খুঙ্গং চাউখৎ-থৌরাং, পঞ্চায়তী রাজ অমসুং লৌউ-শিংউ অমসুং লৌমীশিংগী য়াইফ-থৌরাংগী মন্ত্রী শ্রী নরেন্দ্র সিংহ তোমারনা রাজ্য অমসুং য়ুনিয়ন তেরিতোরীশিংগী খুঙ্গং চাউখৎ থৌরাং মন্ত্রীশিং অমসুং মরী লৈনবা ওফিসরশিংগা লোয়ননা ইং ২০২০গী এপ্রিলগী তাং ২০দগী নোন-কন্তেনমেন্ত এরিয়াশিংদা কোমথোক্কদবা অসিগী মাঙওইননা পুং অনী শাংবা ভিদিও কনফরেন্স অমা পাঙথোকখ্রে, অমসুং হায়রিবা নোন-কন্তেনমেন্ত এরিয়াশিংদা মহাত্মা গান্ধী রুরেল ইম্প্লোইমেন্ত গরেন্তী স্কিম (এম.জি.এন.আর.ই.জি.এস.), প্রধান মন্ত্রী গ্রাম সরক য়োজনা (পি.এম.জি.এস.ৱাই.) অমসুং নেস্নেল রুরেল লাইবলিহুদ মিসন (এন.আর.এল.এম.)গী থবকশিং হৌনবা খন্নখ্রে।

শ্রী নরেন্দ্র সিংহ তোমারনা কোভিদ-১৯ লাইচৎ শন্দোরকপনা ঐখোয়দা পীরিবা খুদোংথীবা অসি য়াম্না শাথীবা তারবসু মসিগী মিৎকুপ অসিদা রাজ্যশিং/য়ু.তি.শিংনা খুঙ্গংগী শেমগৎ-শাগৎকদবশিং চাউখৎহলহৌগদবনি অমসুং মপাঙ্গল কলহলহৌনবা, খুঙ্গংগী মফমশিংদা থবক্কী খুদোংচাবা পীনবা অমসুং খুঙ্গংগী পুন্সি মহিং পাক-চাউহন্নবা খুদোংচাবা অমনি হায়না লৌগদবনি।

এম.জি.এন.আর.ই.জি.এস.কী মখাদা, জল শক্তি মন্ত্রালয়গী স্কিমশিং অমসুং লেন্দ রিসোর্সকী দিপার্তমেন্তকা খুৎশম্নদুনা ঈশিং কনবা, ঈশিং রিচার্জ তৌবা অমসুং ঈথৈ-লৌখোংগী থবকশিংদা মিৎয়েং থমগদবনি হায়না মহাক্না পুক্নিং চিংশিনখি।

নুপীশিংগী এস.ঐচ.জি.শিংনা এন.আর.এল.এম.গী মখাদা প্রোতেক্তিব ফেস কভরশিং, সেনিতাইজরশিং, সাপোনশিং অমসুং মশিং য়াম্লবা ময়ামগী চান-থক্নবা থোংফমশিং চলাইরি তাবদা থাগৎপা ফোঙদোকখি। মহাক্না এস.ঐচ.জি. অমসুং মখোয়গী পোত্থোকশিং ঙম্লিবমখৈ সরকারগী ই-মার্কেৎ (জি.ই.এম.) পোর্তেলদা পুথোক্কদবনি অমসুং এস.ঐচ.জি. ইন্তর্প্রাইজেসশিং অসি পাকথোক-চাউথোকহনগদবনি অমসুং মপাঙ্গল কলহনগদবনি হায়না ফোঙদোকখি।

পি.এম.এ.ৱাই. (জি.)গী মখাদা ইহান হান্না তৌগদবা থবক অসি খুদোংচাবা ফংগদবশিংদা ৩শুবা অমসুং ৪শুবগী ইন্সতোলমেন্ত ওইনা পীখ্রবা য়ুম লাখ ৪৮দু লোইশিনবনি। পি.এম.জি.এস.ৱাই.গী মখাদনা শেল কাইথখ্রবা লম্বী শেম্বগী প্রোজেক্তশিংগী তেন্দর পীবা অমসুং লোইশিন্দনা লৈরিবা লম্বী শেম্বগী প্রোজেক্তশিং অমুক হৌবদা মিৎয়েং থমগনি। 

মহাক্না পনখি মদুদি, মন্ত্রালয় অসিনা পি.এম.এ.ৱাই. (জি.), পি.এম.জি.এস.ৱাই., এন.আর.এল.এম. অমসুং এম.জি.এন.আর.ই.জি.এস.কী মখাদা থবক শুবা মতমদা চেকশিন-থৌরাং পুম্বা ঙাক্না চৎনবা রাজ্য/য়ু.তি.শিংদা মাঙজৌননা এদভাইজরীশিং পীদুনা খঙহনখ্রে। মহাক্না মখা তানা শিন্মীশিং অশোই-অঙাম য়াওদনবা অমসুং মখোয়গী য়াইফনবা য়েংদুনা এদভাইজরীদা য়াওরিবা পুম্নমক ঙাক্না চত্তুনা চেকশিন-থৌরাং পুম্নমক লৌখৎকদবনি হায়নসু তকশিনখি। রাজ্যশিং/য়ু.তি.শিংদা মহাক্না শেল-থুমগী মতেং মতিক চানা মখোয়দা থাদগনি হায়নসু থাজবা পীখি।

রাজ্যশিং/য়ু.তি.শিংনা কেন্দ্রগী খুঙ্গং চাউখৎ-থৌরাং, পঞ্চায়তী রাজ অমসুং লৌউ-শিংউ অমসুং লৌমীশিংগী য়াইফ-থৌরাংগী মন্ত্রীগী ৱাফমশিংদা মপুং ফানা য়াখি। বিহার, কর্নাতকা, হরিয়ানা অমসুং ওরিশানা অকক্ননা এম.জি.এন.আর.ই.জি.এস.কী মখাদা থবক শুবগী পীগদবা ৱাৎলিবা খুৎশুমল অমসুং পোৎচৈশিংগী চাদা ১০০ থাদবীরকপগীদমক কেন্দ্র সরকারবু থাগৎপা ফোংদোকখি। বিহার, উত্তর প্রদেশ অমসুং হরিয়ানানা  পি.এম.এ.ৱাই. (জি.)গী মখাদা অহেনবা পান্দমশিং পীবীনবা হায়জখি। ওরিশানা এন.আর.এল.এম.গী মখাদা পাকথোক চাউথোক্না ফার্ম অমসুং নোন-ফার্ম ইন্তর্প্রাইজশিং প্রোমোত তৌবগী মথৌ তারিবশিংগী মতাংদা থমখি।

রাজ্যশিং/য়ু.তি.শিংনা মখোয়গী খুঙ্গং চাউখৎ-থৌরাংগী ফিল্দ স্তাফশিং, পঞ্চায়তী রাজ ইন্সতিত্যুতশিংগী মথৌ তৌরিবশিং অমসুং অতোপ্পা কম্যুনিতী লেবেলদা থবক তৌরিবশিংনা কেন্দ্রগী য়ুম্লৈ-কৈরৈ মন্ত্রালয়, হকশেল অমসুং য়াইফ-য়ুম্বাল মন্ত্রালয় অমসুং খুঙ্গং চাউখৎ-থৌরাং মন্ত্রালয়গী পাউতাকশিং ইন্দুনা খুঙ্গংগী চাউখৎ-থৌরাংগী স্কিমশিং চেকশিন্না, কান্নবা মপুং ফানা ফংগদবা মওংদা মথৌ তৌরি হায়না থাজবা পীখি।