ଧନତେରସରେ ସୁସ୍ଥ ଜୀବନଶୈଳୀ ଆପଣାଇବାକୁ ପ୍ରତାପରାଓ ଯାଧବଙ୍କ ଆହ୍ୱାନ

ଆୟୁଷ ମନ୍ତ୍ରଣାଳୟର କେନ୍ଦ୍ର ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ତଥା ସ୍ୱାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ରମନ୍ତ୍ରୀ, ଶ୍ରୀ ପ୍ରତାପରାଓ ଯାଦବ ନାଗରିକମାନଙ୍କୁ ଧନତେରସ୍ ପାଳନ ଅବସରରେ ସ୍ୱାସ୍ଥ୍ୟ ଏବଂ ରୋଗ ପ୍ରତିଷେଧକ ବ୍ୟବସ୍ଥାକୁ ନିଜ ଜୀବନର ଏକ ଅବିଚ୍ଛେଦ୍ୟ ଅଙ୍ଗ କରିବାକୁ ଆହ୍ୱାନ ଦେଇଛନ୍ତି। ସେ ଗୁରୁତ୍ୱାରୋପ କରିଛନ୍ତି ଯେ ପ୍ରକୃତ ସମୃଦ୍ଧି ଉତ୍ତମ ସ୍ୱାସ୍ଥ୍ୟ ଏବଂ କଲ୍ୟାଣ ମଧ୍ୟରେ ହିଁ ନିହିତ ଥାଏ। ଏହି ପର୍ବର ମହତ୍ତ୍ୱ ଉପରେ ଆଲୋକପାତ କରି, ମନ୍ତ୍ରୀ ପରିବାରବର୍ଗଙ୍କୁ ଏକ ସୁସ୍ଥ ଜୀବନଶୈଳୀ ଆପଣାଇବାକୁ, ରୋଗ ପ୍ରତିରୋଧକୁ ପ୍ରାଥମିକତା ଦେବାକୁ ଏବଂ ନିଜର ଦୀର୍ଘକାଳୀନ ସ୍ୱାସ୍ଥ୍ୟ ପାଇଁ ସଚେତନ ଭାବେ ନିବେଶ କରିବାକୁ ଉତ୍ସାହିତ କରିଛନ୍ତି।

ଧନତେରସ୍, ଯାହା ଧନ୍ୱନ୍ତରୀ ଜୟନ୍ତୀ ସହିତ ମଧ୍ୟ ଜଡ଼ିତ, ସମୁଦ୍ର ମନ୍ଥନ ସମୟରେ ହସ୍ତରେ ଅମୃତ କଳଶ ଧାରଣ କରି ଭଗବାନ ଧନ୍ୱନ୍ତରୀଙ୍କ ଆବିର୍ଭାବକୁ ସ୍ମରଣ କରାଇଥାଏ। ଦେବତାମାନଙ୍କର ଦିବ୍ୟ ଚିକିତ୍ସକ ଭାବରେ ପୂଜିତ ଭଗବାନ ଧନ୍ୱନ୍ତରୀ, ଭାରତର ପାରମ୍ପରିକ ଜୀବନ ଓ ସ୍ୱାସ୍ଥ୍ୟ ବିଜ୍ଞାନ ଆୟୁର୍ବେଦ ସହିତ ଘନିଷ୍ଠ ଭାବେ ଜଡ଼ିତ। ଏହି ପର୍ବ ବ୍ୟକ୍ତିଗତ ତଥା ପାରିବାରିକ ସମୃଦ୍ଧିର ମୂଳଦୁଆ ଭାବରେ ସ୍ୱାସ୍ଥ୍ୟର ଗୁରୁତ୍ୱ ଉପରେ ଚିନ୍ତନ କରିବାର ଏକ ସୁଯୋଗ ପ୍ରଦାନ କରିଥାଏ।

