ആദരണീയരേ,
വിശിഷ്ട വ്യക്തികളേ,
നമസ്കാരം!

ഇന്ത്യയിലേക്ക് നിങ്ങളെ ഏവരെയും സ്വാഗതം ചെയ്യാനും അഭിവാദ്യം ചെയ്യാനും സാധിച്ചതിൽ എനിക്ക് അതിയായ സന്തോഷമുണ്ട്.

ഇന്ത്യയുടെ ബ്രിക്സ് അധ്യക്ഷത ജനകേന്ദ്രീകൃതവും മാനവികതയ്ക്ക് പ്രഥമ പരിഗണന നൽകുന്നതുമായ ഒരു സമീപനത്തിലധിഷ്ഠിതമാണ്. പ്രതിരോധശേഷി, നവീനാശയം, സഹകരണം, സുസ്ഥിരത എന്നിവയായിരുന്നു നമ്മുടെ പ്രധാന മുൻഗണനകൾ. ഈ മുൻഗണനകളോടെ, ബ്രിക്സ് സഹകരണത്തെ സാധാരണക്കാരുടെ ജീവിതവുമായി കൂടുതൽ അടുത്ത് ബന്ധിപ്പിക്കുന്നതിന് നാം പ്രത്യേക ഊന്നൽ നൽകിയിട്ടുണ്ട്.

ഈ ദർശനത്തോടെ, 350-ലധികം യോഗങ്ങൾ സംഘടിപ്പിക്കപ്പെട്ടു. ഇന്ത്യയിലുടനീളമുള്ള മുപ്പതോളം നഗരങ്ങളിൽ നിങ്ങളുടെ ടീമുകളെ സ്വാഗതം ചെയ്യാൻ ഞങ്ങൾക്ക് അവസരം ലഭിച്ചു. ഇന്ത്യയുടെ ബ്രിക്സ് അധ്യക്ഷത വിജയകരമാക്കുന്നതിൽ നിങ്ങൾ ഓരോരുത്തരും നൽകിയ സജീവമായ സംഭാവനകൾക്കും പിന്തുണയ്ക്കും ഞാൻ ആത്മാർത്ഥമായി നന്ദി അറിയിക്കുന്നു.

സുഹൃത്തുക്കളേ,

ഈ വർഷത്തെ ബ്രിക്സ് ഉച്ചകോടി ചരിത്രപ്രധാനമായ ഒരു നാഴികക്കല്ലാണ്. നാം ബ്രിക്സിന്റെ 20-ാം വാർഷികം ആഘോഷിക്കുകയാണ്. മനുഷ്യജീവിതത്തിൽ, 20 വയസ്സ് എന്നത് പക്വതയുടെയും ഉത്തരവാദിത്തത്തിന്റെയും ഒരു പുതിയ ഘട്ടത്തിന്റെ തുടക്കത്തെ അടയാളപ്പെടുത്തുന്നു. സ്വപ്നങ്ങൾക്കൊപ്പം ഉത്തരവാദിത്തങ്ങളും ചേരുന്ന, കഴിവുകൾ പുതിയ ദിശകളിലേക്ക് നയിക്കപ്പെടുന്ന ഒരു ഘട്ടമാണിത്.

ഇന്ന് ബ്രിക്സും പ്രായപൂർത്തിയാകുന്ന ഒരു ഘട്ടത്തിൽ എത്തിനിൽക്കുകയാണ്. കഴിഞ്ഞ 20 വർഷത്തിനിടയിൽ, ആഗോളതലത്തിൽ ബ്രിക്സ് അതിന്റേതായ ഒരു സ്വത്വം സ്ഥാപിച്ചു. നാം പരസ്പരം കാഴ്ചപ്പാടുകളെ ബഹുമാനിക്കുകയും സമവായത്തിലൂടെ മുന്നോട്ട് പോവുകയും ചെയ്യുന്നു. ആർക്കും എതിരല്ലാത്ത, എന്നാൽ എല്ലാവരെയും കൂടെ കൊണ്ടുപോകാൻ ശ്രമിക്കുന്ന ഒരു സമീപനവുമായി മുന്നോട്ട് പോകാനാണ് നാം പരിശ്രമിക്കുന്നത്.

