হৌজিক ওইরিবা তংদু লৈতাদবা মতম অসিদা ৱাখলগী মঙাল অমা পীরিবসি লৌ-শিংউবননি অমসুং মসিনা মীয়ামদা চাবা ৱাৎলোইদবগী থাজহনবা অমসু পীরি। ভারত শিনবা থুংনা লৌমীশিংনা খুদোংচাদবা কয়া মায়োক্নদুনা লৌবুক্তা হুমাং তাদুনা থবক কন্না শুরি। মখোইনা মনা মনিন নাইদনা থবক শুরিবা অমসুং কেন্দ্র অমসুং রাজ্যগী সরকারনা মতম চানা মতেং পাংলিবা অসিনা মরম ওইদুনা লৌ খাওবদা অমসুং কালেন থাগী মহৈ মরোং থাবদা খজিক্তং অমসুং শুংলেপ লেপ্তনা মখা চত্থবা য়াবগী ওইথোকপা য়ানবসু হোৎনদুনা মায় পাক্লে।   

হোম এফিয়র্স মন্ত্রালয়না কোবিদ-১৯গী লাইচৎ অসিবু লাকশিন্নবা হায়দুনা চেকশিন থৌরাং কয়া অমা থোক্লবসু লৌ-শিংউবগী থবকশিংদা অকাইবা লৈতনা নীংথিনা চত্থনবা থৌরাং থৌশিল কয়া অমসু পীরি। মতম চানা য়েংশিলহৌবা অমসুং অথিংবা লৈতবনা অফবা মহৈ কয়া অমা ফংবা ঙম্লে। লৌমীশিংনা লৌ-উবা মতমদা মশা ঙাকথোকচনবা অমসুং সোসিএল দিস্তেনশিং থমদুনা থবক শুনবা স্তেন্দর্দ ওপরেসন প্রোসেজর (এস.ও.পি.) কয়া অমা হান্ননা খঙহনখ্রবনি। অসিগুম্বা থবক থৌরমশিং অসি চত্থখিবা মরম্না রবীগী মহৈ মরোং লোকপা অমসুং কালেন থাগী মহৈ মরোং থাবদা কাংলোন চুম্না চত্থখ্রিবনী। 

রবী মনা-মশিং লোকপগী মতাংদা লৈবাক অসিদা ঐচ.এ. লাখ ৩১০দা থাখিবা গেহুগী শরুক ৬৩-৬৭% লোকখ্রে। রাজ্যগী থাক্তা মনা-মশিং খাওখিবগী চাংসু হেনগৎলে অমসুং মধ্য প্রদেশতা ৯০-৯৫%, রাজস্থানদা ৮০-৮৫%, উত্তর প্রদেশতা ৬০-৬৫%, হরিয়ানাদা ৩০-৩৫% অমসুং পঞ্জাবতা ১০-১৫% য়ৌখি। হরিয়ানা, পঞ্জাব অমসুং য়ু.পি.দা মনা-মশিং খাওখিবগী চাং খম থেংনা ৱাংখি অমসুং এপ্রিল ২০২০ ফাওবগী মনুংদা লোইশিনবা য়াই। মনা-মশিং খাওবা অমসুং য়ৈনবা পঞ্জাবনা কম্বাইন্স ১৮০০০ অমসুং হরিয়ানানা কম্বাইন্স ৫০০০ শিজিন্নখি।  

ঐচ.এ. লাখ ১৬১দা থাখিবা হৱাইগী মনুংদা গ্রাম, লেন্তিল, উরদ, মুং অমসুং হৱাই থরাক খাওবদি লোইশিনখ্রে। চুগী ওইনদি ঐচ.এ. লাখ ৫৪.২৯দা থাখিবগী মনুংদা মহারস্ত্রা, কর্নাতকা, গুজরাত, আন্ধ্র প্রদেশ, তেলঙ্গানা অমসুং পঞ্জাবতদি খাওবা লোইখ্রে। তমিল নাদু, বিহার, হরিয়ানা অমসুং উত্তরাখন্দ রাজ্যগী ওইনা ৯২-৯৮%কী চাংদা খাওবা লোইখ্রে। উত্তর প্রদেশকী ওইনা ৭৫-৮০%কী চাংদি লোইশিল্লে অমসুং মসিনা মে, ২০২০ ফাওবা চত্থখিগনি।

আন্ধ্র প্রদেশ, অসম, ছতিসগর, গুজরাত, কর্নাতকা, কেরলা, ওরিশা, তমিলনাদু, তেলঙ্গানা, ত্রিপুরা অমসুং নোংচুপ বঙ্গালগী ওইনা ঐচ.এ. লাখ ২৮দা থাখিবা রবীগী চেংগী ওইনদি ফৌশিং অদু মবুক থনবা য়ৌদ্রিবা মরম্না খাওবগী অঙনবা থাক্তা লৈরি অমসুং খাওবগী মতমসু অমগা অমগা খেৎনগনি।

থাও থোকপা মহৈ মরোংগী ওইনদি ঐচ.এ. লাখ ৬৯দা থাখিবা রেপসিদ মস্তার্দশিংদি রাজস্থান, য়ু.পি., এম.পি., হরিয়ানা, নোংচুপ বঙ্গাল, ঝারখন্দ, গুজরাত, ছতিসগর, বিহার, পঞ্জাব, অসম, অরুনাচল প্রদেশ অমসুং জম্মু অমসুং কশ্মীরগী, য়ু.তি.গী ওইনদি খাওবা লোইখ্রে। ঐচ.এ. লাখ ৪.৭তা থাখিবা লৈবাক হৱাইগী ওইনদি ৮৫-৯০%কী চাংদা খাওবা লোইখ্রে।

