ଆସନ୍ତା 24 ତାରିଖ ଦିନ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଦେଶବ୍ୟାପୀ ଗ୍ରାମପଞ୍ଚାୟତଗୁଡିକୁ ସମ୍ବୋଧିତ କରିବେ । ପ୍ରତିବର୍ଷ ଏହି ଦିନଟିକୁ ଜାତୀୟ ପଞ୍ଚାୟତିରାଜ ଦିବସ ରୂପେ ପାଳନ କରାଯାଇଥାଏ ।

ଲକଡାଉନ ଯୋଗୁଁ ଦେଶ ସାମାଜିକ ଦୂରତ୍ଵ ପାଳନ କରୁଥିବା ବେଳେ ପ୍ରଧାନମନ୍ତ୍ରୀ ଭିଡ଼ିଓ କନ୍ଫରେନ୍ସ ମାଧ୍ୟମରେ ବିଭିନ୍ନ ଅଂଶଗ୍ରହଣକାରୀଙ୍କ ସହ ମତ ବିନିମୟ କରିବେ । ପ୍ରଧାନମନ୍ତ୍ରୀ ମୋଦୀ ଏହି ଅବସରରେ ଏକୀକୃତ ଇ-ଗ୍ରାମସ୍ଵରାଜ ପୋର୍ଟାଲ ଓ ମୋବାଇଲ ଆପର ଶୁଭାରମ୍ଭ କରିବେ ।

ଏହି ଏକୀକୃତ ପୋର୍ଟାଲ ଗ୍ରାମପଞ୍ଚାୟତ ବିକାଶ ଯୋଜନାଗୁଡିକୁ ତ୍ୱରାନ୍ୱିତ କରିବାରେ ଏକ ଅଭିନବ ଉପାୟ ପ୍ରଦାନ କରିବ ।

ଏହି ଅବସରରେ ସ୍ଵାମୀତ୍ଵ ଯୋଜନାର ମଧ୍ୟ ଶୁଭାରମ୍ଭ କରିବେ । ଏହି ଯୋଜନା ଦେଶର ଗ୍ରାମାଞ୍ଚଳରେ ଏକ ସମନ୍ଵିତ ସମ୍ପତ୍ତିର ଆଇନଗତ ସମାଧାନ ପ୍ରଦାନ କରିବ । ଗ୍ରାମାଞ୍ଚଳର ଜନବସତି ଅଞ୍ଚଳର ଚିହ୍ନଟିକରଣ ଏକ ଅତ୍ୟାଧୁନିକ ସର୍ଭେ ପଦ୍ଧତି ଦ୍ଵାରା କରାଯିବ । ପଞ୍ଚାୟତିରାଜ ମନ୍ତ୍ରଣାଳୟ, ରାଜ୍ୟ ପଞ୍ଚାୟତିରାଜ ବିଭାଗ, ରାଜ୍ୟ ରାଜସ୍ୱ ବିଭାଗ ଓ ସର୍ଭେ ଅଫ ଇଣ୍ଡିଆର ମିଳିତ ଉଦ୍ୟମରେ ଡ୍ରୋନ ପ୍ରଯୁକ୍ତିବିଦ୍ୟା ପ୍ରୟୋଗକରି ଏହା କରାଯିବ ।

ପ୍ରତିବର୍ଷ ଏହି ଅବସରରେ ପଞ୍ଚାୟତିରାଜ ମନ୍ତ୍ରଣାଳୟର ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ଶ୍ରେଷ୍ଠ ପଞ୍ଚାୟତଗୁଡିକୁ ସେମାନଙ୍କ ଉନ୍ନତମାନର ଜନସେବା ପାଇଁ ସମ୍ମାନିତ କରିଆସୁଛି । ଚଳିତବର୍ଷ 3ଟି ଏପରି ସମ୍ମାନ ପ୍ରଦାନ ପାଇଁ ଚୁଡାନ୍ତ କରାଯାଇଛି । ସେଗୁଡିକ ହେଲା ନାନାଜି ଦେଶମୁଖ ରାଷ୍ଟ୍ରୀୟ ଗୌରବ ଗ୍ରାମ ସଭା ପୁରସ୍କାର, ଚାଇଲ୍ଡ ଫ୍ରେଣ୍ଡଲୀ ଗ୍ରାମ ପଞ୍ଚାୟତ ପୁରସ୍କାର ଏବଂ ଗ୍ରାମ ପଞ୍ଚାୟତ ଡେଭଲପମେଣ୍ଟ ପ୍ଳାନ ସମ୍ମାନ ।

