প্রধান মন্ত্রী শ্রী নরেন্দ্র মোদীনা ঙসি মীয়ামদা ৱা ঙাংখ্রে। লাইচৎ অসিগা লান্থেংনদুনা লৈখিদ্রবশিংবু নিংশিংলদুনা প্রধান মন্ত্রীনা হায়খি মদুদি, কোবিদ-১৯না মরম ওইদুনা ওইহল্লক্লিবা খুদোংথীবা অসি তম্বা ঙম্বা নত্তে, অদুবু মসিগী লানফম অসিদা, ঐখোয় ইশানা ইশাব ঙাকথোকচবতা নত্তনা ঐখোয় মাংজিল থানসু চৎনবা হোৎনগদবনি।

মরোমদোম লেপচবা ভারত

কোবিদকী মমাং অমসুং মতুংগী মালেমগী মতাংদা ৱা ঙাংলদুনা প্রধান মন্ত্রীনা হায়খি মদুদি, ২১শুবা চহী চাগী ভারত ওইনবা হোৎনবগী মঙলান মঙফাওননবা হোৎনবদা মাঙদা লৈরিবা লম্বীদি লৈবাক অসি মরোমদোম লেপচবা ঙম্বা লৈবাক অমা হান্না ওইহনবনি। খুদোংথীবা অসিবু খুদোংচাবা অমা ওন্থোক্নবা হোৎনবগী মতাংদা ৱা ঙাংলদুনা, মহাক্না করি অমত্তা লৈরমদবদগী নোংমদা পি.পি.ই. কিৎশিং অমসুং এন ৯৫ মাস্ক লাখ ২ পুথোকপা ঙম্লকপগী খুদম পীখি।

প্রধান মন্ত্রীনা মরোমদোম লেপচবা হায়বসিগী ৱাহন্থোক অসি গ্লোবেলাইজ ওইরবা মালেম অসিদা অহোং কয়া অমা লৈখ্রে, অমসুং লৈবাক অসিনা মরোমদোম লেপচবগী মতাংদা ঙাংবা মতমদা ইশানা ইশাগীতা খঞ্জবগী ৱাখলগা খেন্নৈ হায়না শেংদোকখি। ভারতকী কলচর অসিনা মালেম অসিবু ইমুং অমত্তা ওইনা উই, অমসুং ভারতকী চাওখৎলোন হায়বসি মালেমদা শরুক তম্বগা লোইননা মালেম পুন্না চাওখৎপা হায়বনি হায়না মহাক্না ফোংদোকখি। মহাক্না অমুক্কসু হায়খি, ভারতনা মীওইবা খুন্নাই চাওখৎনবগীদমক অঙম্বা থাক্তা হোৎনখ্রে হায়বসি মালেম পুম্বনা থাজরি হায়না থমখি।

ভারতনা মরোমদোম লেপচনবগী য়ুম্বী মঙা

য়ুহা হাখ্রবা মতুংদা কচ্চতা থোকখিবা খুদোংথীবা থৌদোক নিংশিংলদুনা প্রধান মন্ত্রীনা হায়খি মদুদি, পুক্নিং লেপ্পা অমসুং ৱারোইশিন পুরকপনা, মফম অসি অমুক হন্না মহৌশাগী পুন্সিদা লাকখি। অসিগুম্বা পুক্নিং লেপ্পা অমা হৌজিক মরোমদোম লেপচবা ঙম্বা লৈবাক অমা ওইনবা হোৎনবদা মথৌ তারি।

মহাক্না হায়খি মদুদি,মরোমদোম লেপ্পা ভারত অমা ওইনবা হোৎনবদা য়ুম্বী মঙা চংগনি; তপ্না-তপ্না অহোংবা লাকপা নত্তবা অমুক্তা চাউনা অহোংবা পুরকপদা চঙবা শেন্মিৎলোন; ভারত মশক তাক্কদৌরিবা ইনফ্রাস্ত্রকচর; ২১শুবা চহী চাগী তেক্নোলোজীদা য়ুম্ফম ওইবা সীস্তেম; অমসুং ঐখোয়গী দিমান্দ অমসুং সপ্লাই চেন অসিবু মপুং ফানা মথৌ তৌহন্নবা মপাঙ্গল হেনগৎহনবা মথৌ তারিবা দিমান্দনি। মহাক্না সপ্লাই চেন্দা লৈরিবা অরৈবা স্তেকহোল্দরশিং হেনগৎহন্দুনা মপাঙ্গল কলহনবা অমসুং দিমান্দশিং পীবা ঙমহনবগী মরু ওইবসু থমখি।

আত্মনির্ভর ভারত অভিয়ান

প্রধান মন্ত্রীনা ঙসি অখন্নবা ইকোনোমীক পেকেজ লাউথোক্তুনা আত্মনির্ভর ভারতকী খোল্লাও অমসু লাউরি। সরকারনা কোবিদকী ইরাং মনুংসিদা হান্নদগী লাউথোকখ্রবা অমসুং আর.বি.আই.না লৌখিবা ৱারেপশিং পুনশিন্নদুনা শেম্বা পেকেজ অসি লুপা লাখ কোতি ২০ লোমগীনি অমসুং মসিগা ভারতকী জি.দি.পি.গী শরুক ১০%গা মান্নৈ। মহাক্না পেকেজ অসিনা ‘আত্মনির্ভর ভারত’ ফংনবা হোৎনবদা চাউরবা মতেং অমা পাংগনি হায়খি।

