তথ্য আৰু সম্প্ৰচাৰ মন্ত্ৰালয়
ভাৰতৰ ৰাষ্ট্ৰপতি শ্ৰীমতী দ্ৰৌপদী মুৰ্মুৱে গুজৰাটৰ একতা নগৰত ৭২সংখ্যক ৰাষ্ট্ৰীয় চলচ্চিত্ৰ বঁটা প্ৰদান কৰে
ৰাষ্ট্ৰপতিয়ে চলচ্চিত্ৰ জগতৰ সৈতে জড়িতসকলক স্বাস্থ্যসন্মত জীৱনশৈলীৰ প্ৰচাৰ কৰিবলৈ আৰু ক্ষতিকাৰক দ্ৰব্যৰ সমৰ্থন নকৰিবলৈ আহ্বান জনায়, কিয়নো তেওঁলোক যুৱ সমাজৰ বাবে আদৰ্শ
দাদাচাহেব ফাল্কে বঁটা বিজয়ী অনন্ত নাগে দেশৰ অগণন জনসাধাৰণৰ পৰা লাভ কৰা অপৰিসীম মৰমৰ বাবে কৃতজ্ঞতা প্ৰকাশ কৰে
গুৰুত্বপূৰ্ণ পৰ্যটনস্থলীসমূহত ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠান অনুষ্ঠিত কৰি ভাৰতৰ সাংস্কৃতিক বৈচিত্ৰ্য দাঙি ধৰা হ’ব: শ্ৰী অশ্বিনী বৈষ্ণৱ
তথ্য আৰু সম্প্ৰচাৰ মন্ত্ৰীয়ে ৱেভছৰ পৰৱৰ্তী সংস্কৰণ ২০২৭ চনৰ অক্টোবৰত অনুষ্ঠিত হোৱাৰ কথা ঘোষণা কৰে
পোষ্ট কৰা হৈছে:
22 SEP 2026 8:34PM by PIB Guwahati
ভাৰতৰ ৰাষ্ট্ৰপতি শ্ৰীমতী দ্ৰৌপদী মুৰ্মুৱে আজি ৭২সংখ্যক ৰাষ্ট্ৰীয় চলচ্চিত্ৰ বঁটা প্ৰদান কৰে আৰু প্ৰতিগৰাকী বঁটা বিজয়ীক তেওঁলোকৰ প্ৰতিভা, নিষ্ঠা আৰু কঠোৰ পৰিশ্ৰমৰ বাবে অভিনন্দন জ্ঞাপন কৰে। তেওঁ কয় যে চলচ্চিত্ৰ নিৰ্মাণ এক সামূহিক প্ৰচেষ্টা আৰু বঁটা বিজয়ী চলচ্চিত্ৰসমূহ সম্ভৱ কৰি তোলাত অৱদান আগবঢ়োৱা সকলোৰে দলৰ প্ৰতিগৰাকী সদস্যলৈ তেওঁৰ কৃতজ্ঞতা জ্ঞাপন কৰিবলৈ বঁটা বিজয়ীসকলক আহ্বান জনায়।
ৰাষ্ট্ৰপতিগৰাকীয়ে দাদাচাহেব ফাল্কে বঁটাৰ প্ৰাপক শ্ৰী অনন্ত নাগক নাট্য আৰু চলচ্চিত্ৰ জগতলৈ আগবঢ়োৱা তেওঁৰ বিশিষ্ট অৱদানৰ বাবে অভিনন্দন জ্ঞাপন কৰে।
ৰাষ্ট্ৰপতিগৰাকীয়ে কয় যে ভাৰতীয় চলচ্চিত্ৰই দেশখনৰ বৈচিত্ৰ্যময় ভাষা, পৰম্পৰা, আকাংক্ষা আৰু সংগ্ৰামৰ প্ৰতিফলন ঘটায়। ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠানৰ স্থান হিচাপে একতা নগৰক বাছনি কৰাৰ বাবে তেওঁ সন্তুষ্টি প্ৰকাশ কৰে আৰু ইয়াক ভাৰতৰ সাংস্কৃতিক আৰু ৰাষ্ট্ৰীয় ঐক্যৰ প্ৰতীক বুলি অভিহিত কৰে।
