ଭାରତ ସରକାରଙ୍କ ଶକ୍ତି ମନ୍ତ୍ରଣାଳୟ ଅଧୀନ ଜାତୀୟ ତାପଜ ବିଦ୍ୟୁତ ନିଗମ (NTPC) ଓ ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ମନ୍ତ୍ରଣାଳୟ ଅଧୀନ ରାଷ୍ଟ୍ରାୟତ୍ତ ଉଦ୍ୟୋଗ ତୈଳ ଓ ପ୍ରାକୃତିକ ବାଷ୍ପ ନିଗମ (ONGC) ମଧ୍ୟରେ ଅକ୍ଷୟ ଶକ୍ତିର ଉତ୍ପାଦନ, ଭଣ୍ଡାରଣ ଓ ବ୍ୟବସାୟ କରିବାକୁ ଏକ ବୁଝାମଣାପତ୍ର ସ୍ୱାକ୍ଷରିତ ହୋଇଛି । ଭାରତ ସରକାରଙ୍କ ଏହି ଦୁଇ ମହାରତ୍ନ କମ୍ପାନୀ ଅକ୍ଷୟ ଶକ୍ତି କ୍ଷେତ୍ରରେ ପାଦ ଥାପିବାକୁ ଏକ ନୂଆ କମ୍ପାନୀ ଗଢ଼ିବେ ।

ଏହି ବୁଝାମଣା ପତ୍ରରେ ଏନଟିପିସିର ବ୍ୟାବସାୟିକ ନିର୍ଦ୍ଦେଶକ ଏ କେ ଗୁପ୍ତା ଏବଂ ଓଏନଜିସିର ଯୁଗ୍ମ ଉଦ୍ୟୋଗ ତଥା ବ୍ୟବସାୟ ବିକାଶ ବିଭାଗର କାର୍ଯ୍ୟକାରୀ ଆର୍ଥିକ ବ୍ୟାପାର ନିର୍ଦ୍ଦେଶକ ସୁଭାଷ କୁମାର ସ୍ୱାକ୍ଷର କରିଛନ୍ତି । ଏନଟିପିସିର ସିଏମଡି ଗୁରୁଦୀପ ସିଂହ ଓ ଏନଜିସିର ସିଏମଡି ଶଶୀ ଶଙ୍କର ଓ ଅନ୍ୟାନ୍ୟ ବରିଷ୍ଠ ଅଧିକାରୀଙ୍କ ଉପସ୍ଥିତିରେ ଏକ ଭର୍ଚ୍ଚୁଆଲ କନଫରେନ୍ସରେ ଏହି ବୁଝାମଣାପତ୍ର ସ୍ୱାକ୍ଷରିତ ହୋଇଛି ।

ଏହି ବୁଝାମଣା ଅନୁସାରେ ଦୁଇ ମହାରତ୍ନ କମ୍ପାନୀ ମିଳିତ ଉଦ୍ୟୋଗରେ ଭାରତ ଓ ବାହାରେ ସମୁଦ୍ର ଭିତରେ ପବନ କଳ ସ୍ଥାପନ ସହ ଅନ୍ୟାନ୍ୟ ଅଣପାରମ୍ପରିକ ଉତ୍ସରୁ ଅକ୍ଷୟ ଶକ୍ତି ଉତ୍ପାଦନ ପାଇଁ ପ୍ରକଳ୍ପ ସ୍ଥାପନ କରିବେ । ଏହାଛଡା ଅକ୍ଷୟ ଶକ୍ତିର ଭଣ୍ଡାରଣ, ଇ-ମୋବିଲିଟ ଏବଂ ପରିବେଶ, ସାମାଜିକ ଓ ପ୍ରଶାସନିକ ଦୃଷ୍ଟିରୁ ଅନୁକୂଳ ଅକ୍ଷୟ ଶକ୍ତି ପ୍ରକଳ୍ପମାନ ହାତକୁ ନେବେ ।

