ঙরাং ভিসাখাপাতনমদা গ্যাস য়ুবগী থৌদোক্না ওইহল্লকপা ফিবম অমুক হন্না য়েংশিন্নবা অনিরকশুবা ওইনা কেবিনেৎ সেক্রেতরী রজীব গৌবানা লুচিংদুনা নেস্নেল ক্রাইসিস মেনেজমেন্ত কম্মিতীগী মীফম পাংথোকখ্রে ।

থৌদোক থোকখ্রবা মতুংদা মী লৌথোক্নবা অমসুং গ্যাস য়ুরিবা প্লান্ত অদু লাকশিন্নবা পায়খৎলিবা থবকশিংগী মতাংদা হৌজিক ওইরিবা ফিবম কম্মিতীদা আন্ধ্র প্রদেশকী চীফ সেক্রেতরীনা পাউদমখি । তেঙ্কশিংদগী মখা তানা য়ুরক্তনবা মখোয়না থবকশিং পায়খৎলে হায়না খঙহনখি । গ্যাস অদুনা তুংকোইনা হকশেলদা পীগদবা চৈথেং অমসুং ঈশিং অমসুং নুংশিৎ ফনা থম্বদা পীগদবা চৈথেংগী মতাংদা মীফম অদুদা খন্নখি ।

মী কনবা অমসুং মতেং পাংবগী পায়খৎলিবা থবকশিংগী হৌজিক ওইরিবা ফিবম কেবিনেৎ সেক্রেতরীনা য়েংশিনখি অমসুং ফিবম অসি লাকশিন্নবা রাজ্য অসিনা দরকার ওইবা পীবা য়াবা মতেং পীনবা খঙহনখি । কেমিকেলগী অশোই-অঙাম থোকহন্দনবা অমসুং ইন্দস্ত্রীগী থবকশিংগী মতাংদা লৈবাক অসিগী অমসুং মালেমগী অখঙ-অহৈশিংগী মরক্ত প্লান্তগী ওফিসিয়েলশিং য়াওনা ভিদিও কনফরেন্সকী খুৎথাংদা খন্ন-নৈনবা পাংথোক্কনি অমসুং দরকারগী মতুংইন্না অসিগুম্বা অখঙ-অহৈ কাংবু অমদা মফম অদুদা থাগনি । মেদিকেলগী চৎন-পথাপশিং ইন্নবা মেদিকেলগী অখঙ-অহৈশিংগী মরক্তা খন্ন-নৈনবসু পাংথোক্কনি । ইনহিবিতর কেমিকেলশিং ফংহন্নবা থবকসু পায়খৎলে হায়রি ।

মীফম অদুদা ইনভাইরনমেন্ত, ফোরেস্ত অমসুং ক্লাইমেৎ চেঞ্জ, কেমিকেলস অমসুং পেত্রোকেমিকেল্স অমসুং ফর্মাস্যুতিকেল্স মিনিস্ত্রীশিংগী সেক্রেতরীশিং, এন.দি.আর.এফ. অমসুং হেল্থ সর্বিসেসকী দি.জি.শিং, এ.আই.আই.এম.এস.কী দিরেক্তর অমসুং এম.ঐচ.এ. অমসুং সেন্ত্রেল পোল্লুসন কন্ত্রোল বোর্দকী ওফিসরশিং শরুক য়াখি । ভিদিও কনফরেন্সকী খুৎথাংদা ভিসাখাপাতনম জিলাগী ওফিসিয়েলশিংগা লোয়ননা পাংথোকখিবা মীফম অদুদা আন্ধ্র প্রদেশকী চীফ সেক্রেতরী শরুক য়াখি ।

****