প্রধান মন্ত্রীনা পেকেজ অসিনা লৈবাক, শিন্মী, শেল মরাং কায়না লৈবা অমসুং আইন্দা মিৎয়েং চংগনি হায়খি। মসিনা কোতেজ ইন্দস্ত্রী, এম.এস.এম.ই.শিং, শিন্মীশিং, মিদল ক্লাস, ইন্দস্ত্রী য়াওনা তোঙান তোঙানবা হীরমশিংদা মতেং পীগনি। হয়েংদগী হৌরগা শেল-থুমগী মন্ত্রীনা পেকেজ অসিগী অকুপ্পা মরোলশিং লাক্লিবা নুমিৎ খরনিগী মনুংদা পীগনি হায়খি।

জে.এ.এম. ত্রিনিতী অমসুং অতোপ্পা শেমদোক শাদোকপশিংনা চহী তরুক্কী মনুংদা পুরকখিবা অফবা ইথিলশিংগী মতাংদা পল্লদুনা প্রধান মন্ত্রীনা লৈবাক অসিবু মরোমদোম লেপ্পা ঙমহন্নবা থৌনা ফবা শেমদোক শাদোকপগী থবকশিং চংগনি অমসুং মদুগী মতুংদদি কোবিদকুম্বা ইরাং অসি লায়না থেংনবা ঙমগনি হায়খি। শেমদোক শাদোকপগী থবকশিং অসিদা লৌউ-শিংউগী পোৎ চাং নায়না পীবগী মওং, অফবা তেক্সকী মওং, অচম্বা অমসুং ময়েক শেংবা আইন, মতিক চাবা হ্যুমেন রিসোর্স অমসুং অরিংবা শেল-থুমগী ফিভমশিং য়াওই। শেমদোক শাদোকপগী থবকশিং অসিনা ললোন ইতিক তৌবা, শেল থাদবশিংগী পুক্নিং চিংশিনবা অমসুং মেক ইন ইন্দিয়াবু মখা তানা খুমাং চাওশিলহনগনি।

প্রধান মন্ত্রীনা মরোমদোম লেপ্পা ঙম্বা অসিনা লৈবাক অসিনা মালেমদা পোৎ-চৈ পীবা ঙম্বগী অরুবা চাংদম্নবা অসিগীদমক শেম শাগনি অমসুং ভারতনা চাংয়েংনরিবা অসিদা মায় পাকপা হায়বসি য়াম্না মরু ওইবনি হায়খি। পেকেজ অসি শেম্বা মতমদসু হায়রিবশিং অসিগী মরমদা নিংথীনা খন্নৈ। মসিনা সেক্তর কয়াগী থবক থৌরমশিংদা ফহনবতা নত্তনা মখোয়গী মতিক মগুনশু হেনগৎহনগনি।

লৈবাক অসিদা ওর্গনাইজদ অমসুং অনওর্গনাইজদ সেক্তর অনিমক্তগী ওইবা লাইরবশিং, শিন্মীশিং, মাইগ্রেন্তশিংগীদমক য়েংলদুনা প্রধান মন্ত্রীনা মখোইনা লৈবাকসিগীদমক্তা য়ারিবা থৌদাং কয়া অসিগী খল্লদুনা পেকেজ অসিনা মখোয়গী চাওখৎপদসু মিৎয়েং থমগনি হায়খি।

হৌজিক্কী ইরাং অসিনা ঐখোয়দা লমদম অসিদা পোৎ-চৈ শাবা, লমদম অসিগী  কৈথেল অমসুং লমদমসিদা পোৎ-চৈ ৱাৎহন্দবগী কান্নবদু তম্বিরে হায়না মহাক্না হায়খি। লোইননা  ইরাং মরক অসিদা ঐখোয়গী অৱাৎপা খুদিংমক লমদম অসিনা পীখি। হৌজিক্তি ঐখোয়গী লমদমসিগী পোত্থোকশিংবু থাগত্তুনা মালেমগী পোত্থোক ওইহন্নবা মতেং পাংলগদবনি হায়না মহাক্না হায়খ্রে।

কোবিদকা লোইননা হিংবা

সাইন্তিস্ত অমসুং অখঙ-অহৈশিংগী মোৎ মতুং ইন্না ভাইরস অসি ঐখোয়গী পুন্সিদা কুইনা শাংনা লৈনদুনা লৈগদৌরি হায়না প্রধান মন্ত্রীনা ফোংদোকখি। অদুবু ঐখোয়গী পুন্সি অসি মসিগী অকোইবদা চত্তুনা লৈবগী মথৌদি তাদে। মহাক্না মীয়াম পুম্নমক্তা মখোয়গী পান্দমদা মাস্ক অমসুং 'দো গজ দুরি'গুম্বা চেকশিল থৌরাংশিংগা লোইননা চংশিন্নবা পুক্নিং চিংশিনখি।

লোকদাউনগী মরিশুবা তাংকক্তা, হৌজিক উরিবা মশক অসিদগী অদুক্কী মতীক হোংলকখিগনি। রাজ্যশিংদগী ফোংদোক্নরকপশিংদা য়ুম্ফম ওইদুনা অনৌবা কাংলোনশিং শেম্লগনি, অমসুং মসিগী অকুপ্পা মরোলশিং অসি মে ১৮গী মমাংদা লাউথোক্লক্কনি।

****