કેન્દ્રીય ગૃહ અને સહકારિતા મંત્રી શ્રી અમિત શાહે આજે નવી દિલ્હીમાં રાષ્ટ્રીય પોલીસ સ્મારક ખાતે પોલીસ સ્મૃતિ દિવસ નિમિત્તે ફરજ દરમિયાન પોતાના પ્રાણ ન્યોછાવર કરનાર પોલીસ કર્મચારીઓને શ્રદ્ધાંજલિ અર્પણ કરી હતી અને સમારોહને સંબોધિત કર્યો હતો. આ પ્રસંગે કેન્દ્રીય ગૃહ મંત્રીએ “નશા સામે લડાઈ” ના સંદેશ સાથે આયોજિત દેશવ્યાપી મોટરસાયકલ રેલીને લીલી ઝંડી દર્શાવીને પ્રસ્થાન કરાવ્યું હતું. પોલીસ સ્મૃતિ દિવસ સમારોહમાં સંસદ સભ્યો શ્રી ક્રિષ્ના પ્રસાદ ટેનેટી અને શ્રી રાજીવ કુમાર; કેન્દ્રીય ગૃહ સચિવ શ્રી ગોવિંદ મોહન; ઇન્ટેલિજન્સ બ્યૂરોના ડાયરેક્ટર શ્રી મહેશ દીક્ષિત; ઇન્ડો-તિબેટિયન બોર્ડર પોલીસના ડાયરેક્ટર જનરલ શ્રી શત્રુજીત કપૂર; અન્ય સેન્ટ્રલ આર્મ્ડ પોલીસ ફોર્સિસના ડાયરેક્ટર જનરલ્સ; અને કેન્દ્રીય પોલીસ સંસ્થાઓના અનેક વરિષ્ઠ અધિકારીઓ ઉપસ્થિત રહ્યાં હતા.

જનમેદનીને સંબોધતા કેન્દ્રીય ગૃહ અને સહકારિતા મંત્રી શ્રી અમિત શાહે જણાવ્યું હતું કે તેઓ આઝાદીથી લઈને અત્યાર સુધી રાષ્ટ્રની સેવામાં સર્વોચ્ચ બલિદાન આપનારા બહાદુર પોલીસ કર્મચારીઓને શ્રદ્ધાંજલિ આપવા માટે રાષ્ટ્રીય પોલીસ સ્મારક ખાતે એકત્રિત થયા છે. તેમણે કહ્યું કે આઝાદીના લગભગ આઠ દાયકા પછી ભારત આજે વિશ્વમાં આદર અને સન્માનના સ્થાન પર ઊભું છે. આ સિદ્ધિનો પાયો આપણા બહાદુર જવાનોના બલિદાનમાં રહેલો છે. જો આ જવાનોએ દેશની આંતરિક સુરક્ષા અને તેની સરહદોનું રક્ષણ કરવા માટે સર્વોચ્ચ બલિદાન ન આપ્યું હોત તો આજે આપણે ક્યાં હોત તેની કલ્પના પણ કોઈ કરી શકતું નથી.

ગૃહ મંત્રી શ્રી અમિત શાહે જણાવ્યું હતું કે 2026 એ ભારતીય પોલીસ માટે અત્યંત મહત્વપૂર્ણ વર્ષ છે. 31 માર્ચ 2026 ના રોજ, દેશને નક્સલવાદમાંથી મુક્તિ મળી, જે દાયકાઓથી ભારતને પીડી રહ્યો હતો. 1981 થી માર્ચ 2026 સુધી દેશે નક્સલવાદના કારણે અનેક મુશ્કેલીઓનો સામનો કરવો પડ્યો હતો. આ સમયગાળા દરમિયાન ઘણા બહાદુર સુરક્ષાકર્મીઓ અને નિર્દોષ નાગરિકોએ જીવ ગુમાવ્યા હતા. 3,600 થી વધુ સુરક્ષાકર્મીઓ શહીદ થયા હતા અને આશરે 13,700 નિર્દોષ નાગરિકોએ પણ પોતાના જીવ ગુમાવ્યા હતા. કેન્દ્રીય ગૃહ મંત્રીએ શહીદ જવાનોના પરિવારોને સંદેશ આપતા કહ્યું કે પાંચ દાયકા જૂની આ સમસ્યામાંથી બહાર આવ્યા બાદ દેશ જ્યારે વિકાસના માર્ગ પર આગળ વધી રહ્યો છે ત્યારે આ 3,600 જવાનોનું બલિદાન આ પ્રગતિનાં પાયામાં છે. શહીદોના પરિવારોને સંબોધતા ગૃહ મંત્રીએ કહ્યું કે તેમના નુકસાનની ભરપાઈ ક્યારેય થઈ શકતી નથી, પરંતુ 1.4 અબજ નાગરિકોનો સમગ્ર દેશ તેમના પરિવારોના સમર્પણ અને બલિદાન માટે કાયમ ઋણી રહેશે.