ബ്രിക്സിനുള്ളിലെ നമ്മുടെ ഐക്യവും സമവായവും ആഗോളതലത്തിൽ കൃത്യമായ ഫലങ്ങളാക്കി മാറ്റേണ്ട സമയമാണിത്. അടുത്ത 20 വർഷത്തേക്ക്, പുതിയതും വലിയ ലക്ഷ്യങ്ങളുള്ളതുമായ ഒരു അജണ്ടയിൽ നാം പ്രവർത്തിക്കണം. നമ്മുടെ സ്വന്തം പ്രവർത്തന സംവിധാനങ്ങളെ ശക്തിപ്പെടുത്തിക്കൊണ്ട് നാം തുടക്കം കുറിക്കണം.

ബ്രിക്സ് അധ്യക്ഷത ഓരോ വർഷവും മാറുന്നു, എന്നാൽ ഇത് നമ്മുടെ സ്ഥാപനപരമായ വേഗതയെ തടസ്സപ്പെടുത്തരുത്. തുടർച്ചയും നടപ്പാക്കലും ഉറപ്പാക്കുന്ന ഒരു 'ബ്രിക്സ് കണ്ടിന്യൂയിറ്റി ആൻഡ് ഇംപ്ലിമെന്റേഷൻ മെക്കാനിസം' സ്ഥാപിക്കാൻ ഞാൻ നിർദ്ദേശിക്കുന്നു. ട്രോയിക്ക (Troika) മുഖേന, ഈ സംവിധാനം എല്ലാ സംരംഭങ്ങളുടെയും ഫലങ്ങളുടെയും ക്രമാനുഗതമായ തുടർപ്രവർത്തനങ്ങൾ ഉറപ്പാക്കും.

ഓരോ തീരുമാനത്തിനും അതിന്റെ നോഡൽ പോയിന്റ്, സമയപരിധി, നടപ്പാക്കൽ നില എന്നിവ രേഖപ്പെടുത്താൻ കഴിയുന്ന സുരക്ഷിതമായ ഒരു ഡിജിറ്റൽ ശേഖരം നമുക്ക് സൃഷ്ടിക്കാൻ കഴിയും.

സുഹൃത്തുക്കളേ,

ബ്രിക്സിനെ (BRICS) ശക്തിപ്പെടുത്തുന്നതോടൊപ്പം തന്നെ ആഗോള പരിഷ്കരണത്തിനായുള്ള പാതയും നാം വെട്ടിത്തെളിക്കേണ്ടതുണ്ട്. ആഗോള ഭരണത്തിന്റെ നിലവിലുള്ള ഘടന ഒരു പിരമിഡിന് സമാനമാണ്. അതിന് മുകളിൽ അധികാരവും തീരുമാനങ്ങളെടുക്കാനുള്ള ശേഷിയും കേന്ദ്രീകരിക്കപ്പെട്ടിരിക്കുന്നു; എന്നാൽ അടിത്തട്ടിലുള്ളത് ഈ തീരുമാനങ്ങളാൽ സ്വാധീനിക്കപ്പെടുന്നതും എന്നാൽ അവ രൂപീകരിക്കുന്നതിൽ കാര്യമായ ശബ്ദമില്ലാത്തതുമായ രാജ്യങ്ങളാണ്.

ഇന്ന് ഗ്ലോബൽ സൗത്ത് ആഗോള പ്രതിസന്ധികളുടെ മുൻനിരയിലാണ്, എന്നാൽ തീരുമാനങ്ങളെടുക്കുന്നതിൽ പിൻനിരയിലുമാണ്. ഈ "ആനുകൂല്യങ്ങളുടെ പിരമിഡിനെ" നാം ഒരു "പങ്കാളിത്ത പ്ലാറ്റ്‌ഫോം" ആക്കി മാറ്റണം; അവിടെ ഓരോ രാജ്യത്തിനും ശബ്ദമുണ്ടാകും, ഓരോ അംഗത്തിനും പങ്കാളിത്തമുണ്ടാകും, മാനവികതയുടെ പുരോഗതി ഓരോ ശ്രമത്തിന്റെയും കേന്ദ്രബിന്ദുവായി നിലകൊള്ളുകയും ചെയ്യും.