ଶ୍ରୀ ଯାଦବ ଆଲୋକପାତ କରିଛନ୍ତି ଯେ, ଯଦିଓ ପାରମ୍ପରିକ ଭାବରେ ଧନତେରସ୍ ସମୟରେ ସମୃଦ୍ଧିର ପ୍ରତୀକ ଭାବରେ ସୁନା, ରୂପା ଏବଂ ଘରୋଇ ସାମଗ୍ରୀ କିଣିବାର ପ୍ରଥା ରହିଛି, ତଥାପି ଏହି ପର୍ବ ଆମକୁ ମନେ ପକାଇ ଦିଏ ଯେ ଉତ୍ତମ ସ୍ୱାସ୍ଥ୍ୟ ଥିଲେ ହିଁ ଭୌତିକ ସମ୍ପଦର ପ୍ରକୃତ ମୂଲ୍ୟ ରହିଥାଏ। ସେ ଗୁରୁତ୍ୱାରୋପ କରି କହିଛନ୍ତି ଯେ, ପରିବାରଗୁଡ଼ିକ ନିଜର ଭବିଷ୍ୟତ ସମୃଦ୍ଧି ସୁନିଶ୍ଚିତ କରିବା ପାଇଁ ଯେପରି ଗୁରୁତ୍ୱ ଦିଅନ୍ତି, ନିଜ ସ୍ୱାସ୍ଥ୍ୟର ସୁରକ୍ଷା ପାଇଁ ମଧ୍ୟ ସେତିକି ଗୁରୁତ୍ୱ ଦେବା ଉଚିତ୍।

ପ୍ରତିରୋଧୀ ସ୍ୱାସ୍ଥ୍ୟସେବାର ଗୁରୁତ୍ୱ ପ୍ରତି ଦୃଷ୍ଟି ଆକର୍ଷଣ କରି ମନ୍ତ୍ରୀ କହିଥିଲେ ଯେ ରୋଗ ହେବା ପରେ ସ୍ୱାସ୍ଥ୍ୟସେବା ଆଲୋଚନା ପ୍ରାୟତଃ ଆରମ୍ଭ ହୁଏ, କିନ୍ତୁ ସୁସ୍ଥ ଜୀବନଶୈଳୀ ବାଛିବା ମାଧ୍ୟମରେ ରୋଗକୁ ରୋକିବା ଉପରେ ସମାନ ଗୁରୁତ୍ୱ ଦିଆଯିବା ଉଚିତ। ସୁସ୍ଥ ବ୍ୟକ୍ତିମାନଙ୍କ ସ୍ୱାସ୍ଥ୍ୟର ସଂରକ୍ଷଣ ଉପରେ ଗୁରୁତ୍ୱ ଦେଉଥିବା ଆୟୁର୍ବେଦିକ ନୀତି "ସ୍ୱାସ୍ଥସ୍ୟ ସ୍ୱାସ୍ଥ୍ୟ ରକ୍ଷାମ୍" କୁ ଉଲ୍ଲେଖ କରି, ସେ ଅଣ-ସଂକ୍ରମିତ ରୋଗ, ଆରାମଦାୟକ ଜୀବନଶୈଳୀ ଏବଂ ଚାପ ଭଳି ବଢ଼ୁଥିବା ଆହ୍ବାନର ମୁକାବିଲା କରିବାରେ ଏହି ପଦ୍ଧତିର ପ୍ରାସଙ୍ଗିକତା ଉପରେ ଆଲୋକପାତ କରିଥିଲେ।

ମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ସନ୍ତୁଳିତ ପୁଷ୍ଟିସାର, ନିୟମିତ ଶାରୀରିକ କାର୍ଯ୍ୟକଳାପ, ପର୍ଯ୍ୟାପ୍ତ ନିଦ୍ରା ଏବଂ ଚାପ ପରିଚାଳନା ସମେତ ଦୈନନ୍ଦିନ ଅଭ୍ୟାସ ସାମଗ୍ରିକ ସୁସ୍ଥତା ବଜାୟ ରଖିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ସେ ପରିବାରଗୁଡ଼ିକୁ ଘରେ ରନ୍ଧା ଏବଂ ପୁଷ୍ଟିକର ଖାଦ୍ୟକୁ ପ୍ରୋତ୍ସାହିତ କରିବା, ଜଙ୍କ ଫୁଡ୍ ର ଅତ୍ୟଧିକ ବ୍ୟବହାର ହ୍ରାସ କରିବା, ନିୟମିତ ଶାରୀରିକ କାର୍ଯ୍ୟକଳାପ କରିବା ଏବଂ ବୃଦ୍ଧ ପରିବାର ସଦସ୍ୟମାନଙ୍କୁ ଉପଯୁକ୍ତ ଯତ୍ନ ଏବଂ ଧ୍ୟାନ ପାଇବା ନିଶ୍ଚିତ କରିବା ପାଇଁ ଉତ୍ସାହିତ କରିଥିଲେ। ନିୟମିତ ଯୋଗ ଅଭ୍ୟାସ ଏବଂ ସମୟାନୁସାରେ ସ୍ୱାସ୍ଥ୍ୟ ପରୀକ୍ଷାକୁ ମଧ୍ୟ ପ୍ରତିରୋଧୀ ସ୍ୱାସ୍ଥ୍ୟସେବା ଦିଗରେ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ ଆଲୋକପାତ କରାଯାଇଥିଲା।

ରୋଗ ପ୍ରତିରୋଧ ଏବଂ ସ୍ୱାସ୍ଥ୍ୟ ଉନ୍ନତିକରଣ କ୍ଷେତ୍ରରେ 'ଆୟୁଷ' ପଦ୍ଧତିଗୁଡ଼ିକର ଅବଦାନ ଉପରେ ଆଲୋକପାତ କରି ଶ୍ରୀ ଯାଦବ କହିଲେ ଯେ, ଆୟୁଷ୍ମାନ ଆରୋଗ୍ୟ ମନ୍ଦିର ଭଳି ପଦକ୍ଷେପଗୁଡ଼ିକ ସାମୁଦାୟିକ ସ୍ତରରେ ଆୟୁଷ-ଆଧାରିତ ସ୍ୱାସ୍ଥ୍ୟସେବାକୁ ଅଧିକ ଲୋକଙ୍କ ନିକଟରେ ପହଞ୍ଚାଇବାରେ ସାହାଯ୍ୟ କରୁଛି। ସେ ଏହା ମଧ୍ୟ ଗୁରୁତ୍ୱ ଦେଇ କହିଲେ ଯେ, ଭାରତର ପାରମ୍ପରିକ ଚିକିତ୍ସା ପଦ୍ଧତିଗୁଡ଼ିକ ଯେପରି ଦେଶର ସ୍ୱାସ୍ଥ୍ୟସେବା ବ୍ୟବସ୍ଥାରେ ଏକ ଦାୟିତ୍ୱପୂର୍ଣ୍ଣ ଯୋଗଦାନ ଦେଇପାରିବେ, ସେଥିପାଇଁ ବୈଜ୍ଞାନିକ ଗବେଷଣା, ଗୁଣାତ୍ମକ ମାନଦଣ୍ଡ ଏବଂ ପ୍ରମାଣ-ଆଧାରିତ ଅଭ୍ୟାସ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।

ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ 'ଫିଟ୍ ଇଣ୍ଡିଆ' (ସୁସ୍ଥ ଭାରତ) ସମ୍ବନ୍ଧୀୟ ଦୂରଦୃଷ୍ଟିକୁ ଉଲ୍ଲେଖ କରି ମନ୍ତ୍ରୀ କହିଲେ ଯେ, ଜୀବନଶୈଳୀ ଜନିତ ରୋଗଗୁଡ଼ିକୁ ରୋକିବା ପାଇଁ ଦୈନନ୍ଦିନ ଜୀବନଚର୍ଯ୍ୟାରେ ଛୋଟ କିନ୍ତୁ ଅର୍ଥପୂର୍ଣ୍ଣ ପରିବର୍ତ୍ତନ ଆଣିବା ଉପରେ ପ୍ରଧାନମନ୍ତ୍ରୀ ଗୁରୁତ୍ୱ ଦେଇଥିଲେ। ସେ କହିଲେ ଯେ, ଶାରୀରିକ ସୁସ୍ଥତା (ଫିଟନେସ୍) କେବଳ ବ୍ୟକ୍ତିଗତ ଉଦ୍ୟମ ନୁହେଁ, ବରଂ ଏକ ସୁସ୍ଥ ଓ ସମୃଦ୍ଧ ସମାଜ ଗଠନ ପାଇଁ ଏହା ଏକ ମୂଳଦୁଆ ଅଟେ। ଭାରତ ଯେତେବେଳେ ବିକଶିତ ଭାରତ ୨୦୪୭ ଲକ୍ଷ୍ୟ ଆଡ଼କୁ ଅଗ୍ରସର ହେଉଛି, ସେତେବେଳେ ଅଧିକ ସୁସ୍ଥ ଏବଂ ସ୍ୱାସ୍ଥ୍ୟ ସଚେତନ ନାଗରିକମାନେ ଦେଶର ବିକାଶ ଯାତ୍ରାର ମୁଖ୍ୟ ଆଧାର ହେବେ।

