ভারতকী রাস্ত্রপতি শ্রীমতি দ্রুপদী মর্মুনা ঙসি ৭২শুবা নেস্নেল ফিল্ম এৱার্দ পীখ্রে অমসুং এৱার্দ ফংলবশিংবু মখোয়গী হৈশিংবা, থৱায় য়াওবা অমসুং হোৎনবা কনবা অদুগীদমক থাগৎপা ফোংদোকখ্রে। মহাক্না হায়খি মদুদি ফিল্ম নম্বগী থবক অসি পুন্না হোৎনমিন্নবা থবক অমনি। মহাক্না এৱার্দ ফংলবশিংবু এৱার্দ ফংলবা ফিল্মশিং অসি পুথোকপা ঙমহনখিবা মখোয়গী তীমগী মেম্বর খুদিংমক্তা মহাক্কী থাগৎপা ফোংদোক্নবা হায়খি।

থিয়েতর অমসুং সিনেমাগী লমদা মশক থোকপা থৌদাং লৌখিবগীদমক দাদাসাহেব ফাল্কে এৱার্দ ফংলবা শ্রী অনন্ত নাগপু রাস্ত্রপতিনা নুংঙাইবা ফোংদোকখি।

রাস্ত্রপতিনা হায়খি মদুদি ভারতকী সিনেমা অসিনা লৈবাক অসিগী তোঙান-তোঙানবা লোলশিং, চৎনবীশিং, অপাম্বা অমসুং লান্থেংশিং উৎলি। নেস্নেল ফিল্ম এৱার্দকী মফম ওইনা ভারতকী নাতকী অমসুং নেস্নেল য়ুনিতীগী খুদম ওইনা একতা নগরবু খনবগীদমক মহাক্না থাগৎপা ফোংদোকখি।

ক্রিয়েতিব ইকোনোমীদা ইকাই খুম্নবা অমসুং সোসিয়েল সেক্যুরিতীগীদমক মথৌ তাই হায়রদুনা, রাস্ত্রপতিনা হায়খি মদুদি ক্রিয়েতিব কম্ম্যুনিতীগী শিন্মীশিং, অপীকপা আর্তিস্তশিং, এসিস্তেন্তশিং অমসুং লান্থেংনরিবা মেম্বরশিংনা ইকাই খুম্নবা অমসুং সোসিয়েল সেক্যুরিতী ফংফম থোকই। মহাক্না নুপীশিংবু জুরি পুম্নমক্তা শরুক য়াহন্নবা হায়খি। মসিনা মপুং ফানা মীওইবগী ওইবা মীৎয়েং অমা লৈহল্লগনি।

মরুওইনা অঙাংশিং অমসুং নহাশিংদা মমিং লৈরবা আর্তিস্তশিংনা পীরিবা ইথিল অদু পল্লদুনা, রাস্ত্রপতিনা মাইপাক্লবা আর্তিস্তশিংদা দিসিপ্লিন লৈরবা পুন্সি মহিং অমগী কান্নবশিংবু প্রমোৎ তৌনবা অমসুং হকশেলদা শোকহল্লিবা পোৎলমশিংবু শৌগৎপদগী থিংনবা তকশিনখি।

লৈবাক অসিদা পুথোক্লিবা ফিল্মশিংগী মগুন অসিনা ভারতকী সিনেমা অসিনা মালেমগী থাক্কী থাক শেম্বা ঙম্মি হায়বা মহাক্কী থাজবা অদু মপাঙ্গল কনখৎহল্লি হায়না রাস্ত্রপতিনা হায়খি।

পুন্সি চুপ্পগী ৱারীশিং, সিনেমাগী লেগেসী: শ্রী অনন্ত নাগপু দাদাসাহেব ফাল্কে এৱার্দনা ইকায়খুম্নখ্রে

ভারতকী রাস্ত্রপতি, শ্রীমতি দ্রৌপদী মুর্মুনা শ্রী অনন্ত নাগতা মশক নাইবা দাদাসাহেব ফাল্কে এৱার্দ ২০২৪ লান্থোকপীখিবগা লোয়ননা, মীৎকুপ অদুনা ৱারী লীবদা, থিয়েতর অমসুং সিনেমাগী লমদা মহাক্কী পুন্সি চুপ্পা কৎথোকখিবদুবু থাগৎখি। ইকায়খুম্নবা অসিনা চহি তরাগী খুজিং কয়াগী মনুংদা মহাক্কী নীংশিংনিঙাই ওইরবা পর্ফোর্মেন্সশিং অমসুং ভারতকী সিনেমাগীদমক লেপ্তনা লৌখিবা থৌদাং অদুবু মশক খঙবিখি।