ഈ ലക്ഷ്യത്തോടെ, ആഗോള ഭരണ പരിഷ്കരണത്തിനായി പത്ത് നിർദ്ദേശങ്ങൾ രൂപീകരിക്കാൻ നാം ഒന്നിച്ചുപ്രവർത്തിക്കണമെന്ന് ഞാൻ നിർദ്ദേശിക്കുന്നു; അടുത്ത ഉച്ചകോടിയോടെ ഇവയെ ഒരു 'ബ്രിക്സ് പരിഷ്കരണ മാർഗ്ഗരേഖ' ആയി വികസിപ്പിക്കാൻ നമുക്ക് ശ്രമിക്കാം.

ഈ മാർഗ്ഗരേഖ തയ്യാറാക്കുമ്പോൾ, നാം മൂന്ന് പ്രധാന വശങ്ങൾ മനസ്സിൽ സൂക്ഷിക്കേണ്ടതുണ്ട്: പ്രാതിനിധ്യം, പ്രതികരണശേഷി, നിയമനിർമ്മാണം.

ഒന്നാമതായി, പ്രാതിനിധ്യത്തെക്കുറിച്ച് പറയുമ്പോൾ ഐക്യരാഷ്ട്രസഭാ സുരക്ഷാ കൗൺസിലിന്റെ പരിഷ്കരണം ഇനി വൈകിക്കാനാവില്ലെന്ന് ഞാൻ പറയാൻ ആഗ്രഹിക്കുന്നു. ഈ വിഷയത്തിലുള്ള വാചാധിഷ്ഠിത ചർച്ചകൾ കൃത്യമായി നിർവ്വചിക്കപ്പെട്ട സമയക്രമവുമായും വ്യക്തമായ ഫലങ്ങളുമായും ബന്ധിപ്പിക്കണം.

അതുപോലെ തന്നെ, ധനകാര്യ സ്ഥാപനങ്ങളിൽ വോട്ടിംഗ് അവകാശം, നേതൃത്വ പദവികൾ, നയപരമായ മുൻഗണനകൾ എന്നിവ ഇന്നത്തെ സാമ്പത്തിക യാഥാർത്ഥ്യങ്ങളെ പ്രതിഫലിപ്പിക്കുന്നതായിരിക്കണം. ആഗോള സാമ്പത്തിക വളർച്ചയെ നയിക്കുന്ന രാജ്യങ്ങൾക്ക് ആഗോള സാമ്പത്തിക ഭരണം രൂപീകരിക്കുന്നതിലും അനുയോജ്യമായ പങ്കാളിത്തം ഉണ്ടായിരിക്കണം.

രണ്ടാമതായി, പ്രതികരണശേഷി. ആഗോള വെല്ലുവിളികൾക്ക് കാര്യക്ഷമമായ പരിഹാരങ്ങൾ നൽകാൻ കഴിയുമ്പോൾ മാത്രമേ ആഗോള സ്ഥാപനങ്ങൾക്ക് മാനവികതയുടെ വിശ്വാസം നേടിയെടുക്കാൻ സാധിക്കൂ. നമ്മുടെ കൂട്ടായ പ്രതികരണത്തിന്റെ വേഗത, വ്യാപ്തി, അവസാന ഘട്ടം വരെയുള്ള സ്വാധീനം എന്നിവയിലാണ് നാം ശ്രദ്ധ കേന്ദ്രീകരിക്കേണ്ടത്.

ആഗോള വ്യാപാരത്തിന് നാവികർ വളരെ നിർണ്ണായകമായ സംഭാവന നൽകുന്നു, എന്നിരുന്നാലും പ്രതിസന്ധി ഘട്ടങ്ങളിൽ പലപ്പോഴും അനുയോജ്യമായ പിന്തുണയില്ലാതെ അവർ ഒറ്റപ്പെട്ടു പോകുന്നു. ഒരു 'നാവിക അടിയന്തര സഹായ ശൃംഖല' നമുക്ക് സ്ഥാപിക്കാൻ കഴിയുമോ എന്ന് ഞാൻ നിർദ്ദേശിക്കുന്നു. ഈ ശൃംഖലയ്ക്ക് ബന്ധപ്പെട്ട രാജ്യങ്ങളിലെ മാരിടൈം അധികാരികളെയും നയതന്ത്ര ദൗത്യങ്ങളെയും തമ്മിൽ ബന്ധിപ്പിക്കാൻ സാധിക്കും. ഇതിന് അടിയന്തര മുന്നറിയിപ്പുകൾ, വൈദ്യസഹായം, കുടുംബങ്ങളുമായുള്ള ആശയവിനിമയം, ഒഴിപ്പിക്കലിനുള്ള പിന്തുണ എന്നിവ എളുപ്പമാക്കാൻ കഴിയും.

