La buh hakhmat eh ia ka koit ka khiah ha ka Dhanteras bad pdiang ia ka rukom im kaba koit ba khiah: Prataprao Jadhav

U myntri khynnah ka tnat Ayush bad ka tnat ka koit ka khiah bad Family Welfare ka sorkar pdeng, u Prataprao Jadhav, ula khot la we ria ki paid nongshong shnong ban pynlong ia ka koit ka khiah bad ia ki lad jingiada jong ka kum ki bynta ba kongsan tam jong ka jingrakhe ia ka Dhanteras, da kaba banjur ruh ba ka jingpahuh pahai ba shisha ka shong ha ka jingkoit jingkhiah bad ka jingim bhai im miat. Haba pynpaw ia ka jingdonkam jong kane ka tamasa, u myntri ula pynshlur ia ki iing ki sem ban wanrah ia ka rukom im kaba koit ba khiah, ban buh hakhmat eh ia ki lad jingiada na ki jingpang bad ban bei tyngka na ka bynta ka koit ka khiah jong ki hadien habud.

Ka Dhanteras, ka don jingiadei ruh bad ka Dhanvantari Jayanti, ia kaba la ju rakhe ia ka jingwan jong u blei Dhanvantari ha ka por jong ka Samudra Manthan, da kaba rah ruh ia ka Amrit Kalash. La ju ai nam ia u kum u nongsumar ba kynja blei jong ki blei, u blei Dhanvantari u don ka jingiadei kaba iajan bad ka Ayurveda, kaba long ka jingstad saian tynrai jong ka jingim bad ka koit ka khiah jong ka India. Kane ka jingrakhe ka wanrah ia ka lad ka lynti ban khmihit ia ka jingdonkam jong ka koit ka khiah kum ka nongrim jong u briew shi met bad ka pahuh pahai jong ka iing ka sem.

U Jadhav ula pynpaw ba ia ka Dhanteras katkum ka rukom tynrai la pyniadei bad ka jingthied ia ka ksiar, ka rupa bad ia ki jingtiar ki tar ha iing ha sem kum ka dak jong ka jingpahuh pahai, kane ka tamasa ka long ruh kum ka jingpynkynmaw ba ki jingdon jingem jong ka spah ka phew ki shongdor haba ngi don ia ka met ka phad kaba koit ba khiah. Ula banjur ba ki iing ki sem ki dei ban ai kajuh ka jingkongsan ban iada ia ka koit ka khiah jong ki kumba ki ialeh ban ioh ia ka lawei jong ki kaba pahuh pahai.

Da kaba khring ia ka jingmut jingpyrkhat halor ka jingdonkam ia ki lad jingiada jong ka koit ka khiah, u myntri ula khmih bniah ba ki jingiatai ia ka koit ka khiah bunsien ki sdang hadien ba la ioh ia ka jingpang, hynrei ngi dei ban ai kajuh ka jingdonkam halor ka jingkhanglad ia ki jingpang lyngba ka jingjied ia ka rukom im kaba koi tba khiah. Haba phai sha ka nongrim  jong ka Ayurvedic ka “Swasthasya Swasthya Rakshanam”, kaba banjur halor ka jingpynneh ia ka koit ka khiah jong ki briew kiba koi tba khiah, ula pynpaw ia ka jingiadei jong kane ka nongrim ha ka ban weng ia ki jingeh kiba nangbun kum ki jingpang bym iabit, ka rukom im kaba shu shong hajuh bad ka jingim kaba dap jingkhuslai.

