ಮುಂಬೈ : 15 ಅಕ್ಟೋಬರ್ 2026

ಸೃಜನಶೀಲ ಕಂಟೆಂಟ್ (ವಿಷಯ ವಸ್ತು), ತಂತ್ರಜ್ಞಾನ, ಪ್ರತಿಭೆ ಮತ್ತು ಜಾಗತಿಕವಾಗಿ ಸ್ಪರ್ಧಾತ್ಮಕ ಮಾಧ್ಯಮ ಕಂಪನಿಗಳ ಪ್ರಮುಖ ಮೂಲವಾಗಿ ಭಾರತವನ್ನು ಇರಿಸುವ ಉದ್ದೇಶದಿಂದ, ಮಾಧ್ಯಮ ಮತ್ತು ಮನರಂಜನಾ ಉದ್ಯಮವು ಕೇವಲ ಪ್ರಮಾಣಕ್ಕಿಂತ (scale) ಆಚೆಗೆ ಸಾಗಿ ಮೂಲ ಬೌದ್ಧಿಕ ಆಸ್ತಿ (IP), ಸುಸ್ಥಿರ ವ್ಯವಹಾರ ಮಾದರಿಗಳು ಮತ್ತು ಜಾಗತಿಕ ಮಾರುಕಟ್ಟೆ ವಿಸ್ತರಣೆಯ ಮೇಲೆ ಗಮನ ಹರಿಸಬೇಕು ಎಂದು ಭಾರತ ಸರ್ಕಾರದ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಚಂಚಲ್ ಕುಮಾರ್ ಇಂದು ಕರೆ ನೀಡಿದರು.

"ಮಾಧ್ಯಮ ಮತ್ತು ಮನರಂಜನೆಯ ಹೊಸ ಅರ್ಥಶಾಸ್ತ್ರ: ಭಾರತದ ಭವಿಷ್ಯದ ಜಾಗತಿಕ ಮಾಧ್ಯಮ ಕಂಪನಿಗಳ ನಿರ್ಮಾಣ" ಎಂಬ ವಿಷಯದಡಿಯಲ್ಲಿ ಆಯೋಜಿಸಲಾಗಿದ್ದ ಎರಡು ದಿನಗಳ 'ಸಿಐಐ ಬಿಗ್ ಪಿಕ್ಚರ್ ಶೃಂಗಸಭೆ 2026' ರ ಉದ್ಘಾಟನಾ ಅಧಿವೇಶನವನ್ನು ಉದ್ದೇಶಿಸಿ ಮಾತನಾಡಿದ ಶ್ರೀ ಚಂಚಲ್ ಕುಮಾರ್, ಭಾರತವು ತನ್ನ ಶ್ರೀಮಂತ ಕಥೆ ಹೇಳುವ ಪರಂಪರೆ, ಸಾಂಸ್ಕೃತಿಕ ವೈವಿಧ್ಯತೆ ಮತ್ತು ಸೃಜನಶೀಲ ಪ್ರತಿಭೆಯನ್ನು ಶಾಶ್ವತ ಆರ್ಥಿಕ ಹಾಗೂ ಸಾಂಸ್ಕೃತಿಕ ಮೌಲ್ಯವಾಗಿ ಪರಿವರ್ತಿಸುವ ಅವಕಾಶವನ್ನು ಹೊಂದಿದೆ ಎಂದು ಹೇಳಿದರು.

