Goa, 20 Naiwieng 2026
Ϊa ka bynta ba 20 jong ka WAVES Film Bazaar la plie hynne ka sngi ha Taj Cidade de Goa Horizon, Goa, kaba long ruh ka dak jong ka jingdap 20 snem jong ka jingϊadei kaba khlaiñ hapdeng ki karkhana shna phlim jong ka India bad kiwei pat ki karkhana shna phlim jong ki ri ka pyrthei. Kane ka jakaϊew ba la pynlong da ka National Film Development Corporation (NFDC), hapoh jong ka tnat Information bad Broadcasting, kaba san sngi kynthih kala wanrahlang hajuh ϊa ki nongshna phlim, ki nongpynmih phlim, ki nongthoh ϊa ka khana, ki nongbei tyngka, ki nongsam bad kiwei kiwei pat ki riew donsap ha kane ka kam ban wad ϊa ka jingϊatreilang bad ban pynϊasoh ϊa ki projek shna phlim bad ki ϊew jong ka pyrthei.
Haba pdiang sngewbha ha kane ka jingϊalang, u Managing Director ka NDFC, u Dhiraj Singh, ula ong ba ka Film Bazaar ka long kum kawei na ki bynta ba kongsan jong ka International Film Festival of India (IFFI), da kaba kdew ruh ϊa ka jingϊadei ba ϊaineh jong ka bad kane ka tamasa mynta la palat 20 snem. Ula ϊathuh ruh ba ka Film Bazaar kala kylla long sha kawei na ki rynsan kiba kham heh bad kham ϊar, kaba wanrah ruh ϊa kiba bun ki lad ki lynti bad ka jingϊatreilang kaba khamheh na ka bynta ki karkhana shna phlim.

Shri Ashutosh Gowariker, Festival Director
Haba ai jingkren ha kane ka jingϊalang kum u symbud kongsan, u Festival Director ka IFFI 57, u Ashutosh Gowariker, ula pynpaw ϊa ka bynta ba kham kyrpang jong ka Film Bazaar ha ka ban wanrahlang hajuh ϊa ki nongshna phlim jong ka India bad ki karkhana shna phlim jong kiwei pat ki ri ha ka pyrthei. Ula banjur ba ka ϊew ka hat ka ϊatreilang bad ki nongshna phlim ha manla ki kyrdan jong ka jingϊaid lynti jong ki, ha ka jaka ban ap ϊa ka phlim na ka bynta ban pyndep. Lada u ne ka nongshna phlim ki don ϊa ki jingthoh ϊa ka khana ka bym pat dep lane ka phlim ba la dep ban pyndep kaba wad ϊa ki nongwan peitkai, ka WAVES Film Bazaar ka ailad ban pynϊasoh bad ki paidbah kiba lah ban rah kham shakhmat ϊa ka projek. Ula pyni ruh ba kumno ka jingϊakren kaba suk, kaba bunsien ka sdang da ka jingkhot sngewbha ban ϊa dih coffee, ka lah ban plie ϊa ki jingkhang na ka bynta ka jingϊatreilang kaba don jingmut.
Haba pynpaw ϊa ka bor jingpynkylla jong ka cinema, u Gowariker ula ong ba ka jingpynlah ϊa ki briew ban ϊohi ϊa ka pyrthei da kumwei pat ka long ka jingai sngewbha. Ula pynshlur ϊa ki nongshahkhot sngewbha ba kin pyndonkam hok ϊa kine ki saw sngi da kaba ϊatreilang bad ki briew ba thymmai, ban ϊasam ϊa ki jingmut jong ki, bad khamtam eh ban wanrah ϊa ki projek bym pat lah ban pyndep sha ka miej jingϊakren. Ula kyntu ruh ϊa ki nongwan ϊashimbynta ba kin ban shim ϊa ki lad ki lynti bad ban ϊailong kiba pdiang ϊa kino kino ki lad ki lynti, ula pynshlur ruh ϊa ki ba kin mih shakhmat ban ϊa mir jingmut da ka jingkyrmen ban lap ne shem ϊa ka jubab ‘hooid’.

Shri Chanchal Kumar, Secretary, Ministry of Information & Broadcasting
U Secretary ka tnat Information bad Broadcasting, u Chanchal Kumarha ka jingkren lamkhmat jong u, ula pynpaw ϊa ka jingkiew jong ka Film Bazaar, na ki 204 ngut ki nongshahkhot sngewbha kiba mihkhmat ϊa ki 18 tylli ki ri ha u snem 2007 sha palat 2,500 ngut ki nongshah khot sngewbha ha ka bynta kaba dang shu dep shen. Ula batai ϊa ka WAVES Film Bazaar kum ka rynsan kaba pynϊasoh ϊa ka sap ka phong bad kilad kamai.
Haba phai sha ka jingthmu jong ka ‘Create in India, Create for the World’, ba la wanrah da u myntri rangbahduh ka ri, u Narendra Modi ha ka WAVES 2025, ula banjur halor ka jingdonkam ban pynϊasoh ϊa ka sap ka phong jong ka India bad ki ϊew ha ka pyrthei bad ban pynϊar shuh shuh ϊa ki lad ki lynti na ka bynta ka jingϊatreilang ha ka pyrthei.
Haba batai ϊa ka Film Bazaar kum ka rynsan na ka bynta ka jingϊatreilang bad ka jinglap ϊa kiei kiei kib thymmai, u la khot la wer ϊa ki nongshna phlim na kylleng ki ri jong ka pyrthei ba kin shim ϊa ka kabu na kane ka ϊew, ha kaba ki khana ki lah ban kylla sha ka jingϊatreilang bad ka sap ka phong ka lah ban kylla sha ka ϊoh ka kot kaba neh bad ka jingpynneh ϊa ka kolshor.

From right- Shri Prabhat, Additional Secretary, MIB, G Krishnakumar, Chairman, NFDC, Shri Chanchal Kumar, Secretary, MIB, Shri Ashutosh Gowariker, Festival Director, Shri Dhiraj Singh, Managing Director NFDC
U Additional Secretary jong ka tnat Information bad Broadcasting, u Prabhat ula ai ϊa ka jingkren ai khublei. Ha kane ka jingϊalang plie pyrda la wan ruh ban ϊadonlang da u Chairman ka NFDC, U G. Krishnakumar.
Katba ka WAVES Film Bazaar kala kynjoh sha ka 20 snem, ka bynta jong ka ka long ban wanrahlang hajuh ϊa kito baroh kiba ϊadonbynta ha ka kam shna phlim ban wanrah ϊa ki lad ki lynti na ka bynta ka jingϊatreilang bad ka jingpynphriang sha ka pyrthei. Da kaba pynϊasoh ϊa ki nongshna phlim bad ki nongpynmih phlim,ki nongthoh khana, ki nongbei tyngka bad ki nongsam phlim kiba na kylleng ka pyrthei, ka ϊew ka hat ka wadlad ban ϊarap ϊa ki projek kiba don jingkyrmen ban shem ϊa ki nongϊatreilang kiba biang bad thaw ϊa ki lad ki lynti na ka bynta ki khana bapher bapher jong ki nong India ba kin poi sha ki nongpeitkai ha kylleng ki ri jong ka pyrthei. Ka ϊaibteng ban wanrah ϊa ka rynsan ha kaba ki jingmut kiba thymmai ki lah ban kylla long sha ki jingϊatreilang kiba don jingmut bad ban lah ban pynpaw ϊa ka sap ka phong hapoh ka screen.
2338970*