Ha ka:
15 NOV 2026 8:56PM by PIB Shillong
Ha ka sienjam kaban ai mynsiem ïa ki khynnah samla kiba don ïa ka sap ha ka kam rwai bad ka tem ka put bad ruh ban ïai pynneh pynsah ïa ka jingriewspah bad ka jingbun jait ka kam rwai ha India, na ka liang ka Akashvani ka la pynbna ban sdang ïa ka aïom kaba nyngkong jong ka “AIR Rising Stars” kaba long ka thup jong ki prokram concert ba kyrpang ha kylleng ki jylla ha ka ri, ha kaba ki khynnah samla kiban ïashimbynta kin long tang ki nongrwai bad nongtem kiba hapoh 30 snem ka rta. Ïa ka bynta kaba nyngkong jong kane ka concert yn pynlong ha ki 26 tylli ki jaka bapher bapher ha ka Ri, ka ban sdang naduh ka 17 haduh ka 30 tarik u Naiwieng, 2026. Kine ki concert kin ailad ïa ki samla nongrwai bad nongtem ba kin ïoh ïa ka rynsan kaba pawnam bha ha ka Ri, bad ban pyni ïa la ki sap ryngkat ka jingpynïadei bad ki paidbah ne ki nongkyrshan.
Kane ka sienjam ka long shi bynta jong ka jingrakhe ïa ka jingdap 90 snem jong ka Akashvani bad ruh kaba pyni ïa ka jingaiti jong ka ophis treikam ban wad, ban pynroi bad ban kyntiew ïa ki sap jong ki khynnah ha ka kam rwai bad ka tem ka put hapdeng ki pateng bapher bapher. Ka “AIR Rising Stars” ka thmu ban ïai bteng ïa kane ka jingthmu da kaba pynleit jingmut kyrpang ha ki nongrwai bad ki nongtem jong ka pateng kaba thymmai.
Ka jingpynleit jingmut ha ki nongrwai nongtem kiba dang sdang bad kiba mihkhmat thymmai
Ha kine ki concert, yn ai bynta khamtam ïa ki samla nongrwai bad nongtem jong ka Akashvani kiba la don ha ka thup kyrdan (Graded Artists) bad kiba dei hapoh ka 30 snem ka rta, kiba rwai ne tem ïa ki jait jingrwai bad jingtem bapher bapher. Lada jia ba ki don samla nongrwai ki bym shym la shah kynthup hapoh ka kyrdan jong ki nongrwai nongtem wat ha kano kano ka bynta kaba la kdew, hynrei lah ban ai lad ïa ki samla nongrwai bad nongtem kiba khlem da ïoh ban rung ha ka thup kyrdan (ungraded artists) kiba dei hok ban ïoh ïa ka kabu, kata ruh katkum ki kyndon ba la buh bad katkum ka jingjied jong ka Akashvani Station kaba khmih ïa kato ka jylla ne ka thaiñ.
Kine ki concert kin pyni ïa ka jingbun jait jong ki rukom rwai bad tem kiba la hiar pateng ha ka Ri India lyngba ka Hindustani Classical Music, ka Carnatic Classical Music, Ki Light and Folk Music (ki jingrwai tynrai kiba jem bad ba suk), Ka Western Music bad kiwei pat ki jait rwai tynrai jong ki thaiñ bapher bapher, katkum ka jinglong jong ki station kiba ïashim bynta.
Ka jingrakhe bad jinglehkmen ha kylleng ka Ri ha ki 26 tylli ki jaka
Ïa kine ki concert yn pynlong da ki 26 tylli ki ophis treikam jong ka Akashvani Station kiban ïashimbynta ha ki jaka ki long kumne harum: Ka Shimla, Dehradun, Delhi, Lucknow, Varanasi, Jaipur, Jalandhar, Suratgarh, Hyderabad, Vijayawada, Dharwad, Bengaluru, Mysuru, Madurai, Thiruvananthapuram, Tiruchirappalli, Kolkata, Imphal, Mumbai, Ahmedabad, Sangli, Nagpur, Puducherry, Jammu, Guwahati bad Rampur.
Kawei pa kawei ka Station kaba ïashimbynta kan pynlong ïa kawei kawei ka concert ha ka jaka kaba biang, ha kaba ki khynnah samla kiba dei ki nongrwai bad nongtem kin ïoh ban ïashimbynta na ka thaiñ jong ki. Yn khot sngewbha ruh ïa ki riew pawkhmat, ki briew kiba don jingtip shaphang ka kam rwai kam siaw bad ka tem ka put, ki samla kiba long ka nuksa babha ïa kiwei pat, ki khynnah pule bad ki paidbah ha kaba kin wan ban ai mynsiem ïa la ki paralok nongrwai bad nongtem kiba ïashimbynta, bad ruh halor ka thong ban pynlong ïa kane ka sienjam kum kawei na ki jingrakhe kaba kynthup lang ïa ki samla kiba don ïa ka sap rwai ha kylleng ka Ri.
