ ନିର୍ଭର ଭାରତ ଏବଂ ପିଏମଜିକେଏୱାଇ ପ୍ୟାକେଜ୍‌ ମାଧ୍ୟମରେ ରାଜ୍ୟମାନଙ୍କୁ ଏଭଳି ଖାଦ୍ୟଶସ୍ୟ ଓ ଡ଼ାଲି ଯୋଗାଇ ଦିଆଯାଉଛି । ବିଶେଷ କରି ପାର୍ବତ୍ୟାଞ୍ଚଳ କ୍ଷେତ୍ରର ରାଜ୍ୟ, ଉତ୍ତର ପୂର୍ବାଞ୍ଚଳ କ୍ଷେତ୍ର ଏବଂ ଆଣ୍ଡାମାନ ଓ ନିକୋବର ଦ୍ୱୀପପୁଂଜ ଭଳି ରାଜ୍ୟମାନେ କେନ୍ଦ୍ର ସରକାରଙ୍କ ପକ୍ଷରୁ ବିମାନ, ଜଳପଥ ଏବଂ ରେଳ ଯୋଗେ କରୋନା ମହାମାରୀ ଓ ଲକଡାଉନ୍‌ ସମୟରେ ଏଭଳି ଅତ୍ୟାବଶ୍ୟକ ଖାଦ୍ୟଶସ୍ୟ ଯୋଗାଇ ଦିଆଯାଉଥିବାରୁ ସେମାନଙ୍କର କୃତଜ୍ଞତା ପ୍ରକଟ କରିଥିଲେ ।

ଏହି କାର୍ଯ୍ୟକ୍ରମକୁ ପ୍ରବର୍ତ୍ତନ କରିବାରେ ସହଯୋଗ କରିଥିବାରୁ ଶ୍ରୀ ପାସୱାନ ରାଜ୍ୟମାନଙ୍କୁ ପ୍ରଶଂସା କରି କହିଥିଲେ ଯେ ଗରିବ ତଥା ଦୁର୍ବଳ ଶ୍ରେଣୀର ଶ୍ରମିକମାନଙ୍କୁ ଖାଦ୍ୟଶସ୍ୟ ଓ ଡ଼ାଲି ଯୋଗାଇ ଦେବାରେ ସେମାନଙ୍କ ସହଯୋଗ ବାସ୍ତବିକ୍‌ ପ୍ରଶଂସନୀୟ । ଏକ ରାଷ୍ଟ୍ର ଏକ ରାସନ୍‌ କାର୍ଡ଼ ପ୍ରୟାସରେ ଆଗକୁ ଆଗେଇ ଯିବାରେ ମଧ୍ୟ ସେମାନଙ୍କ ସହଯୋଗ ଅବ୍ୟାହତ ରହିବ ବୋଲି ସେ ଆଶା ପ୍ରକଟ କରିଥିଲେ । ରାଜ୍ୟମାନଙ୍କରେ ଏବେ ଖାଦ୍ୟଶସ୍ୟ ସଂଗ୍ରହ ସନ୍ତୋଷଜନକ ଭାବେ ଜାରି ରହିଥିବାରୁ ମନ୍ତ୍ରୀ ଶ୍ରୀ ପାସୱାନ ସନ୍ତୋଷ ବ୍ୟକ୍ତ କରିଥିଲେ ।

