गोवा, 20 नोव्हेंबर 2026
WAVES फिल्म बाजाराच्या 20व्या आवृत्तीचें उक्तावण आयज गोयांतल्या ताज सिदादे द गोवा होरायझन हांगा जालें. भारतीय आनी आंतरराष्ट्रीय चित्रपट उद्योगांमदीं संबंध वाडोवपाच्या दोन दशकांच्या प्रवासांतलें, हें एक म्हत्त्वाचें पावल आसा. म्हायती आनी प्रसारण मंत्रालयाच्या मार्गदर्शनाखाला राष्ट्रीय चित्रपट विकास महामंडळ (NFDC) हांचेवतीन घडोवन हाडिल्लो हो पांच दिसांचो फिल्म बाजार, परस्पर सहकार्याच्यो संदी सोदून काडपाक आनी सृजनशील चित्रपट प्रकल्पांक संवसारीक बाजारपेठे कडेन जोडपा हेतान चित्रपट निर्माते, निर्माते, लेखक, गुंतवणूकदार, वितरक आनी हेर उद्योग व्यावसायिकांक एकठांय हाडटा.
आपल्या बीजभाषणात, म्हायती आनी प्रसारण मंत्रालयाचे सचिव श्री. चंचल कुमार हांणी फिल्म बाजाराच्या लक्षणीय विकासाचेर उजवाड घालो. २००७ वर्सा १८ देशांचें प्रतिनिधित्व करपी २०४ प्रतिनिधी आशिल्ल्या ह्या व्यासपीठाचो विस्तार जावन, हालींच्या आवृत्त्यांनी प्रतिनिधींचो आकडो 2500 परस चड जाला, अशें तांणी सांगलें. WAVES फिल्म बाजार हें सर्जनशील दृष्टिकोन आनी व्यावसायिक संदी हांकां जोडपी एक म्हत्त्वाचें व्यासपीठ आसा, अशें तांणी म्हळें.
WAVES 2025 हांगा प्रधानमंत्री श्री. नरेंद्र मोदी हांणी मांडिल्ल्या ‘भारतात निर्माण करात, संवसाराखातीर निर्माण करात’ ह्या संकल्पनेचो उल्लेख करतना, भारतांतल्या सर्जनशील प्रतिभेक आंतरराष्ट्रीय बाजारपेठेकडेन जोडप आनी जागतिक सहकार्याच्यो संदी वाडोवपाचें म्हत्त्व तांणी अधोरेखित केलें. सहकार्य आनी नव्यो संदी सोदपाचें व्यासपीठ म्हणून फिल्म बाजाराचें वर्णन करतना, जगभरांतल्या चित्रपट निर्मात्यांक हाचो पुराय लाव घेवपाचें आवाहन तांणी केलें. ह्या माचयेर कथांक सहकार्याच्या भागीदारीचें रूप मेळूंक शकता आनी सर्जनशीलतेचें रूपांतर दीर्घकाळ टिकपी आर्थिक आनी सांस्कृतिक मूल्यांत जावंक शकता, अशें तांणी नमूद केलें.

श्री. चंचल कुमार, सचिव, म्हायती आनी प्रसारण मंत्रालय
मुखेल सोयरे म्हणून उपस्थितांकडेन उलयताना, 57व्या IFFIचे महोत्सव संचालक श्री. आशुतोष गोवारीकर हांणी भारतीय चित्रपट निर्माते आनी आंतरराष्ट्रीय चित्रपट उद्योगांतले व्यावसायिक हांकां एकठांय हाडपाक फिल्म बाजाराच्या वैशिष्ट्यपूर्ण भूमिकेचेर उजवाड घालो.
एखाद्या चित्रपट निर्मात्याकडेन अपूर्ण पटकथा आसूं वा प्रेक्षकां मेरेन पावपाची वाट पळोवपी पूराय जाल्लो चित्रपट आसूं, अशा प्रकल्पाक फुडें व्हरपाक मजत करपी लोकांकडेन संपर्क जोडपाची संदी WAVES फिल्म बाजार उपलब्ध करून दिता. कॉफी पिवपाच्या निमंत्रणान सुरू जावपी एक साधीशी गजाल लेगीत, अर्थपूर्ण सहकार्याचीं दारां उगडूं शकता, हें तांणी एका उदाहरणा वरवीं स्पश्ट केलें.