પોલીસ સ્મારક દિવસના ઇતિહાસનો ઉલ્લેખ કરતા શ્રી અમિત શાહે કહ્યું કે 21 ઓક્ટોબર, 1959 ના રોજ, લદ્દાખના દૂરના હોટ સ્પ્રિંગ્સ ક્ષેત્રમાં, સેન્ટ્રલ રિઝર્વ પોલીસ ફોર્સ (CRPF) ના 10 સૈનિકોએ ચીની સેનાના હુમલાનો બહાદુરીથી પ્રતિકાર કરતા પોતાના જીવનનું બલિદાન આપ્યું હતું. જ્યારે આપણે હોટ સ્પ્રિંગ્સ ઘટનાનો અભ્યાસ કરીએ છીએ, ત્યારે સ્પષ્ટ થાય છે કે જ્યારે ઊંચી ટેકરીઓ પર લડવાનો નિર્ણય લેવામાં આવ્યો હતો, ત્યારે પરિણામ લગભગ નિશ્ચિત હતું. છતાં, તે અમર પુત્રોએ અમર બલિદાન આપ્યું, દેશની એક ઇંચ પણ જમીન કોઈપણ વિદેશીના હાથમાં ન જાય તે સુનિશ્ચિત કરવાના તેમના સંકલ્પને પૂર્ણ કર્યો. ત્યારથી, 21 ઓક્ટોબર દર વર્ષે પોલીસ સ્મારક દિવસ તરીકે ઉજવવામાં આવે છે. તેમણે ઉમેર્યું કે તેઓ જ્યાં એકત્રિત થયા છે તે રાષ્ટ્રીય પોલીસ સ્મારકનું ઉદ્ઘાટન 2018 માં પ્રધાનમંત્રી શ્રી નરેન્દ્ર મોદી દ્વારા દેશભરમાં પોતાના પ્રાણ ન્યોછાવર કરનાર પોલીસ કર્મચારીઓના સન્માનમાં કરવામાં આવ્યું હતું. સ્મારકની સ્થાપના પાછળનો ઉદ્દેશ્ય પોલીસ કર્મચારીઓની ભાવિ પેઢીઓને તેમની જવાબદારીઓ પ્રત્યે પ્રતિબદ્ધ રહેવા અને ફરજ બજાવતી વખતે સર્વોચ્ચ બલિદાન આપવા માટે તૈયાર રહેવાની પ્રેરણા આપવાનો હતો. તેમણે વધુમાં ઉમેર્યું હતું કે આ સ્મારક દેશભરના નાગરિકો માટે પણ શ્રદ્ધાનું સ્થાન બન્યું છે. કૃતજ્ઞ નાગરિકો 36,852 પોલીસ કર્મચારીઓને શ્રદ્ધાંજલિ આપવા અને તેમની સેવા તથા બલિદાન માટે રાષ્ટ્રની કૃતજ્ઞતા વ્યક્ત કરવા આ સ્થળની મુલાકાત લે છે.

કેન્દ્રીય ગૃહ મંત્રી શ્રી અમિત શાહે જણાવ્યું હતું કે તમામ સરકારી સેવાઓમાં પોલીસ સેવા સૌથી પડકારજનક સેવાઓમાંથી એક છે. દેશનો દરેક નાગરિક રક્ષાબંધન, હોળી, દિવાળી અને ઈદ જેવા તહેવારો ઉજવે છે, પરંતુ પોલીસ કર્મચારીઓ પાસે આ પ્રસંગો ઉજવવા માટે અવારનવાર રજાઓ હોતી નથી. તેમણે કહ્યું કે જ્યારે લોકો પોતાના પરિવાર સાથે તહેવારો ઉજવે છે, ત્યારે પોલીસ કર્મચારીઓ આંતરિક સુરક્ષા જાળવીને, વાહનવ્યવહારનું સંચાલન કરીને અને જાહેર સુરક્ષા સુનિશ્ચિત કરીને ડ્યુટી પર રહે છે. પોતાના પરિવારથી દૂર રહીને પોતાના જીવનના શ્રેષ્ઠ વર્ષો રાષ્ટ્રને સમર્પિત કરવા એ દેશની બહુ મોટી સેવા છે.