ଏହି ସମୀକ୍ଷା କାଳରେ ଶ୍ରୀ ପାସୱାନ ରାଜ୍ୟ ଓ କେନ୍ଦ୍ରଶାସିତ କ୍ଷେତ୍ରର ମନ୍ତ୍ରୀମାନଙ୍କୁ ପରାମର୍ଶ ଦେଇଥିଲେ ଯେ ଖାଦ୍ୟ ବଣ୍ଟନ କାର୍ଯ୍ୟକ୍ରମ ଯେଭଳି ସୁଚାରୁ ରୂପେ ଚାଲେ ତାହା ସୁନିଶ୍ଚିତ କରାଯିବା ଉଚିତ । ତାହା ହେଲେ ଦେଶରେ କେହି ଜଣେ ହେଲେ ଲୋକ ଭୋକିଲା ରହିବେ ନାହିଁ । ସେ ଗୁରୁତ୍ୱ ଆରୋପ କରି କହିଥିଲେ ଯେ ଓଡ଼ିଶା ଓ ପଶ୍ଚିମବଙ୍ଗ ଭଳି ରାଜ୍ୟମାନେ ଝଡ଼ବାତ୍ୟା “ଅମ୍ଫନ” ଦ୍ୱାରା ଆକ୍ରାନ୍ତ ହୋଇଛି । ଏଭଳି ପ୍ରାକୃତିକ ବିପଦ ଦ୍ୱାରା ଆକ୍ରାନ୍ତ ଲୋକମାନଙ୍କ ସହାୟତା ନିମନ୍ତେ ଉପଯୁକ୍ତ ସେବା ଯୋଗାଇ ଦିଆଯିବା ଆବଶ୍ୟକ । ଭାରତୀୟ ଖାଦ୍ୟ ନିଗମ (FCI) ଏବେ ସାରା ଦେଶରେ ଖାଦ୍ୟଶସ୍ୟ ବଣ୍ଟନ କ୍ଷେତ୍ରରେ ଜୀବନରେଖାରେ ପରିଣତ ହୋଇଛି । ସଡ଼କ, ରେଳ ଏବଂ ବିମାନରେ ସେଠାରୁ ଖାଦ୍ୟଶସ୍ୟ ଦେଶସାରା ବଣ୍ଟନ କରାଯାଉଛି । ଏହି ଅବସରରେ ରାଜ୍ୟ ତଥା କେନ୍ଦ୍ରଶାସିତ କ୍ଷେତ୍ରମାନେ କିଭଳି ଭାବେ ଖାଦ୍ୟଶସ୍ୟ ଓ ଡ଼ାଲି ଆଦି ବଣ୍ଟନ କରୁଛନ୍ତି ସେ ସଂପର୍କରେ ସବିଶେଷ ବିବରଣୀ ପ୍ରାପ୍ତ ହୋଇଥିଲା । ପ୍ରତ୍ୟେକ ରାଜ୍ୟ ଏ ଦିଗରେ ହାସଲ କରିଥିବା ସଫଳତା ଏବଂ ସମ୍ମୁଖୀନ ହେଉଥିବା ସମସ୍ୟା ସଂପର୍କରେ ସେ ଅବଗତ ହୋଇଥିଲେ । ଏକ ରାଷ୍ଟ୍ର ଏକ ରାସନ୍‌ କାର୍ଡ଼ (ONOS) ଯୋଜନା ପ୍ରବର୍ତ୍ତନ ସଂପର୍କରେ ମଧ୍ୟ ମନ୍ତ୍ରୀ ଶ୍ରୀ ପାସୱାନ ରାଜ୍ୟମାନଙ୍କ ପ୍ରଗତି ସଂପର୍କରେ ବୁଝିଥିଲେ ।

ଆତ୍ମନିର୍ଭର ଭାରତ ପ୍ୟାକେଜ୍‌:

ଖାଦ୍ୟ ଓ ସାଧାରଣ ବଣ୍ଟନ ବିଭାଗ ପକ୍ଷରୁ ଏବେ ସୁଦ୍ଧା ଆତ୍ମନିର୍ଭର ଭାରତ ପ୍ୟାକେଜ ଅଧୀନରେ ରାଜ୍ୟମାନଙ୍କୁ 8 ଲକ୍ଷ ମେଟ୍ରିକ୍‌ ଟନ୍‌ ଗହମ/ଚାଉଳ ଏବଂ 39,000 ମେଟ୍ରିକ୍‌ ଟନ୍‌ ଡ଼ାଲିଜାତୀୟ ଶସ୍ୟ ଯୋଗାଇ ଦିଆଯାଇଛି ଯାହାକି ପ୍ରବାସୀ ଶ୍ରମିକମାନଙ୍କ ମଧ୍ୟରେ ବଣ୍ଟନ ପାଇଁ ଉଦ୍ଦିଷ୍ଟ । ବାହାର ରାଜ୍ୟରେ ଫସି ରହିଥିବା ପ୍ରବାସୀ ଶ୍ରମିକମାନଙ୍କୁ ମୁଣ୍ଡପିଛା ପ୍ରତି ମାସରେ 5 କିଲୋଗ୍ରାମ ଗହମ/ଚାଉଳ ମାଗଣାରେ କେନ୍ଦ୍ର ସରକାର ଯୋଗାଇ ଦେଉଛନ୍ତି । ଆଠକୋଟି ପ୍ରବାସୀ ଶ୍ରମିକ ଏହାଦ୍ୱାରା ଉପକୃତ ହେଉଛନ୍ତି । ସେହିଭଳି ପରିବାର ପିଛା ମାସକୁ 1 କିଲୋଗ୍ରାମ ଡ଼ାଲି ହିସାବରେ ଦୁଇମାସ (ମେ ଏବଂ ଜୁନ୍‌ 2020) ପାଇଁ ମାଗଣାରେ ଡାଲି ମଧ୍ୟ ଯୋଗାଇ ଦିଆଯାଉଛି । ଏଥିରେ 1.96 କୋଟି ପ୍ରବାସୀ ଶ୍ରମିକ ପରିବାର ଯେଉଁମାନେ କି ଏନଏଫଏସଏ କିମ୍ବା ରାଜ୍ୟ/କେନ୍ଦ୍ରଶାସିତ କ୍ଷେତ୍ରମାନଙ୍କର କୌଣସି ସାଧାରଣ ବଣ୍ଟନ ଯୋଜନାରେ ସାମିଲ ହୋଇନାହାନ୍ତି ସେମାନେ ଉପକୃତ ହେଉଛନ୍ତି । ଏହି ଖାଦ୍ୟଶସ୍ୟ ବଣ୍ଟନ କାର୍ଯ୍ୟକ୍ରମ ଜୁନ 15, 2020 ସୁଦ୍ଧା ଶେଷ ହେବା ଆଶା କରାଯାଉଛି । ଶ୍ରୀ ପାସୱାନ କହିଲେ ଯେ  ଆତ୍ମ ନିର୍ଭର ଭାରତ କାର୍ଯ୍ୟକ୍ରମ ଅଧୀନରେ ବଣ୍ଟନ ସକାଶେ 17ଟି ରାଜ୍ୟ ଏବେ ସୁଦ୍ଧା ସେମାନଙ୍କ କୋଟା ଖାଦ୍ୟଶସ୍ୟ ଉଠାଇ ସାରିଛନ୍ତି । ଏହି ଯୋଜନା ମାଧ୍ୟମରେ ହରିଆଣା ଓ ତ୍ରିପୁରା ଭଳି ରାଜ୍ୟ ଖାଦ୍ୟଶସ୍ୟ ବଣ୍ଟନ ମଧ୍ୟ ଆରମ୍ଭ କରିଛନ୍ତି ।  ଏହି ଯୋଜନା ପାଇଁ 3500 କୋଟି ଟଙ୍କା ଖର୍ଚ୍ଚ କରାଯାଉଛି ଯାହାକି କେନ୍ଦ୍ର ସରକାର ବହନ କରିବେ । ଏପରିକି ରାଜ୍ୟ ଭିତରେ, ଡ଼ିଲରମାନଙ୍କ ମାର୍ଜିନ ସମେତ ସବୁ ଖର୍ଚ୍ଚ କେନ୍ଦ୍ର ସରକାର ବହନ କରିବେ । ଏଥିପାଇଁ ରାଜ୍ୟ ତଥା କେନ୍ଦ୍ରଶାସିତ କ୍ଷେତ୍ରର ସରକାରମାନଙ୍କୁ ହିତାଧିକାରୀମାନଙ୍କ ତାଲିକା ଅଗ୍ରୀମ ଭାବେ ଦେବାକୁ ପଡ଼ିବ । ତେବେ ସେମାନେ ଏହି ବଣ୍ଟନ ରିପୋର୍ଟ ଜୁଲାଇ 15, 2020 ସୁଦ୍ଧା କେନ୍ଦ୍ରକୁ ପଠାଇବାକୁ ସେ ଅନୁରୋଧ କରିଥିଲେ ।

