পোষ্ট কৰা হৈছে:
23 OCT 2026 3:12PM by PIB Guwahati
প্ৰধানমন্ত্ৰী শ্ৰী নৰেন্দ্ৰ মোদীৰ দৃষ্টিভংগীৰ সৈতে সংগতি ৰাখি ভাৰতে ভাৰতীয় সেনাৰ সৈতে প্ৰথমবাৰৰ বাবে যুটীয়া প্ৰশিক্ষণ পদক্ষেপৰ সৈতে এক উজ্জীৱিত অসামৰিক প্ৰতিৰক্ষা নেটৱৰ্ক গঢ়ি তুলিব। প্ৰথম পৰ্যায়ত ১২ খন ৰাজ্য/কেন্দ্ৰীয়শাসিত অঞ্চলত অসামৰিক প্ৰতিৰক্ষাৰ মাষ্টাৰ প্ৰশিক্ষকসকলৰ বাবে তিনিদিনীয়া বিশেষ প্ৰশিক্ষণ অনুষ্ঠিত হ’ব।
২০২৬ চনৰ ১৫ আগষ্টত লালকিল্লাৰ পৰা ৰাষ্ট্ৰক সম্বোধন কৰি প্ৰধানমন্ত্ৰী শ্ৰী নৰেন্দ্ৰ মোদীয়ে নতুনকৈ সৃষ্টি হোৱা নিৰাপত্তা প্ৰত্যাহ্বানৰ মোকাবিলা কৰিবলৈ আধুনিক ব্যৱস্থা, প্ৰযুক্তি আৰু সমসাময়িক প্ৰস্তুতিৰ সামৰ্থ্যৰে সজ্জিত এক উজ্জীৱিত অসামৰিক প্ৰতিৰক্ষা নেটৱৰ্ক গঢ়ি তোলাৰ দৃষ্টিভংগী ঘোষণা কৰিছিল। এই দৃষ্টিভংগীক আগুৱাই নিয়াৰ বাবে গৃহ পৰিক্ৰমা মন্ত্ৰালয়ৰ অগ্নিনিৰ্বাপক সেৱা, অসামৰিক প্ৰতিৰক্ষা আৰু গৃহ সুৰক্ষা বাহিনীৰ সঞ্চালকালয়ে (ডিজিএফএছচিডিএইচজি) ভাৰতীয় সেনাৰ সৈতে সমন্বয় ৰক্ষা কৰি অসামৰিক প্ৰতিৰক্ষাৰ প্ৰস্তুতি শক্তিশালী কৰাৰ বাবে ভাৰতীয় সেনাৰ দ্বাৰা অসামৰিক প্ৰতিৰক্ষাৰ মাষ্টাৰ প্ৰশিক্ষকসকলৰ বিশেষ প্ৰশিক্ষণৰ জৰিয়তে প্ৰথমবাৰৰ বাবে এক পাইলট পদক্ষেপ গ্ৰহণ কৰিছে।
প্ৰথম পৰ্যায়ত প্ৰতিখন অংশগ্ৰহণকাৰী ৰাজ্য/কেন্দ্ৰীয়শাসিত অঞ্চলৰ পৰা ৫০ গৰাকীকৈ মুঠ ৬০০ অসামৰিক প্ৰতিৰক্ষা মাষ্টাৰ প্ৰশিক্ষকক ২০২৬ চনৰ নৱেম্বৰৰ দ্বিতীয় সপ্তাহৰ ভিতৰত নিৰ্ধাৰিত ভাৰতীয় সেনা প্ৰশিক্ষণ প্ৰতিষ্ঠানত তিনিদিনীয়া বিশেষ প্ৰশিক্ষণ কাৰ্যসূচীৰ জৰিয়তে প্ৰশিক্ষণ দিয়াৰ প্ৰস্তাৱ দিয়া হৈছে। অংশগ্ৰহণকাৰী ৰাজ্য/কেন্দ্ৰীয়শাসিত অঞ্চলসমূহ হ’ল- জম্মু-কাশ্মীৰ, পঞ্জাব, ৰাজস্থান, গুজৰাট, দিল্লী, মেঘালয়, ছিকিম, অসম, উত্তৰ প্ৰদেশ, কেৰালা, কৰ্ণাটক আৰু তামিলনাডু।
এই পদক্ষেপে সমসাময়িক নিৰাপত্তাজনিত ভাবুকি, প্ৰতিকূল পৰিস্থিতি আৰু জৰুৰীকালীন অৱস্থাৰ প্ৰতি কাৰ্যকৰীভাৱে সঁহাৰি জনাবলৈ অসামৰিক প্ৰতিৰক্ষা কৰ্মীসকলৰ প্ৰস্তুতি বৃদ্ধি কৰিবলৈ বিচাৰিছে। প্ৰশিক্ষণত তিনিটা বিস্তৃত ক্ষেত্ৰ সামৰি লোৱা হ’বঃ
