কেবিনেত সেক্রেতরী শ্রী রজিব গৌবানা সাইক্লোনিক স্তোর্ম ‘অম্ফন’গী মতাংদা স্তেৎ অমদি কেন্দ্রগী মিনিস্ত্রী/এজেন্সিশিংগী শেম শারিবশিং য়েংশিন্নবা পাঙথোকপা নেসনেল ক্রাইসিস মেনেজমেন্ত কমিতীগী অহুমসুব মীফম পাঙথোকখ্রে‍।

সুপর সাইক্লোন অসিনা মে ২০গী নুংথিল/নুমিদাংৱাইরম ৱেস্ত বেঙ্গলগী সমুদ্র মপানদা য়ৈরবা য়াই হায়না ইন্দিয়ন মেতিওরোলোজিকেল দিপার্তমেন্ত (আই.এম.দি.)না ফোঙদোক্লি‍। য়াম্না কনবা নোং অমসুং মিতর ৪-৫ ফাওবা ৱাংখৎলক্কদবা নোংলৈ নুংশিৎ য়াওবা পূংদা কিমি ১৬৫ দগী ১৮৫ ফাওবা য়ৌবা য়াম্না কনবা নুংশিৎনা স্তেৎ অসিগী সমুদ্র মপানগী দিস্ত্রিকশিংদা য়ৈরবা য়াই‍। ইস্ত মেদিনিপুর, সাউথ এন্দ নোর্থ ২৪ পাগনাস, হাউরা, হুগ্লী, অমদি কোলকতাদা শোকহল্লবা য়াই‍। সাইইক্লোন অসিনা মাংহন তাকহনবা ঙম্বগী চাং অসি ইং ২০১৯গী নবেম্বর ৯দা ৱেস্ত বেঙ্গলগী সমুদ্র মপানদা য়ৈখিবা সাইক্লোন বুলবুলদগী হেন্না কল্লবা য়াই হায়না পানরি‍।

সাইক্লোন অসিনা ওরিশাগী সমুদ্র মপানগী দিস্ত্রিক্তশিং জগৎসিংহপুর, কেন্দ্রপরা, ভদ্রক, জয়পুর অমসুং বলাসোরদা অকনবা নোং, শাথিবা নুংশিৎ অমদি নোংলৈ নুংশিৎপুরক্কদৌরি‍।

ওরিশাগী চীফ সেক্রেতরী অমসুং ৱেস্ত বেঙ্গলগী এদিসনেল চীফ সেক্রেতরীনা মখোয়না লৌখৎলিবা থৌরাংশিংগী মতাংদা এন.সি.এম.সি.দা পাউদমখি‍। অনেমবা মফমশিংদগী মী হোন্দোকপগী থবক চত্থরি হায়না মখোয়না পাউদমখি‍। চানবা চীঞ্জাক, থক্নবা ঈশিং অমদি অতৈ তঙাই ফদবা মচাকশিং পৈশিনবগী লৌখৎফম থোকপা থৌরাংশিং লৌখৎলি‍। মৈ অমসুং তেলিকোম সর্ভিসশিং শেন্ননবা অমদি শেনজিন্নবা কাংবুশিং মফম চানা থমখ্রে‍।

স্তেৎ অমদি সেন্ত্রেল এজেন্সিশিংগী শেম শারিবশিং য়েংশিল্লদুনা কেবিনেত সেক্রেতরীনা স্তেৎ লৈঙাকশিংদা অনেনবা মফমশিংদা লৈবা মীওইশিং মতম চানা অমদি মপুং ফানা হোন্দোক্নবা অমদি চানবা চিঞ্জাক, থক্নবা ঈশিং অমসুং হিদাক লাংথকশিংনচিংবা তঙাই ফদনা চঙদ্রবা য়াদ্রবা মচাকশিং মরাং কায়না থম্নবা ৱাফম থমখি‍। লম্বী ফাত্তোক্নবা অমদি অতৈ শেমজিন শাজিনবগী কাংবুশিংসু শেন শাদুনা থম্নবা মখোয়দা পাউতাক পীখি‍।

স্তেৎ অনি অসিদা হৌজিক এন.দি.আর.এফ.কী কাংবু ৩৬ থাজিন্দুনা থম্লি‍। আর্মী অমসুং নেভীগী রেস্ক্যু অমদি রিলিফ কাংবুশিং নেভী, এয়র ফোর্স অমসুং কোস্ত গার্দকী জহাজ অমসুং এয়র ক্রাফশিংগা লোয়ননা সতেন্দ বাইদা থমখ্রে‍। দিপার্তমেন্ত ওফ তেলিকম্ম্যুনিকেসন্স অমসুং পৱর মন্ত্রালয়গী এজেন্সিশিংদগী মীওইশিংসু স্তেৎশিং অসিদা ইসেন্সিএল সর্ভিসশিং মেনেজ তৌনবগীদমক থম্লি‍।

ওরিশাগী চীফ সেক্রেতরী অমসুং ৱেস্ত বেঙ্গলগী হোম সেক্রেতরীসু মীফম অদুদা ভিদিও কন্ফরেন্সিংগী খুত্থাঙদা শরুক য়াখি‍। হোম এফ্যার্স, দিফেন্স, সিপ্পিং, পৱার, তেলিকম্ম্যুনিকেসনশিং, হেল্থ, আই.এম.দি., এন.দি.এম.এ. অমসুং এন.দি.আর.এফ. মন্ত্রালয়শিংগী মকোক থোংবা ওফিসরশিংসু মীফম অদুদা শরুক য়াখি‍।

এন.সি.এম.সি.না ওইরক্লিবা ফীভমগী মতাংদা নৈননবা অমুক হন্না মীফম ফমগনি‍।

******