ପିଏମ- ଜିକେଏୱାଇ ଯୋଜନା:

ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା (ପିଏମ- ଜିକେଏୱାଇ) ଅଧୀନରେ ଅତିରିକ୍ତ ଖାଦ୍ୟଶସ୍ୟ ଦେଶର 80 କୋଟି ଲୋକଙ୍କୁ ବଣ୍ଟନ କରାଯାଉଛି । ସମସ୍ତ ରାଜ୍ୟ ଓ କେନ୍ଦ୍ରଶାସିତ କ୍ଷେତ୍ରର ଏନଏଫଏସଓ ହିତାଧିକାରୀମାନେ ଅପ୍ରେଲ ଠାରୁ ଜୁନ୍‌ 2020 ତିନିମାସ ପର୍ଯ୍ୟନ୍ତ ଏହି ଖାଦ୍ୟଶସ୍ୟ ପାଇବେ ଏବଂ ଏଥିରେ ଡ଼ିବିଟି ମୋଡ଼ରେ ଥିବା କେନ୍ଦ୍ରଶାସିତ କ୍ଷେତ୍ରମାନେ ମଧ୍ୟ ସାମିଲ ।

ଶ୍ରୀ ପାସୱାନ କହିଲେ ଯେ ପିଏମଜିକେଏୱାଇ ଅଧୀରେ ଅପ୍ରେଲ 2020 ପାଇଁ ଉଦ୍ଦିଷ୍ଟ ଥିବା 90% ଖାଦ୍ୟଶସ୍ୟ ସମସ୍ତ ରାଜ୍ୟରେ (କେବଳ ପଞ୍ଜାବ, ସିକିମ, ଦିଲ୍ଲୀ, ମଧ୍ୟ ପ୍ରଦେଶ ଓ ଝାଡ଼ଖଣ୍ଡ ରାଜ୍ୟ ଯେଉଁଠାରେ କି  ଅପ୍ରେଲ ପାଇଁ 75%ରୁ କମ୍‌ ପରିମାଣର ଖାଦ୍ୟଶସ୍ୟ ବଣ୍ଟାଯାଇଛି ) ବଣ୍ଟନ ସରିଛି । ଚଳିତ ମାସ ପାଇଁ ରାଜ୍ୟମାନେ ପାଖାପାଖି 61% ଖାଦଶସ୍ୟ ବାଣ୍ଟି ସାରିଛନ୍ତି । ଦିଲ୍ଲୀ, ପଶ୍ଚିମବଙ୍ଗ, ମଣିପୁର, କେରଳ ଓ ବିହାର ମେ ମାସ ପାଇଁ ଖାଦ୍ୟଶସ୍ୟ ବଣ୍ଟନ ଆରମ୍ଭ କରିନାହାନ୍ତି ଅଥବା ଏହି ବଣ୍ଟନ ଏବେ 10%ରୁ କମ୍‌ ରହିଛି ।

ପିଏମ- ଜିକେଏୱାଇ ଅଧୀନରେ ଡ଼ାଲିଜାତୀୟ ଶସ୍ୟ ବଣ୍ଟନ:

