উপরাস্ত্রপতি শ্রী এম, ভেনকৈয়া নাইদুনা মীয়ামদা অপীল তৌখ্রে মদুদি লান্না থজবশিং অমসুং তোকঙানা মরম ওইদুনা, কোবিদ-১৯গী মায়োক্তা চংশিল্লিবা ঐখোয়গী খোংথাং অসি মনীং হলহনবা ঙম্লোই। মহাক্না য়ুম্ফম য়াওদবা ই-পাউ শন্দোকপা, মরু ওইনা সোসিয়েল মীদিয়াদা শন্দোক্লিবশিং অসি, ‘ভাইরস’ হায়না কৌরদুনা মসি থিংবা মথৌ তাইনা হায়না ফোংদোকখি।

লান্না শন্দোকপা অমদি তোকঙাশিং শন্দোকপা থিংনবগীদমক্তা, প্রমান লৈবা ই-পাউ শন্দোকপগী মথৌ তাবশিং অদু ফোংদোক্লদুনা শ্রী নাইদুনা মহাক্কী ফেসবুক পোস্তা ইখি মদুদি করিগুম্বা ঐখোয় অরুবা তানফম অসিবু নীংথিজনা ৱাখল তাদ্রবদি ভাইরস অসিগী মায়োক্তা চংশিল্লিবা লাঞ্জং অসি মাই পাকপা ঙম্লোই।

রাজ্য খরদা সোসিয়েল দিস্তেন্সিংগী গাইদলাইনশিং ঙাক্তবা অমদি নই দিল্লীদা হন্দক্তা থোকখিবা মীয়াম তিনবা থৌদোক্কী মতাংদা উপরাস্ত্রপতিনা গাইদলাইনশিং পাক-শন্না শন্দোকপা অমদি মসিবু চেৎনা ঙাকহন্নবগী মথৌ তাবশিং অদু পনখি।

মহাক্না হায়খি মদুদি ফিভম অসিগী মতুং ইন্না মিৎকুপ-নাহুম শিংনা লৈবা মথৌ তাই। ভাইরস শন্দোকপগী মতাংদা সাইন্তিফিক ওইবা খুদমগা লোইননা, কাংলুপ, লৈফম, লোন, লাইনীংগী খেন্নবা থমদনা পুন্না থেংনমিন্নবা মথৌ তাই।

শ্রী নাইদুনা হায়খি মদুদি কাংলুপ খুদিংমক্না অমত্তা ওইনা য়ানবা তাই মদুদি সোসিয়েল দিস্তেন্সিংগী নোর্মশিং অসি লাইনা লৌবা য়াদে। অমসুং শিংনবা অসি মপুং ফানা লোইদ্রিফাওবদি অচৌবা থৌরম অমত্তা পাংথোক্লোইদবনি। মহাক্না থাজবা ফোংদোকখি “তুংলমচৎতা অসুম্না গাইদলাইনশিং অসিবু থৌওইদবা তৌরোইদবনি।”

উপরাস্ত্রপতিনা মীয়ামদা কাংলুপকী মতাংদা য়ুম্ফম য়াওদবা ৱারেপশিং লৌরকপদগী ঙাকথোক্নবা হায়খি অমসুং থৌরমশিংবু ৱাখন্না শাগৎতুনা ৱারেপ খক লৌরোইদবনি।

লাইনা-লাইচৎ শন্দোরকপগী মায়োক্তা রাজ্য সরকারশিং, সিবিল সোসাইতীশিং অমসুং প্রাইভেৎ সেক্তরশিংনা লৌখৎলিবা তোঙান তোহানবা খোংথাংশিংগী মরমদা পল্লদুনা মহাক্না হায়খি মদুদি মশিং য়াম্না মীওইবগী মতেং পাংনবগী থবক পাইখৎলি লোইননা তোল্ল-তারবশিং অমসুং মাইগ্রেন্ত ৱাকরশিংগী অৱাবশিং কোকহন্নবা থবক পাইখৎলি। মহাক্না হায়খি মদুদি রাজ্যনা মহৈ মরোং লোকপগী মতমদা থেংনরিবা লৌমীশিংগী অৱাবশিং অদু খঙই লোইননা অচুম্বা মওংদা মহৈ মরোং লোকপা অমসুং মহৈ-মরোং লৈবগী থবক পাইখৎনবা খোংথাং কয়া পাইখৎলি।

মহাক্না হায়খি মদুদি হৌজিক পোৎথাবগী মতম নত্তে, হৌজিকসু মাংদা অরুবা লানফম লৈরি। মহাকনা হায়খি মদুদি ঐখোয় অমত্তা ওইনা খুদোং থিবা অসিগীদমক্তা মিৎকুপ নাহুম শিংনা লৈগদবনি। ৱাশক অমদি পুন্না হোৎনবা অমসুং ঐখোয়না থৌনা ফরবা ঐখোয়গী লান্মীশিংদা থমোই শেংনা মতেং পাংবা অসি মতমনা পুরকপা তঙাইফদবা অদুনি।

মহাক্না হায়খি মদুদি ঐখোয়গী মাং থারিবা লান্মীশিং, মরু ওইনা হেল্থ প্রোফেস্নরশিংগী শোইদ-ঙামদবা অমসুং ইকাই খুম্নবা অসি ঐখোয়গী পান্দমশিং অসি মপুং ফাহন্নবগীদমক তশেংনা মথৌ তাই। মহাক্না হায়খি মদুদি অফবা থবক অমা, মীনুংশিনা থল্লবা থবক অমা, মীওইবগী থৱাইগীদমক্তা পাংথোকপা ৱাশক্কা লোইনবা তৌরিবা থবক অসি, হৌজিক্কী ওইরিবা অমম্বা শুরুং অসিদগী থোরক্নবা অমত্তা ঙাইরবা লম্বী অদু ওইগনি।