ପୃଷ୍ଠଭୂମି-

1. ତୃଣମୂଳ ସ୍ତରରେ କ୍ଷମତାର ବିକେନ୍ଦ୍ରୀକରଣ ପାଇଁ 24 ଏପ୍ରିଲ 1993ରେ ପଞ୍ଚାୟତଗୁଡ଼ିକୁ ଆନୁଷ୍ଠାନିକ ଭାବେ କ୍ଷମତା ପ୍ରଦାନ କରାଯାଇଥିଲା । 1992ରେ ସମ୍ବିଧାନର 73ତମ ସଂଶୋଧନ ଆଇନରେ ଗ୍ରହଣ କରାଯାଇଥିବା ବ୍ୟବସ୍ଥା ଏହି ଦିନ ଲାଗୁ କରାଯାଇଥିଲା । ସେ ଦୃଷ୍ଟିରୁ କେନ୍ଦ୍ର ପଞ୍ଚାୟତିରାଜ ମନ୍ତ୍ରଣାଳୟ ପ୍ରତିବର୍ଷ 24 ଏପ୍ରିଲ ଦିନଟିକୁ ରାଷ୍ଟ୍ରୀୟ ପଞ୍ଚାୟତିରାଜ ଦିବସ ରୂପେ ପାଳନ କରିଥାଏ । ଏହିଦିନ ପଞ୍ଚାୟତିରାଜ ପ୍ରତିନିଧିମାନଙ୍କ ସହିତ ପ୍ରତ୍ୟକ୍ଷ କଥାବାର୍ତ୍ତା ପାଇଁ ଦେଶବ୍ୟାପୀ ଏକ ସୁଯୋଗ ପ୍ରଦାନ କରିଥାଏ । ସେମାନଙ୍କ ଉଲ୍ଲେଖନୀୟ କାର୍ଯ୍ୟର ପ୍ରଶଂସା ଯୋଗୁଁ ସେମାନଙ୍କୁ ଅଧିକ ଭଲ କାମ କରିବା ପାଇଁ ସଶକ୍ତ ଓ ପ୍ରୋତ୍ସାହିତ କରିଥାଏ । 
2. ସାଧାରଣତଃ ଜାତୀୟ ପଞ୍ଚାୟତିରାଜ ଦିବସ ଦିଲ୍ଲୀ ଛଡା ଅନ୍ୟଆଡେ ମଧ୍ୟ ବଡ ଆକାରରେ ପାଳନ କରାଯାଇଥାଏ ।  ଅନେକବାର ସ୍ଵୟଂ ପ୍ରଧାନମନ୍ତ୍ରୀ ଏହି ଅବସରରେ ଉପସ୍ଥିତ ରହିଥାନ୍ତି । ଚଳିତବର୍ଷ ଉତ୍ତରପ୍ରଦେଶର ଝାନ୍ସିରେ ଏହିପରି ଏକ ଉତ୍ସବର ଆୟୋଜନ କରାଯାଇ ପ୍ରଧାନମନ୍ତ୍ରୀ ଏହାକୁ ସମ୍ବୋଧନ କରିବାର ପ୍ରସ୍ତାବ ରହିଥିଲା । ମାତ୍ର ଦେଶରେ କରୋନା ସଂକ୍ରମଣ ଯୋଗୁଁ ହୋଇଥିବା ଲକଡାଉନ ପାଇଁ ଜାତୀୟ ପଞ୍ଚାୟତିରାଜ ଦିବସ ଅନଲାଇନରେ ପାଳନ କରିବା ପାଇଁ ନିଷ୍ପତ୍ତି ହୋଇଛି ।
