প্ৰধানমন্ত্ৰী শ্ৰী নৰেন্দ্ৰ মোদীৰ 'সহকাৰ সে সমৃদ্ধি' দৃষ্টিভংগীৰ দ্বাৰা পৰিচালিত হৈ, কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহৰ নেতৃত্বত সমবায় মন্ত্ৰালয় আৰু ইয়াৰ প্ৰতিষ্ঠানসমূহ সমবায় সমিতিৰ সদস্যসকলৰ স্বাৰ্থ ৰক্ষা কৰিবলৈ আৰু সমবায় খণ্ডৰ প্ৰতি ৰাইজৰ আস্থা সুদৃঢ় কৰিবলৈ উৎসৰ্গিত। এই প্ৰতিশ্ৰুতিৰ অংশ হিচাপে, চেণ্ট্ৰেল ৰেজিষ্ট্ৰাৰ অৱ ক'অপাৰেটিভ ছ'চাইটিজে (CRCS) মাননীয় উচ্চতম ন্যায়ালয়ৰ ২৯ মাৰ্চ ২০২৩ তাৰিখৰ ডব্লিউ.পি. (W.P.) নম্বৰ ১৯১/২০২২ ৰ নিৰ্দেশ অনুসৰি এক সুৰক্ষিত, স্বচ্ছ আৰু অনলাইন ব্যৱস্থাৰ জৰিয়তে চাহাৰাৰ বৈধ জমাকৰ্তাসকলক তেওঁলোকৰ প্ৰাপ্য আৰু প্ৰকৃত ধন পৰিশোধ কৰাত নিৰন্তৰ সহায় কৰি আহিছে।

আজিলৈকে, ৪১,৫৬,৭১১ গৰাকী জমাকৰ্তালৈ মুঠ ৯,২৬৭ কোটি টকা তেওঁলোকৰ আধাৰ-সংলগ্ন বেংক একাউণ্টত প্ৰত্যক্ষভাৱে ঘূৰাই দিয়া হৈছে। চিআৰচিএছ-চাহাৰা ৰিফাণ্ড পৰ্টেলৰ (CRCS-Sahara Refund Portal) জৰিয়তে প্ৰক্ৰিয়াকৰণৰ বাবে এতিয়াও প্ৰায় ২০ লাখ আবেদন বাকী আছে। এতিয়া পৰ্টেলটো পুনৰ সক্ৰিয় হোৱাৰ লগে লগে, এই অমীমাংসিত আবেদনসমূহৰ প্ৰমাণীকৰণ আৰু ধন ঘূৰাই দিয়াৰ প্ৰক্ৰিয়া পুনৰ আৰম্ভ হৈছে।

চাহাৰা সমবায় সমিতিসমূহৰ সৈতে সম্পৰ্কহীন কিছুমান বিষয়ৰ বাবে তেওঁলোকৰ কাৰ্যালয়সমূহ ছীল কৰাৰ ফলত ২০২৫ চনৰ নৱেম্বৰ মাহত চাহাৰা সমবায় সমিতিসমূহৰ কাম-কাজ প্ৰভাৱিত হৈছিল। লগতে হাৰ্ডৱেৰ আৰু বাৰ্ষিক মেৰামতি চুক্তি (AMCs) সম্পৰ্কীয় বকেয়া ধন, অত্যাৱশ্যকীয় তথ্য-প্ৰযুক্তিৰ আন্তঃগাঁথনি আৰু অনুজ্ঞাপত্ৰৰ নৱীকৰণ, মানৱ সম্পদ আৰু অন্যান্য প্ৰশাসনিক বিষয়কে ধৰি সমিতিসমূহে পৰিচালনাগত আৰু প্ৰশাসনিক বাধাসমূহৰো সন্মুখীন হৈছিল। সামূহিকভাৱে, এই কাৰণসমূহে ধন ঘূৰাই পোৱাৰ দাবীসমূহ প্ৰমাণীকৰণ আৰু প্ৰক্ৰিয়াকৰণৰ বাবে প্ৰয়োজনীয় ব্যৱস্থাসমূহ ব্যাহত কৰিছিল।

