ભારતીય અને આંતરરાષ્ટ્રીય ફિલ્મ ઉદ્યોગો વચ્ચે જોડાણને પ્રોત્સાહન આપવાના બે દાયકાને ચિહ્નિત કરતા, WAVES ફિલ્મ બજારની 20મી આવૃત્તિનું આજે ગોવાના તાજ સિદાદે દ ગોવા હોરાઇઝન ખાતે ઉદ્ઘાટન કરવામાં આવ્યું હતું. માહિતી અને પ્રસારણ મંત્રાલય હેઠળના નેશનલ ફિલ્મ ડેવલપમેન્ટ કોર્પોરેશન (NFDC) દ્વારા આયોજિત, આ પાંચ-દિવસીય માર્કેટપ્લેસ સહયોગની શક્યતાઓ ચકાસવા અને સર્જનાત્મક પ્રોજેક્ટ્સને વૈશ્વિક બજારો તરફ લઈ જવા માટે ફિલ્મકરો, નિર્માતાઓ, લેખકો, રોકાણકારો, વિતરકો અને અન્ય ઉદ્યોગ વ્યાવસાયિકોને એકસાથે લાવે છે.
ઉદ્ઘાટન દરમિયાન મુખ્ય સંબોધનમાં, માહિતી અને પ્રસારણ મંત્રાલયના સચિવ શ્રી ચંચલ કુમારે 2007 માં 18 દેશોનું પ્રતિનિધિત્વ કરતા 204 પ્રતિનિધિઓથી શરૂ કરીને તાજેતરની આવૃત્તિઓમાં 2,500 થી વધુ પ્રતિનિધિઓ સુધી પહોંચેલા ફિલ્મ બજારના નોંધપાત્ર વિકાસ પર પ્રકાશ પાડ્યો હતો. તેમણે WAVES ફિલ્મ બજારને એક એવા પ્લેટફોર્મ તરીકે વર્ણવ્યું હતું જે સર્જનાત્મક કલ્પનાને વ્યાપારિક તકોમાં રૂપાંતરિત કરે છે.

માહિતી અને પ્રસારણ મંત્રાલયના સચિવ શ્રી ચંચલ કુમાર
WAVES 2025 ખાતે પ્રધાનમંત્રી શ્રી નરેન્દ્ર મોદી દ્વારા વ્યક્ત કરાયેલા 'ક્રિએટ ઇન ઇન્ડિયા, ક્રિએટ ફોર ધ વર્લ્ડ' ના વિઝનનો ઉલ્લેખ કરતા, તેમણે ભારતીય સર્જનાત્મક પ્રતિભાને આંતરરાષ્ટ્રીય બજારો અને તકોની વધુ સારી પહોંચ પૂરી પાડવાના મહત્વ પર ભાર મૂક્યો હતો. તેમણે ફિલ્મ બજારને સહયોગ અને શોધ માટેનું પ્લેટફોર્મ ગણાવ્યું હતું, અને વિશ્વભરના ફિલ્મ નિર્માતાઓને આ માર્કેટપ્લેસનો સંપૂર્ણ ઉપયોગ કરવા આમંત્રણ આપ્યું હતું, જ્યાં વાર્તાઓ ભાગીદારીમાં વિકસી શકે અને સર્જનાત્મકતા કાયમી આર્થિક અને સાંસ્કૃતિક મૂલ્ય પેદા કરી શકે.
અતિથિ વિશેષ તરીકે સભાને સંબોધતા, ફેસ્ટિવલ ડિરેક્ટર શ્રી આશુતોષ ગોવારિકરે ભારતીય ફિલ્મ નિર્માતાઓ અને આંતરરાષ્ટ્રીય ઉદ્યોગ વ્યાવસાયિકોને એકસાથે લાવવામાં ફિલ્મ બજારની અનન્ય ભૂમિકા પર પ્રકાશ પાડ્યો હતો.