3. ପ୍ରତିବର୍ଷ ଏହି ଅବସରରେ ପଞ୍ଚାୟତିରାଜ ମନ୍ତ୍ରଣାଳୟ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳଗୁଡିକର ଶ୍ରେଷ୍ଠ ପଞ୍ଚାୟତଗୁଡ଼ିକୁ ସମ୍ମାନିତ କରିଆସୁଛି । ସମ୍ମାନଗୁଡିକ ବିଭିନ୍ନ ବିଭାଗ ଅନୁଯାୟୀ ପ୍ରଦାନ କରାଯାଇଥାଏ । ସେଗୁଡିକ ହେଲା – ଦୀନ ଦୟାଲ ଉପାଧ୍ୟାୟ ପଞ୍ଚାୟତ ସଶକ୍ତିକରଣ ପୁରସ୍କାର (ଡିଡିୟୁପିଏସପି), ନାନାଜି ଦେଶମୁଖ ରାଷ୍ଟ୍ରୀୟ ଗୌରବ ଗ୍ରାମସଭା ପୁରସ୍କାର (ଏନଡିଆରଜିଜିଏସପି), ଚାଇଲ୍ଡ ଫ୍ରେଣ୍ଡଲୀ ଗ୍ରାମ ପଞ୍ଚାୟତ  ଆୱର୍ଡ (ସିଏଫଜିପିଏ), ଗ୍ରାମ ପଞ୍ଚାୟତ ଡେଭଲପମେଣ୍ଟ ପ୍ଳାନ (ଜିପିଡିପି) ଏବଂ ଇ-ପଞ୍ଚାୟତ ପୁରସ୍କାର । ଚଳିତ ବର୍ଷ ଲକଡାଉନ ଯୋଗୁଁ କେବଳ 3ଟି ଶ୍ରେଣୀ ଯଥା – ନାନାଜି ଦେଶମୁଖ ଗ୍ରାଷ୍ଟ୍ରୀୟ ଗୌରବ  ଗ୍ରାମସଭା ପୁରସ୍କାର, ଚାଇଲ୍ଡ ଫ୍ରେଣ୍ଡଲୀ ଗ୍ରାମ ପଞ୍ଚାୟତ ଆୱର୍ଡ ଏବଂ ଗ୍ରାମ ପଞ୍ଚାୟତ ଡେଭଲପମେଣ୍ଟ ପ୍ଳାନ ସମ୍ମାନର ତାଲିକା ଚୁଡାନ୍ତ କରାଯାଇଛି । ଅନ୍ୟ ଦୁଇଟି ଶ୍ରେଣୀର ସମ୍ମାନ ପୁରସ୍କାର ପରେ ଚୁଡାନ୍ତ କରାଯାଇ ରାଜ୍ୟଗୁଡିକୁ ପୃଥକ ଭାବେ ଜଣାଇ ଦିଆଯିବ ।
4. ଏନପିଆରଡି କାର୍ଯ୍ୟକ୍ରମ ଟେଲିକାଷ୍ଟ, ୱେବକାଷ୍ଟ, ଡିଡି ନ୍ୟୁଜ ଜରିଆରେ କରାଯିବ ଏବଂ ଏହି ଅନଲାଇନ କାର୍ଯ୍ୟକ୍ରମକୁ ରାଜ୍ୟଗୁଡ଼ିକର ପଞ୍ଚାୟତିରାଜ ବିଭାଗ ଓ ଏହାର ଆନୁଷଙ୍ଗିକ ବିଭାଗ, ଜିଲ୍ଲା, ମଣ୍ଡଳ, ପଞ୍ଚାୟତସ୍ତରୀୟ ସଙ୍ଗଠନଗୁଡିକ ଲକଡାଉନ କାଳରେ ସାମାଜିକ ଦୂରତ୍ଵ ସହ କୌଣସି ସାଲିସ ନକରି ପାଳନ କରିବେ ।

*********