Ka Tnad pathai Information and Broadcasting ka la pynpaw ka jingsngewsih kaba khraw ïa ka jingkhlad syndet ki lai ngut ki dkhot jong ka tnat Information and Broadcasting kiba la duh noh ïa la ka jong ka jingim ha ka jingjia aksiden kali ha Mizoram ha ka 1 tarik u Risaw, 2026. Ka kali kaba kit ïa kine ki ophisar ka la hap sha riat katba ki dang don ha ka kam.

Kiba la khlad noh ki long u Dr. Engam Pame, IIS, Additional Director General, Press Information Bureau bad Central Bureau of Communication, Imphal; u Nampibou Marinmai, IIS, Director (News), Doordarshan Kendra bad All India Radio, Aizawl; bad u H. Lianvela, MTS, Central Bureau of Communication, Field Office, Aizawl.

Ka jingduh noh ia ki lai ngut ka la pynsngewsih jur ia ka Tnad. Ka jingkhlad syndet jong ki ka long ka jingduh kaba khraw ia la ki jong ki jong ki jaka treikam jong ki bad ia ka kynhun jong ki ophisar bad ki riew shemphang kiba trei ia ka kam ai jingtip paidbah bad jingpynsaphriang ia ki jingtip ha kylleng ka ri.

U Dr. Engam Pame, 58 snem ka rta, u la rung sha ka Indian Information Service ha u snem 1994 hadien ba u la pyndep ia ka MA ha ka International Relations na ka School of Social Sciences, Jawaharlal Nehru University, New Delhi. Ha ki lai phew snem ba u la shakri, u la trei ha ki kyrdan bapher bapher ha Delhi, Imphal, Pune bad Shillong, da kaba noh synniang ha ka jingai jingtip ka sorkar, ka jingpynbiang ia ki jingtip bad ka jingai jingtip paidbah.

Kum u Additional Director General, PIB Imphal, u Dr. Pame u la don ka bynta kaba kongsan ha kaba pynkhlaiñ ïa ka kam ai jingtip bad jingïatreilang bad ki kynhun pathai khubor bad ki tnad sorkar ha kylleng ka thaiñ Shatei lammihngi. Uwei na ki ophisar jong ka Information Service Group A uba la shakri slem tam na ka thaiñ shatei lammihngi, u la wanrah ïa ka jingshemphang kaba khraw ha ka kam bad ka jingsngewthuh kaba jylliew shaphang ka jingïakren bapher bapher jong ka thaiñ sha ki kam jong u. U Dr. Pame u dei na ka jaidbynriew Zeme Naga jong ka Tamenglong district, Manipur. U la iehnoh shadien ïa ka tnga jong u, ka Ajuna Pame bad uwei u khun shynrang bad kawei ka khun kynthei.

U Nampibou Marinmai u dei u ophisar jong ka Indian Information Service bad u dang trei kum u Director (News), Doordarshan Kendra bad ka All India Radio, Aizawl. U la long ruh u Chairman jong ka Inter Media Publicity Coordination Committee (IMPCC). Hashuwa kane u la trei kum u Public Relations Officer bad ka Tnad ïada ri jong ka sorkar India, ha kaba u la don bynta ha ki kam ïadei bad ki jingai jingtip shaphang ki kam ïada ri, ka jingpynbna khubor ha ki lad pathai khubor bad ka jingïakren.

Lyngba ka jingiadei kaba la slem jong u bad ki kam pathai khubor bad ki jingpynbna paidbah, u Nampi u la nohsynniang shibun ha ka kam ai jingtip ia ki paidbah bad ka jingpynsaphriang jingtip. Ka jingshemphang jong u ha ka kam ai jingtip shaphang ka kam iada ri bad ka jingpynbna paidbah ka la plie lad ia u ban pynsuk ia ka jingai jingtip hapdeng ki jaka treikam bad ki lad pathai khubor. Yn kynmaw burom ia ka jingaiti lut jong u ha ka kam, ka jingshakri ba aiti lut bad ka jingiadei kaba jan bad ki paralok bad ki nongtrei ha ki lad pathai khubor. U la iehnoh shadien ia ka tnga, u khun shynrang bad ka khun kynthei.

U H. Lianvela, MTS, CBC Field Office Aizawl, u la rung sha ka kam sorkar ha u snem 1998. U la don 52 snem ka rta bad u la iehnoh shadien ia ka kurim, ka khun kynthei bad u khun ksiew.

U Gojendra Dey, Driver, CBC, Field Office, Aizawl ruh u la mynsaw ha katei ka jingjia aksiden bad u dang shah sumar ha kawei ka Hospital. U la tip briew bad u don hapoh ka jingsumar jong ki doktor.

Ka Tnad Information and Broadcasting ka don ryngkat bad kiba haïing hasem, ki para ba iatreilang bad ki paralok ba la duh noh ïa ki lai ngut ki heh ophisar ha kane ka por jong ka jingsngewsih kaba khraw. Yn kynmaw da ka burom bad jingsngewnguh ia ki na ka bynta ki snem ba ki la trei shitom na ka bynta ka Sorkar bad ka jingnoh synniang jong ki ha ka jingai jingtip paidbah.

***