ଏବେ ଏନଟିପିସି ପାଖରେ 920 ମେଗାୱାଟ ଅକ୍ଷୟ ଶକ୍ତି ଉତ୍ପାଦନର ସଂରଚନା ରହିଛି । ଏହାଛଡା ଏହି ନିଗମ ଏବେ 2300 ମେଗାୱାଟ ଅକ୍ଷୟ ଶକ୍ତି ଉତ୍ପାଦନ ପାଇଁ ବିଭିନ୍ନ ପ୍ରକଳ୍ପ କାର୍ଯ୍ୟକାରୀ କରୁଛି । ନୂଆ ମିଳିତ ପ୍ରୟାସ ଫଳରେ ଏନଟିପିସିର ଅକ୍ଷୟ ଶକ୍ତି ଉତ୍ପାଦନ ଦକ୍ଷତା ତ୍ୱରାନ୍ୱିତ ହେବ ଏବଂ ପ୍ରଥମ କରି ସମୁଦ୍ର ଭିତରେ ପ୍ରକଳ୍ପ ନିର୍ମାଣ କରି ଅକ୍ଷୟ ଶକ୍ତି ଉତ୍ପାଦନ କରିବ । ଏନଟିପିସି ଭାରତର ସର୍ବବୃହତ ଶକ୍ତି ଉତ୍ପାଦନକାରୀ ସଂସ୍ଥା । 2032 ସୁଦ୍ଧା ଏହି ନିଗମ 32 ଜିଗାୱାଟ ଅକ୍ଷୟ ଶକ୍ତି ଉତ୍ପାଦନ କରିବାକୁ ଯେଉଁ ମହତାକାଂକ୍ଷୀ ଲକ୍ଷ୍ୟ ରଖିଛି । ଏହା ଦ୍ୱାରା ତାହା ପୂରଣ ହୋଇପାରିବ ବୋଲି ଆଶା ରଖିଛି ।

ଅପରପକ୍ଷରେ ଓଏନଜିସି ପାଖରେ ଏବେ 176 ମେଗାୱାଟ ଅକ୍ଷୟ ଶକ୍ତି ଉତ୍ପାଦନର ସାମର୍ଥ୍ୟ ଓ ବ୍ୟବସ୍ଥା ଅଛି । ସେଥି ମଧ୍ୟରେ 153 ମେଗାୱାଟ ପବନ ଓ 23 ମେଗାୱାଟ ସୌରଶକ୍ତି । ନୂଆ ବୁଝାମଣା ଦ୍ୱାରା ଓଏନଜିସି ଅକ୍ଷୟ ଶକ୍ତି ବ୍ୟବସାୟରେ ପାଦ ଥାପିବ । ଏହାଛଡା 2040 ସୁଦ୍ଧା 10 ଜିଗାୱାଟ ଅକ୍ଷୟ ଶକ୍ତି ଉତ୍ପାଦନ କରିବାକୁ ଏହି ସଂସ୍ଥା ଯେଉଁ ଲକ୍ଷ୍ୟ ରଖିଛି ତାହାର ରୂପାୟନ କାର୍ଯ୍ୟ ତ୍ୱରାନ୍ୱିତ ହେବ ।

ଏନଟିପିସି ଗ୍ରୁପର ମୋଟ ଶକ୍ତି ଉତ୍ପାଦନ କ୍ଷମତା 62110 ମେଗାୱାଟ । ଦେଶର ବିଭିନ୍ନ ସ୍ଥାନରେ ଏହାର 70ଟି ଶକ୍ତି ଉତ୍ପାଦନ କେନ୍ଦ୍ର ରହିଛି । ସେଥିରୁ 24ଟି କୋଇଲା ଚାଳିତ ହୋଇଥିବା ବେଳେ ସାତଟି ଗ୍ୟାସ ଓ ତରଳ ଇନ୍ଧନର ଯୌଗିକ ପ୍ରକି୍ରୟାରେ ଚାଲିଛି । ଏହା ବ୍ୟତୀତ ଏନଟିପିସିର ଗୋଟିଏ ଜଳବିଦ୍ୟୁତ, 13ଟି ଅକ୍ଷୟ ଶକ୍ତି କେନ୍ଦ୍ର ଓ 25ଟି ମିଳିତ ଉଦ୍ୟୋଗ ଶକ୍ତି କେନ୍ଦ୍ର କାର୍ଯ୍ୟକ୍ଷମ ଅଛି ।

*****************