પ્રધાનમંત્રી 2 નવેમ્બર, 2026ના રોજ 'ભારત રિન્યુએબલ એનર્જી સમિટ એન્ડ એક્સ્પો 2026' નું ઉદ્ઘાટન કરશે

130થી વધુ દેશો ભાગ લે તેવી અપેક્ષા; સમિટ વૈશ્વિક નેતાઓ, રોકાણકારો, ઉદ્યોગ સાહસિકો અને ઇનોવેટર્સ એકસાથે લાવશે.

ઓસ્ટ્રેલિયા, ડેનમાર્ક, યુરોપિયન યુનિયન, ફ્રાન્સ, જર્મની, નેધરલેન્ડ, નોર્વે, સ્વીડન, યુનાઇટેડ કિંગડમ 'કંટ્રી પાર્ટનર્સ' તરીકે ભાગ લેશે.

આંધ્ર પ્રદેશ, આસામ, બિહાર, છત્તીસગઢ, દિલ્હી, ગુજરાત, કર્ણાટક, મધ્ય પ્રદેશ, મહારાષ્ટ્ર, ઓડિશા, રાજસ્થાન, ઉત્તર પ્રદેશ અને પશ્ચિમ બંગાળ સહિત તેર રાજ્યો અને કેન્દ્રશાસિત પ્રદેશો આ સમિટમાં ભાગ લેશે, જે તેમની અક્ષય ઊર્જા ક્ષમતા, રોકાણની તકો અને ઉત્પાદન ક્ષમતાઓનું પ્રદર્શન કરશે.

રાષ્ટ્રીય અને વૈશ્વિક પ્રદર્શનકર્તાઓ અક્ષય ઊર્જા ટેકનોલોજીનું પ્રદર્શન કરશે; નેશનલ હેકાથોન, રિન્યુએબલ એનર્જી ક્વિઝ અને 'REGen' પેવેલિયન મુખ્ય આકર્ષણોમાં સામેલ છે

ભારત સરકારના નવી અને અક્ષય ઊર્જા મંત્રાલય (MNRE) દ્વારા 2 થી 5 નવેમ્બર 2026 દરમિયાન ભારત મંડપમ, નવી દિલ્હી ખાતે 'ભારત રિન્યુએબલ એનર્જી સમિટ એન્ડ એક્સ્પો (BRESE) 2026' નું આયોજન કરવામાં આવી રહ્યું છે.

માનનીય પ્રધાનમંત્રી શ્રી નરેન્દ્ર મોદી 2 નવેમ્બર 2026ના રોજ આ સમિટનું ઉદ્ઘાટન કરશે.

ભારત સરકારના નવી અને અક્ષય ઊર્જા મંત્રાલયના સચિવ શ્રી સંતોષ સારંગીએ આજે અહીં પત્રકારોને સંબોધતા જણાવ્યું હતું કે, “ભારતનું ક્લીન એનર્જી ટ્રાન્ઝિશન (સ્વચ્છ ઊર્જા તરફનું પ્રયાણ) નિર્ણાયક તબક્કામાં પ્રવેશ કરી રહ્યું છે. 308 GW ની સ્થાપિત નોન-ફોસિલ ફ્યુઅલ (બિન-અશ્મિભૂત બળતણ) ક્ષમતા સાથે, આપણે 2030 સુધીમાં આપણા 500 GW ના લક્ષ્યાંક સુધી પહોંચવા માટે મક્કમતાથી આગળ વધી રહ્યા છીએ. આ આકાંક્ષાને સાકાર કરવા માટે 2027 થી 2030 વચ્ચે આશરે 220 બિલિયન યુએસ ડોલરના રોકાણની જરૂર પડશે, જેની સાથે ઊર્જા સંગ્રહના ઝડપી અમલીકરણ, મજબૂત ટ્રાન્સમિશન નેટવર્ક્સ અને વિસ્તૃત સ્થાનિક ઉત્પાદન ક્ષમતાઓની જરૂર પડશે. 'ભારત રિન્યુએબલ એનર્જી સમિટ એન્ડ એક્સ્પો 2026' વૈશ્વિક મૂડી, ટેકનોલોજી અને ઉદ્યોગની કુશળતાને ભારતની વધતી જતી સ્વચ્છ ઊર્જાની તકો સાથે જોડવા માટે એક મહત્વપૂર્ણ મંચ પૂરો પાડશે, જે રોકાણની સક્ષમતાને પ્રોજેક્ટ્સ, ભાગીદારી અને પ્રગતિમાં રૂપાંતરિત કરશે.”

