পুনেস্থিত চিএছআইআৰ-নেচনেল কেমিকেল লেব’ৰেটৰী(এনচিএল)য়ে ক’ৰোনা ভাইৰাছৰ প্ৰাদূৰ্ভাৱৰ বিৰুদ্ধে যুঁজ দিবলৈ ইয়াৰ উদ্যোগ কেন্দ্ৰৰ জৰিয়তে নতুন উদ্ভাৱন আৰু উদ্যমিতা প্ৰসাৰত নেতৃত্ব আগবঢ়াইছে। ক’ৰোনা ভাইৰাছৰ প্ৰাদূৰ্ভাৱৰ নিয়ন্ত্ৰণ কৰিব পৰা এনে দুটা শেহতীয়া উদ্ভাৱন হ’লঃ

১) ডিজিটেল আইআৰ থাৰ্মোমিটাৰঃ চিএছআইআৰ-এনচিএলৰ উদ্যোগ কেন্দ্ৰৰ ইনকিউবেটি বিএমইকেৰ মূৰব্বী শ্ৰীমান প্ৰতীক কুলকাৰ্ণীয়ে হাতেৰে ব্যৱহাৰ কৰিব পৰা এক ডিজিটেল থাৰ্মোমিটাৰ প্ৰস্তুত কৰিছে। ই হ’ল ক’ৰোনা ভাইৰাছৰ প্ৰাদূৰ্ভাৱ নিয়ন্ত্ৰণ কৰিব পৰা এক উপযোগী আহিলা। মোবাইল ফোন অথবা পাৱাৰ বেংকক এই থাৰ্মোমিটাৰৰ শক্তি উৎস হিচাপে ব্যৱহাৰ কৰিব পাৰি। আইআৰ থাৰ্মোমিটাৰৰ ডিজাইন অ’পেন ছ’ৰ্চৰ ৰূপত উপলব্ধ হৈছে। ইয়ে থাৰ্মোমিটাৰ নিৰ্মাণৰ স্থানীয় চাহিদা পূৰণত সহায় কৰিব। এতিয়া ভাৰত ইলেক্ট্ৰ’নিকছ লিমিটেড, পুনেৰ অংশীদাৰিত্বৰ সৈতে ইয়াৰ নিৰ্মাণ বৃদ্ধি কৰা হ’ব।

২) দ্বিতীয়টো উদ্ভাৱন হ’ল অক্সিজেন সংবৰ্ধন ইউনিট(অ’ইইউ): ক’ভিড-১৯ ৰোগীয়ে উশাহ-নিশাহত সমস্যাৰ সন্মুখীন হোৱাত তেনে ৰোগীৰ বাবে এটা জৰুৰী প্ৰয়োজনীয় আহিলা হ’ল অক্সিজেন। এই প্ৰয়োজনীয়তাৰ প্ৰতি লক্ষ্য ৰাখি এনচিএলৰ পলিমাৰ ছায়েন্স এণ্ড ইঞ্জিনিয়াৰিং ডিভিজনৰ মূৰব্বী ড০ উলহাছ খাৰুলে অক্সিজেন সংবৰ্ধিত ইউনিট(অ’ইইউ) বিকশিত কৰিছে। এই ইউনিটে পৰিৱেশৰ বায়ুমণ্ডলত অক্সিজেনৰ মাত্ৰা ২১-২২ শতাংশৰ পৰা ৩৮-৪০শতাংশলৈ বৃদ্ধি কৰে। ইয়াৰ বৈধতা পৰীক্ষাৰ বাবে বাংগালুৰুৰ টিইউভি ৰেইনলেণ্ড ইণ্ডিয়া প্ৰাইভেট লিমিটেডলৈ প্ৰেৰণ কৰা হৈছে। প্ৰায় ১০টা অ’ইইউ মেছিন পুনেৰ এনচিএল বিইএলত একগোট কৰা হ’ব আৰু পৰীক্ষাৰ পিছত ইয়াৰ নিৰ্মাণ বৃদ্ধি কৰা হ’ব।

*****

KGS/(DST-CSIR)/MS