Ka Ophis jong u Myntri Rangbah duh ka ri
azadi ka amrit mahotsav

Yn plie u Modi ïa ka jingialang nyngkong jong ka SCO Civilisational Dialogue Forum ha ka 20 tarik u Naiwieng

Ka jingialang kaba lai sngi kan wanrah lang ïa ki riewstad, ki riew shemphang bad ki nongmihkhmat na ka liang ka kolshor ban wad bniah ïa ka pateng tynrai kaba ïasam lang hapdeng ki ri kiba don hapoh ka SCO

Ha ka: 19 NOV 2026 4:24PM by PIB Shillong

U Myntri Rangbahduh ka ri, u Narendra Modi un plie paidbah ïa ka jingialang nyngkong jong ka Shanghai Cooperation Organisation (SCO) Civilisational Dialogue Forum ha ka 20 tarik Naiwieng 2026 ha Purana Qila, New Delhi ha ka por kumba 5:30 janmiet. 

Na ka liang u Modi un ai jingkren ruh sha kiba wan ïa shim bynta ha kane ka jingïalang.

Kane ka jingialang kan long naduh ka 20 haduh ka 22 tarik Naiwieng 2026, bad
ban rakhe ïa ka riti dustur bad ka spah bah jong ka jinglong ka jingman kaba ïasoh lang jong kane ka thaiñ, ban pynkhlaiñ ïa ka jingïadei hapdeng ki paidbah bad ban kyntiew ïa ka jingïakren bad ka jingïatreilang hapdeng ki jaitbynriew bapher bapher."

Kane ka sienjam ka shong nongrim halor ka jingtyrwa jong u Myntri Rangbahduh ka ri ha ka SCO Summit kaba la long ha Tianjin, China ha u snem 2025, ban seng ïa ka rynsan kaba kyrpang na ka bynta ka jingïakren halor ka pateng tynrai hapoh ka rukom treikam jong ka SCO. 

Hadien kata, kane ka jingtyrwa la pdiang sngewbha ha ka Bishkek Declaration jong ka SCO.

Ha ka jingïalang plie paidbah, yn pyni ïa ka prokram kaba kyrpang kaba la ai kyrteng “Civilisations in Conversation - Cultural Show”, kaba pynïasoh lang ïa ka jingtem, ka jingshad, ka jingïathuh khana lyngba ki dur bad ka jingbatai. 

Da kaba pynshong nongrim halor ka phang “Vasudhaiva Kutumbakam - Ka Pyrthei Ka Long Kawei Ka Longïing”, kane ka prokram kan pyni ïa ki jingïadei kolshor hapdeng ka India bad ka Eurasia.

Ha kane ka Forum yn pyni ruh ïa ki jingpyni kyrpang kiba pynpaw ïa ka pateng tynrai, ki kam shna dur bad ka thoh ka tar jong ka India, hapoh ka kyrteng “ASTITVA – The Essence of Our Existence.” 

Kane kan ai ïa ka jingbatai kaba itynnad halor ka histori jong ka Delhi lyngba ki sakhi na ki jingwad bniah ha ka mariang, naduh u snem 1200 BCE haduh u snem 1200 CE, kynthup ïa ki jingtei kiba la sei na ka khyndew, ki tiar tynrai, ki bynta jong ki jingtei bad kiwei pat ki jinglap kiba donkam.

Ka “Mahabharat Scroll Pavilion - Anant: A Rare 18th Century Mahabharata Scroll” kan pyni ïa kawei ka kot jingïathuhkhana kaba la dro dur, kaba pynpaw ïa ka pateng kaba riewspah jong ki khana puriskam bad ki kam shna dur jong ka India.

Saw tylli ki jingïalang jingïakren halor ki phang bapher bapher kin long ha ka 21 bad 22 tarik Naiwieng, ha kaba kin wan shim bynta lang ki riewstad, ki riew shemphang ha ki bynta bapher bapher bad ki nongmihkhmat na ka liang ka kolshor.

Ki jingïakren kin long halor ki rukom pynpaw ïa ka kolshor kum ka jingtem bad ki kam shad bad put, ki jain tynrai, ki jingbam tynrai bad ki jingïalehkai tynrai; ki rukom tynrai kiba ïasam lang ha ki kam shna dur bad ka jingtei; ka ktien bad ka pateng thoh ka tar, kynthup ïa ki rukom thoh dak bad ki kot thoh tynrai; bad ki lynti jong ki jaka sah jong ki riewniam bad ki jinghikai tynrai halor ka jingmut jingpyrkhat.


 


(Release ID: 2338711) visitor counter : 7