ঐগী নুংশিজরবা ইরৈবাকচাশিং,

কোরোনা লাইচৎকী মায়োক্তা লৈবাক শিনবা থুংনা চৎথরিবা লোকদাউন অসি ঙসি নুমিৎ ৯নি শুরে। মসিদা অদোম পুম্নমক্না লৌবীরিবা থৌদাং অমসুং থক্সি-খাসি অনিমক্কী থৌওং অসি হায়নীংঙাই লৈতবা মওংদনি।

লৈঙাকলোই, থৌশিল্লোই অমসুং মীয়াম্না পুন্না ফিভম অসিবু নীংথিজনা লাকশিন্নবা অঙম্বা থাক্তা হোৎনরি। অদোম্না মতৌ অসুম্না, মার্চ ২২দা নোংমাইজিং নুমিৎতা কোরোনাগী মায়োক্তা লান্থেংনখিবা পুম্নমক্কী মফমদা থাগৎপা ফোংদোকচরি, মখোয় অদু লৈবাক পুম্নমক্কীদমক ফিদমনীংঙাইগী মশক অমা ওইরবনি।

মীয়ামগী কর্ফ্যুবু ওইরো, কাংশি খিংবা, খুবাক খুবা নত্ত্রগা পুখম থিনবগী থৌরম্বু ওইরো, মখোয়না অসিগুম্বা শিংনবগী মতম অসিদা লৈবাক অসিদা অপুনবগী পাঙ্গল অদু উৎথোকখি। মসিদগী লৈবাক অসিনা অমত্তা ওইনা পুন্সিন্দুনা কোরোনাগী মায়োক্তা লান্থেংনবগী ৱাখল্লোন অদু উৎথোক্লে। হৌজিক লোকদাউনগী মতমদা, লৈবাক্কী, অদোম পুম্নমক্কী অসিগুম্বা অপুনবগী লিচৎ অসি উবা ফংলি।

মরূপশা, ঙসি মীওই করোর কয়া মাগী মাগী ময়ুমদা লৈরিবা অসিদা, কনাগুম্বা অমা হেক্তনা মথন্তনা করি তৌবা ঙমগনি হায়না খল্লমগনি। কনাগুম্বা খরদি, অসুক চাউখ্রবা লানফম অসি মথন্তনা করম্না মায়োক্নবা ঙমগনি হায়নসু খল্লমগনি। কয়া মরুম অমনা ৱাফম অসি মপুক্নীংদা খল্লমগনি মদুদি নুমিৎ কয়ানি মতৌ অসুম্না লেনখিগদগে।

মরূপশা, তশেংনা মসি লোকদাউনগী মতম অদুনি, ঐখোয় ইশা ইশাগী য়ুমদা তশেংনা লৈরিবনি, অদুবু ঐখোয় কনা অমত্তা নাইতোম তাদ্রি। লৈবাক মচা করোর ১৩০গী অপুনবগী পাঙ্গল অদু মীপুম খুদিংমক্কা লোইনরি, মীপুম খুদিংমক পাঙ্গলনি। মতম মতমগী ওইনা লৈবাক মীয়ামগী অপুনবা পাঙ্গল অসিগী থৌনা, মসিগী চীংলেম্বা অমসুং মতিক-মঙাল অসি শিজিন্নবা মথৌ তাই।

মরূপশা, ঐখোয়গী লৈবাক অসিদদি লৈবাক মীয়াম অসি লাইগী মশক্নি হায়না লৌনৈ। মরম অসিনা লৈবাক অসিনা অসুক চাউখ্রবা লান শোক্নরিবা মতম অসিদা, অসিগুম্বা লানফম অসিদা মীয়ামগী মশক ওইরবা অচৌবা থৌনা অসি হন্না হন্না শাফোংগদবনি। অসিগুম্বা শাফোং অসিনা, ঐখোয়দা পুক্নীংগী পাঙ্গল পী, পান্দম পী, মদুবু ফংননবগী থৌনা হাপ্পী, ঐখোয়গী লম্বী ময়েক হেন্না শেংহল্লি।

মরূপশা, কোরোনা লাইচৎনা শন্দোরক্লিবা অমম্বা অসিগী মরক্তা, ঐখোয় লেপ্তনা মঙালগী মাইকৈদা চংশিনগদবনি। কোরোনাগী অকিবা অসিনা খ্বাইদগী হেন্না শোকহল্লবা, ঐখোয়গী লাইরবা ইচিল-ইনাওশিংবু নীংবা কাইবগী মাইকৈদগী অনৌবা অশা অমগী মাইকৈদা পুগদবনি। অসিগুম্বা কোরোনাগী তমথিবা অসিদগী পোক্লক্লিবা অমম্বা অমদি তং তাদবা অসি লোইশিন্দুনা ঐখোয় মঙাল অমসুং তংদু লৈতাবা অসিগী মাইকৈদা চংশিনগদবনি। অমম্বতনা থল্লবা কোরোনাগী খুদোংথিবা অসিবু মাইথিবা পীনবগীদমক, ঐখোয় মশেক মঙাল অসি মাইকৈ মরিদা শন্দোক্কদবনি।