সৃষ্টিশীল অৰ্থনীতিত মৰ্যাদা আৰু সামাজিক সুৰক্ষাৰ আহ্বান জনাই ৰাষ্ট্ৰপতিগৰাকীয়ে কয় যে কৰ্মী, ক্ষুদ্ৰ শিল্পী, সহায়ক আৰু সৃষ্টিশীল সমাজৰ সংগ্ৰামৰত সদস্যসকলে সন্মান আৰু সামাজিক সুৰক্ষা লাভ কৰিব লাগে। তেওঁ সকলো জুৰীতে মহিলাৰ অংশগ্ৰহণ নিশ্চিত কৰাৰ বাবেও আহ্বান জনায়, যাতে এক সামগ্ৰিক মানৱীয় দৃষ্টিভংগী প্ৰতিফলিত হয়।
জনপ্ৰিয় শিল্পীসকলৰ, বিশেষকৈ শিশু আৰু যুৱসকলৰ ওপৰত থকা প্ৰভাৱৰ কথা উল্লেখ কৰি ৰাষ্ট্ৰপতিগৰাকীয়ে সফল শিল্পীসকলক নিয়মানুৱৰ্তী জীৱনশৈলীৰ সুফলসমূহ প্ৰচাৰ কৰিবলৈ আৰু স্বাস্থ্যৰ বাবে ক্ষতিকাৰক দ্ৰব্যৰ সমৰ্থন কৰাৰ পৰা বিৰত থাকিবলৈ আহ্বান জনায়।
ৰাষ্ট্ৰপতিগৰাকীয়ে কয় যে দেশত নিৰ্মাণ হৈ থকা চলচ্চিত্ৰসমূহৰ মানদণ্ডই তেওঁৰ এই বিশ্বাস অধিক শক্তিশালী কৰিছে যে ভাৰতীয় চলচ্চিত্ৰই বিশ্বমানৰ মানদণ্ড স্থাপন কৰিব পাৰে।
কাহিনীৰে ভৰা এক জীৱন, চলচ্চিত্ৰৰ এক ঐতিহ্য: দাদাচাহেব ফাল্কে বঁটাৰে সন্মানিত শ্ৰী অনন্ত নাগ
ভাৰতৰ ৰাষ্ট্ৰপতি শ্ৰীমতী দ্ৰৌপদী মুৰ্মুৱে যেতিয়া সন্মানীয় দাদাচাহেব ফাল্কে বঁটা ২০২৪ শ্ৰী অনন্ত নাগক প্ৰদান কৰে, সেই মুহূৰ্তটোৱে কাহিনী কোৱা, নাট্য আৰু চলচ্চিত্ৰৰ প্ৰতি তেওঁৰ জীৱনজোৰা নিষ্ঠাক উদযাপন কৰে। দশকজুৰি তেওঁৰ স্মৰণীয় অভিনয় আৰু ভাৰতীয় চলচ্চিত্ৰলৈ আগবঢ়োৱা সুদীৰ্ঘ অৱদানৰ স্বীকৃতি হিচাপে এই সন্মান প্ৰদান কৰা হয়।
বিনম্ৰতাৰে বঁটা গ্ৰহণ কৰি শ্ৰী অনন্ত নাগে তেওঁৰ যাত্ৰাক গঢ় দিয়া লোকসকল আৰু অভিজ্ঞতাসমূহৰ বাবে কৃতজ্ঞতা প্ৰকাশ কৰে।