কালেন থাগী মহৈ মরোং থাবা অসি ভারতকী ওইনদি মতম কুইনদগী চৎনরক্লবা থৌওং অমনি অমসুং মসি য়ুমগী ওইবা চেং চাক্কী অমসুং শা-শনগী মচিঞ্জাক্কী ওইনা তৌনৈ। লৌউ-শিংউ অমসুং লৌমীশিংগী য়াইফ-থৌরাংগী মন্ত্রালয়না হৱাইশিং, অপৌবা সিরিএলশিং, মচি লৈবা সিরিএলশিং অমসুং থাও থোকপা মরুশিং সাইন্তিফিক ওইবা মওংদা থাননবা অনৌবা খোঙথাং কয়া অমসু লৌখৎখ্রে। মসিগী মথক্তা লৌউবশিং অসিনা ঈশিং ফংবগী মতুং ইন্না নোংপোক থংবা অমসুং ময়াই ওইবা ভারতকী মফমশিংগী রাজ্যশিংদা কালেনগী ফৌসু থানরি। 

এপ্রিল ১৭, ২০২০ ফাওবদা, লৈবাক অসিগী কালেনগী ওইনা খাওবদা মমাং চহীগী মান্নবা মতম অসিগা চাংদম্নবদা ১৪% হেন্না খাওরে। হন্দকী কুম অসিদা মমাং চহীগী মান্নবা মতমগা চাংদম্নবদা নোং তাবগী চাং অসি ১৪% হেনখি অমসুং মসিনা কালেন থাগী মহৈ মরোং থাবদা য়াম্না চান্নবা অমা ওইখি। হৌজিক ফাওবগী কালেন থাগী মহৈ মরোং থাবা লমগী অপুনবা পাক চাউবা অসি মমাংগী চহীদা হেক্তর লাখ ৩৮.৬৪ ওইরম্বদগী হেক্তর লাখ ৫২.৭৮ ওইদুনা হেনগৎলে। হৱাইশিং, অপৌবা সিরিএলশিং, মচি লৈবা সিরিএলশিং অমসুং থাও থোকপা মরুশিং থাবা লমগী অপুনবা পাক চাউবা অসি মমাংগী চহীদা ওইরম্বা হেক্তর লাখ ১৪.৭৯ ওইরম্বদগী হেক্তর লাখ ২০.০৫ ওইদুনা হেনগৎলে। 

কালেনগী মুং মরু থাননবা সীদ দ্রীল শিজিন্নদুনা শেম শাবা

কালেনগী চেং অসি নোংচুপ বঙ্গাল, তেলঙ্গানা, ওরিশা, অসম, গুজরাত, কর্নাতকা, ছতিসগর, তমিলনাদু, বিহার, মহারাস্ত্র, মধ্য প্রদেশ অমসুং কেরলাগী ঐচ.এ. লাখ ৩৩ পাক চাউবা মফমদা থাখ্রে।

তমিল নাদু, উত্তর প্রদেশ, নোংচুপ বঙ্গাল, গুজরাত, ছতিসগর, বিহার, পঞ্জাব, কর্নাতকা, মহারাস্ত্র, মধ্য প্রদেশ, ঝারখন্দ অমসুং তেলঙ্গানাগী রাজ্যশিংদা পুন্না ঐচ.এ. লাখ ৫ পাক চাউবা মফমদা হৱাই থাবসু হৌখ্রে।

সীদ দ্রীলনা থারবা কালেনগী মুংগী মহৈ মরোং

নোংচুপ বঙ্গাল, কর্নাতকা, গুজরাত, উত্তর প্রদেশ, মহারাস্ত্র, তমিল নাদু, তেলঙ্গানা, ছতিসগর, মধ্য প্রদেশ, পঞ্জাব অমসুং বিহারগী পুন্না ঐচ.এ. লাখ ৭.৪ পাক চাউবা মফমদসু থাও থোকপা মহৈ মরোং থাবা হৌখ্রে। নোংচুপ বঙ্গালদা লিমোন থাবসু হৌখ্রে অমসুং নোং তাবদগী য়াম্না কান্নবসু ফংখ্রে।

কালেন থাগী মহৈ মরোং অসিনা অহেনবা শেন্থোক ফংহনবতা নত্তনা লৌমীশিংদা রবী অমসুং খরিফকী মহৈ মরোং থাদ্রিঙৈগী মরক্তসু থবক শুনবগী খুদোংচাবা কয়া অমা পী। কালেন থাগী মহৈ মরোং, মরু ওইনা হৱাইগী মহৈ মরোং, থাবনা লৈবাক লৈহাও ফবসু হেনগৎহল্লি। মেকানাইজদ সোৱিং তৌবা অসিনা কালেন থাগী মহৈ মরোংশিংদা হেন্না কান্নবসু পী। 

কেন্দ্র অমসুং রাজ্যগী সরকারনা তাকপী-তম্বীবা অমসুং শেন্নবীবা অসিনা মতম চানা মহৈ মরোং লোকপদসু মতেং পাংবতা নত্তনা লৌমীশিংনা কন্না থবক শুজদুনা কালেন থাগী মহৈ মরোং থাবগী লমগী পাক চাউবসু হেনগৎহল্লে।