କୋଭିଡ-19 ବିଶ୍ଵମାରୀକୁ ଦୃଷ୍ଟିରେ ରଖି କେନ୍ଦ୍ର କୃଷି ମନ୍ତ୍ରଣାଳୟ ପାଇକାରୀ ବଜାର ଓ ଯୋଗାଣ ବ୍ୟବସ୍ଥାକୁ ସୁଦୃଢ କରିବା ପାଇଁ କେତେକ ପଦକ୍ଷେପ ନେଇଛନ୍ତି । ଜାତୀୟ କୃଷି ବଜାର (ଇ-ନାମ) ପୋର୍ଟାଲକୁ ଦୁଇଟି ମଡ୍ୟୁଲ ସଂଯୁକ୍ତ କରି ଅଧିକ ସକ୍ରିୟ କରାଯାଇଛି । ପ୍ରଥମଟି ପଣ୍ୟାଗାର ଭିତ୍ତିକ ବାଣିଜ୍ୟିକ ମଡ୍ୟୁଲ ହୋଇଥିବା ବେଳେ ଦ୍ଵିତୀୟଟି କୃଷି ଉତ୍ପାଦକ ସଂଗଠନ (ଏଫପିଓ) ମଡ୍ୟୁଲ । ପଣ୍ୟାଗାର ଭିତ୍ତିକ ବାଣିଜ୍ୟିକ ମଡ୍ୟୁଲ ଦ୍ଵାରା ଚାଷୀମାନେ ସେମାନଙ୍କର ଉତ୍ପାଦିତ ସାମଗ୍ରୀ ପଣ୍ୟାଗାର ବିକାଶ ଏବଂ ନିୟନ୍ତ୍ରଣ ଅଥରିଟି ଜରିଆରେ ଉଦ୍ଦିଷ୍ଟ ବଜାରରେ ବିକ୍ରୟ କରିପାରିବେ । ଏଫପିଓ ମଡ୍ୟୁଲ ଦ୍ଵାରା ସଂଗଠନଗୁଡିକ ଉତ୍ପାଦିତ ସାମଗ୍ରୀଗୁଡିକୁ ସଂଗୃହିତସ୍ଥଳରୁ ସଂଗ୍ରହ କରି ଅନଲାଇନ ନିଲାମ ଜରିଆରେ ବିକ୍ରୟ କରିପାରିବେ । ସେଥିପାଇଁ ଚାଷୀମାନଙ୍କୁ ମଣ୍ଡିକୁ ଯିବାକୁ ପଡିବ ନାହିଁ । ଏପର୍ଯ୍ୟନ୍ତ 12 ରାଜ୍ୟ (ଓଡିଶା, ପଞ୍ଜାବ, ଗୁଜରାଟ, ରାଜସ୍ଥାନ, ପଶ୍ଚିମବଙ୍ଗ, ମହାରାଷ୍ଟ୍ର, ହରିୟାଣା, ଆନ୍ଧ୍ରପ୍ରଦେଶ, ତାମିଲନାଡୁ, ଉତ୍ତରାଖଣ୍ଡ, ଉତ୍ତରପ୍ରଦେଶ ଓ ଝାଡଖଣ୍ଡ) ଏହି ବାଣିଜ୍ୟରେ ଅଂଶଗ୍ରହଣ କରିଛନ୍ତି ।

ଉଭୟ ରାଜ୍ୟ ଓ କେନ୍ଦ୍ରଶାସିତ ସରକାରଗୁଡିକୁ କୃଷକ, ଏଫପିଓ ଓ ସମବାୟ ଜରିଆରେ ପ୍ରତ୍ୟକ୍ଷ ବିପଣନ ପାଇଁ କୃଷି ମନ୍ତ୍ରଣାଳୟ ମାର୍ଗଦର୍ଶୀକା ଜାରି କରିଛି । ଏଫପିଓଗୁଡିକ ମଧ୍ୟ ନିକଟବର୍ତ୍ତୀ ନଗର ଓ ସହର ମଧ୍ୟରେ ପନିପରିବା ବିକ୍ରୟ କରୁଛନ୍ତି । ସାମଗ୍ରୀ ପରିବହନ ଜନିତ ସମସ୍ତ ସମସ୍ୟାକୁ ତତ୍କାଳ ସମାଧାନ କରାଯାଉଛି । ଏଫପିଓଗୁଡିକୁ ରାଜ୍ୟ ସରକାରମାନେ ପାସ ଓ ଇ-ପାସ ଜାରି କରିବା ପାଇଁ ନିଷ୍ପତ୍ତି ନେଇଛନ୍ତି ।