શ્રી અમિત શાહે જણાવ્યું હતું કે દેશભરમાં પોલીસ કર્મચારીઓ દ્વારા અસાધારણ ધીરજ, સંયમ, શિસ્ત, સાહસ અને સમર્પણ દર્શાવીને દેશની આંતરિક સુરક્ષાને મજબૂત કરવાના અસંખ્ય ઉદાહરણો છે. તેમણે કહ્યું કે પોલીસ કર્મચારીઓ આંતરિક સુરક્ષા માટે પ્રથમ અને અંતિમ બંને પ્રકારની રક્ષણાત્મક પંક્તિ છે. તેમણે સરહદો પર તૈનાત અને દેશની અંદર સુરક્ષાની જવાબદારી સોંપાયેલા કેન્દ્રીય સશસ્ત્ર પોલીસ દળો (CAPF) ના તમામ જવાનોનો વિશેષ આભાર વ્યક્ત કર્યો હતો. પોતાના પરિવારથી દૂર રહીને આ જવાનો સતર્ક રહે છે અને દરેક પ્રસંગે, પછી તે ચૂંટણી હોય, તહેવારો હોય, વિરોધ પ્રદર્શનો હોય કે સરહદ સુરક્ષાની ડ્યુટી હોય, દેશની આંતરિક સુરક્ષાને મજબૂત કરે છે. દેશનું સુચારુ સંચાલન સુનિશ્ચિત કરવા માટે તેઓ સતત ડ્યુટી પર રહે છે. લોકશાહીનું રક્ષણ કરવું હોય કે લોકશાહી પ્રક્રિયાઓનું સુચારુ સંચાલન સુનિશ્ચિત કરવું હોય, કેન્દ્રીય સશસ્ત્ર પોલીસ દળો વિના આ કાર્યો પૂર્ણ થવાની કલ્પના કરવી અશક્ય છે. શ્રી શાહે જણાવ્યું હતું કે ભારત ઉત્તર પ્રદેશ અને બિહારમાં ચૂંટણી હિંસા નાબૂદ કરવામાં સફળ રહ્યું છે, પરંતુ પશ્ચિમ બંગાળમાં લાંબા સમયથી ચૂંટણી હિંસા ચાલુ રહી હતી. તેમણે કહ્યું કે તાજેતરમાં સંપન્ન થયેલી પશ્ચિમ બંગાળ વિધાનસભા ચૂંટણી દરમિયાન સુરક્ષાકર્મીઓએ એક પણ જાનહાનિ વિના ચૂંટણી પૂર્ણ થાય તે સુનિશ્ચિત કરીને નોંધપાત્ર સફળતા મેળવી છે. આમ કરીને કેન્દ્રીય સશસ્ત્ર પોલીસ દળોએ એક નવો માપદંડ સ્થાપિત કર્યો છે. તેમણે ઉમેર્યું હતું કે હવે સમગ્ર દેશ સ્વીકારે છે કે રાષ્ટ્રમાંથી ચૂંટણી હિંસાનો અંત આવ્યો છે.