- ভাবুকি সজাগতাঃ আধুনিক আৰু হাইব্ৰিড যুদ্ধ, ড্ৰোন সজাগতা আৰু আকাশী আক্ৰমণৰ ভাবুকি।
- সুৰক্ষা আৰু জৰুৰীকালীন সঁহাৰিঃ গুৰুত্বপূৰ্ণ আন্তঃগাঁথনি সুৰক্ষা, অগ্নি সুৰক্ষা, ৰাসায়নিক, জৈৱিক, ৰেডিঅ’লজিকেল আৰু নিউক্লিয়াৰ (চিবিআৰএন) সজাগতা, দুৰ্ঘটনা ব্যৱস্থাপনা, অনুসন্ধান আৰু উদ্ধাৰ।
- যোগাযোগ আৰু সমন্বয়ঃ জৰুৰীকালীন যোগাযোগ, চাইবাৰ হাইজিন, ডিজিটেল সহনশীলতা, অসামৰিক-সামৰিক সমন্বয় আৰু ঘটনাৰ নেতৃত্ব।
এই পদক্ষেপৰ এটা মূল বৈশিষ্ট্য হৈছে এক গঠনমূলক মাষ্টাৰ প্ৰশিক্ষক আৰ্হিৰ জৰিয়তে ইয়াৰ গুণক প্ৰভাৱ। বিশেষ প্ৰশিক্ষণৰ পিছত প্ৰতিগৰাকী মাষ্টাৰ প্ৰশিক্ষকে নিজ নিজ ৰাজ্য/কেন্দ্ৰীয়শাসিত অঞ্চলত ১০০ গৰাকী অসামৰিক প্ৰতিৰক্ষা স্বেচ্ছাসেৱকক পৰৱৰ্তী প্ৰশিক্ষণ প্ৰদান কৰিব। এই ব্যৱস্থাৰে ১২ খন অংশগ্ৰহণকাৰী ৰাজ্য/কেন্দ্ৰীয়শাসিত অঞ্চলৰ ৬০,০০০ অসামৰিক প্ৰতিৰক্ষা স্বেচ্ছাসেৱকসকলৰ বাবে বিশেষ প্ৰস্তুতিৰ দক্ষতা সম্প্ৰসাৰণ কৰাৰ সামৰ্থ্য আছে, যাৰ ফলত এই পদক্ষেপৰ প্ৰৱেশাধিকাৰ আৰু প্ৰভাৱ উল্লেখযোগ্যভাৱে বৃদ্ধি পাইছে।
এই পদক্ষেপ ভাৰতীয় সেনাৰ দক্ষতাক অসামৰিক প্ৰতিৰক্ষা স্বেচ্ছাসেৱক নেটৱৰ্কৰ সৈতে একত্ৰিত কৰি অসামৰিক-সামৰিক সমন্বয় আৰু প্ৰাতিষ্ঠানিক প্ৰস্তুতি শক্তিশালী কৰাৰ দিশত এক গুৰুত্বপূৰ্ণ পদক্ষেপ হিচাপে চিহ্নিত হৈছে। ই নতুনকৈ সৃষ্টি হোৱা ভাবুকি, সমন্বিত জৰুৰীকালীন সঁহাৰি আৰু গুৰুত্বপূৰ্ণ আন্তঃগাঁথনি সুৰক্ষাৰ বাবে প্ৰস্তুতি বৃদ্ধি কৰিব। পৰীক্ষামূলক পৰ্যায়ৰ ফলাফলৰ ওপৰত ভিত্তি কৰি এই পদক্ষেপটো পৰ্য্যায়ক্ৰমে বাকী ৰাজ্য/কেন্দ্ৰীয়শাসিত অঞ্চললৈ সম্প্ৰসাৰণ কৰাৰ পৰিকল্পনা কৰা হৈছে, যাৰ ফলত এক শক্তিশালী, সঁহাৰিপূৰ্ণ আৰু ভৱিষ্যতৰ বাবে সাজু উজ্জীৱিত অসামৰিক প্ৰতিৰক্ষা নেটৱৰ্কৰ প্ৰধানমন্ত্ৰী মোদীৰ দৃষ্টিভংগীক আগুৱাই নিব পাৰি।
*****
RK / RR / PR / HS