ಅವರು ಶೃಂಗಸಭೆಯ ಥೀಮ್ ಅನ್ನು, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ 'ವೇವ್ಸ್ 2025' ರ  "ಭಾರತದಲ್ಲಿ ಸೃಷ್ಟಿಸಿ, ಜಗತ್ತಿಗಾಗಿ ಸೃಷ್ಟಿಸಿ" (Create In India, Create For The World) ಎಂಬ ದೃಷ್ಟಿಕೋನಕ್ಕೆ ಸಂಯೋಜಿಸಿ, ಆವಿಷ್ಕಾರ ಮತ್ತು ನಂಬಿಕೆ ಎರಡನ್ನೂ ಒತ್ತಿಹೇಳಿದರು. ಭಾರತದ ಸೃಜನಶೀಲ ವ್ಯವಸ್ಥೆಯನ್ನು ಬಲಪಡಿಸಲು ಸರ್ಕಾರದ ಶ್ರಮವನ್ನು ಎತ್ತಿಹಿಡಿದ ಶ್ರೀ ಚಂಚಲ್ ಕುಮಾರ್, 'ವೇವ್ಸ್', 'ವೇವ್ಸ್ ಬಜಾರ್', 'ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಕ್ರಿಯೇಟಿವ್ ಟೆಕ್ನಾಲಜೀಸ್' (IICT) ಮತ್ತು 'ಇಂಡಿಯಾ ಸಿನಿ ಹಬ್' ದಂತಹ ಉಪಕ್ರಮಗಳನ್ನು ಉಲ್ಲೇಖಿಸಿದರು. ಸೃಜನಶೀಲತೆ ಮತ್ತು ಬೌದ್ಧಿಕ ಆಸ್ತಿಯನ್ನು ರಕ್ಷಿಸಲು ದೃಢವಾದ ಪೈರಸಿ-ವಿರೋಧಿ ಚೌಕಟ್ಟಿನ ಮಹತ್ವವನ್ನು ಅವರು ಒತ್ತಿಹೇಳಿದರು, ಹಾಗೂ "ಭಾರತದಲ್ಲಿ ಸೃಷ್ಟಿಸಿ. ಭಾರತದಲ್ಲಿ ಮಾಲೀಕತ್ವ ಹೊಂದಿ. ಭಾರತದಿಂದ ವಿಸ್ತರಿಸಿ. ಜಗತ್ತಿಗೆ ಕೊಂಡೊಯ್ಯಿರಿ" ಎಂಬ ದೃಷ್ಟಿಕೋನಕ್ಕೆ ಒತ್ತು ನೀಡಿದರು.

ಈ ಶೃಂಗಸಭೆಯು, ಕನ್ಫೆಡರೇಶನ್ ಆಫ್ ಇಂಡಿಯನ್ ಇಂಡಸ್ಟ್ರಿ (CII) ಹೊರತಂದ 'ಮಾಧ್ಯಮ ಮತ್ತು ಮನರಂಜನೆಯ ಹೊಸ ಅರ್ಥಶಾಸ್ತ್ರ' ಎಂಬ ಶ್ವೇತಪತ್ರದ ಬಿಡುಗಡೆಗೂ ಸಾಕ್ಷಿಯಾಯಿತು, ಇದು 2030 ರ ದಶಕದ ಆರಂಭದ ವೇಳೆಗೆ ಭಾರತದ ಮಾಧ್ಯಮ ಮತ್ತು ಮನರಂಜನಾ ವಲಯವು 100 ಬಿಲಿಯನ್ ಡಾಲರ್‌ಗೆ ತಲುಪಲು ನೀಲನಕ್ಷೆಯನ್ನು ರೂಪಿಸುತ್ತದೆ. ಈ ವಲಯದ ಬೆಳವಣಿಗೆಯನ್ನು ವೇಗಗೊಳಿಸಲು ವೇಗದ ಸುಧಾರಣೆಗಳು, ಬಲವಾದ ಪ್ರಾದೇಶಿಕ ಮಾರುಕಟ್ಟೆಗಳು ಮತ್ತು ಅಳೆಯಬಹುದಾದ ಅನುಷ್ಠಾನಕ್ಕೆ ಶ್ವೇತಪತ್ರವು ಕರೆ ನೀಡುತ್ತದೆ.

ಶೃಂಗಸಭೆಯ ಅಧ್ಯಕ್ಷತೆ ಹಾಗೂ ಸೋನಿ ಪಿಕ್ಚರ್ಸ್ ನೆಟ್‌ವರ್ಕ್ಸ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಆದ ಶ್ರೀ ಗೌರವ್ ಬ್ಯಾನರ್ಜಿ ಅವರು ವ್ಯವಹಾರ ಮಾದರಿಗಳ ಮೂಲಭೂತ ಮರುಚಿಂತನೆಗೆ ಕರೆ ನೀಡಿದರು. "ಬೃಹತ್ ಪ್ರೇಕ್ಷಕರ ಬಳಗವು ಅಂತಿಮವಾಗಿ ಕೇವಲ ಒಂದು ಆರಂಭಿಕ ಹಂತವಾಗಿದೆ. ಅದೊಂದೇ ವ್ಯವಹಾರ ಮಾದರಿಯಲ್ಲ." ಪ್ರೇಕ್ಷಕರ ಮೌಲ್ಯ, ಜಾಹೀರಾತುದಾರರ ಅಳೆಯಬಹುದಾದ ಫಲಿತಾಂಶಗಳು ಮತ್ತು ಹೂಡಿಕೆದಾರರ ಸುಸ್ಥಿರ ಲಾಭಗಳ ಮೇಲೆ ಹೆಚ್ಚಿನ ಗಮನ ಹರಿಸುವಂತೆ ಅವರು ಒತ್ತಾಯಿಸಿದರು.