ପିଏମ-ଜିକେଏୱାଇ ଯୋଜନାରେ ଆଗାମୀ ତିନିମାସ ପାଇଁ ମୋଟ 5.87 ଲକ୍ଷ ମେଟ୍ରିକ୍‌ ଟନ୍‌ ଡ଼ାଲିଜାତୀୟ ଶସ୍ୟ ଆବଶ୍ୟକ । ନାଫେଡ଼୍‌ର ସୂଚନା ଅନୁସାରେ 4.05 ଲକ୍ଷ ମେଟ୍ରିକ ଟନ୍‌ ଡ଼ାଲିଜାତୀୟ ଶସ୍ୟ ଏପର୍ଯ୍ୟନ୍ତ ପ୍ରେରଣ କରାଯାଇସାରିଛି । ରାଜ୍ୟମାନେ 3.02 ଲକ୍ଷ ମେଟ୍ରିକ୍‌ ଟନ୍‌ ଡ଼ାଲିଜାତୀୟ ଶସ୍ୟ ପାଇ ସାରିଛନ୍ତି ଏବଂ ପ୍ରାୟ 1.27 ଲକ୍ଷ ମେଟ୍ରିକ୍‌ ଟନ୍‌ ଡାଲିଜାତୀୟ ଶସ୍ୟ 21ଟି ରାଜ୍ୟ ଓ 5ଟି କେନ୍ଦ୍ରଶାସିତ କ୍ଷେତ୍ରରେ ବଣ୍ଟା ଯାଇସାରିଛି । ଏଥିପାଇଁ 5,000 କୋଟି ଟଙ୍କା ବ୍ୟୟଭାର ବହନ କରିବାକୁ ପଡ଼ୁଛି ଯାହାକି ଭାରତ ସରକାର ବହନ କରୁଛନ୍ତି ବୋଲି ଶ୍ରୀ ପାସୱାନ କହିଥିଲେ ।

ଜାତୀୟ ଖାଦ୍ୟ ସୁରକ୍ଷା ଆଇନ:

ଶ୍ରୀ ପାସୱାନ କହିଲେ ଯେ ଏନଏଫଏସଏ ଅଧୀନରେ ଅପ୍ରେଲ 2020ରେ ମାସିକିଆ ଖାଦ୍ୟଶସ୍ୟର 93% ମଂଜୁର କରାଯାଇଛି । ମେ ମାସ ପାଇଁ ମଂଜୁର ଖାଦ୍ୟଶସ୍ୟର ମୋଟ ପରିମାଣର 75% ମଂଜୁର କରାଯାଇଛି ଏବଂ ତାହା ଏବେ ରାଜ୍ୟମାନେ ବଣ୍ଟନ କରୁଛନ୍ତି ।

ଏକ ରାଷ୍ଟ୍ର ଏକ ରାସନ କାର୍ଡ଼ ଯୋଜନା:

ଏକ ରାଷ୍ଟ୍ର ଏକ ରାସନ କାର୍ଡ଼ (ଓଏନଓସି) ଯୋଜନା ଅଧୀନରେ ସାଧାରଣ ବଣ୍ଟନ ବ୍ୟବସ୍ଥାର ହିତାଧିକାରୀମାନେ ସେମାନଙ୍କର ରାସନ ଯେକୌଣସି ଏଫପିଏସ ଦୋକାନରୁ ବାୟୋମେଟ୍ରିକ୍‌ ତନଖି ପରେ ପାଇପାରିବେ । ଏକ ରାଷ୍ଟ୍ର ଏକ ରାସନ୍‌ କାର୍ଡ଼ ବ୍ୟବସ୍ଥାରେ ମେ 1, 2020 ସୁଦ୍ଧା 17ଟି ରାଜ୍ୟ/କେନ୍ଦ୍ରଶାସିତ କ୍ଷେତ୍ରକୁ ଯୋଡ଼ାଯାଇ ସାରିଛି । ଅନ୍ୟ ତିନୋଟି ରାଜ୍ୟ ଓ କେନ୍ଦ୍ରଶାସିତ କ୍ଷେତ୍ର ଯଥା ଓଡିଶା, ନାଗାଲାଣ୍ଡ ଏବଂ ମିଜୋରାମ ଏହି ଯୋଜନା ସହ ଜୁନ୍‌ 2020ରେ ସଂଯୁକ୍ତ ହେବାକୁ ଯାଉଛନ୍ତି । ଅଗଷ୍ଟ 2020ରେ ଉତ୍ତରାଖଣ୍ଡ, ସିକିମ ଓ ମଣିପୁର ଏହି ଅନଲାଇନ୍‌ ପ୍ଲାଟଫର୍ମରେ ସାମିଲ ହେବେ । ଏହି ଯୋଜନାରେ ମୋଟ 23ଟି ରାଜ୍ୟ ଓ କେନ୍ଦ୍ରଶାସିତ କ୍ଷେତ୍ର ସାମିଲ ହେବେ । ସରକାର ଓଏନଓସି ଯୋଜନା ମାଧ୍ୟମରେ ମାର୍ଚ୍ଚ 31, 2021 ସୁଦ୍ଧା ଦେଶର ସମସ୍ତ ରାଜ୍ୟ ଓ କେନ୍ଦ୍ରଶାସିତ କ୍ଷେତ୍ରଙ୍କୁ ସାମିଲ କରିବାର ଯୋଜନା ରଖିଛନ୍ତି ବୋଲି ଶ୍ରୀ ପାସୱାନ ସୂଚାଇଥିଲେ ।

