কোবিদ-১৯গা মায়োক্নবা মখা চৎথরদুনা ভারতকী রেলৱেনা ভারত সরকারগী হকশেলগা মরী লৈনবা থবকশিংদা মতেং পাংনবগীদমক্তা অঙম্বা থাক্তা হোৎনরি। মসিগী মতাংদা পাইখৎলিবা তোঙান তোঙানবা খোংথাংশিংদা রেলৱেগী লৈরিবা হোস্পিতালশিংবু কোবিদ-১৯গা মরী লৈনবা মথৌ তাবশিং মপুং ফাহনবা ঙমহন্নবা, ইমর্জেন্সীগী মতমদা থবক পাইখৎনবা হোস্পিতালগী ফমুংশিং ফংহনবা, অমসুং দোক্তরশিং অমসুং পেরামেদিকশিং লৌবা, পেসেঞ্জর কোচশিংবু আইসোলেসন কোচশিং ওন্থোকপা, মেদিকেল ইকুইপমেন্তশিং ফংহনবা, পি.পি.ই. অমসুং ভেন্তিলেতরশিং অসিনচিংবা মসিগী মনুংদা শেমগৎপা অসিনচিংবা য়াওরি।

রেলৱেগী হকশেল বিভাগ অসি কোবিদ-১৯গী লানফম অসিদা ভারত সরকারগী হকশেলগা মরী লৈননা হোৎনরিবশিং অসিদা মতেং পাংনবগীদমক্তা মিৎকুপ নাহুমশিংনা অমদি শেম-শাদুনা লৈরি। পনবা য়াই মদুদি লৈবাক অপুনবা অসিদা রেলৱেগী হেল্থ য়ুনিৎ ৫৮৬, সব দিবিজনেল হোস্পিতাল ৪৫, দিবিজনেল হোস্পিতাল ৫৬, প্রদক্সন য়ুনিৎ হোস্পিতাল ৮ অমসুং জোনেল হোস্পিতাল ১৬ লৈরি। হায়রিবা খুদোংচাবশিং অসিগী য়াম্না চাউবা শরুক অমা কোরোনা ভাইরসকা মায়োক্ননবা কৎথোক্লি।

দোক্তরশিংগী অপুনবা পোস্ত ২৫৪৬ অমসুং নর্সিং স্তাফ, ফার্মাসিস্ত অমসুং অতৈ স্তাফ কেতেগোরী য়াওনা পেরামেদিক স্তাফ ৩৫১৫৩গা লোইননা রেলৱেনা কোবিদ-১৯গা মায়োক্নরিবা লানফম অসিদা মখল অমা হেক্তগী শিংনবগা মায়োক্ননবা শেম শাদুনা লৈরি। অনৌবা খোংথাং অমগী মখাদা লৈবাক শিনবা থুংনা কেন্দ্র সরকারগী ইম্প্লোয়ী খুদিমংমক্কীদমক্তা হৌজিক রেলৱে হেল্থ সর্বিস অসি ফংহল্লে। মসিগী মনুংদা অকক্নবা লমশিংদা প্রাইমরী, সেকেন্দরী অমসুং তর্সরী কেয়রশিং য়াওরি।

কোবিদ-১৯গী মায়োক্তা চৎথরিবা লানজং অসিদা ভারতকী রেলৱেনা মখাগী থৌরাংশিং অসি পাইখৎলিঃ

১. ক্বরেন্তাইন/আইসোলেসনগী খুদোংচাবশিং ওইনা থবক তৌনবগীদমক্তা কোচশিং শেমদোকপাঃ ভারতকী রেলৱেনা কোবিদ-১৯গীদমক্তা ফমুং ৮০০০০ থৌরাং তৌনবা ক্বরেন্তাইন/আইসোলেসনগী খুদোংচাবশিং ওইনা থবক তৌনবগীদমক লৈবাক শিনবা থুংনা ত্রেনগী কোচ ৫০০০ শেমদোক্লে।

২. কোবিদ-১৯গী অনাবশিং লায়েংনবগীদমক ফমুং ৫০০০ খন্দোকপাঃ কোবিদ-১৯গী অনাবশিং লায়েংনবগীদমক কৎথোক্লবা হোস্পিতাল ১৭ অমসুং রেলৱে হোস্পিতালগী হোস্পিতাল ব্লোক ৩৩দা চাউরাক্না ফমুং ৫০০০ খনদোক্লে।

৩. ক্বরেন্তাইন ফমুং ১১,০০০: কোবিদ-১৯ মায়োক্ননবা ভারতকী রেলৱেগী ইস্তাব্লিসমেন্তশিংদা ক্বরেন্তাইন ফমুং ১১,০০০ ফংহল্লে।

৪. মেদিকেল ইকুইপমেন্ত – ভেন্তিলেতর অমসুং পি.পি.ই. ফংহনবাঃ কোবিদ-১৯ মায়োক্নবদা পার্সোনেল প্রোতেক্তিব ইকুইপমেন্ত (পি.পি.ই.), ভেন্তিলেতর অসিনচিংবা মরাং কাইনা ফংহনবা অসি মরু ওই। কোবিদ-১৯ মায়োক্ননবা মথৌ তাবশিং মপুং ফাহন্নবা ভেন্তিলেতর, পি.পি.ই. অমসুং মেদিকেল ইকুইপমেন্তশিং খোমজিন্নবগীদমক রেলৱেগী জোনশিং অমসুং প্রদক্সন য়ুনিৎশিংনা থবক পাইখৎলি।

৫. পনবা য়াই মদুদি রেলৱেনা পার্সোনেল প্রোতেক্তিব ইকুইপমেন্ত (পি.পি.ই.) ইন-হাউস শেমজবা অসি মমাংদগী হৌখ্রে। মসিনা নুংতিগী চাউরাক্না পি.পি.ই. ১০০০ শানবগীদমক হোৎনরি, মখা তানা মসিগী মশিং অসি হেনগৎলকপা য়ারি।

৬. কেন্দ্র সরকারগী ইম্প্লোয়ী খুদিংমক্কী মফমদা রেলৱে হেল্থ সর্বিসশিংগী ওফরঃ লৈবাক অপুনবা অসিদা কেন্দ্র সরকারগী ইম্প্লোয়ী খুদিংমক্কী মফমদা রেলৱে হোস্পিতালশিং/হেল্থ সেন্তরশিংদা শক্তাক চে উৎলবা মতুংদা হকশেলগী সর্বিসশিং ফংহল্লি।