'ઇન્વેસ્ટ. ઇનોવેટ. ઇન્સ્પાયર.' (Invest. Innovate. Inspire.) થીમ પર આધારિત આ ચાર દિવસીય ઇવેન્ટમાં 130થી વધુ દેશોના સહભાગીઓ હાજર રહેવાની અપેક્ષા છે, જેમાં મંત્રીઓ, નીતિ નિર્માતાઓ, ઉદ્યોગ સાહસિકો, રોકાણકારો, નાણાકીય સંસ્થાઓ, ઉત્પાદકો, નાવીન્યકારો, સંશોધકો અને બહુપક્ષીય સંગઠનોના પ્રતિનિધિઓ શામેલ છે. આ સમિટનું આયોજન 'ઇન્ટરનેશનલ સોલર એલાયન્સ' (ISA) એસેમ્બલીના 9મા સત્ર અને 'ઇન્ટરનેશનલ કોન્ફરન્સ ઓન ગ્રીન હાઇડ્રોજન' (ICGH) ની 4થી આવૃત્તિની સાથે સાથે કરવામાં આવશે. આ ત્રણેય ઇવેન્ટ્સ અક્ષય ઊર્જા રોકાણ, આંતરરાષ્ટ્રીય સહયોગ, ઉભરતી ટેકનોલોજી અને સ્વચ્છ ઊર્જાના અમલીકરણ અંગેની ચર્ચાઓ માટે એક સામાન્ય મંચ પૂરો પાડશે.

ઓસ્ટ્રેલિયા, ડેનમાર્ક, યુરોપિયન યુનિયન, ફ્રાન્સ, જર્મની, નેધરલેન્ડ, નોર્વે, સ્વીડન અને યુનાઇટેડ કિંગડમ દેશ ભાગીદારો (Country Partners) તરીકે ભાગ લેશે. અક્ષય ઊર્જા ધિરાણ, ગ્રીન હાઇડ્રોજન, એનર્જી સ્ટોરેજ, ક્લીન એનર્જી મેન્યુફેક્ચરિંગ અને ટેકનોલોજી વિકાસમાં સહયોગની તકો શોધવા માટે અન્ય કેટલાક દેશોના પ્રતિનિધિમંડળો પણ આ સમિટમાં હાજરી આપે તેવી અપેક્ષા છે.

તેર ભારતીય રાજ્યો 'પાર્ટનર સ્ટેટ્સ' તરીકે ભાગ લેશે અને તેમની અક્ષય ઊર્જા ક્ષમતા, રોકાણની તકો, નીતિગત પહેલો અને ઉત્પાદન ક્ષમતાઓનું પ્રદર્શન કરશે. અન્ય સહભાગી રાજ્યો પણ અક્ષય ઊર્જા વિકાસ અને રોકાણ માટેની તકો પર પ્રકાશ પાડશે.

ભારત 2030 સુધીમાં 500 GW ના તેના લક્ષ્યાંક તરફ આગળ વધી રહ્યું છે, જે અક્ષય ઊર્જા અને સૌર સ્થાપિત ક્ષમતામાં વૈશ્વિક સ્તરે ત્રીજા સ્થાને અને પવન ઊર્જા ક્ષમતામાં ચોથા સ્થાને છે. બ્લૂમબર્ગ એનઇએફ (BloombergNEF) અનુસાર, ભારતે જુલાઈ 2024 થી જૂન 2026 દરમિયાન તેના અક્ષય ઊર્જા ક્ષેત્રમાં 63.7 બિલિયન યુએસ ડોલરનું રોકાણ કર્યું છે. આ ગતિને આગળ ધપાવતા, આ સમિટ આંતરરાષ્ટ્રીય સહયોગને મજબૂત કરવા, રોકાણ એકત્રિત કરવા અને ખાસ કરીને ઉભરતા અર્થતંત્રો અને ગ્લોબલ સાઉથમાં અક્ષય ઊર્જાના અમલીકરણને ઝડપી બનાવવા માટે વૈશ્વિક નીતિ નિર્માતાઓ, રોકાણકારો, ઉદ્યોગ સાહસિકો અને નાવીન્યકારોને એકસાથે લાવશે. આ ચાર દિવસીય પરિષદમાં ઉચ્ચ-સ્તરીય પૂર્ણ સત્રો (plenaries), મંત્રી સ્તરની ચર્ચાઓ, સીઇઓ રાઉન્ડટેબલ અને નાણાકીય સહાય, નીતિ, ટેકનોલોજી અને કૌશલ્ય પર ધ્યાન કેન્દ્રિત કરતી કંટ્રી અને સ્ટેટ સેશન્સ યોજાશે. ચર્ચાઓમાં સ્વચ્છ ઊર્જા રોકાણ, ઉભરતી ટેકનોલોજી, ઉત્પાદન, ઊર્જા સંગ્રહ અને કાર્યબળ વિકાસને આવરી લેવામાં આવશે, જેમાં ટેકનોલોજી વિનિમય, સ્કેલેબલ સોલ્યુશન્સ અને વૈશ્વિક ઊર્જા સંક્રમણમાં મહિલાઓની વધુ ભાગીદારી અને નેતૃત્વ પર ભાર મૂકવામાં આવશે.

