57th International Film Festival of India 2026
20 – 28 Nov 2026

चित्रपट रातयान संवसार बदलूंक शकनात, पूण ते लोकांचीं मनां उगडुन संवादाक उर्बा दिता : ‘फादरलँड’ चित्रपट निर्माता ईवा पुस्ज़िन्स्का


सामायिक इतिहासार आदारीत चित्रपटांखातीर भारत आणि पोलंडमदी चर्चा सुरूच उरतली: ईवा पुस्ज़िन्स्का

पोस्ट केल्लें: 21 NOV 2026 2:03PMby PIB Mumbaiउजवाडणी आयडी: 2339537Views: 10

गोंय, 21 नोव्हेंबर 2026

 

चित्रपट एका रातींत संवसार बदलूंक शकनात, पूण ते लोकांचीं मनां उगडूंन, संवादाक उर्बा दिता आनी लोकांक आपल्या भोंवतणच्या संवसाराचेर मंथन करपाक प्रेरणा दितात, अशें नामनेच्यो पोलिश चित्रपट निर्माता आनी 57व्या भारतीय आंतरराष्ट्रीय चित्रपट महोत्सवाच्या (इफ्फी) उक्तावण चित्रपट ‘फादरलँड’ हाची निर्माता श्रीमती ईवा पुस्ज़िन्स्का हांणी सांगलें.

इफ्फी निमतान आयोजीत पत्रकार परिषदेंत उलयताना तांणी लोकांमदीं संवाद घडोवन हाडपाक तशेंच तरेकवार दृष्टिकोनांची समज वाडोवपाक चित्रपटांच्या भुमिकेचेर उजवाड घालो. “चित्रपटांच्या माध्यमांतल्यान लोकां कडेन संवाद साधप गरजेचें. जीवनाचे आनी संवसाराचे वेगवेगळे पैलु आपणावपाक आमी मनां उक्तीं करपाक जाय,” अशें तांणी सांगलें.

आधुनिक समाजांत दिसून येवपी विभागणेचेर प्रतिक्रीया दितना एकूच विचारसरणी वा मुद्दो योग्य आसा, असो दावा  करपाक मेळना अशें  श्रीमती पुश्चिन्स्का  हांणी सांगलें. लोक एकमेकांचें आयकपापरस आपापल्या विचारांनी बांदून उरतात, अशेंय तांणी मुखार सांगलें. “एकूच मुद्दो वा एकूच विचारसरणी योग्य आसा अशें ना. एकमेकां कडेन संवाद साधात आनी विचारांचें समन्वय घडयात,” अशें तांणी आवाहन केलें.

तरेकवार पैलु आशिल्ली कथा, अशें ‘फादरलँड’ ह्या चित्रपटाचे वर्णन करताना, हो चित्रपट आधुनिक काळाच्या समस्यांचेर लेगीत उजवाड घालता, अशें श्रीमती पुस्ज़िन्स्का हांणी सांगलें. 1949 वर्सा विभागिल्ल्या युरोपाच्या फाटभूंयेर आधारित हो चित्रपट पूर्व आनी पश्चिम हांचे मजगतींच्या फूटीचेर तशेंच आयच्या समाजाक आकार दिवपी मतभेद सादर करता. स्थलांतरणाच्या फाटभूंयेर, वळख आनी आपलेपणाच्या भावनेविशीं हो चित्रपट प्रश्न उबारता. मनीस आनी ताज्या मायदेशा मजगतच्या विचित्र संबंदांचेर विचार मांडटना, “तुजो देश खंयचो? तूं रावता तो देश काय तुं उलयता ती भास? तुज्या अस्तित्वाचीं मूळां आसपी सुवात, काय तुं सध्या रावता तो देश?” असो प्रस्न तांणी  विचारलो. 

नामनेचे जर्मन लेखक थॉमस मान आनी ताच्या कुटुंबाच्या कथेच्या माध्यमांतल्यान ‘फादरलँड’ हो चित्रपट संस्कृती आनी समाज्या मजगतच्या संबंदांचोय वेध घेता. साहित्य आनी सांस्कृतिक वाठारातले नामनेचीं व्यक्तीमत्वां लोकांखातीर आदर्श आनी प्रेरणेचे स्रोत थारपाक शकता, अशें श्रीमती ईवा पुस्ज़िन्स्का हांणी नमूद केलें. ह्या चित्रपटांत पालक आनी भुरगीं, भावंडां तशेंच कलाकारांमदलीं नातीं आसपावन कुटुंबांतल्या गुंतागुंतीच्या नात्यांचेर उजवाड घाला. तातूंत नामनेच्या कलाकारांचीं भुरगीं कसल्या आव्हानांक तोंड दितात आनी आपल्या पालकांच्या यशाची बरोबरी करपाचो तांचेर आशिल्लो पेज, ह्या चित्रपटान दाखयला. व्यापक नदरेन, इतिहासांतल्यो म्हत्वाच्यो घडाणुको सामान्य मनशांच्या जिणेचेर कसो परिणाम करतात, हेंय ह्या चित्रपटांत दाखयलां.