নিজৰ প্ৰাৰম্ভিক দিনসমূহ স্মৰণ কৰি শ্ৰী অনন্ত নাগে কয় যে তেওঁ এক আশ্ৰমত ডাঙৰ-দীঘল হৈছিল আৰু পাছত তেওঁক মুম্বাইলৈ পঠিওৱা হৈছিল, য’ত তেওঁ এখন নাটকত অভিনয় কৰাৰ সুযোগ লাভ কৰিছিল। নাট্যই তেওঁৰ কেৰিয়াৰৰ ভেটি স্থাপন কৰে আৰু চলচ্চিত্ৰত প্ৰৱেশ কৰাৰ পূৰ্বে তেওঁ প্ৰায় ৫০খন নাটকত অভিনয় কৰে। পৰৱৰ্তী সময়ত তেওঁ প্ৰখ্যাত চলচ্চিত্ৰ নিৰ্মাতা শ্যাম বেনেগালৰ দ্বাৰা নিৰ্মিত চলচ্চিত্ৰকে ধৰি বিভিন্ন চলচ্চিত্ৰত কাম কৰাৰ সুযোগ লাভ কৰে।
শ্ৰী অনন্ত নাগে কয় যে তেওঁ সচেতনভাৱে কন্নড় চলচ্চিত্ৰক বাছি লৈছিল আৰু বেংগালুৰুক নিজৰ কৰ্মভূমি হিচাপে গঢ়ি লৈছিল। যোৱা বছৰ মাননীয় ৰাষ্ট্ৰপতিৰ দ্বাৰা পদ্মভূষণ সন্মানেৰে সন্মানিত হোৱাৰ কথা স্মৰণ কৰি তেওঁ এই বছৰ পুনৰ ৰাষ্ট্ৰপতিৰ হাতৰ পৰা দাদাচাহেব ফাল্কে বঁটা লাভ কৰাৰ বাবে গভীৰ কৃতজ্ঞতা প্ৰকাশ কৰে।
গুজৰাটত ৰাষ্ট্ৰীয় চলচ্চিত্ৰ বঁটাক আদৰণি
গুজৰাটত অনুষ্ঠিত অনুষ্ঠানটোৱে ৰাষ্ট্ৰীয় চলচ্চিত্ৰ বঁটাৰ যাত্ৰাত এক নতুন অধ্যায়ৰ সূচনা কৰে।
গুজৰাটৰ ৰাজ্যপাল আচাৰ্য দেৱব্ৰতে দিল্লীৰ বাহিৰত ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠান অনুষ্ঠিত কৰাৰ পৰম্পৰা আৰম্ভ কৰাৰ বাবে তথ্য আৰু সম্প্ৰচাৰ মন্ত্ৰালয়ৰ প্ৰতি কৃতজ্ঞতা প্ৰকাশ কৰে। তেওঁ কয় যে চৰ্দাৰ বল্লভভাই পেটেলৰ ঐতিহ্য আৰু শক্তিৰ সৈতে জড়িত একতা নগৰ, কেভাড়িয়াত এই সন্মানীয় বঁটা প্ৰদান অনুষ্ঠান আয়োজন কৰাটো গুজৰাটৰ বাবে গৌৰৱৰ বিষয়।
৭২সংখ্যক ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠানত ভাষণ দি ৰাজ্যপালগৰাকীয়ে কয় যে ভাৰতীয় চলচ্চিত্ৰই দেশখনৰ বৈচিত্ৰ্যময় ভাষা আৰু সংস্কৃতিক সমৃদ্ধ কৰাত গুৰুত্বপূৰ্ণ অৱদান আগবঢ়াইছে।
তেওঁ চলচ্চিত্ৰ নিৰ্মাতাসকলক প্ৰাকৃতিক কৃষি, স্বাস্থ্যসন্মত জীৱনশৈলী আৰু পৰিৱেশ সচেতনতা প্ৰচাৰৰ বাবে চলচ্চিত্ৰক ব্যৱহাৰ কৰিবলৈ আৰু প্ৰেম, ভাতৃত্ববোধ তথা ৰাষ্ট্ৰীয় ঐক্যৰ মূল্যবোধ শক্তিশালী কৰিবলৈ আহ্বান জনায়।
