కోవిడ్-19 కి వ్యతిరేకంగా జరుపుతున్న పోరాటంపై ప్రజల్లో అవగాహనా కల్పించాలని ఉపరాష్ట్రపతి శ్రీ ఎం.వెంకయ్య నాయుడు రాష్ట్రాల గవర్నర్లు, కేంద్రపాలిత ప్రాంతాల లెఫ్టనెంట్ గవర్నర్లకు పిలుపునిచ్చారు. సామజిక సంస్థలను ఈ కార్యంలో ప్రోత్సహించాలని, ప్రభుత్వంతో ప్రైవేట్ రంగం కలిసి పనిచేసేలా తగు మార్గదర్శకం ఇవ్వాలని ఉపరాష్ట్రపతి సూచించారు.

రాష్ట్రాల గవర్నర్లు, లెఫ్టనెంట్ గవర్నర్లతో వీడియో కాన్ఫరెన్స్ కు రాష్ట్రపతి శ్రీ రామ్ నాథ్ కోవింద్ ఇచ్చిన పిలుపు మేరకు గవర్నర్లను ఉద్దేశించి ఉపరాష్ట్రపతి శ్రీ ఎం. వెంకయ్య నాయుడు మాట్లాడుతూ రాష్ట్రాల మొదటి పౌరులుగా ఈ సంక్షోభ సమయంలో సృజనాత్మకంగా ఆలోచనలు చేసి సమాజానికి మంచి మార్గదర్శనం చేయాలని కోరారు. 

'మీ నాయకత్వం ఇపుడు చాలా కీలకం. ప్రజలను చైతన్య పరచడం, వారిలో ప్రేరణ నింపడం ఇపుడు చాలా ముఖ్యం' అని ఉపరాష్ట్రపతి అన్నారు. 

కోవిడ్-19 వ్యాధిగ్రస్థుల ఐసోలేషన్ వార్డుల కోసం అవసరం మేర విశ్వవిద్యాలయాలు, కేంద్రీయ విద్యాలయాలు, ఇతర విద్యాసంస్థలు, ధార్మిక సంస్థలు ... ఇలా వివిధ సంస్థల ప్రాంగణాలను వినియోగించుకునేలా వారిలో ప్రేరణ కల్పించాలని గవర్నర్లకు ఉపరాష్ట్రపతి సూచించారు. 

విశ్వవిద్యాలయాల ఛాన్సలర్లుగా కూడా ఉన్నందున గవర్నర్లు వివిధ విద్యాసంస్థలు పాఠ్యాంశాలను పూర్తి చేయడానికి ఆన్‌లైన్ తరగతులను నిర్వహించే అవకాశాన్ని అన్వేషించాలని, విద్యా షెడ్యూల్ చెదిరిపోకుండా చూడాలని ఉపరాష్ట్రపతి చెప్పారు.  

కోవిడ్ -19 రోగులకు ప్రైవేట్ ఆస్పత్రులు కొన్ని పడకలు కేటాయించాలని, రెడ్ క్రాస్ వంటి సంస్థలు రంగంలోకి దిగి పేదలు, వృద్ధుల విషయంలో మానవతా దృక్పథంతో సహాయం అందించాలని ఉపరాష్ట్రపతి పిలుపు ఇచ్చారు. 

కేంద్ర, రాష్ట్ర ప్రభుత్వాలు తీసుకొంటున్న చర్యలను కొనియాడిన ఉపరాష్ట్రపతి టీమ్ ఇండియా స్ఫూర్తితో అంతా పనిచేయాలని అన్నారు. 

  వ్యాధి వ్యాపించకుండా చక్రాన్ని ఛేదించడానికి  సామజిక దూరమే కీలకం అనే విషయాన్ని విస్తృతంగా ప్రజల్లో నాటుకుపోయేలా చేయాలని ఆయన తెలిపారు.

' మీరు గడప దాటితే, కరోనా లోపడికి వస్తుంది' అనే విషయం ప్రజలంతా అర్థం చేసుకోవాలని ఉపరాష్ట్రపతి స్పష్టం చేశారు. 

లాక్ డౌన్ వల్ల ఆర్ధిక పరిస్థితి ఛిన్నాభిన్నం కాకుండా పేదలను ఆదుకోడానికి ప్రభుత్వం ప్రకటించిన చర్యలు ఎంతో ఉపయోగకరంగా ఉంటుందని ఉపరాష్ట్రపతి అన్నారు. 

ప్రజల భాగస్వామ్యం ఉంటేనే ఈ సంక్షోభం నుండి బయటపడగలమని, ఇందుకు ప్రభుత్వాలు సూచించిన నియమనిబంధనలు అందరు పాటించాలని ఉపరాష్ట్రపతి పిలుపు ఇచ్చారు. 

ఈ వీడియో కాన్ఫెరెన్స్ లో  మహారాష్ట్ర, కేరళ, కర్ణాటక, హర్యానా, గుజరాత్, రాజస్థాన్, తెలంగాణ, పంజాబ్, బీహార్, మధ్యప్రదేశ్, తమిళనాడు, పశ్చిమ బెంగాల్, హిమాచల్ ప్రదేశ్ గవర్నర్లు, ఢిల్లీ, చండీగఢ్ లెఫ్టనెంట్ గవర్నర్లు పాల్గొన్నారు. 

                                        *****