য়াম্না ইকায়খুম্নবগা লোয়ননা এৱার্দ অদু লৌদুনা, শ্রী অনন্ত নাগনা মহাক্কী খোঙচৎ অসিদা মশক শেমবিখিবা মীওইশিং অমসুং এক্সপিরিয়েন্সশিংগীদমক থাগৎপা ফোংদোকখি।

মহাক্কী অঙাং ওইরিঙৈ মতমশিং নিংশিংলদুনা, শ্রী অনন্ত নাগনা হায়খি মদুদি মহাক মুম্বাইদা থাদোকত্রিঙৈগী মমাংদা আশ্রম অমদা চাউরকখি, মফম অদুদা মহাক্না প্লে অমদা এক্ত তৌবগী খুদোংচাবা অমা ফংখি। থিয়েতরনা মহাক্কী করিয়রগী য়ুম্ফম ওইখি, অমসুং ফিল্মদা চংদ্রিঙৈগী মমাংদা মহাক্না প্লে ৫০ রোমদা পর্ফোর্ম তৌখি। মতুংদা মহাক্না শ্যাম বেনেগলগুম্বা মমিং লৈরবা ফিল্মমেকরনা নম্বা ফিল্মশিং য়াওনা ফিল্মশিংদা থবক তৌবগী খুদোংচাবা ফংখি।

শ্রী অনন্ত নাগনা হায়খি মদুদি মহাক্না কন্নদা সিনেমা অসি থৌওইনা মশানা খন্দুনা লৌখি অমসুং বেঙ্গালুরুবু মহাক্কী কর্মভুমি ওইহনখি। মমাং চহিদা ইকায়খুম্নজরবা রাস্ত্রপতিনা মহাকপু পদ্ম ভুসন্না ইকায়খুম্নখিবা অদু নিংশিংলদুনা, চহি অসিদা অমুক হন্না রাস্ত্রপতিদগী দাদাসাহেব ফাল্কে এৱার্দ ফংজবগীদমক মহাক্না থম্মোয় শেংনা থাগৎপা ফোংদোকখি।

গুজরাতনা নেস্নেল ফিল্ম এৱার্দসপু তরাম্না ওকখ্রে

গুজরাতকী থৌরম অদুনা নেস্নেল ফিল্ম এৱার্দসকী খোঙচত্তা অনৌবা পন্দুপ অমা হৌদোকখ্রে।

গুজরাতকী গবর্নর অচার্য দেবব্রতনা নেস্নেল ফিল্ম এৱার্দস অসি দিল্লীগী মপান্দা পাংথোকপগী চৎনবী হৌদোকপগীদমক ইনফোর্মেসন এন্দ ব্রোদকাস্তিং মন্ত্রালয়দা থাগৎপা ফোংদোকখি, অমসুং সর্দার বল্লবভাই পতেলগী লেগেসী অমসুং পাঙ্গলগা মরী লৈনবা কেভাদিয়াগী একতা নগরদা মশক নাইবা এৱার্দশিং অসি পাংথোকপা অসি গুজরাতকীদমক চাউথোকচনিংঙাই ওইবা ৱাফম অমনি হায়না ফোংদোকখি।

৭২শুবা নেস্নেল ফিল্ম এৱার্দসকী থৌরমদা ৱা ঙাংলদুনা, গবর্নরনা হায়খি মদুদি ভারতকী সিনেমানা লৈবাক অসিগী তোঙান-তোঙানবা লোনশিং অমসুং কলচরশিং চাউখৎহনবদা মরুওইবা থৌদাং লৌখ্রে।

মহাক্না ফিল্মমেকরশিংদা নেচরেল ফার্মিং, হকচাং ফবা পুন্সি মহিং অমসুং অকোয়বগী ফীভমগী মতাংদা খঙববু শৌগৎনবা, অমসুং নুংশিবা, মরুপ-মপাং ওইবা অমসুং লৈবাক্কী অপুনবা ওইবগী ৱাখল্লোনশিং মপাঙ্গল কনখৎহন্নবা সিনেমা শিজিন্ননবা তকশিনখি।