ଏହି ଧନତେରସରେ ପ୍ରତିରୋଧକ ସ୍ୱାସ୍ଥ୍ୟସେବାକୁ ବ୍ୟକ୍ତିଗତ ଏବଂ ପାରିବାରିକ ପ୍ରତିବଦ୍ଧତା କରିବାକୁ ନାଗରିକମାନଙ୍କୁ ଆହ୍ୱାନ କରି ଶ୍ରୀ ଯାଦବ ସମସ୍ତଙ୍କୁ ସେମାନଙ୍କ ଦୈନନ୍ଦିନ କାର୍ଯ୍ୟସୂଚୀରେ ଅତି କମରେ ଗୋଟିଏ ସକାରାତ୍ମକ ସ୍ୱାସ୍ଥ୍ୟ ଅଭ୍ୟାସକୁ ସାମିଲ କରିବାକୁ ଏବଂ ପରିବାରର ଅନ୍ୟ ସଦସ୍ୟଙ୍କୁ ସେହିପରି କରିବାକୁ ପ୍ରେରଣା ଦେବାକୁ ଉତ୍ସାହିତ କରିଥିଲେ। ସେ ପରିବାରର ବୃଦ୍ଧ ସଦସ୍ୟ, ମହିଳା ଏବଂ ପିଲାମାନଙ୍କ ସ୍ୱାସ୍ଥ୍ୟ ପ୍ରତି ଅଧିକ ଧ୍ୟାନ ଦେବାକୁ, ସମୟୋଚିତ ଡାକ୍ତରୀ ପରାମର୍ଶ ନେବାକୁ ଏବଂ ସୁସ୍ଥ ଜୀବନଯାପନକୁ ଏକ ସହଭାଗୀ ପାରିବାରିକ ଦାୟିତ୍ୱ କରିବାକୁ ମଧ୍ୟ ଲୋକଙ୍କୁ ଅନୁରୋଧ କରିଥିଲେ।

ମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ଏହି ଧନତେରସରେ, ନାଗରିକମାନେ ସମୃଦ୍ଧିର ପାରମ୍ପରିକ ପ୍ରତୀକଠାରୁ ଅଧିକ ଦେଖିବା ଉଚିତ ଏବଂ ସୁସ୍ଥ ଅଭ୍ୟାସକୁ ଗ୍ରହଣ କରିବା ଆବଶ୍ୟକ। ସେମାନଙ୍କ ପ୍ରିୟଜନଙ୍କ ଯତ୍ନ ନେବା ଉଚିତ ଏବଂ ପ୍ରତିରୋଧକ ସ୍ୱାସ୍ଥ୍ୟସେବାକୁ ସେମାନଙ୍କ ପରିବାରର ଭବିଷ୍ୟତର ମୂଳଦୁଆ କରିବା ଆବଶ୍ୟକ। "ସ୍ୱାସ୍ଥ୍ୟ ହେଉଛି ସର୍ବୋତ୍ତମ ସମ୍ପଦ" ଏହି କାଳଜୟୀ ସର୍ବଦା ମନେରଖିବା ଉଚିତ।

***