সেন্তর ফোর সেলুলর এন্দ মোলিক্যুলর বাইওলোজী (সি.সি.এম.বিও) অমদি ইনস্তিত্যুৎ ওফ জিনোমিক এন্দ ইন্তিগ্রেতেদ বাইওলোজী (আই.জি.আই.বি.)গী মতুংদা কাউন্সিল ওফ সাইন্তিফিক এন্দ ইন্দস্ত্রিএল রিসর্চ (সি.এস.আই.আর.)গী অতোপ্পা ইনস্তিত্যুৎ অমনসু নোভেল কোরোনাভাইরসকী অপুনবা জিনোম সিকুএন্সিংগী থবক হৌখ্রে‍। চান্দীগরদা লৈবা ইনস্তিত্যুৎ ওফ মাইক্রোবিএল তেক্নোলোজী (আই.এম.তেক)না ভাইরস অসিগী জিনোম সিকুএন্সিংগী পাক চাউরবা থবক অসি পায়খৎখ্রে‍।

মাইক্রোবশিংদগী হেন্না ভাইরসশিং অসিনা ম্যুতেসনগী খোঙজেল য়াম্না ৱাংই অমদি মখোয়না মথং মথং শন্দোরকলিবমখৈ মখোয়গী জিনেতিক মচাকশিং অসিসু য়াম্না থুনা হোংই‍। “হায়রিবা জিনোম সিকুএন্সিংগী সেম্পলশিং অসি মালেম্না শকখঙনরবা রিপোজিতরীদা থাগৎকনি,” হায়না আই.এম.তেককী দিরেক্তর দাঃ সঞ্জীব খোস্লানা ইন্দিয়া সাইন্স ৱায়রদা ফোঙদোকখি‍। জিনোম সিকুএন্সিংগী মপুং ফারবা মচাকশিং অসিনা থিজিল্লোইশিংগী মফমদা ভাইরস অসিগী হৌরকফম, ইন্দিয়াদা শন্দোক্লিবা স্ত্রেন মখলশিং অমসুং মসিনা লৈবাকসিগী কাচিন কোয়া শিন থুংনা কমদৌনা শন্দোকপগে হায়বনচিংবশিংগী মরমদা মমুৎ তানা খঙবা ঙমহনগনি‍। “সিকুএন্সিং অসিদগী ফংলকপা জিনোমিক মচাকশিং অসিনা কোভিদ-১৯ নাবা মী খঙদোক্নবা অনৌবা তার্গেৎ খঙদোকপা অমসুং হীদাক পুথোকপদা মতেং ওইরগনি,” হায়না দাঃ খোস্লানা হায়খি‍।

অপুনবা জিনোম সিকুএন্সিং অসি অকক্নবা ওর্গানিজম অমগী জিনোমগী দি.এন.এ. সিকুএন্স খঙদোক্নবা চত্থবা থৌওং অমনি‍। মাইক্রোবিএল অমদি জিনোমিক রিসর্চগী লমদা থোইদোক হেন্দোক্না মমীং লৈরবা ইনস্তিত্যুৎ অমা ওইনা সি.এস.আই.আর.-আই.এম.তেকনা ক্লিনিকেল সেম্পলশিংদগী থাইদোরকপা সার্স-কোভ-২গী আর.এন.এ. জিনোমগী সিকুএন্সিংগী থবক পাঙথোক্কনি‍।

ইং ২০০৮দা দব্লিউ.ঐচ.ও.না লৈবাকশিংগী মরক্তা জিনোম সিকুএন্স স্যের তৌননবগীদমক শেমখিবা পব্লিক প্লেতফোর্ম – গ্লোমেল ইনিসিএতিভ এন স্যেরিং ওল ইনফ্লুএঞ্জা দাতা (জি.আই.এস.এ.আই.দি.)গী মতুং ইন্না মালেমগী ওইনা হৌজিকফাওবদা সেম্পল ৯০০০ সিকুএন্স তৌখ্রে‍। হায়রিবা সিকুএন্সিং অসিদগী ফংলকপা জিনোমিক মচাকশিং অসিনা কোভিদ-১৯না নাহনগদবা মীওইশিং খঙদোকপা অমসুং হীদাক পুথোকপদা মতেং ওইগনি‍।

সি.এস.আই.আর.-আই.এম.তেক দিরেক্তর দাঃ সঞ্জীব খোস্লানা হায়, “ঐখোয়না সেম্পলশিংগী ক্লিনিকেল চাংয়েং তৌবা হৌরে অমদি ভাইরেল স্ত্রেনশিং সিকুএন্স তৌবগী মিসন অসিদা খোঙ থাংজিল্লদুনা হৌজিক্তি মালেমগী ওইনা লাইচৎ থোকহল্লিবা ভাইরস অসিগী মওং মতৌ খঙদোকপদা হেন্না মতিক চাবা ওইরগনি‍।” সি.এস.আই.আর.-আই.এম.তেকনা মখোয়গী হৈজ-শীংজবশিং অদু পোর্তেবল, রিএল-তাইম অমসুং ইন্দিয়াদগী ফংলিবা সার্স-কোভ-২গী স্ত্রেনশিং অসিগী কেমিকেল মোদিফিকেসন থিজিন্নবা দাইরেক্ত জিনোম সিকুএন্সিং তৌবদা  শীজিন্নগদৌরি‍।

****