ممبئی: 15 اکتوبر 2026

ہندوستان کی حکومت کی اطلاعات و نشریات کی وزارت کے سکریٹری جناب چندر کمار نے آج میڈیا اور تفریحی صنعت سے اپیل کی کہ وہ صرف بڑے پیمانے پر کاروبار پھیلانے سے آگے بڑھ کر اصل دانشورانہ ملکیت (آئی پی)، پائیدار کاروباری ماڈل اور عالمی منڈیوں میں توسیع پر توجہ دے۔ اس کا مقصد ہندوستان کو تخلیقی مواد، ٹیکنالوجی، صلاحیتوں اور عالمی سطح پر مسابقت کرنے والی میڈیا کمپنیوں کا ایک نمایاں مرکز بنانا ہے۔

دو روزہ سی آئی آئی بگ پکچر سمٹ 2026 کے افتتاحی اجلاس سے خطاب کرتے ہوئے، جس کا موضوع ’’میڈیا اور تفریح کی نئی معیشت: ہندوستان کی مستقبل کی عالمی میڈیا کمپنیوں کی تعمیر‘‘ تھا، جناب چندر کمار نے کہا کہ ہندوستان کو اپنی داستان گوئی کی شاندار روایات، ثقافتی تنوع اور تخلیقی صلاحیتوں کو دیرپا اقتصادی اور ثقافتی قدر میں تبدیل کرنے کا موقع حاصل ہے۔

انہوں نے سمٹ کے موضوع کو وزیر اعظم جناب نریندر مودی کے ویوز 2025 کے وژن ’’ہندوستان میں تخلیق کریں، دنیا کے لیے تخلیق کریں‘‘ سے جوڑا اور جدت طرازی کے ساتھ اعتماد کی اہمیت پر زور دیا۔ ہندوستان کے تخلیقی ماحول کو مستحکم بنانے کے لیے حکومت کی کوششوں کو اجاگر کرتے ہوئے جناب چندر کمار نے ویوز، ویوز بازار، انڈین انسٹی ٹیوٹ آف کری ایٹو ٹیکنالوجیز (آئی آئی سی ٹی) اور انڈیا سنے ہب جیسے اقدامات کا ذکر کیا۔ انہوں نے تخلیقی صلاحیتوں اور دانشورانہ ملکیت کے تحفظ کے لیے پائریسی مخالف مضبوط نظام کی اہمیت پر بھی زور دیا اور اس وژن کو نمایاں کیا: ’’ہندوستان میں تخلیق کریں، ہندوستان کی ملکیت بنیں، ہندوستان سے وسعت دیں اور اسے دنیا تک پہنچائیں۔‘‘

چوٹی کانفرنس کے دوران بھارتیہ صنعتوں کی کنفیڈریشن (سی آئی آئی) میں وائٹ پیپر ’’میڈیا اور تفریح کی نئی معیشت‘‘ کا اجرا بھی کیا گیا۔ اس میں ہندوستان کے میڈیا اور تفریحی شعبے کو 2030 کی دہائی کے اوائل تک 100 ارب ڈالر کا شعبہ بنانے کے لیے لائحۂ عمل پیش کیا گیا ہے۔ اس رپورٹ میں شعبے کی ترقی کو تیز کرنے کے لیے اصلاحات میں تیزی لانے، علاقائی منڈیوں کو مضبوط بنانے اور قابلِ پیمائش طریقے سے اقدامات پر عمل درآمد کرنے پر زور دیا گیا ہے۔

سمٹ کے چیئرمین اور سونی پکچرز نیٹ ورکس انڈیا کے منیجنگ ڈائریکٹر اور چیف ایگزیکٹیو آفیسر جناب گورو بنرجی نے کاروباری ماڈل پر بنیادی طور پر ازسرنو غور کرنے کی ضرورت پر زور دیا۔ انہوں نے کہا، ’’بڑی تعداد میں ناظرین کا ہونا، آخرکار، محض ایک شروعات ہے۔ یہ کوئی کاروباری ماڈل نہیں ہے۔‘‘ انہوں نے ناظرین کو فراہم کی جانے والی قدر، اشتہار دینے والوں کے لیے قابلِ پیمائش نتائج اور سرمایہ کاروں کو پائیدار منافع فراہم کرنے پر زیادہ توجہ دینے کی اپیل کی۔

سمٹ کی شریک چیئر اور یوٹیوب انڈیا کی کنٹری منیجنگ ڈائریکٹر محترمہ گنجن سونی نے تخلیقی صلاحیتوں اور ثقافت کو اقتصادی طاقت قرار دیا، جو ہندوستان کے ’’وکست بھارت‘‘ کے عزائم کی حمایت کرتی ہیں۔ انہوں نے کہا کہ ڈیجیٹل ٹیکنالوجی اور مصنوعی ذہانت نوجوان تخلیق کاروں کی نسل کو اپنے تخیل اور مقامی شناخت کو عالمی معیار کے کاروباری اداروں میں تبدیل کرنے میں مدد دے سکتی ہیں۔

سمٹ کے شریک چیئر اور جیٹ سنتھیسس کے منیجنگ ڈائریکٹر اور چیف ایگزیکٹیو آفیسر جناب راجن ناوانی نے کہا کہ عالمی تبدیلیوں کے ساتھ قدم سے قدم  ملا کر چلنے کے لیے ٹیکنالوجی اور مصنوعی ذہانت تک سب کی رسائی ضروری ہے۔ ان کے مطابق، مصنوعی ذہانت انسانی تخیل اور خیالات کو عملی شکل دینے کی صلاحیت کے درمیان فاصلے کو تیزی سے کم کر رہی ہے۔

جناب چنچل کمار نے ویوز گلوبل انویسٹر اینڈ انویسٹی میٹ کا بھی افتتاح کیا، جس میں 150 سے زیادہ سرمایہ کاروں اور سرمایہ حاصل کرنے والوں نے شرکت کی۔ اس پہل کے تحت ویو ایکس اور ویوز بازار سے وابستہ تقریباً 20 شرکا کو ایک پلیٹ فارم پر لایا گیا، جس سے سرمایہ فراہم کرنے والوں اور ابھرتے ہوئے تخلیقی کاروباروں کے درمیان روابط مضبوط ہوئے۔

ش ح۔ ش ب ۔ ج

UNO- 6160