চাহাৰা সমিতিসমূহৰ ধন ঘূৰাই দিয়া ব্যৱস্থাত প্ৰভাৱ পেলোৱা প্ৰশাসনিক, বিত্তীয়, পৰিচালনাগত আৰু প্ৰযুক্তি-সম্পৰ্কীয় বাধাসমূহ দূৰ কৰাৰ ক্ষেত্ৰত সমবায় মন্ত্ৰালয়ে এক গুৰুত্বপূৰ্ণ ভূমিকা পালন কৰিছিল। উত্তৰ প্ৰদেশ চৰকাৰৰ বিষয়া আৰু কৰ্তৃপক্ষকে ধৰি অংশীদাৰসকলৰ সৈতে ধাৰাবাহিক প্ৰতিষ্ঠানিক হস্তক্ষেপ আৰু সমন্বয়ৰ জৰিয়তে চিআৰচিএছ-এ (CRCS) অত্যাৱশ্যকীয় ব্যৱস্থা, আন্তঃগাঁথনি আৰু প্ৰশাসনিক কাম-কাজৰ লগত জড়িত বাধাসমূহ সমাধান কৰাত সহায় কৰে, যাৰ ফলত পৰ্টেলটো আৰু ইয়াৰ সৈতে জড়িত প্ৰমাণীকৰণ ব্যৱস্থাসমূহ পুনৰ কাৰ্যক্ষম কৰাটো সম্ভৱ হয়। ইয়াৰ ফলত চাহাৰা গ্ৰুপৰ সমবায় সমিতিসমূহৰ, অৰ্থাৎ চাহাৰা ক্ৰেডিট ক'অপাৰেটিভ ছ'চাইটি লিমিটেড, লক্ষ্ণৌ; চাহাৰায়ণ ইউনিভাৰ্ছেল মাল্টিপাৰ্পাজ ছ'চাইটি লিমিটেড, ভূপাল; হামাৰা ইণ্ডিয়া ক্ৰেডিট ক'অপাৰেটিভ ছ'চাইটি লিমিটেড, কলকাতা; আৰু ষ্টাৰ্ছ মাল্টিপাৰ্পাজ ক'অপাৰেটিভ ছ'চাইটি লিমিটেড, হায়দৰাবাদৰ প্ৰকৃত জমাকৰ্তাসকলৰ বৈধ প্ৰাপ্য ধন ঘূৰাই দিয়াৰ প্ৰক্ৰিয়াকৰণ পুনৰ আৰম্ভ হৈছে।

ধন ঘূৰাই দিয়াৰ প্ৰক্ৰিয়াটো চিআৰচিএছ-চাহাৰা ৰিফাণ্ড পৰ্টেলৰ (CRCS-Sahara Refund Portal) জৰিয়তে চিআৰচিএছৰ (CRCS) দ্বাৰা পৰিচালনা কৰা হৈছে, যাৰ ফলত সমগ্ৰ ব্যৱস্থাটো স্বচ্ছ, ডিজিটেল, কাগজবিহীন আৰু প্ৰমাণীকৰণ-ভিত্তিক হৈ থকাটো নিশ্চিত কৰা হৈছে। ১৮ জুলাই ২০২৩ তাৰিখে চৰকাৰে মুকলি কৰা এই নিৰ্দিষ্ট অনলাইন পৰ্টেলটোৱে জমাকৰ্তাসকলক কোনো ভৌতিক কাগজ-পত্ৰ নোহোৱাকৈ ধন ঘূৰাই পোৱাৰ আবেদন দাখিল কৰিবলৈ সক্ষম কৰিছে, যিয়ে এক স্পষ্ট ডিজিটেল তথ্য সংৰক্ষণ কৰাৰ লগতে প্ৰক্ৰিয়াটো সহজলভ্য আৰু সুবিধাজনক কৰি তুলিছে।