चित्रपटाच्या दृश्यात्मक शैलीविशीं उलयतना, दिग्दर्शक पावेल पाव्लिकोव्स्की हांच्याबरोबर केल्ल्या ‘इडा’ आनी ‘कोल्ड वॉर’ ह्या आदल्या चित्रपटां सारकी दृश्यात्मक शैली वापरून, ‘फादरलँड’ हो चित्रपट ब्लॅक अॅण्ड व्हायट आनी 4:3 आस्पेक्ट रेशियोत चित्रीत केला, अशी म्हायती श्रीमती पुस्ज़िन्स्का हांणी दिली. चित्रपटांत दाखयल्ल्या काळाचें वास्तववादी चित्रण करपा हेतान हो निर्णय घेतिल्लो. “आमकां चित्रपटांत दाखयल्लो काळ प्रामाणीकपणान सादर करचो आशिल्लो. ‘फादरलँड’ ह्या चित्रपट खंडांतलो तिसरो चित्रपट मानूंक येता,” अशें तांणी सांगलें.

चित्रपट निर्मिती प्रक्रियेविशीं उलयताना, ‘फादरलँड’ हो पोलंड, जर्मनी, इटली आनी फ्रान्स ह्या देशांच्या जोड पालवान तयार केल्लो आंतरराष्ट्रीय सहनिर्मिती चित्रपट आसा, अशें ताणीं सांगलें. कथा जर्मनींत घडटा, पूण चित्रपटाचें सुमार 95 टक्के चित्रीकरण पोलंडांत जालां आनी चित्रपटाच्या सर्जनशील आनी तांत्रिक पंगडांत मुखेलपणान पोलिश तज्ञांचो आस्पाव आशिल्लो. 1949 वर्साच्या जर्मनीचें स्वरूप उबे करपाक पोलंडांत योग्य चित्रीकरण स्थळां मेळ्ळी, तातूंत मोडून पडिल्ले आनी दुर्लक्षित रस्ते, इमारती आनी ल्हान शारांचो आस्पाव आशिल्लो.

श्रीमती ईवा पुस्ज़िन्स्का हांणी दुसऱ्या म्हायुद्धाच्या काळांत भारतांत आश्रय मेळयल्ल्या पोलिश भुरग्यांची कथा  पडद्याचेर हाडुन भारत आनी पोलंड हांचेमदल्या जोड इतिहासाचेर आधारित चित्रपट तयार करपाची इत्सा उक्तायतली. इफ्फीचे महोत्सव संचालक श्री आशुतोष गोवारीकर हांचे कडेन जाल्ल्या चर्चेचो उल्लेख करताना, ह्या विषयाचेर गोवारीकर हांणी आदींच पटकथा बरयल्या, अशेंय तांणी सांगलें. ह्या विषयावयली चर्चा फुडें चालू दवरून हो प्रकल्प प्रत्यक्षांत हाडपाचो हावेस तांणी उक़्तायलो.

ह्या सत्राचें सूत्रसंचालन श्री सय्यद रबीहाश्मी हांणी केलें.

Read IFFILOID here: https://www.pib.gov.in/iffi/57/iffiLoid.aspx?yr=2026&lang=1&reg=48

 

* * *

पीआयबी मुंबई | मनाली प्रभूगांवकर/प्रियंका वेलिंगकर/दर्शना राणे


Great films resonate through passionate voices. Share your love for cinema with #IFFI2026 and #StoriesWithoutBorders. Tag us @pibindia on Instagram and @PIB_India on X, and we will help amplify your festival moments!

For accredited journalists, critics, bloggers, and vloggers seeking 1-on-1 interviews with filmmakers and festival juries, write to us at:
iffi.mediadesk@pib.gov.in with the subject line: Take One with PIB.


Official Release ID: 2339537
•
Media Centre: Goa
•
Festival Dates: Nov 20 – 28, 2026