સાથે યોજાનારી 9મી ISA એસેમ્બલી પોતાની સફળ નીતિઓ, ટેકનોલોજી અને અમલીકરણ મોડલ્સને ગ્લોબલ સાઉથના દેશો સુધી પહોંચાડીને સૌર ઊર્જાને આગળ ધપાવવામાં ભારતના વૈશ્વિક નેતૃત્વને વધુ મજબૂત કરશે. ISA ની સર્વોચ્ચ નિર્ણય લેતી સંસ્થા તરીકે, આ એસેમ્બલી સૌર ઉર્જાના અમલીકરણ, ધિરાણ અને ક્ષમતા નિર્માણ અંગેની પ્રાથમિકતાઓ નક્કી કરવા અને સામૂહિક કાર્યવાહી માર્ગદર્શન માટે હસ્તાક્ષરકર્તા અને સભ્ય દેશોના મંત્રીઓ અને પ્રતિનિધિઓને એકસાથે લાવશે. PM-KUSUM અને PM સૂર્ય ઘર જેવી ફ્લેગશિપ પહેલો સાથેના ભારતના અનુભવ પર આધાર રાખીને, ISA દેશ-સંચાલિત કાર્યક્રમો, રોકાણ એકત્રીકરણ અને સંસ્થાકીય ભાગીદારી દ્વારા સાબિત થયેલા ઉકેલોને અપનાવવામાં અને વિસ્તારવામાં દેશોને મદદ કરી રહ્યું છે, જેનાથી ભારતની અક્ષય ઊર્જા સફળતાને વિશ્વભરમાં મૂર્ત લાભોમાં રૂપાંતરિત કરી શકાય છે.

આ સાથેના પ્રદર્શનમાં ભારત અને વિદેશના 400 થી વધુ અગ્રણી ઉત્પાદકો, ડેવલપર્સ, ટેકનોલોજી પ્રોવાઇડર્સ, જાહેર અને ખાનગી ક્ષેત્રની કંપનીઓ, સ્ટાર્ટઅપ્સ અને સંશોધન સંસ્થાઓ ભાગ લેશે. આ પ્રદર્શન અક્ષય ઊર્જા ક્ષેત્રે ઉભરતી ટેકનોલોજી અને ઉકેલોનું પ્રદર્શન કરશે અને બિઝનેસ નેટવર્કિંગ, રોકાણ સુવિધા અને ટેકનોલોજી ભાગીદારી માટે તકો પૂરી પાડશે.

આ સમિટ 'ભારત રિન્યુએબલ એનર્જી હેકાથોન 2026' ના વિજેતાઓને પણ સન્માનિત કરશે અને એવોર્ડ આપશે. આ એક પ્રી-ઇવેન્ટ પહેલ હતી જેણે વિદ્યાર્થીઓ, સ્ટાર્ટઅપ્સ, સંશોધકો અને નાવીન્યકારોને બે ટ્રેક: અર્લી સ્ટેજ (Early Stage) અને ગ્રોથ સ્ટેજ (Growth Stage) હેઠળ અક્ષય ઊર્જાના દસ વાસ્તવિક પડકારોના ઉકેલો વિકસાવવા માટે એકસાથે આણ્યા હતા.

દેશભરમાં પ્રાદેશિક રાઉન્ડ દ્વારા આયોજિત 'RE નેશનલ રિન્યુએબલ એનર્જી ક્વિઝ 2026' ભારત મંડપમ ખાતે તેના ગ્રાન્ડ ફિનાલે સાથે સંપન્ન થશે. 'REGen' પેવેલિયન વિદ્યાર્થીઓ, યુવા નાવીન્યકારો, ઉદ્યોગસાહસિકો અને સંશોધકોને વિચારો રજૂ કરવા અને ઉદ્યોગના નેતાઓ સાથે જોડાવા માટે એક સમર્પિત મંચ પૂરો પાડશે.

આ સમિટ B2B, B2G, અને G2G જોડાણો પૂરા પાડશે, જે રોકાણકારો, ઉત્પાદકો, ટેકનોલોજી પ્રોવાઇડર્સ અને સરકારી પ્રતિનિધિઓને રોકાણની તકો, ભાગીદારી અને પ્રોજેક્ટ વિકાસની શક્યતાઓ ચકાસવા માટે જોડશે.

વધુ વિગતો માટે મુલાકાત લો: www.bresummit.in

SM/BS/JD