প্রধান মন্ত্রী শ্রী নরেন্দ্র মোদীনা লৈবাক্কী পঞ্চায়তী রাজ নুমিৎ ২০২০গী থৌরম অসিদা লৈবাক অসিগী গ্রাম পঞ্চায়ৎশিংগী সর্পঞ্চশিংগা ভিদিও কনফরেন্সিংগী খুত্থাংদা ৱারী-ৱাতাই শানখ্রে। থৌরম অসিদা মহাক্না পুনশিল্লবা ই-গ্রাম স্বরাজ পোর্তেল অমসুং মোবাইলগী এপ অমসুং স্বামিত্ব স্কীম অমসু হৌদোকখ্রে।

ই-গ্রাম স্বরাজ অসিনা গ্রাম পঞ্চায়ৎ দিবেলপমেন্ত প্লানশিং অসি শেম শাবা অমসুং থবক ওইনা পাংথোকপদা মতেং পাংগনি। পোর্তেল অসিনা হৌজিক হৌজিক্কী ওইবা মতমগী ওইনা য়েংশিন্নবা অমসুং অচুম অরান খঙবদা মতেং পাংগনি। পোর্তেল অসি গ্রাম পঞ্চায়ৎকী থাক ফাওবদা দিজিতাইজেসন তৌবগী অচৌবা খোংথাং অমনি। 

রাজ্য তরুক্তা পাইলোৎ মোদতা হৌদোক্লিবা স্বামিত্ব স্কীম অসিনা দ্রোন অমসুং খ্বাইদগী অনৌবা সর্বে তৌবগী থৌওং কয়া শিজিন্নদুনা খুঙ্গংগী মী তাদবা মফমশিং খঙদোকপদা মতেং পাংগনি।  স্কীম অসিনা খুঙ্গংগী লমশিংদা মচা খাইনা তৌগদবশিং য়াৎথোকপা, রেবিন্যু খোমজিনবা অমসুং প্রোপর্তী রাইৎকী মতাংদা অশেংবা খঙহনবগী থবকশিং শোইদনা পাংথোকহনগনি। মসিনা লমগী মপুশিংনা শেল-থুমগী ইন্সতিত্যুসনশিংদগী লোন লৌবা য়াবগী খুদোংচাবা কয়া পীগনি। লমগী য়েৎনবা লৈবশিংসু স্কীম অসিগী খুত্থাংদা পীবা তাইতল দীদশিংগী খুত্থাংদা লোইশিনহনগনি।  

লৈবাক অসিগী সর্পঞ্চশিংদা ৱা ঙাংবদা প্রধান মন্ত্রীনা কোরানাগী লাইচৎ অসিনা প্রজাশিংনা থবক শুবগী মওং অসি হোংহনবতা নত্তনা অফবা পারা অমসু তম্বীরে হায়খি। লাইচৎ অসিনা ঐখোইদা মতম পুম্বদা মীপান তাংদনা লৈগদবনি হায়না তাক্লে হায়নসু মহাক্না হায়খি।

 “মসিগী লাইচৎ অসিনা ঐখোইনা হান্না খঙলমদবা শিংনবা অমসুং খুদোংচাদবা কয়া অমা খঙহল্লে অমসুং মসিনা অকনবা ৱাফম কয়া য়াওবা অফবা পারা অমসু তম্বীরে।  মসিনা ঐখোইবু অতোপ্পগী মীপান তাংদবা অমসুং ইশাগী  ৱাত্ত-পাদবা ওইনা লৈগদবনি হায়বসু তাকপীরে।  ঐখোইগী খুদোংচাদবশিংগী ৱারোইশিনসু অতোপ্পা লৈবাক্তগী লৌগদবা নত্তে হায়বসু মসিনা তাক্লে। ঐখোইনা খঙবা খ্বাইদগী চাউবা পারাদি মসিনি।”