श्री. आशुतोष गोवारीकर, महोत्सव संचालक
सिनेमाच्या परिवर्तनकारी शक्तीचेर भर दितना, श्री. गोवारीकर हाणी नमूद केले की, लोकांक जगाकडे पळोवपाचो एक नवो दृष्टिकोन दिवप ही चित्रपटांची अनमोल देणगी. चार दिसांच्या ह्या चित्रपट बाजाराचो पुराय लाव घेवपाचें आवाहन तांणी प्रतिनिधींक केलें. नव्या व्यक्तीं कडेन संवाद साधप, आपले विचार मांडप आनी खास करून अपूर्ण प्रकल्प चर्चे खातीर घेवन येवप, हाचेर तांणी भर दिलो. सहभागींक उपलब्ध संदींचो सक्रियपणान सोद घेवपाक आनी नव्या शक्यतांये खातीर उक्ते रावपाचे आवाहन करतना, दर एका संवादाक हयकार मेळटलो, अशी आशा दवरची, अशें तांणी सांगले.
उपस्थितांक येवकार दितना, NFDCचे वेवस्थापकीय संचालक श्री. धीरज सिंह हांणी फिल्म बाजार हो भारतीय आंतरराष्ट्रीय चित्रपट महोत्सवाचो (IFFI) एक अविभाज्य भाग आशिल्ल्याचे सांगले. फाटल्या दोन दशकां सावन फिल्म बाजाराचें ह्या महोत्सवा वांगडा अतूट नातें आशिल्ल्याचे तांणी नमूद केलें. तशेंच ‘फिल्म बाजार’ आतां चड व्यापक आनी विस्तारीत मंच जाला, जाका लागून चित्रपट उद्देगा खातीर चड संदी आनी सहभागाचे विस्तृत पर्याय उपलब्ध जाल्यात, अशें तांणी नमूद केले.

उजवे कडल्यान – श्री. प्रभात, अतिरिक्त सचिव, म्हायती आनी प्रसारण मंत्रालय (MIB); श्री. जी. कृष्णकुमार, अध्यक्ष, NFDC; श्री. चंचल कुमार, सचिव, म्हायती आनी प्रसारण मंत्रालय; श्री. आशुतोष गोवारीकर, महोत्सव संचालक; आनी श्री. धीरज सिंह, व्यवस्थापकीय संचालक, NFDC.
म्हायती आनी प्रसारण मंत्रालयाचे अतिरिक्त सचिव श्री. प्रभात हांणी उपकार मानलें. ह्या उक्तावण सुवाळ्याक NFDCचे अध्यक्ष श्री. जी. कृष्णकुमार हेवूय उपस्थित आशिल्ले.
WAVES फिल्म बाजाराक दोन दशकां पुराय जातात, चित्रपट उद्योगातल्या विविध घटकांक एकठांय हाडपा पलीकडे वचून, सहकार्याच्यो संधी निर्माण करप आनी जागतिक स्तरार भारतीय चित्रपटसृष्टीचो विस्तार साधप, अशी महत्वाची भूमिका हे व्यासपीठ करता. जगभरांतल्या चित्रपट निर्मात्यांक, निर्माते, लेखक, गुंतवणूकदार आनी वितरक हांचे कडेन जोडून, आशादायक चित्रपट प्रकल्पांक योग्य सहकारी मेळोवपाक आनी विविधतेन भरिल्ल्यो भारतीय कथा आंतरराष्ट्रीय प्रेक्षकां मेरेन पावोवपाक मार्ग तयार करपाचो ह्या माचयेचो यत्न आसा.
Read IFFILOID here: https://www.pib.gov.in/iffi/57/iffiLoid.aspx?yr=2026&lang=1®=48
* * *
पीआयबी मुंबई | मनाली प्रभूगांवकर/मोनाली प्रभू/दर्शना राणे