ଲକଡାଉନ କାଳରେ ଇ-ନାମ ସାମାଜିକ ଦୂରତ୍ଵ ରକ୍ଷାର ଏକ ମାଧ୍ୟମ ହୋଇପାରିଛି । ରାଜ୍ୟଗୁଡିକ ମଧ୍ୟ ଇ-ନାମ ଜରିଆରେ ସଂଗୃହିତସ୍ତଳରୁ ଖାଦ୍ୟଶସ୍ୟ ଆଣି ଅନଲାଇନ ଜରିଆରେ ବ୍ୟବସାୟ କରିପାରୁଛନ୍ତି । ଝାଡଖଣ୍ଡ ଭଳି ରାଜ୍ୟ ଇ-ନାମ ଜରିଆରେ ଏପିଏମସିକୁ ନଯାଇ ସେମାନଙ୍କ ଶସ୍ୟର ବିସ୍ତୃତ ବିବରଣୀ ଅନଲାଇନ ଜରିଆରେ ପ୍ରଦାନ କରୁଛନ୍ତି ।

କୃଷିଜାତ ସାମଗ୍ରୀ ପରିବହନ ଯୋଗାଣ ପଦ୍ଧତି ପାଇଁ ଏକ ଅବିଚ୍ଛେଦ ଅଙ୍ଗ ହୋଇଥିବାରୁ ମନ୍ତ୍ରଣାଳୟ କିଷାନ ରଥ ନାମକ ଏକ ମୋବାଇଲ ଆପ ବିକଶିତ କରିଛି । ଏହାଫଳରେ ଚାଷୀମାନେ ସେମାନଙ୍କ କୃଷି ଓ ଉଦ୍ୟାନଜାତ ସାମଗ୍ରୀଗୁଡିକୁ ଠିକଣା ଜାଗାରେ ପହଞ୍ଚାଇବା ପାଇଁ ବିସ୍ତୃତ ତଥ୍ୟ ଏହି ଆପ ଜରିଆରେ ପାଇପାରୁଛନ୍ତି । ପ୍ରାଥମିକ ପରିବହନ ବ୍ୟବସ୍ଥାରେ ଫାର୍ମରୁ ମଣ୍ଡି, ଏପିଓ କେନ୍ଦ୍ର, ଗାଁ ହାଟ, ରେଳ ଷ୍ଟେସନ ଓ ପଣ୍ୟାଗାରଗୁଡିକୁ ଜିନିଷପତ୍ର ପରିବହନ କରିବା ଅନ୍ତର୍ଭୁକ୍ତ । ପ୍ରାରମ୍ଭିକ ପରିବହନରେ ଶସ୍ୟ ସାମଗ୍ରୀ ମଣ୍ଡିରୁ ଆନ୍ତଃରାଜ୍ୟ ମଣ୍ଡି, ଆନ୍ତଃରାଜ୍ୟ ପଣ୍ୟାଗାର ଓ ପାଇକାରୀ କେନ୍ଦ୍ର ଇତ୍ୟାଦି ଅନ୍ତର୍ଭୁକ୍ତ । କିଷାନ ରଥ ଆପ ଉଭୟ ଇ-ନାମ ଓ ଅଣ ଇ-ନାମ ମଣ୍ଡିଗୁଡିକ ପାଇଁ କାର୍ଯ୍ୟ କରିପାରିବ ।