ଖାଦ୍ୟଶସ୍ୟ ସଂଗ୍ରହ:

(ଗହମ/ ଧାନ)

ଏହି ଭିଡ଼ିଓ କନଫରେନ୍ସିଂ ବେଳେ ଅଧିକାରୀମାନେ ସୂଚୀତ କରିଥିଲେ ଯେ ମେ 21, 2020 ସୁଦ୍ଧା ପୁନଃପୌନିକ ଭାବେ 2020-21 ପାଇଁ ଆରଏମଏସରେ 319.95 ଲକ୍ଷ ମେଟ୍ରିକ୍‌ ଟନ୍‌ ଗହମ ସଂଗୃହୀତ ହୋଇଛି । 2019-20ର ଏହି ସମୟରେ 326.15 ଲକ୍ଷ ମେଟ୍ରିକ୍‌ ଟନ୍‌ ଗହମ ସଂଗୃହୀତ ହୋଇଥିଲା । ଗତ ବର୍ଷ ତୁଳନାରେ ଚଳିତ ବର୍ଷ ଗହମ ସଂଗ୍ରହ ମାତ୍ରା 1.90% ହ୍ରାସ ପାଇଛି । କାରଣ କୋଭିଡ଼-19 ଯୋଗୁ ଗହମ ସଂଗ୍ରହ ବିଳମ୍ବରେ ଆରମ୍ଭ ହୋଇଛି । ଏହା ବ୍ୟତୀତ, ସଂଗ୍ରହ କାର୍ଯ୍ୟ ଯଥେଷ୍ଟ ସତର୍କତାମୂଳକ ବ୍ୟବସ୍ଥା ମଧ୍ୟରେ ଏବଂ ମଣ୍ଡିରେ ସାମାଜିକ ଦୂରତା ରକ୍ଷା ମାଧ୍ୟମରେ ସଂପାଦନ କରାଯାଉଛି । ଶ୍ରୀ ପାସୱାନ କହିଲେ ଯେ ସଂଗ୍ରହକୁ ଅନୁପାତ ଅନୁସାରେ ହିସାବ କଲେ, ଚଳିତ ଋତୁରେ ଯେଉଁ 400 ଲକ୍ଷ ମେଟ୍ରିକ୍‌ ଟନ୍‌ ଗହମ ସଂଗ୍ରହର ଲକ୍ଷ୍ୟ ଧାର୍ଯ୍ୟ କରାଯାଇଛି ତାହା ପୂରଣ ହୋଇପାରିବ ।

ତେଣୁ 21, 2020 ସୁଦ୍ଧା, କେଏମଏସରେ ପୁନପୌନିକ ଧାନ ସଂଗ୍ରହ ପରିମାଣ 460.89 ଲକ୍ଷ ମେଟ୍ରିକ୍‌ ଟନ୍‌ ଛୁଇଁଛି । ଯାହାକି 2018-19 ବର୍ଷରେ 407.86 ଲକ୍ଷ ମେଟ୍ରିକ୍‌ ଟନ୍‌ ହୋଇଥିଲା ଓ ତାହା ଚଳିତ ବର୍ଷ ଠାରୁ 13% କମ୍‌ ଥିଲା ।