U myntri ula pynpaw ba ki jingmlien ba man ka sngi, ba kynthup ka jingbam ia ka jingbam kaba don baroh ki jait jingbam batei, ka jingkilan met man ka por, ka por thiah kaba biang bad ka jingpynduna ia ka jigkhuslai, ki don ia ka bynta ba kongsan na ka bynta ka bha ka miat jong ngi. Ula pynshlur ia ki longing longsem ban pynmlien ban bam ia ki jingbam ba shet hala iing bad ia ki jingbam batei, ban pynduna ia ka jingbam  palat ia ki jingbam khutia na jingbam kai, ban kilan met barabor bad ban pynthikna ba ki dkhot jong ka longing longsem kiba la kham noh ryta kin ioh ia ka jingsumar bad ka jingiada ba paka. Ka jingleh Yoga manla ka por bad ka jingleit phah khmih ia ka koit ka khiah na ka por sha ka por ki long ki sienjam ba kongsan na ka bynta ki lad jingiada jong ka koit ka khiah.

Haba pynpaw ia ka jingnohsynniang jong ka rukom treikam jong ka Ayush ha ka ban kyntiew ia ki lad jingiada jong ka koit ka khiah, u Jadhav ula ong ba ki sienjam kiba kum ka Ayushman Arogya Mandirs ki iarap ha ka ban pyniar shuh shuh ia ka jingai jingiarap jong ki jaka ai jingsumar jong ka Ayush ha ki shnong ki thaw. Ula banjur ruh halor ka jingdonkam jong ka jingwadbniah jong ka jingstad saian, ki jingpyrshang kiba kham bha kiba long katkum ka jingpynshisha ban pynthikna ba ki rukom ai dawai tynrai jong ka India ki don ia ka bynta ba kongsan ha ki kyndon treikam jong ka koit ka khiah jong ka ri. 

Haba kdew ia ka jingthrang jong u myntri rangbahduh badonburom ka ri, u Narendra Modi na ka bynta ka Fit India, u myntri ula pynkynmaw ia ka jingbanjur jong u ha ka ban wanrah ia ka jingkylla kaba rit hynrei kaba don jingmut ha ka rukom im jong ngi kaba manla ka sngi na ka bynta ban iada na ka rukom im kaba iadei bad ki jingpang. Ula pynpaw ba ka jingim kaba koit ba khiah kam dei eh tang na ka bynta jong uwei ne kawei ka briew hynrei ka long ka nongrim ba kongsan na ka bynta ka imlang sahlang kaba koi tba khiah bad kaba pahuh pahai. Katba ka India ka dang iaid shaphrang ban poi sha ka thong jong ka Viksit Bharat 2047, ki nongshong shnong kiba shait ba khlain bad kiba phikir ia ka koit ka khiah kin long kiba hakhmat eh ha ka jingiaid lynti na ka bynta ka roi ka par jong ka ri.

Da kaba khot ba wer ia ki nongshong shnong ban shim ia ki lad jingiada jong ka koit ka khiah na ka bynta ia lade shimet bad na ka bynta ka iing ka sem da ka jingkut jingmut ha kane  ka Dhanteras, u Jadhav ula ai mynsiem bad pynhlur ia baroh ba kin wanrah la kumno kumno kawei ka jingmlien babha ha ka jingim jong ki ba manla ka sngi bad ai mynsiem ia kiwei pat ki longiing longsem ban leh kumjuh. Ula kyntu ruh ia ki paidbah ba kin kham pynleit jingmut na ka bynta ka koit ka khiah jong ki dkhot jong ka longiing longsem kiba la kham noh ryta,ia ki longkmie bad ia ki khunlung khynnah, ban pan jingmut na ka bynta ka jingsumar ha ka pork aba biang bad ban pynlong ia ka rukom im kaba koit ba khiah kum ka jingkitkhlieh lang shi iing shi sem.

U myntri ula banjur ba ha kane ka Dhanteras, ki paid nongshong shnong ki dei ban peit kham palat ia ki dak ki shin tynrai jong ka jingpahuh pahai bad ban pdiang ia ki jingmlien kiba koit ba khiah, ban sumar ia kiba ieid ba thoin jong ki bad ban shim ia ki lad jingiada jong ka koit ka khiah kum ka nongrim jong ka lawei jong ka iing ka sem jong ki, da kaba pynskhem biang ia ka jinghikai ba “ Ka Jingkoit Jingkhiah ka dei ka Spah bah.”