Ka jingpynphriang lyngba ki rynsan bad ki lad pathai bapher bapher sha ki paidbah lyngba ka kor digital
Kawei na ki bynta ba kongsan jong ka AIR Rising Stars: Season-1 ka long ba yn sa pynphriang paidbah ha ka rukom kaba kham heh lyngba ki rynsan bad ki lad pathai bapher bapher ha kaba ïadei bad ki prokram sha ki paidbah lyngba ka juk jong ka digital bad kane kan sa ïarap ruh ban pyni ïa ki jingrwai bad jingtem jong ki khynnah samla sha ki paidbah ha kylleng ka Ri, ym tang ha ki jaka ba la pynlong ïa ki concert.
Ïa kine ki concert yn sa pynmih paidbah lyngba ka network jong ki Akashvani Station, bad yn sa pyni ruh lyngba ka Doordarshan, bad ka YouTube channel “Raagam” jong ka Akashvani, nangta ki YouTube channel jong ki 26 tylli ki Akashvani Station, ka Mobile App “NewsOnAir” bad ka rynsan “WAVES OTT” kaba dei jong ka Prasar Bharati. Kane ka rukom ban pynphriang kan pynïasoh lang ïa ki rynsan bapher bapher kaban ailad ïa ki samla nongrwai bad nongtem kiba la ïashim bynta ba kin ïohlad ban pynpaw bad pyni ïa ki sap jong ki lyngba ka Radio, ki Television bad ruh lyngba ki rynsan jong ka juk digital mynta.
Ki khusnam kiba da ka pisa na ka bynta ki lai tylli ki nongjop
Ban ai mynsiem bad pynshlur ïa ki samla nongrwai bad nontem ban ïashimbynta kham bun lyngba ki rynsan jong ka digital, yn sa ai ruh ïa ka khusnam da ka pisa lem bad ki syrnod sha ki lai ngut ki nongjop ha ka liang ka rwai ka siaw bad ka tem ka put, bad ïa kane yn sa bishar katkum ka jingbun duh jong kiba peit bad sngap (views) ïa ki durkhih jong ki ha ka rynsan YouTube haduh ka 15 tarik Kyllalyngkot, 2027.
• Khusnam ba nyngkong: T. 20,000
• Khusnam ba ar: T. 15,000
• Khusnam ba lai: T. 10,000
Kane ka sienjam kan ai ruh ïa ka jingithuh kaba kham kyrpang ïa ki samla nongrwai bad nongtem, bad kan pynshlur ruh ïa ki ba kin ïaleh ban pynsaphriang ïa ki sap ki phong jong ki sha ki paidbah lyngba ki rynsan jong ka digital.
Ka long kaba donkam ban tip ruh ba ka Akashvani ka la ju don ïa ka khana ha kaban pynlong ïa ka ïakob jong ka Akashvani Sangeet Sammelan, ha kaba ka la dep ban pynlong haduh 67 sien. Ka Akashvani Sangeet Sammelan ka ai ïa ka rynsan kaba don burom tam ïa ki nongrwai bad nongtem kiba la ïoh ïa ka kyrdan Top Grade bad A Grade ban pyni ïa ka sap bad ka jingstad jong ki ha ka kam rwai kam siaw bad ka tem ka put katba ka AIR Rising Stars pat ka long ka sienjam kyrpang, kaba thmu ban ai ïa ka rynsan kaba la buh kyrpang na ka bynta ki samla nongrwai bad nongtem kiba la ïoh kyrdan ïa ki kyrdan bapher bapher, kiba ym ju da kham ïohlad ban ïashimbynta ha ki concert kiba paw kiba pynlong da ka Akashvani.
Lyngba ka rynsan ïakob jong ka “AIR Rising Stars”, ka Akashvani ka thmu ruh ban thaw ïa ka rynsan kaba kyrpang ha ka Ri baroh kawei na ka bynta ka pateng jong ki nongrwai bad nongtem kiba dang mih thymmai, bad ruh ha kajuh ka por ban pynkhlaiñ ïa ka jingïadei hapdeng ki jingrwai tynrai jong ka pateng ba mynshwa jong ka India kiba la neh slem bad don bad ki samla jong ka Ri. Ym tang kata kane ka sienjam kan pynkhlaiñ shuh shuh ïa ka bynta kaba la slem bha jong ka Akashvani ha kaban kyntiew bad tynrong ïa ka jingriewspah jong ka lariti bad ka pateng jong ka rukom rwai tynrai ha ka Ri India, bad ban long ka jaka ai jinghikai na ka bynta ban pynroi ïa ki samla kiba dang sdang ban mihkhmat bad kiba don shisha ïa sap ha ka kam rwai kam siaw bad ka tem ka put.
*****