গুজৰাটৰ মুখ্যমন্ত্ৰী শ্ৰী ভূপেন্দ্ৰ পেটেলে ৭২সংখ্যক ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠানৰ বাবে মাননীয় ৰাষ্ট্ৰপতি আৰু বিশিষ্ট অতিথিসকলক গুজৰাটলৈ আদৰণি জনায় আৰু একতা নগৰত এই অনুষ্ঠান আয়োজন কৰাটো ৰাজ্যখনৰ বাবে গৌৰৱৰ বিষয় বুলি অভিহিত কৰে।
তেওঁ চলচ্চিত্ৰক সমাজৰ প্ৰতিফলক, সংস্কৃতিৰ বাহক আৰু মানৱীয় অনুভূতিৰ সংযোগ স্থাপনৰ এক শক্তিশালী মাধ্যম হিচাপে উল্লেখ কৰে আৰু ভাৰতৰ বৈশ্বিক পৰিচয় তথা কোমল শক্তি শক্তিশালী কৰাৰ ক্ষেত্ৰত ইয়াৰ সম্ভাৱনাৰ কথা উল্লেখ কৰে।
গুজৰাটৰ সমৃদ্ধ ঐতিহ্য, বৈচিত্ৰ্যময় ভূ-দৃশ্য আৰু সাংস্কৃতিক পৰম্পৰাৰ কথা উল্লেখ কৰি তেওঁ ভাৰতীয় আৰু আন্তঃৰাষ্ট্ৰীয় চলচ্চিত্ৰ নিৰ্মাতাসকলক চলচ্চিত্ৰৰ দৃশ্যগ্ৰহণৰ বাবে গুজৰাটক বাছনি কৰিবলৈ আহ্বান জনায় আৰু সন্মানীয় অনুষ্ঠানটো ৰাজ্যখনলৈ লৈ অহাৰ বাবে তথ্য আৰু সম্প্ৰচাৰ মন্ত্ৰালয়ক ধন্যবাদ জ্ঞাপন কৰে।
কেন্দ্ৰীয় তথ্য আৰু সম্প্ৰচাৰ মন্ত্ৰী শ্ৰী অশ্বিনী বৈষ্ণৱে একতা নগৰ, কেভাড়িয়াত অনুষ্ঠিত ৭২সংখ্যক ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠানত মাননীয় ৰাষ্ট্ৰপতিৰ উপস্থিতিৰ বাবে কৃতজ্ঞতা প্ৰকাশ কৰে আৰু ভাৰতীয় চলচ্চিত্ৰলৈ আগবঢ়োৱা অসাধাৰণ সাফল্যৰ বাবে সকলো বঁটা বিজয়ীক অভিনন্দন জ্ঞাপন কৰে।
মন্ত্ৰীগৰাকীয়ে কয় যে চলচ্চিত্ৰ এক দলগত প্ৰচেষ্টা আৰু ৰাষ্ট্ৰীয় চলচ্চিত্ৰ বঁটাই বঁটা লাভ কৰাসকলৰ লগতে আঁৰৰ পৰা কাম কৰা লোকসকলৰ অৱদানকো স্বীকৃতি দিয়ে। তেওঁ দাদাচাহেব ফাল্কে বঁটাৰ প্ৰাপক শ্ৰী অনন্ত নাগে ভাৰতীয় চলচ্চিত্ৰলৈ আগবঢ়োৱা বিশাল অৱদানৰ বাবেও প্ৰশংসা কৰে।