Shri Ashutosh Gowariker, Festival Director
આ પ્લેટફોર્મ ફિલ્મ નિર્માતાઓ સાથે તેમની સર્જનાત્મક સફરના દરેક તબક્કે જોડાય છે તેના પર ભાર મૂકતા, તેમણે કહ્યું કે WAVES ફિલ્મ બજાર ફિલ્મ પૂર્ણ થવાની રાહ જોતું નથી પરંતુ પ્રક્રિયામાં ફિલ્મ નિર્માતાઓ જ્યાં હોય ત્યાં તેમને મળે છે. ફિલ્મ નિર્માતા પાસે અધૂરી પટકથા હોય કે પ્રેક્ષકોની શોધમાં રહેલી પૂર્ણ ફિલ્મ હોય, આ માર્કેટપ્લેસ એવા લોકોને એકસાથે લાવે છે જેઓ પ્રોજેક્ટને આગળ લઈ જવામાં મદદ કરી શકે છે. તેમણે વર્ણવ્યું હતું કે કેવી રીતે એક સામાન્ય વાતચીત, જે ઘણીવાર કોફી પીવાના આમંત્રણથી શરૂ થાય છે, તે અર્થપૂર્ણ સહયોગના દ્વાર ખોલી શકે છે.
સિનેમાની પરિવર્તનશીલ શક્તિ પર પ્રકાશ પાડતા, તેમણે અવલોકન કર્યું હતું કે લોકોને વસ્તુઓને અલગ રીતે જોવામાં સક્ષમ બનાવવું એ એક ભેટ છે. તેમણે પ્રતિનિધિઓને ચાર દિવસનો મહત્તમ લાભ લેવા, અજાણ્યા લોકો સાથે વાતચીત કરવા, ખાસ કરીને અધૂરા પ્રોજેક્ટ્સ સહિત પોતાના વિચારો શેર કરવા અને 'હા' મળવાની આશા સાથે તકોનો પીછો કરવા અનુરોધ કર્યો હતો.

જમણેથી- શ્રી પ્રભાત, અધિક સચિવ, MIB, જી. કૃષ્ણકુમાર, ચેરમેન, NFDC, શ્રી ચંચલ કુમાર, સચિવ, MIB, શ્રી આશુતોષ ગોવારિકર, ફેસ્ટિવલ ડિરેક્ટર, શ્રી ધીરજ સિંહ, મેનેજિંગ ડિરેક્ટર NFDC
સભાનું સ્વાગત કરતા, NFDCના મેનેજિંગ ડિરેક્ટર શ્રી ધીરજ સિંહે ફિલ્મ બજારને ભારતીય આંતરરાષ્ટ્રીય ફિલ્મ મહોત્સવ (IFFI)ના અભિન્ન અંગ તરીકે વર્ણવ્યું હતું, અને નોંધ્યું હતું કે આ પ્લેટફોર્મે છેલ્લા બે દાયકાથી આ જોડાણ જાળવી રાખ્યું છે. તેમણે અવલોકન કર્યું હતું કે ફિલ્મ બજાર એક ઘણા મોટા અને વ્યાપક પ્લેટફોર્મમાં વિકસ્યું છે, જેણે ફિલ્મ ઉદ્યોગ માટે તેનો વ્યાપ અને તકો વિસ્તારી છે.
માહિતી અને પ્રસારણ મંત્રાલયના અધિક સચિવ શ્રી પ્રભાતે આભારવિધિ રજૂ કરી હતી. ઉદ્ઘાટન સમારોહમાં NFDC ના ચેરમેન જી. કૃષ્ણકુમાર પણ ઉપસ્થિત રહ્યા હતા.
જેમ જેમ WAVES ફિલ્મ બજાર બે દાયકા પૂર્ણ કરે છે, તેની ભૂમિકા ફિલ્મ ઉદ્યોગને એકસાથે લાવવાથી આગળ વધીને વાર્તાઓને વધુ દૂર સુધી પહોંચાડવાની શક્યતાઓ ઊભી કરવાની છે. ફિલ્મ નિર્માતાઓને વિશ્વભરના નિર્માતાઓ, લેખકો, રોકાણકારો અને વિતરકો સાથે જોડીને, આ માર્કેટપ્લેસ એ સુનિશ્ચિત કરવાનો પ્રયાસ કરે છે કે આશાસ્પદ વિચારોને યોગ્ય સહયોગીઓ મળે અને વૈવિધ્યસભર ભારતીય વાર્તાઓને આંતરરાષ્ટ્રીય પ્રેક્ષકો સુધી પહોંચવાની તકો મળે. એક એવી જગ્યા બનાવવા પર ભાર યથાવત છે જ્યાં વાતચીત સહયોગ તરફ દોરી જાય અને સર્જનાત્મક શક્યતાઓને પડદા સુધી પહોંચવાનો માર્ગ મળે.
અહીં IFFILOID વાંચો: https://www.pib.gov.in/iffi/57/iffiLoid.aspx?yr=2026&lang=1®=48
SM/DK/JD