ಶೃಂಗಸಭೆ ಸಹ-ಅಧ್ಯಕ್ಷತೆ ಹಾಗೂ ಯೂಟ್ಯೂಬ್ ಇಂಡಿಯಾದ, ದೇಶದ ವ್ಯವಸ್ಥಾಪಕ ನಿರ್ದೇಶಕಿಯಾದ ಶ್ರೀಮತಿ ಗುಂಜನ್ ಸೋನಿ ಅವರು ಸೃಜನಶೀಲತೆ ಮತ್ತು ಸಂಸ್ಕೃತಿಯನ್ನು ಭಾರತದ "ವಿಕಸಿತ ಭಾರತ"ದ ಮಹತ್ವಾಕಾಂಕ್ಷೆಯನ್ನು ಬೆಂಬಲಿಸುವ ಆರ್ಥಿಕ ಶಕ್ತಿಗಳು ಎಂದು ಬಣ್ಣಿಸಿದರು. ಡಿಜಿಟಲ್ ತಂತ್ರಜ್ಞಾನ ಮತ್ತು ಎಐ (AI) ಯುವ ಪೀಳಿಗೆಯ ಸೃಷ್ಟಿಕರ್ತರಿಗೆ ಕಲ್ಪನೆ ಮತ್ತು ಸ್ಥಳೀಯ ಗುರುತನ್ನು ವಿಶ್ವದರ್ಜೆಯ ಉದ್ಯಮಗಳಾಗಿ ಪರಿವರ್ತಿಸಲು ಸಹಾಯ ಮಾಡುತ್ತದೆ ಎಂದು ಅವರು ಹೇಳಿದರು.

ಶೃಂಗಸಭೆ ಸಹ-ಅಧ್ಯಕ್ಷತೆ ಹಾಗೂ ಜೆಟ್‌ಸಿಂಥೆಸಿಸ್‌ನ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಆದ ಶ್ರೀ ರಾಜನ್ ನವಾನಿ ಮಾತನಾಡಿ, ಜಾಗತಿಕ ಬದಲಾವಣೆಗೆ ಅನುಗುಣವಾಗಿ ಸಾಗಲು ತಂತ್ರಜ್ಞಾನ ಮತ್ತು ಎಐಗೆ ಪ್ರಜಾಸತ್ತಾತ್ಮಕ ಪ್ರವೇಶ ಅತ್ಯಗತ್ಯ ಎಂದು ಹೇಳಿದರು. ಮಾನವನ ಕಲ್ಪನೆ ಮತ್ತು ಆಲೋಚನೆಗಳನ್ನು ಸಾಕಾರಗೊಳಿಸುವ ಸಾಮರ್ಥ್ಯದ ನಡುವಿನ ಅಂತರವನ್ನು ಎಐ ವೇಗವಾಗಿ ಕಡಿಮೆ ಮಾಡುತ್ತಿದೆ ಎಂದು ಅವರು ಹೇಳಿದರು.

ಶ್ರೀ ಚಂಚಲ್ ಕುಮಾರ್ ಅವರು, 150 ಕ್ಕೂ ಹೆಚ್ಚು ಹೂಡಿಕೆದಾರರು ಮತ್ತು ಹೂಡಿಕೆ ಪಡೆಯುವವರನ್ನು ಒಂದೆಡೆ ತಂದ 'ವೇವ್ಸ್ ಗ್ಲೋಬಲ್ ಇನ್ವೆಸ್ಟರ್ ಅಂಡ್ ಇನ್ವೆಸ್ಟೀ ಮೀಟ್' ಅನ್ನು ಸಹ ಉದ್ಘಾಟಿಸಿದರು. ಈ ಉಪಕ್ರಮವು 'ವೇವ್‌ಎಕ್ಸ್' (WaveX) ಮತ್ತು 'ವೇವ್ಸ್ ಬಜಾರ್'ನಿಂದ ಸುಮಾರು 20 ಭಾಗವಹಿಸುವವರನ್ನು ಸಂಪರ್ಕಿಸಿತು, ಬಂಡವಾಳ ಪೂರೈಕೆದಾರರು ಮತ್ತು ಉದಯೋನ್ಮುಖ ಸೃಜನಶೀಲ ಉದ್ಯಮಗಳ ನಡುವಿನ ಬಾಂಧವ್ಯವನ್ನು ಬಲಪಡಿಸಿತು.

******