অমসুং মরম অসিনা, এপ্রিল ৫দা, ঐখোয় পুম্নমক অমত্তা ওইদুনা, কোরোনাগী খুদোংথিবা অসিগী অমম্বা অদুবু শিংনগনি, মসিবু মঙালগী মতিক-মথৌনা খঙহনগনি। এপ্রিল ৫ অসিদা ঐখোয়, ইরৈবাকচা করোর ১৩০গী থৌনা অদু উৎথোক্কনি।

এপ্রিল ৫দা, নোংমাইজিং নুমিৎকী নুমিদাং পুং ৯ তাবা মতমদা ঐ অদোমগী মিনিৎ ৯ খক পামজৈ। পুক্নীং চংনা তাবীয়ু, এপ্রিল ৫দা নুমিদাংগী পুং ৯দা, য়ুমগী মৈ (লাইৎ) খুদিংমক মুথৎতুনা, য়ুমগী থোংজিন্দা নত্ত্রগা দলান মথক্তা লেপতুনা, মিনিৎ ৯ মোম্বতী, মৈরা, তোর্চ নত্ত্রগা মোবাইলগী ফ্লাশলাইৎ থানবীয়ু।

ঐ অমুক্কা হায়জরি, মোম্বতী, মৈরা, তোর্চ নত্ত্রগা মোবাইলগী ফ্লাশলাইৎ, এপ্রিল ৫দা, নুমিদাংগী পুং ৯ তাবা মতমদা, মিনিৎ ৯ ফাওবদং থানবীয়ু। অমসুং মতম অদুদা করিগুম্বা য়ুমগী মৈ (লাইৎ) খুদিংমক মুথৎলবা, মাইকৈ মরিদা মীওই খুদিংমক্না মৈরা অমমম থাল্লবদি, মঙালগী অদুগুম্বা পাঙ্গল অদু খঙবা ঙমগনি, মসিদা অমত্তা ঙাইরবা পান্দম ঐখোয় পুম্নমক লান্থেংনরি হায়বদু ফোংদোক্কনি। মঙাল অদুদা, অদুগুম্বা মৈঙাল অদুদা, অদুগুম্বা মশেক অদুদা, ঐখোয়গী পুক্নীংদা ৱাশক অসি লৌসি মদুদি ঐখোয় ইথন্তা নত্তে, কনা অমত্তা নাইতোম তাদে। ইরৈবাকচা করোর ১৩০, ৱাশক অমখক্কী লিপুন্না পুল্লি।

মরূপশা, ঐ মসিমগা থৌনিজরি মদুদি, থৌরম অসিগী মনুংদা কনা অমত্তনা, মফম অমত্তদা পুন্না খক লৈমিন্নরোইদবনি। লম্বীদা, লৈরক্তা নত্ত্রগা লৈকাইদা চৎপীরোইদবনি, অদোমগী য়ুমগী থোংজিন, দলান খক্তদগী মসি তৌবীগদবনি। সোসিয়েল দিস্তেন্সিংগী ‘লক্ষমন রেখা’ লানবীরোইদবনি। সোসিয়েল দিস্তেন্সিং অসি ফিভম অমত্তদা থুগাইবীরোইদবনি। কোরোনাগী চেন থুগাইনবা মসি অমত্তা ঙাইরবা শিদ-হিদাক্নি।

মরম অদুনা, এপ্রিল ৫গী নুমিদাং পুং ৯দা, মিৎকুপ খরা ইথন্তা ফম্বীদুনা, ইমা ভারতীবু নীংশিংবীয়ু, ইরৈচা করোর ১৩০গী মাইথোং অদুবু লাকশিনবীয়ু, ইরৈচা করোর ১৩০গী অপুনবা, মদুগী পাঙ্গল অদুবু ফাওবীয়ু। মসিনা ঐখোয়বু, খুদোংথিবগী পুংজা অসিগা মায়োক্ননবগী থৌনা পীগনি অমসুং মাই পাকপগী থাজবসু ফংহনগনি। ঐখোয়গী মফম অসিদা মসি হায়নৈ -

উৎসাহ বলৱান আর্য়

ন অস্তি উৎসাহ পরম বলম|

স উৎসাহস্য লোকেষু,

নকিনচিৎ অপি দুলর্ভম||

হায়বদি, ঐখোয়গী থৌনা, ঐখোয়গী স্পিরিৎতগী হেনবা ফোর্স মালেম অসিদা অমমুক লৈতে। অসিগুম্বা থৌনা অসিদগী ঐখোয়না ফংবা ঙমলোইদবা মালেম অসিদা করিগুম্বা অমত্তা লৈতে। লাকপীরো, ঐখোয় পুন্সিল্লসি অমসুং পুন্না কোরোনা ভাইরস মাইথিবা পীরসি অমসুং ভারত অসি মাই পাকহল্লসি।

হন্না হন্না থাগৎচরি!!