শ্ৰী অশ্বিনী বৈষ্ণৱে কয় যে ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠানৰ মূল লক্ষ্য হৈছে বিভিন্ন ৰাজ্য আৰু কেন্দ্ৰীয় শাসিত অঞ্চলৰ গুৰুত্বপূৰ্ণ পৰ্যটনস্থলীসমূহলৈ এই অনুষ্ঠান লৈ যোৱা আৰু ইয়াৰ জৰিয়তে ভাৰতৰ সমৃদ্ধ সাংস্কৃতিক ঐতিহ্য আৰু পৰ্যটনক প্ৰচাৰ কৰা। তেওঁ ৰাজ্য আৰু কেন্দ্ৰীয় শাসিত অঞ্চলসমূহক ৰাষ্ট্ৰীয় চলচ্চিত্ৰ বঁটাৰ ভৱিষ্যৎ সংস্কৰণসমূহৰ অনুষ্ঠানস্থল হিচাপে পৰ্যটনস্থলীসমূহৰ প্ৰস্তাৱ আগবঢ়াবলৈ আহ্বান জনায়।
ভাৰতীয় সৃষ্টিশীল প্ৰযুক্তি প্ৰতিষ্ঠান (আইআইচিটি)-ক এক নতুন প্ৰতিভাৰ ভঁৰাল হিচাপে উল্লেখ কৰি তেওঁ কয় যে ইতিমধ্যে প্ৰায় ৩৮০গৰাকী শিক্ষাৰ্থীয়ে ১৩টা পাঠ্যক্ৰমত নামভৰ্তি কৰিছে, যাৰ পাঠ্যক্ৰম উদ্যোগখণ্ডৰ দ্বাৰা প্ৰস্তুত আৰু পৰিচালিত। তেওঁ লগতে জনায় যে মাননীয় প্ৰধানমন্ত্ৰীয়ে সমগ্ৰ দেশত ১৫,০০০টা ক্ৰিয়েটিভ লেব স্থাপনৰ অনুমোদন জনাইছে, যাৰ ফলত যুৱ সমাজে উদীয়মান প্ৰযুক্তি শিকিবলৈ আৰু ভাৰতৰ বৈচিত্ৰ্যময় সংস্কৃতি দাঙি ধৰিবলৈ নতুন সুযোগ লাভ কৰিব।
মন্ত্ৰীগৰাকীয়ে প্ৰসাৰ ভাৰতীৰ অধ্যক্ষ শ্ৰী প্ৰসূন যোশীৰ সৈতে চলচ্চিত্ৰ নিৰ্মাতা আৰু সমগ্ৰ চলচ্চিত্ৰ জগতক সৰু চহৰসমূহৰ কেঁচা প্ৰতিভা চিনাক্ত, লালন-পালন আৰু প্ৰচাৰ কৰাত সহায় কৰিবলৈ আহ্বান জনায়।
তেওঁ পুনৰ কয় যে চৰকাৰ আৰু সৃষ্টিশীল সমাজৰ যৌথ প্ৰচেষ্টাই ভাৰতৰ বিশাল সৃষ্টিশীল সম্ভাৱনাক মুকলি কৰি দিব পাৰে আৰু ভাৰতীয় প্ৰতিভাক সমগ্ৰ বিশ্বৰ দৰ্শকৰ কাষলৈ লৈ যাব পাৰে।
তেওঁ অহা বছৰ অক্টোবৰত অনুষ্ঠিত হ’বলগীয়া ৱেভছ ২০২৭ৰ বাবে পৰামৰ্শ আৰু ধাৰণা আগবঢ়াবলৈও আহ্বান জনায়।
তথ্য আৰু সম্প্ৰচাৰ মন্ত্ৰালয়ৰ সচিব শ্ৰী চঞ্চল কুমাৰে কয় যে ৭২সংখ্যক ৰাষ্ট্ৰীয় চলচ্চিত্ৰ বঁটাৰ বাবে ৩৪টা ভাষাত ৪০০খন পূৰ্ণদৈৰ্ঘ্যৰ চলচ্চিত্ৰ আৰু ২৪টা ভাষাত ১৬১খন অপূৰ্ণদৈৰ্ঘ্যৰ চলচ্চিত্ৰ লাভ কৰা হৈছিল আৰু ২২টা পূৰ্ণদৈৰ্ঘ্যৰ চলচ্চিত্ৰ বঁটা আৰু ২৩টা অপূৰ্ণদৈৰ্ঘ্যৰ চলচ্চিত্ৰ বঁটা প্ৰদান কৰা হৈছে। তেওঁ কয় যে ভাৰতীয় চলচ্চিত্ৰই সাংস্কৃতিক প্ৰকাশ আৰু বিশ্বজনীন কাহিনী কোৱাৰ এক শক্তিশালী মাধ্যম হিচাপে ধাৰাবাহিকভাৱে বিকশিত হৈছে।