 “খুঙ্গং খুদিংমক মশাগী তঙাই ফদবশিং মশানা পীজনবগীদমক ৱাত্তা পাদবা ওইগদবনি। মসিগা মান্নবা মওংদা জিলা খুদিংমক মশাগী থাক্তা ৱাত্তা পাদবা ওইগদবনি, রাজ্য খুদিংমক মশাগী থাক্তা ৱাত্তা পাদবা ওইগদবনি অমসুং ঐখোইগী লৈবাক পুম্বা অসিসু মশাগী থাক্তা ৱাত্তা পাদবা ওইগদবনি” হায়না মহাক্না হায়খি।

শ্রী নরেন্দ্র মোদীনা হায়খিবগী মতুং ইন্না সরকারনসু খুঙ্গংশিং অসি ৱাত্তা পাদবা ওইহন্নবা অমসুং গ্রাম পঞ্চায়ৎশিংসু মপাঙ্গল কলহন্নবা কন্না হোৎনরি।

 “হান্ননা পঞ্চায়ৎ ১০০খক ব্রোদবেন্দনা শম্নহল্লম্বা অদু হৌখিবা চহী মঙাদদি ব্রোদবেন্দনা শম্নহনবা পঞ্চায়ৎশিংগী মশিং অসি লাখ ১.২৫ শুরে। মসিগা মান্ননা কমন সর্বিস সেন্তরগী মশিংসু লাখ ৩ হেল্লে” হায়না মহাক্না মখা তানা হায়খি। 

মহাক্না হায়খি মদুদি মোবাইল ফোনশিং অসি ভারত্তা শাবা হৌবদগীদি স্মার্তফোনগী মমলসু হন্থরে অমসুং অহোংবা স্মার্তফোনশিং অসি খুঙ্গং খুদিংদা পাইনরে অমসুং মসিনা খুঙ্গংগী থাক্কী ওইবা দিজিতেল ইনফ্রাস্ত্রকচরগী মপাঙ্গল কনখৎহল্লগনি।

প্রধান মন্ত্রীনা অসুম্না হায়খি, “ পঞ্চায়ৎ চাউখৎপা অসিনা লৈবাক্কী অমসুং গনতন্ত্রগী চাউখৎপসু পুরক্কনি।”

ঙসিগী থৌরম অসি প্রধান মন্ত্রী অমসুং গ্রাম পঞ্চায়ৎকী মীহুৎশিংগী মরক্তা হকথেংননা ৱারী শাবা ফংবগী য়াম্না ফবা খুদোংচাবা অমনি।

সর্পঞ্চশিংগা ৱারী ৱাতাই শাবা অদুদা পি.এম.না য়াম্না চম্বা মওংদা সোসিএল দিস্তেন্সিংবু খঙহনবা মন্ত্রা ‘দো গজ দুরী’ অসি পুথোকপগীদমক খুঙ্গংশিংবু থাগৎখি।

ভারতকী খুঙ্গংনা পীরিবা স্লোগান “দো গজ দেহ কী দুরী” অসিনা মীয়াম অসিগী ৱাখল লৌশিং উৎলি হায়না মহাক্না হায়খি। মসিনা মীয়ামদা সোসিএল দিস্তেন্সিং ইন্নবা ইথিল অমা পী হায়বা ৱাহৈ অসি পল্লদুনা স্লোগান অসিবু মহাক্না য়াম্না থাগৎখি।

ঐখোইদা লৈরিবা রিসোর্সশিং অসি য়াম্না অকক্নবা ওইরবসু ভারতনা শিংনবা অসিবু থৌনা ফনা থেংনরি অমসুং অনৌবা পাঙ্গল অমসুং অনৌবা লম্বীশিংগা লোইননা মাং থানা চৎনবা থৌনা অমা উৎলি হায়না প্রধান মন্ত্রীনা হায়খি।