ગૃહમંત્રીએ કહ્યું કે છેલ્લા કેટલાક વર્ષોમાં દેશમાં ઘણી સમસ્યાઓ હતી, જેમાંથી આપણે દાયકાઓથી ત્રણ મોટી સમસ્યાઓનો સામનો કરી રહ્યા હતા. તેમણે કહ્યું કે હવે આ ત્રણેય મુખ્ય હોટસ્પોટ્સ—કાશ્મીર, ઉત્તર-પૂર્વ અને ડાબેરી ઉગ્રવાદથી પ્રભાવિત વિસ્તારોમાં શાંતિ સ્થપાઈ છે. આ પ્રદેશોમાં વિકાસ માટે સાનુકૂળ વાતાવરણ ઊભું થયું છે અને તેઓ હવે વિકાસના સંદર્ભમાં બાકીના દેશ સાથે સ્પર્ધા કરવા માટે તૈયાર છે. શ્રી શાહે જણાવ્યું હતું કે કાશ્મીરમાં આતંકવાદને ડામવામાં નોંધપાત્ર સફળતા મળી છે. અનેક કરારો અને હજારો લોકો દ્વારા શસ્ત્રો હેઠા મુક્યા બાદ સમગ્ર ઉત્તર-પૂર્વ શાંતિના માર્ગે આગળ વધ્યું છે. તેમણે ઉમેર્યું હતું કે પોલીસ અને કેન્દ્રીય સશસ્ત્ર પોલીસ દળોના જવાનોએ અનેક રાજ્યોમાં ફેલાયેલી પાંચ દાયકા જૂની નક્સલવાદી સમસ્યાને સંપૂર્ણપણે નાબૂદ કરવામાં મોટી સફળતા મેળવી છે. તેમણે નક્સલવાદના નિર્મૂલનમાં યોગદાન બદલ CRPF અને તેની ક્યુઆરટી/કોબ્રા (CoBRA) બટાલિયનનો વિશેષ આભાર માન્યો હતો અને છત્તીસગઢ પોલીસની બહાદુરીના વખાણ કર્યા હતા.

શ્રી અમિત શાહે જણાવ્યું હતું કે દેશ હજી સુધી સમસ્યાઓથી સંપૂર્ણપણે મુક્ત થયો નથી અને અનેક પડકારો બાકી છે. તેમણે જણાવ્યું હતું કે કેન્દ્રીય ગૃહ મંત્રાલયે 2026 ના બાકીના સમયગાળા અને આગામી ત્રણ વર્ષો—2027, 2028 અને 2029 દરમિયાન નશા સામે સંગઠિત લડાઈ દ્વારા 31 ડિસેમ્બર 2029 સુધીમાં દેશને નશાના દૂષણમાંથી મુક્ત કરવાનું લક્ષ્ય નિર્ધારિત કર્યું છે. તેમણે આને રાષ્ટ્ર માટે ખૂબ જ મહત્વપૂર્ણ લક્ષ્ય ગણાવ્યું હતું. તેમણે કહ્યું કે નશાનો ઉપયોગ અને તેની તસ્કરી આવનારી પેઢીઓના ભવિષ્યને નુકસાન પહોંચાડે છે, અર્થતંત્ર પર અનાવશ્યક બોજ નાખે છે અને દેશવિરોધી ઈરાદા ધરાવતી સંસ્થાઓને નાણાકીય ટેકો પૂરો પાડે છે. કેન્દ્રીય ગૃહ મંત્રીએ દેશભરના પોલીસ દળોને પ્રધાનમંત્રી શ્રી નરેન્દ્ર મોદીના નેતૃત્વ હેઠળ તૈયાર કરાયેલા 'નશા મુક્ત ભારત' માટેના રોડમેપને લાગુ કરવાના પ્રયાસોમાં પૂર્ણ નિષ્ઠાથી જોડાવા અને ભવિષ્યની પેઢીઓને સુરક્ષિત કરવા તરફ કામ કરવા આહ્વાન કર્યું હતું.

આજે ગૃહ મંત્રી દ્વારા પ્રસ્થાન કરાવવામાં આવેલી મોટરસાયકલ રેલીમાં વિવિધ રાજ્યો અને કેન્દ્રશાસિત પ્રદેશો (જમ્મુ અને કાશ્મીર, લડાખ, હિમાચલ પ્રદેશ, ઉત્તરાખંડ, ઉત્તર પ્રદેશ, પંજાબ, હરિયાણા, ચંડીગઢ અને દિલ્હી), કેન્દ્રીય સશસ્ત્ર પોલીસ દળો (CRPF, CISF, BSF, SSB, ITBP અને NSG), અને કેટલીક કેન્દ્રીય પોલીસ સંસ્થાઓ (RPF, NDRF અને NIA) ના લગભગ 90 રાઇડર્સ સામેલ છે. આ રેલી “નશા સામે લડાઈ” ના સંદેશ સાથે આયોજિત દેશવ્યાપી અભિયાનનો એક ભાગ છે, જેમાં દેશભરના તમામ રાજ્યો, કેન્દ્રશાસિત પ્રદેશો અને કેન્દ્રીય દળોના મોટરસાયકલ રાઇડર્સ એકતા પરેડ-2026 માં ભાગ લેવા માટે એકતા નગર, ગુજરાત પહોંચશે.

SM/IJ/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com