সচিবগৰাকীয়ে কয় যে দিল্লীৰ বাহিৰত একতা নগৰত ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠান অনুষ্ঠিত কৰাটো চৰ্দাৰ বল্লভভাই পেটেলৰ ৰাষ্ট্ৰীয় ঐক্যৰ দৃষ্টিভংগী আৰু প্ৰতিশ্ৰুতিৰ দ্বাৰা অনুপ্ৰাণিত এক গুৰুত্বপূৰ্ণ পদক্ষেপ আৰু আগন্তুক বছৰসমূহত অন্যান্য চহৰতো এই অনুষ্ঠান অনুষ্ঠিত কৰাৰ পৰিকল্পনা কৰা হৈছে।
উৎকৰ্ষৰ উদযাপন: ভাৰতীয় চলচ্চিত্ৰৰ কাহিনী, অভিনয় আৰু বিভিন্ন ৰূপ
শ্ৰেষ্ঠ অভিনেতা (মুখ্য চৰিত্ৰ)ৰ বঁটা ব্ৰমায়ুগমৰ বাবে মাম্মুট্টী আৰু চান্দু চেম্পিয়নৰ বাবে কাৰ্তিক আৰিয়ানৰ মাজত যুটীয়াভাৱে প্ৰদান কৰা হয়, আনহাতে আৰ্টিকল ৩৭০ৰ বাবে য়ামী গৌতমে শ্ৰেষ্ঠ অভিনেত্ৰী (মুখ্য চৰিত্ৰ)ৰ বঁটা লাভ কৰে।
সহায়ক চৰিত্ৰৰ শিতানত ভক্ষকৰ বাবে সঞ্জয় মিশ্ৰক শ্ৰেষ্ঠ অভিনেতা (সহায়ক চৰিত্ৰ) হিচাপে সন্মানিত কৰা হয়, আনহাতে মহাৰাজাৰ বাবে সচানা নামিদাস আৰু মিথ্যাৰ বাবে ৰূপশ্ৰী বৰকাডীয়ে শ্ৰেষ্ঠ অভিনেত্ৰী (সহায়ক চৰিত্ৰ)ৰ বঁটা যুটীয়াভাৱে লাভ কৰে।
আৰ্টিকল ৩৭০ক শ্ৰেষ্ঠ পূৰ্ণদৈৰ্ঘ্যৰ চলচ্চিত্ৰ হিচাপে সন্মানিত কৰা হয়, আনহাতে ৰণদীপ হুডাই তেওঁৰ পৰিচালনাৰ প্ৰথম চলচ্চিত্ৰ স্বতন্ত্ৰ বীৰ সাভাৰকাৰৰ বাবে স্বীকৃতি লাভ কৰে। কাল্কি ২৮৯৮ এডিক সৰ্বাংগীণ মনোৰঞ্জন প্ৰদান কৰা শ্ৰেষ্ঠ জনপ্ৰিয় চলচ্চিত্ৰ হিচাপে নিৰ্বাচিত কৰা হয়, আনহাতে কেপ্টেইন মিলাৰক ৰাষ্ট্ৰীয়, সামাজিক আৰু পৰিৱেশগত মূল্যবোধক প্ৰচাৰ কৰা শ্ৰেষ্ঠ পূৰ্ণদৈৰ্ঘ্যৰ চলচ্চিত্ৰৰ বঁটা প্ৰদান কৰা হয়। আমৰণৰ বাবে ৰাজকুমাৰ পেৰিয়াসামীয়ে শ্ৰেষ্ঠ পৰিচালনাৰ বঁটা লাভ কৰে।