മൂന്നാമതായി, നിയമനിർമ്മാണത്തെക്കുറിച്ച് സംസാരിക്കാൻ ഞാൻ ആഗ്രഹിക്കുന്നു. ഭാവിയിലെ ആഗോള നിയമങ്ങൾ രൂപീകരിക്കുന്നതിൽ തുല്യ പങ്കാളിത്തം ഉറപ്പാക്കുന്നത് അതീവ പ്രാധാന്യമുള്ള കാര്യമാണ്.

ആർട്ടിഫിഷ്യൽ ഇന്റലിജൻസ് (AI), സൈബറിടം , ബഹിരാകാശം, ബയോടെക്നോളജി, നിർണ്ണായക സാങ്കേതികവിദ്യകൾ എന്നിവ ഭാവിയുടെ അവസരങ്ങളെ മാത്രമല്ല, ഭാവിയെ നിയന്ത്രിക്കുന്ന നിയമങ്ങളെയും രൂപപ്പെടുത്തുന്നു.

ഗ്ലോബൽ സൗത്തിനെ നിയമങ്ങൾ സ്വീകരിക്കുന്നവരിൽ നിന്ന് നിയമങ്ങൾ രൂപീകരിക്കുന്നവരാക്കി മാറ്റാൻ നാം പ്രവർത്തിക്കണം. ബ്രിക്സ് മുഖേന, ഗ്ലോബൽ സൗത്തിലെ രാജ്യങ്ങളിൽ നിന്നുള്ള യുവ നയതന്ത്രജ്ഞർക്കും നയരൂപീകരണ വിദഗ്ദ്ധർക്കും നയതന്ത്ര ചർച്ചാ ശേഷികൾ, പ്രായോഗിക പരിശീലനം, നിയമപരമായ പ്രാഗത്ഭ്യം എന്നിവ നൽകാൻ നമുക്ക് സാധിക്കും.

സന്തോഷകരമായ ഒരു യാദൃശ്ചികതയാൽ ഇന്ന് ഐക്യരാഷ്ട്രസഭയുടെ സൗത്ത്-സൗത്ത് സഹകരണ ദിനമാണ്. ഗ്ലോബൽ സൗത്തിനായി സമർപ്പിക്കപ്പെട്ട ഒരു ദിനത്തിൽ തന്നെ ഇത്തരമൊരു തീരുമാനം കൈക്കൊള്ളുന്നത് സവിശേഷ പ്രാധാന്യമർഹിക്കുന്നു. ഈ വിഷയത്തിൽ നേതൃത്വം വഹിക്കാൻ ഇന്ത്യ തയ്യാറാണ്.

സുഹൃത്തുക്കളേ,

ഇന്ത്യ ആതിഥേയത്വം വഹിക്കുന്ന ഈ ബ്രിക്സ് ഉച്ചകോടിയുടെ സന്ദേശം ഉച്ചത്തിലും വ്യക്തവുമായിരിക്കണം: നമ്മുടെ ഭാവി പങ്കുവെക്കപ്പെട്ട ഒന്നാണെങ്കിൽ ആ ഭാവി രൂപപ്പെടുത്താനുള്ള അവകാശവും പങ്കുവെക്കപ്പെടണം.

ശബ്ദത്തിൽ നിന്ന് സ്വാധീനത്തിലേക്ക്. ആനുകൂല്യത്തിൽ നിന്ന് പങ്കാളിത്തത്തിലേക്ക്.

ഇതായിരിക്കണം 20-ാം വർഷത്തിൽ ബ്രിക്സിന്റെ നിശ്ചയദാർഢ്യം.

വളരെയധികം നന്ദി.

നിരാകരണം: ഇത് പ്രധാനമന്ത്രിയുടെ പ്രസംഗത്തിന്റെ ഏകദേശ പരിഭാഷയാണ്. യഥാർത്ഥ പ്രസംഗം ഹിന്ദിയിലാണ് നടത്തിയത്.

***********