আধাৰ ই-কেৱাইচি (Aadhaar e-KYC) আৰু সংশ্লিষ্ট সমিতিসমূহে প্ৰদান কৰা তথ্যৰ সৈতে জমাকৰ্তা, সদস্যপদ আৰু একাউণ্টৰ সবিশেষ মিলাই চাই দাবীসমূহৰ প্ৰক্ৰিয়াকৰণ কৰা হয়। উচ্চতম ন্যায়ালয়ৰ নিৰ্দেশিত নিৰীক্ষণ ব্যৱস্থাৰ অধীনত অনুমোদিত ষ্টেণ্ডাৰ্ড অপাৰেটিং প্ৰচিডিউৰ (SOP) বা মানক পৰিচালনা প্ৰক্ৰিয়া অনুসৰি জমা প্ৰমাণপত্ৰ বা ৰচিদ আৰু অন্যান্য নিৰ্ধাৰিত নথিপত্ৰসমূহ পৰীক্ষা কৰা হয়। সফলতাৰে প্ৰমাণীকৰণ সম্পূৰ্ণ হোৱাৰ পিছত, যোগ্য ধনৰ পৰিমাণ পোনপটীয়াকৈ জমাকৰ্তাৰ আধাৰ-সংলগ্ন বেংক একাউণ্টত জমা কৰা হয়।

সমবায় মন্ত্ৰালয় আৰু চিআৰচিএছ-এ প্ৰয়োজনীয় তথ্য-প্ৰযুক্তি আন্তঃগাঁথনি সুদৃঢ় কৰিবলৈ, অত্যাৱশ্যকীয় ব্যৱস্থা আৰু অনুজ্ঞাপত্ৰ নৱীকৰণ কৰিবলৈ, পৰিচালনাগত বাধাসমূহ দূৰ কৰিবলৈ আৰু দাবীৰ প্ৰক্ৰিয়াকৰণত প্ৰভাৱ পেলোৱা মানৱ সম্পদ আৰু প্ৰশাসনিক সমস্যাসমূহৰ সমাধান কৰিবলৈ সন্মিলিত পদক্ষেপ গ্ৰহণ কৰিছে। পৰ্টেলটোৰ পুনৰ সক্ৰিয়কৰণে মন্ত্ৰালয়ৰ জনমুখী দৃষ্টিভংগী আৰু প্ৰকৃত জমাকৰ্তাসকলৰ স্বাৰ্থ সুৰক্ষিত কৰাৰ লগতে অমীমাংসিত আবেদনসমূহৰ সুচল প্ৰমাণীকৰণ আৰু প্ৰক্ৰিয়াকৰণৰ সুবিধা প্ৰদান কৰাৰ ক্ষেত্ৰত চিআৰচিএছৰ নিৰন্তৰ প্ৰতিষ্ঠানিক দায়িত্বক প্ৰতিফলিত কৰে।

জমাকৰ্তাসকলক নতুন দাবী দাখিল কৰাৰ বাবে কেৱল চৰকাৰী চিআৰচিএছ-চাহাৰা ৰিফাণ্ড পৰ্টেল (https://mocrefund.crcs.gov.in) ব্যৱহাৰ কৰিবলৈ আৰু দাখিল কৰা দাবীসমূহত থকা ভুল শুধৰণিৰ বাবে (যেতিয়াই অৱগত কৰা হয়) পুনৰ-দাখিল বা ৰিছাবমিছন পৰ্টেল (https://mocresubmit.crcs.gov.in) ব্যৱহাৰ কৰিবলৈ পৰামৰ্শ দিয়া হৈছে। লগতে, দাবী দাখিল বা পুনৰ দাখিল কৰাৰ সময়ত নিৰ্ধাৰিত প্ৰক্ৰিয়া আৰু নথিপত্ৰৰ প্ৰয়োজনীয়তাসমূহ মানি চলিবলৈ কোৱা হৈছে। ইয়াৰ ফলত সময়মতে প্ৰমাণীকৰণ নিশ্চিত হোৱাত সহায় হ'ব আৰু আবেদনকাৰীসকলক অননুমোদিত মাধ্যম বা বিভ্ৰান্তিকৰ দাবীৰ পৰা সুৰক্ষিত কৰিব পৰা যাব।

*****

AK/RD