संरक्षण मंत्रालय
azadi ka amrit mahotsav

संरक्षण मंत्र्यांच्या हस्ते 'रक्षा' (RAKSHA) या संरक्षण मुत्सद्देगिरी दस्तऐवजाचे प्रकाशन; पुढील 10 वर्षांतील जागतिक भागीदारीसाठी भारताचा संरक्षण धोरणात्मक आराखडा आणि दृष्टिकोन अधोरेखित

Posted On: 03 SEP 2026 10:55PM by PIB Mumbai

नवी दिल्‍ली, 3 सप्‍टेंबर 2026

 

संरक्षणमंत्री राजनाथ सिंह यांनी आज 3 सप्टेंबर 2026 रोजी नवी दिल्लीत संरक्षण मुत्सद्देगिरीवरील 'रक्षा' (RAKSHA) या दस्तऐवजाचे प्रकाशन केले. हा सर्वसमावेशक दस्तऐवज पुढील 10 वर्षांतील जागतिक संरक्षण भागीदारीसाठी भारताचा धोरणात्मक आराखडा आणि दृष्टिकोन अधोरेखित करत आहे.

हा दस्तऐवज भारताच्या धोरणात्मक सहभागातील बदलाचे प्रतीक आहे. राष्ट्रीय सुरक्षेच्या उद्दिष्टांना सक्रिय जागतिक सहकार्याशी जोडणारा तसेच दीर्घकालीन स्थैर्य आणि परस्पर विकासाला प्रोत्साहन देणारा हा आराखडा आहे. या धोरणात्मक आराखड्यात अधोरेखित केलेले मुख्य विषय खालीलप्रमाणे आहेत:

  • धोरणात्मक भागीदारी: द्विपक्षीय आणि बहुपक्षीय सुरक्षा सहकार्य अधिक दृढ करणे
  • क्षमता बांधणी: मित्र राष्ट्रांसोबत संयुक्त लष्करी सराव, प्रशिक्षण कार्यक्रम आणि सर्वोत्तम पद्धतींची देवाणघेवाण वाढवणे
  • देशांतर्गत निर्यात: देशाला एक विश्वासार्ह जागतिक संरक्षण उत्पादन केंद्र म्हणून स्थापित करण्यासाठी 'मेक-इन-इंडिया' संरक्षण प्लॅटफॉर्मला प्रोत्साहन देणे
  • सागरी सुरक्षा: हिंदी महासागर क्षेत्रात 'निव्वळ सुरक्षा प्रदाता' आणि ‘प्रथम प्रतिसादकर्ता’ म्हणून भारताची भूमिका बळकट करणे

संरक्षण मुत्सद्देगिरी हा भारताच्या परराष्ट्र धोरणाचा एक मुख्य स्तंभ असल्याने, हा दस्तऐवज पुढील दशकासाठी एक स्पष्ट आणि कृतीयोग्य दृष्टिकोन प्रदान करतो, ज्यामुळे बदलत्या जागतिक परिदृश्यात भारत शांतता, स्थैर्य आणि नियम-आधारित व्यवस्थेचा मुख्य आधार बनून राहील याची हमी मिळते.

या प्रसंगी लष्करप्रमुख जनरल धीरज सेठ; संरक्षण सचिव राजेश कुमार सिंह; सचिव (संरक्षण उत्पादन) संजीव कुमार; सचिव (पूर्व), परराष्ट्र व्यवहार मंत्रालय रुद्रेंद्र टंडन; उप-वायुसेना प्रमुख एअर मार्शल आशुतोष दीक्षित; उप-नौदल प्रमुख व्हाईस ॲडमिरल अजय कोचर; एकात्मिक संरक्षण दल प्रमुख एअर मार्शल तेजिंदर सिंह आणि संरक्षण मंत्रालय, परराष्ट्र व्यवहार मंत्रालय व राष्ट्रीय सुरक्षा परिषद सचिवालयाचे इतर वरिष्ठ अधिकारी उपस्थित होते.

 

* * *

नेहा कुलकर्णी/शैलेश पाटील/दर्शना राणे

 

सोशल मिडियावर आम्हाला फॉलो करा:@PIBMumbai   Image result for facebook icon /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai


(Release ID: 2306753) अभ्यागत कक्ष : 24
Read this releasein: English , Urdu , हिन्दी , Bengali , Bengali-TR , Punjabi , Odia , Tamil , Telugu , Kannada , Malayalam