মহাক্না হায়খি, “ খুঙ্গংশিংনা পুন্না হোৎনমিন্নরিবা অসিনা লৈবাক অসিবু খুমাং চাউশিনবদা মতেং পাংলি”।

হৌজিক পায়খৎলিবা খোংথাং কয়া অসিগী মরক্তা ঐখোইনা নীংশিংগদবদি কনাগুম্বা মীওই অমগী চেকশন্দবা অমনা খুঙ্গং পুম্বদা খুদোংথিবা তাহনগনি অমসুং মসিনা মরম ওইদুনা কোম্থোকপগী ৱাফম লৈতে হায়না মহাক্না পনখি।

প্রধান মন্ত্রীনা সর্পঞ্চশিংদা মখোইগী খুঙ্গংশিংদা স্বচ্ছতা কেম্পেনগী মাইকৈদা থবক নীংথিনা তৌনবা অমসুং চহি য়াম্লবা, নাম্ম শোইরবা অঙাংশিং অমসুং খুঙ্গংগী অতোপ্পা লৈত লাইরশিংদা ক্বরেন্তাইন, সোসিএল দিস্তেন্সিং অমসুং মায়দা মাস্ক উপ্পগী কাংলোনশিং ইন্না ইন্না মতেং পাংনবসু হায়খি।

মহাক্না সর্পঞ্চশিংদা কোবিদ-১৯গী অচুম্বা ৱারোলশিং ইমুং খুদিংমক্তা খঙহন্নবসু হায়খি।

মহাক্না খুঙ্গংশিংদা আরোগ্য সেতু এপ দাউনলোদ তৌনবা হায়খি অমসুং পঞ্চায়ৎকী মীহুৎশিংদা মখোইগী পঞ্চায়ৎকী মনুংদা লৈরিবা মীওই খুদিংমকসু এপ অসি দাউনলোদ তৌহন্নবা খঙহনখি।

প্রধান মন্ত্রীনা খুঙ্গংশিংদা লৈরিবা লাইরবা মীওই খুদিংদা খ্বাইদগী ফবা হেল্থকেয়র ফংহন্নবসু কন্না হোৎনরি হায়খি। মহাক্না হায়খি মদুদি আয়ুশমান ভারত য়োজনা অসি খুঙ্গংগী লাইরবশিংগী ওইনা য়াম্না কান্নবা অমা ওইরে অমসুং স্কীম অসিগী মখাদা য়ামদ্রবদা লাইরবা অনাবা কোতি ১দি লায়েংশঙদা লেম্না লায়েংখ্রে।

ই.-এন.এ.এম. অমসুং জি.ই.এম. পোর্তেলগুম্বা দিজিতেল প্লেৎফোর্ম শিজিন্নদুনা খুঙ্গংগী পোত্থোকশিংগী অচৌবা কৈথেলশিংদা থোক্তুনা অফবা মমল ফংনবা হোৎনৌ হায়নসু মহাক্না হায়খি।

প্রধান মন্ত্রীনা জম্মু অমসুং কশ্মীর, করনাতকা, বিহার, য়ু.পি., মহারাস্ত্রা, পঞ্জাব অমসুং অসমগী সরপঞ্চশিংগা ৱারী শাখি।

মহাক্না হায়খি মদুদি মহাত্মা গান্ধীগী স্বরাজ অসি গ্রাম স্বরাজদা য়ুম্ফম ওইবনি। শাস্ত্র পল্লদুনা মহাক্না পাঙ্গলগী হৌরকফম অসি অপুনবদগীনি হায়না হায়খি।

প্রধান মন্ত্রীনা পঞ্চায়তী রাজকী নুমিৎ অসিগী অমসুং মখোইগী অপুনবা থৌদাংশিং অমসুং নীংহন্নদনা কোরোনাবু মাইথীবা পীবগীদমক সরপঞ্চ খুদিংমক্তা য়াইফ-পাউজেল পীখি।