ଶ୍ରୀ ପାସୱାନ କହିଲେ ଯେ ଲକଡାଉନ୍‌ ଯୋଗୁ ଧାନ ସଂଗ୍ରହ କାର୍ଯ୍ୟ ବେଶ ସମସ୍ୟା ଭିତରେ ସଂପାଦନ କରିବାକୁ ପଡ଼ିଛି । ତେବେ ଏହି ସଂଗ୍ରହ ମାତ୍ରା ବେଶ୍‌ ଉତ୍ସାହଜନକ । ଏଥିପାଇଁ ଭାରତ ସରକାର ଏବଂ ରାଜ୍ୟ ସରକାରମାନଙ୍କ ମଧ୍ୟରେ ଉପଯୁକ୍ତ ସମନ୍ୱୟ ରକ୍ଷା ତଥା ଟିମ୍‌ ୱାର୍କ ଯୋଗୁ ତାହା ସମ୍ଭବପର ହୋଇଛି । କେନ୍ଦ୍ରୀୟ ଭଣ୍ଡାରକୁ ଏତେ ମାତ୍ରାର ଖାଦ୍ୟଶସ୍ୟ ଆସିବା ଦ୍ୱାରା, ଏଫସିଆଇ ଗୋଦାମରେ ନୂତନ ଖାଦ୍ୟଶସ୍ୟ ଭରପୂର ହେବ । ଏହା ଦ୍ୱାରା ବର୍ତ୍ତମାନ ଭଳି ସଂକଟର ଘଡ଼ିରେ ଲୋକମାନଙ୍କ ଆବଶ୍ୟକତା ପୂରଣ କରିବା ସକାଶେ ଆବଶ୍ୟକ ଅତିରିକ୍ତ ଖାଦ୍ୟଶସ୍ୟ ମଧ୍ୟ ଯୋଗାଇ ଦିଆଯିବ । ଏଫସିଆଇରେ ଅତି ସହଜରେ 600 ଲକ୍ଷ ମେଟ୍ରିକ୍‌ ଟନ୍‌ ପର୍ଯ୍ୟନ୍ତ ଖାଦ୍ୟଶସ୍ୟ ଭଣ୍ଡାର ବ୍ୟବସ୍ଥା ରହିଛି । ଏନଏଫଏସଏ ଏବଂ ଅନ୍ୟାନ୍ୟ ଜନହିତକର ଯୋଜନା ସକାଶେ ମାସିକ ପ୍ରାୟ 60 ଲକ୍ଷ ମେଟ୍ରିକ୍‌ ଟନ୍‌ ଖାଦ୍ୟଶସ୍ୟ ଆବଶ୍ୟକ ପଡ଼ିଥାଏ ।

ଖାଦ୍ୟ ସବସିଡ଼ି:

ଶ୍ରୀ ପାସୱାନ କହିଲେ ଯେ ଜାନୁଆରୀ 01, 2020 ସୁଦ୍ଧା ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ନେତୃତ୍ୱାଧୀନ କେନ୍ଦ୍ର ସରକାରଙ୍କ ପକ୍ଷରୁ ସମସ୍ତ ରାଜ୍ୟ/କେନ୍ଦ୍ରଶାସିତ କ୍ଷେତ୍ରମାନଙ୍କୁ ମୋଟ 28,847 କୋଟି ଟଙ୍କାର ସବସିଡ଼ି ଯୋଗାଇ ଦିଆଯାଇଛି । ଗତବର୍ଷ ଏହି ସମୟରେ 12,356 କୋଟି ଟଙ୍କାର ସବସିଡ଼ି ପ୍ରଦାନ କରାଯାଇଥିଲା । ତେଣୁ ଗତ ବର୍ଷ ତୁଳନାରେ ଚଳିତ ବର୍ଷର ସବସିଡ଼ି ଦୁଇଗୁଣରୁ ଅଧିକ । ଖାଦ୍ୟଶସ୍ୟ ସଂଗ୍ରହ ପ୍ରକ୍ରିୟାକୁ ବିକେନ୍ଦ୍ରୀକରଣ କରିବା ଦିଗରେ ରାଜ୍ୟ ଓ କେନ୍ଦ୍ରଶାସିତ କ୍ଷେତ୍ରମାନଙ୍କୁ ତାଙ୍କ ବିଭାଗ ସଂପୂର୍ଣ୍ଣ ରୂପେ ସହଯୋଗ କରୁଛି ବୋଲି ଶ୍ରୀ ପାସୱାନ ସୂଚାଇଥିଲେ ।

********************