ଇ-ନାମ ପ୍ଲାଟଫର୍ମରେ କରାଯାଇଥିବା ସ୍ଵତନ୍ତ୍ର ବ୍ୟବସ୍ଥା ଜରିଆରେ ବ୍ୟବସାୟୀମାନେ ସେମାନଙ୍କ ନିକଟସ୍ଥ ପରିବହନକାରୀ ଓ କୃଷିଜାତ ସାମଗ୍ରୀର ମଣ୍ଡିରୁ ବିଭିନ୍ନ ସ୍ଥାନକୁ ପରିବାହନର ସୂଚନା ପାଇପାରିବେ । ଏହି ମଡ୍ୟୁଲ ସହିତ 11.37 ଲକ୍ଷରୁ ଊର୍ଦ୍ଧ୍ଵ ଟ୍ରକ ଓ 2.30 ଲକ୍ଷରୁ ଉର୍ଦ୍ଧ୍ଵ ପରିବହନକାରୀଙ୍କୁ ସଂଯୋଗ କରାଯାଇଛି । 

ଅତ୍ୟାବଶ୍ୟକ ସାମଗ୍ରୀ ପରିବହନ କରି ଯାଉଥିବା ଯାନବାହାନଗୁଡିକୁ ଆନ୍ତଃରାଜ୍ୟ ଚଳାଚଳ ପାଇଁ ସରକାର ନିଷ୍ପତ୍ତି ନେଇଛନ୍ତି । ମନ୍ତ୍ରଣାଳୟ ରାଜ୍ୟ କୃଷି ବିପଣନ ବୋର୍ଡ ସହ ଯୋଗସୂତ୍ର ରକ୍ଷା କରି ରାଜ୍ୟ ରାଜ୍ୟ ମଧ୍ୟରେ ଆହୋରାତ୍ର ଫଳ ଓ ପନିପରିବା ପରିବହନ କାର୍ଯ୍ୟକୁ ସୁଗମ କରିଛନ୍ତି । ସରକାର ଫଳ ଓ ପନିପରିବା ବଜାରଗୁଡିକର କାର୍ଯ୍ୟ ସହ କୃଷକ ଉପଭୋକ୍ତା ବଜାରର ପରିଚାଳନା ଉପରେ ତୀକ୍ଷଣ ନଜର ରଖିଛନ୍ତି ।

ମହାରାଷ୍ଟ୍ର ମଣ୍ଡିଗୁଡିକ ସହ ଯୋଗାଯୋଗ କରି ମହାରାଷ୍ଟ୍ରରୁ ଅନ୍ୟାନ୍ୟ ରାଜ୍ୟକୁ ପିଆଜ ଯୋଗାଣର ସୁବିଧା କରିଛନ୍ତି । ବର୍ତ୍ତମାନ ନାସିକ ଜିଲ୍ଲା ଅଧୀନରେ ଥିବା ଏପିଏମସି ଦିନକୁ ଅନୁନ୍ୟ 300 ଟ୍ରକ ପିଆଜ ଦିଲ୍ଲୀ, ହରିୟାଣା, ବିହାର, ତାମିଲନାଡୁ, ପଞ୍ଜାବ, କୋଲକାତା, ଜମ୍ମୁ-କଶ୍ମୀର, କର୍ଣ୍ଣାଟକ, ଓଡିଶା, ଗୁଜରାଟ, ଆସାମ, ରାଜସ୍ଥାନ ଓ ମଧ୍ୟପ୍ରଦେଶ ପ୍ରଭୃତି ରାଜ୍ୟକୁ ନିୟମିତ ପଠାଉଛନ୍ତି । ଉତ୍ତରପୂର୍ବାଞ୍ଚଳ ରାଜ୍ୟଗୁଡିକୁ ଫଳ ଓ ପନିପରିବା ଏବଂ ଅତ୍ୟାବଶ୍ୟକ ସାମଗ୍ରୀ ଯୋଗାଣ ତଥା ଏହାର ମୂଲ୍ୟର ନିୟନ୍ତ୍ରଣ ପାଇଁ ଏକ ପୃଥକ ସେଲ ମଧ୍ୟ ସୃଷ୍ଟି କରାଯାଇଛି ।

**********