গুজরাতকী মুখ্য মন্ত্রী, শ্রী ভুপেন্দ্র পতেলনা ৭২শুবা নেস্নেল ফিল্ম এৱার্দসকীদমক ইকায়খুম্নজরবা রাস্ত্রপতি অমসুং মশক নাইরবা মীথুংলেনশিংবু গুজরাত্তা তরাম্না ওকখি, একতা নগরদা থৌরম অসি পাংথোকপা অসি স্তেত অসিগীদমক চাউথোকচনিংঙাই ওইবা ৱাফম অমনি হায়না মহাক্না হায়খি।

মহাক্না সিনেমা অসি খুন্নাইগী মমি অমা, কলচরগী কেরিয়র অমা অমসুং মীওইবগী পুক্নিংবু শম্নহন্নবগী শক্তি লৈবা মেদিয়ম অমা ওইনা ভারতকী গ্লোবেল আইদেন্তিতী অমসুং সোফত পাৱরবু মপাঙ্গল কনখৎহন্নবগী পোতেন্সিয়েল লৈ হায়না ফোংদোকখি।

গুজরাতকী ফজরবা হেরিতেজ, তোঙান-তোঙানবা লেন্দস্কেপশিং অমসুং কলচরগী চৎন-পথাপশিং মমি তাহল্লদুনা, মহাক্না ভারতকী অমসুং মালেমগী ফিল্মমেকরশিংদা ফিল্ম নম্নবগীদমক গুজরাতপু খন্নবা কৌখি অমসুং মশক নাইবা থৌরম অসি স্তেত অসিদা পুরকপগীদমক ইনফোর্মেসন এন্দ ব্রোদকাস্তিং মন্ত্রালয়দা থাগৎপা ফোংদোকখি।

কেন্দ্রগী ইনফোর্মেসন এন্দ ব্রোদকাস্তিং মন্ত্রালয় শ্রী অশ্বিনী বৈস্নবনা কেভাদিয়াগী একতা নগরদা পাংথোকপা ৭২শুবা নেস্নেল ফিল্ম এৱার্দস থৌরমদা শরুক য়াবীবগীদমক ইকায়খুম্নজরবা রাস্ত্রপতিদা থাগৎপা ফোংদোকখি, অমসুং ভারতকী সিনেমাগী লমদা মশক থোকপা মাইপাকপশিং ফংখিবগীদমক এৱার্দ ফংলবা পুম্নমকপু নুংঙাইবা ফোংদোকখি।

মন্ত্রীনা হায়খি মদুদি সিনেমা অসি তীম অমনা হোৎনবগী ফলনি অমসুং নেস্নেল ফিল্ম এৱার্দসনা এৱার্দ ফংলিবশিং অমসুং মদু শেম-শাবদা মরুমদা থবক তৌরিবা মীওইশিং অনীমকপু মশক খঙবী। মহাক্না দাদাসাহেব ফাল্কে এৱার্দ ফংলবা শ্রী অনন্ত নাগপু ভারতকী সিনেমাগীদমক মহাক্না লৌখিবা অচৌবা থৌদাং অদুগীদমকসু থাগৎপা ফোংদোকখি।

শ্রী অশ্বিনী বৈস্নবনা হায়খি মদুদি নেস্নেল ফিল্ম এৱার্দসকী মীৎয়েংদি স্তেতশিং অমসুং য়ুনিয়ন তেরিতোরীশিংদা লৈরিবা মরুওইবা তুরিস্ত দেস্তিনেসনশিংদা থৌরম অসি য়ৌহনবা অসিনি, মসিগী খুত্থাংদা ভারতকী ফজরবা কলচরেল হেরিতেজ অমসুং ত্যুরিজম প্রমোত তৌবা ঙমগনি। মহাক্না রাজ্যশিং অমসুং য়ুনিয়ন তেরিতোরীশিংদা তুরিস্তিক দেস্তিনেসনশিংবু নেস্নেল ফিল্ম এৱার্দকী তুংগী এদিসনশিংগী মফমশিং ওইনা থাগৎলক্না হায়খি।