বহু ভাষা, এক ৰাষ্ট্ৰীয় মঞ্চ
এই বঁটাসমূহে ভাৰতীয় চলচ্চিত্ৰৰ ভাষিক বৈচিত্ৰ্যও দাঙি ধৰিলে। সংবিধানৰ অষ্টম অনুসূচীত উল্লেখ কৰা ভাষাসমূহৰ উপৰি গঢ়ৱালী আৰু তুলু চলচ্চিত্ৰয়ো ৰাষ্ট্ৰীয় স্বীকৃতি লাভ কৰে।
এছচি ফাৰ্মাকেম প্ৰাইভেট লিমিটেডৰ দ্বাৰা প্ৰযোজিত আৰু দিনেশ পি ভোঁছলেৰ দ্বাৰা পৰিচালিত ধোলীয়ে শ্ৰেষ্ঠ গঢ়ৱালী চলচ্চিত্ৰৰ বঁটা লাভ কৰে, আনহাতে পিচ্চাৰ ষ্টুডিঅ’ৰ দ্বাৰা প্ৰযোজিত আৰু শিৱধ্বজ শেট্টীৰ দ্বাৰা পৰিচালিত ইম্বুক শ্ৰেষ্ঠ তুলু চলচ্চিত্ৰ হিচাপে সন্মানিত কৰা হয়।
ৰবি ৰাজ মুৰ্মুৰ দ্বাৰা পৰিচালিত সন্তালী চলচ্চিত্ৰ আংগেনয়ে পৰিচালকৰ শ্ৰেষ্ঠ অভিষেক চলচ্চিত্ৰৰ বঁটা লাভ কৰে।
গঢ়ৱালী আৰু তুলুৰ পৰা সন্তালীলৈকে, এই সন্ধিয়াই বৈচিত্ৰ্যময় চলচ্চিত্ৰৰ কণ্ঠসমূহক এক ৰাষ্ট্ৰীয় মঞ্চলৈ লৈ আহি পুনৰ নিশ্চিত কৰিলে যে প্ৰতিটো ভাষাই ভাৰতৰ চলচ্চিত্ৰৰ বৰ্ণমালাত এক নতুন কাহিনী সংযোজন কৰে।
ভাৰতীয় চলচ্চিত্ৰৰ এক উদযাপন
৭২সংখ্যক ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠানে উদযাপিত চলচ্চিত্ৰ জগতৰ বিশিষ্ট ব্যক্তিত্ব, উদীয়মান কণ্ঠ, জনপ্ৰিয় চলচ্চিত্ৰ আৰু আঞ্চলিক কাহিনী কোৱাৰ পৰম্পৰাক এক ৰাষ্ট্ৰীয় মঞ্চত একত্ৰিত কৰিলে। একতা নগৰত এই সন্ধিয়া ভাৰতৰ চলচ্চিত্ৰৰ সৃষ্টিশীল মনোভাৱৰ এক উদযাপনলৈ পৰিণত হয়—বহু ভাষা, অগণন কাহিনী আৰু বৈচিত্ৰ্যময় সৃষ্টিশীল পৰম্পৰা চলচ্চিত্ৰৰ সাৰ্বজনীন ভাষাৰ জৰিয়তে একত্ৰিত হয়।
বঁটা প্ৰাপকসকলৰ সম্পূৰ্ণ তালিকা আৰু বঁটাসমূহৰ বিষয়ে বিশদ তথ্যৰ বাবে অনুগ্ৰহ কৰি ক্লিক কৰক : বঁটা প্ৰাপকসকলৰ সম্পূৰ্ণ তালিকা
*****
Mahesh Kumar/ Sayyid Rabeehashmi / Vivek Vishwash/ Aparajita Priyadarshini/AA
(ৰিলিজ আই ডি : 2313702)
অতিথি কক্ষ : 8