KI JINGAI KHUBLEI JONG KA PRESIDENT KA RI INDIA HA SHWA KA JINGLEHKMEN DIWALI

Ka President jong ka Ri India, ka Droupadi Murmu, ka la phah ïa ki jingai khublei sha baroh ki paid nongshong shnong jong ka Ri ha shwa ka sngi lehkmen Diwali

Ha ka kyrwoh, ka President ka la ong, “Ha kane ka sngi kaba kyrpang jong ka jingrakhe ia ka Diwali, nga phah ïa ki jingai khublei bad ki jingkitbok kitrwiang jong nga sha baroh ki nong India kiba shong ba sah hapoh ka Ri bad kiba shong ba sah shabar jong ka Ri India”

Ki jingrakhe jong ka aiom lehkmen ki long hadien ka jingwan phai jong U Bhagwan Shri Ram sha Ayodhya, hadien ka jingjop jong U ïa u Ravana. U Bhagwan Shri Ram u la iohi ïa ki jingpynbeit itynnad jong ki sharak kiba la thaba bad pynshai. Kane ka pyni ïa ka jingmut kaba khraw jong ka Diwali ha ka kolshor bad ka jingngeit niam. Ka ne ka jinglehkmen ka long ruh ka dak jong ka jingsdang kaba bha jong ka Ram Rajya.

Ka jingrakhe ïa ka Diwali ka pyni ïa ka jingjop jong ki jinglong babha halor ki jinglong basniew. Ka pyni ruh ïa ki jingkut jong ki jingjynjar bad ka jingsdang jong ka jingim kaba dap da ka jingkmen bad ka jingroi jingpar. Ha kane ka sngi rakhe, ki briew ki mane ïa U Bhagwan Ganesh na ka bynta ki jingsdang jong ka jingbha bad ka bha ka miat, bad ïa Ka Mahalakshmi Mata na ka bynta ka roi ka par. La duwai ruh na ka bynta ka jingkmen lang jong baroh.

Nga kitbok kitrwiang ïa baroh ki nongshong shnong jong ka ri, ba kin ioh ia ka koit ka khiah, ka jingkmen bad ka jingroi  jingpar. To ngin sumar bad pynneh pynsah ïa ka mariang, ngin im ha ka jingïatylli bad ka jingïasngewthuh jingmut, bad to ki samla kiba ieid ïa ka ri, kiba la ïalam da ki jinglong tynrai jong ka India, kin noh synñiang da ka jingtrei shitom bad ka jingkmen ban tei ïa ka Viksit Bharat (ka India kaba la kiew shaphrang).

*****