ইন্দিয়ন ইন্সতিত্যুত ওফ ক্রিয়েতিব তেক্নোলোজিজ (IICT)বু অনৌবা তেলেন্ত পুল অমা ওইনা মমি তাহল্লদুনা, মহাক্না হায়খি মদুদি মহৈরোই ৩৮০ রোমনা কোর্স ১৩দা মমিং চনখ্রে, মসিগী করিক্যুলম অসি ইন্দস্ত্রীনা দিজাইন তৌবা অমসুং চলায়বনি। মহাক্না মখাতানা খঙহনখি মদুদি ইকায়খুম্নজরবা প্রধান মন্ত্রীনা লৈবাক শিনবা থুংনা ক্রিয়েতিব লেব ১৫,০০০দা অয়াবা পীখ্রে, মসিনা নহাশিংদা অনৌবা তেক্নোলোজীশিং তম্নবা অমসুং ভারতকী তোঙান-তোঙানবা কলচর উৎনবগী অনৌবা খুদোংচাবশিং শেমগৎলি।

মন্ত্রীনা প্রসার ভারতীগী চিয়রমেন ওইনা শ্রী প্রসুন জোসিগা লোয়ননা, ফিল্মমেকরশিং অমসুং ফিল্মগী কাংলুপ পুম্নমক্তা অপিকপা সহরশিংদগী থোক্লকপা অশেংবা তেলেন্তশিং মশক খঙদোকপা, চাউখৎহনবা অমসুং শৌগৎপদা তেংবাংনবা হায়খি।

মহাক্না অমুক হন্না হায়খি মদুদি লৈঙাক অমসুং ক্রিয়েতিব ফ্রেতর্নিতীগা পুন্না হোৎনমিন্নবগী থৌওংনা ভারতকী চাউরবা ক্রিয়েতিব পোতেন্সিয়েল অদু ফংহনবদা মতেং পাংগনি অমসুং ভারতকী তেলেন্তশিংবু মালেম পুম্বগী মীয়ামদা য়ৌহনবদা মতেং পাংগনি হায়না মহাক্না অমুক হন্না ফোংদোকখি।

মহাক্না মথং চহিগী ওক্তোবরদা পাংথোক্কদবা ৱেবস ২০২৭ (WAVES 2027)গীদমক সজেসনশিং অমসুং ৱাখল্লোনশিংসু পীরক্নবা হায়খি।

ইনফোর্মেসন এন্দ ব্রোদকাস্তিং মন্ত্রালয়গী সেক্রেতরী, শ্রী চঞ্চল কুমারনা হায়খি মদুদি ৭২শুবা নেস্নেল ফিল্ম এৱার্দসতা, লোন ৩৪দা ফিচর ফিল্ম ৪০০ অমসুং লোন ২৪ দা নন-ফিচর ফিল্ম ১৬১ লাকখি, মসিদা ফিচর ফিল্মগী এৱার্দ ২২ অমসুং নন-ফিচর ফিল্মগী এৱার্দ ২৩ পীখ্রে। ভারতকী সিনেমানা কলচর উৎপা অমসুং মালেমগী থাক্তা ৱারী লীবগী মপাঙ্গল কনবা পাম্বৈ অমা ওইনা লেপ্তনা চাউখৎলি হায়না মহাক্না ফোংদোকখি।

সেক্রেতরীনা হায়খি মদুদি নেস্নেল ফিল্ম এৱার্দস অসি দিল্লীগী মপান্দা, একতা নগরদা পাংথোকপা অসি সর্দার বল্লবভাই পতেলগী মঙলান অমসুং নেস্নেলগী অপুনবা ওইবগী ফিরেপদগী ইথিল ফংবা মরুওইবা খোঙথাং অমনি, অমসুং লাক্কদৌরিবা চহিশিংদা, থৌরম অসি অতৈ সহরশিংদসু পাংথোক্নবা থৌরাং তৌরি।

এক্সেলেন্সপু সেলেব্রেত তৌবা: ৱারীশিং, পর্ফোর্মেন্সশিং অমসুং ভারতকী সিনেমাগী মখল কয়াগী মশকশিং

বেস্ত এক্তর ইন এ লীদিং রোলগী এৱার্দ অদু ব্রময়ুগমগীদমক মম্মুত্তী অমসুং চান্দু চেম্পিয়নগীদমক কার্তিক আর্য়ান্না পুন্না ফংমিন্নখি, অদুগা য়ামী গৌতম্না আর্তিকল ৩৭০ গীদমক বেস্ত এক্ত্রেস ইন এ লীদিং রোলগী এৱার্দ ফংখি।

সপ্পোর্তিং কেতেগোরীশিংদা, ভকসককীদমক সঞ্জয় মিস্রাবু বেস্ত এক্তর ইন এ সপ্পোর্তিং রোল ওইনা ইকায়খুম্নখি, অদুগা মহারাজাগীদামক সচানা নামিদাস অমসুং মিথ্যাগীদমক রোপাস্রী ভরকাদীনা বেস্ত এক্ত্রেস ইন এ সপ্পোর্তিং রোলগী এৱার্দ পুন্না ফংমিন্নখি।

আর্তিকল ৩৭০বু বেস্ত ফিচর ফিল্ম ওইনা ইকায়খুম্নখি, অদুগা রনদীপ হুদানসু মহাক্কী দিরেক্তর ওইনা অহানবা ফিল্ম, স্বাতন্ত্র্য বীর সাভরকরগীদমক মশক খঙবীখি। কল্কি ২৮৯৮ এ.দি. বু মপুং ফাবা ইন্তর্তেনমেন্ত পীবগীদমক বেস্ত পোপুলর ফিল্ম হায়না খল্লি, অদুগা কেপ্তেন মিল্লরনা নেস্নেল, সোসিয়েল অমসুং এনভাইরনমেন্তেল ভেল্যুশিং শৌগৎপগীদমক বেস্ত ফিচর ফিল্মগী এৱার্দ ফংখি। রাজকুমার পেরিয়াসামিনা অমরনগীদমক বেস্ত দাইরেক্সনগী এৱার্দ ফংখি।

লোন কয়া অমা, নেস্নেল স্তেজ অমা

এৱার্দশিং অসিনা ভারতকী সিনেমাগী লোনগী দাইভর্সিতী অদুসু মমি তাহনখি। সংবিধানগী নিপালশুবা সেদ্যুলদা পনখিবা লোনশিংগী ৱাংমদা, গারৱালি অমসুং তুলু সিনেমাসু নেস্নেলগী থাক্তা মশক খঙবীখি।

এস.সি. ফারমচেম প্রাইভেত লিমিতেদনা পুথোকপা অমসুং দিনেস পি. ভোন্সলেনা দাইরেক্ত তৌবা ধোলীনা বেস্ত গারৱালি ফিল্মগী এৱার্দ ফংখি, অদুগা পিচছর স্তুদিওনা পুথোকপা অমসুং সিবধ্বজ সেত্তীনা দাইরেক্ত তৌবা ইম্বুবু বেস্ত তুলু ফিল্ম ওইনা ইকায়খুম্নখি।

রবি রাজ মুর্মুনা দাইরেক্ত তৌবা সান্তালি ফিল্ম অমা ওইরিবা আঙ্গেননা বেস্ত দেব্যুত ফিল্ম ওফ এ দাইরেক্তর এৱার্দ ফংখি।

গারৱালি অমসুং তুলুদগী হৌরগা সান্তালি ফাওবা, নুমিদাং অদুনা তোঙান-তোঙানবা সিনেমাগী খোঞ্জেলশিংবু নেস্নেল ফম্পাক অমদা পুরকখি, লোন খুদিংমক্না ভারতকী সিনেমাগী ফীভমদা অনৌবা ৱারী অমা হাপচিল্লি হায়বা অদু অমুক হন্না থাজহনখি।

ভারতকী সিনেমাগী কুম্মৈ অমা

৭২শুবা নেস্নেল ফিল্ম এৱার্দসনা মমিং চৎলবা মীওইশিং, থোক্লক্লিবা খোঞ্জেলশিং, পোপুলর সিনেমা অমসুং রিজনেলগী ৱারী লীবশিংবু নেস্নেল স্তেজ অমদা পুরকখি। একতা নগরদা, নুমিদাং অদু ভারতকী সিনেমাগী থৱায় - লোন কয়া অমা, ৱারী কয়া অমা অমসুং তোঙান-তোঙানবা ক্রিয়েতিব ত্রেদিসনশিং সিনেমাগী য়ুনিভর্সেল লোনগী খুত্থাংদা পুন্না লাকপা অদুগী থৌরম অমা ওইখি।

এৱার্দ ফংলবশিংগী মপুং ফাবা লিস্ত অমসুং এৱার্দশিং অসিগী মতাংদা অকুপ্পা ঈ-পাউগীদমক, চানবীদুনা অসিদা ক্লিক তৌবীয়ু:  Complete List of Awardees

******