মতম শাংনা শেন থাদরকপা, শেন থাদবগী মরী হেন্না চেৎশীনহন্নবা অমসুং ভারতকী চাউখৎপগী ৱারিদা জপান্না শরুক য়াবা হেনগৎহন্নবা ঙসি কম্মর্স অমসুং ইন্দষ্ট্রিগী য়ুনিয়ন মিনিষ্টর শ্রী পিয়ুস গোয়ালনা তোকিওদা জপানগী মরুওইবা শেন-থুম অমসুং শেন থাদবগী ইন্সতিতুসনশিংগী লুচিংবশিংগা ৱারি শানখ্রে।

মীফম অদুদা এম.য়ু.এফ.জি, দিবলপমেন্ত বেঙ্ক ওফ জপান, মিজুহো, মোর্গান ষ্টেনলি, নোমুরা অমসুং নিপোন লাইফকী মীহুৎশিং শরুক য়াখি। মখোয়না ভারতকী শেন-থুমগী মীৎয়েং, নৌনা লাকপা শেন থাদনবগী খুদোংচাবশিং অমসুং ভারত্ত জপানগী ইন্সতিসুনশিংনা মখা তানা শেন থাদনবগী মতাংদা খন্নখি।

ভারতকী শেন্মিৎলোনগী মপাঙ্গল অমসুং অৱাবা মায়োক্নবা ঙম্বা অদু শিংথারদুনা, শ্রী পিয়ু গোয়ালনা হায়খি মদুদি মালেমগী লৈতাদবা কয়া লৈজরবসু হৌখিবা চহিদা ভারতনা চাদা ৭.৭ গ্রোথ লৈখি অমসুং ২০৪৭ ফাওবগী মনুংদা য়ু.এস দোল্লার ত্রিল্লিয়ন ৩০ গী ইকোনোমি অমা লৈনবা মাইকৈদা থবক পায়খৎলি। ভারতকী বেঙ্কশিং মপাঙ্গল কল্লি, কেপিতেল মরাংকাইনা লৈরি, নন-পর্ফোরমিং এসেতশিং নেম্না লৈরি, মিদল ক্লাস মশিং হেনগৎলকপা অমসুং চাদিং তৌথোকপা য়াবা শেন্থোক হেনগৎলক্লিবা অসিনা লেপ্তনা শেন-থুম চাউখৎলক্লিবা মরুওইবা মরমশিং ওইরি।

মিনিষ্টরনা হায়খি মদুদি সেমিকন্দক্তরশিং, এ.আই, দেতা সেন্তরশিং, রিন্যুএবল ইনর্জি, গ্রিন হায়দ্রোজেন, এদভান্স মেনুফেকচরিং অমসুং দিজিতেল ইনফ্রাষ্ট্রকচরদা জপান্না শেন থাদরক্নবা খুদোংচাবা কয়া লৈরি। ভারতনা রিন্যুএবল ইনর্জি পুথোকপা হেনগৎলক্লি অমসুং ইনর্জি য়াম্না চঙবা দিজিতেল ইন্দষ্ট্রিশিং চাউখৎনবগীদমক অকনবা য়ুম্ফম অমা নেসনেল পৱার গ্রিদনা শেম্লে অমসুং মেনুফেকচরিং অমসুং তেক্নোলোজিগী হিরমদা ইন্দিয়া সেমিকন্দক্তর মিসন্না অনৌবা খুদোংচাবশিং শেম্লে।

ভারত-জপান মরীগী মরুওইবা অমসুং খুদিংমক কোনশিনবগী মওং অদু ফোঙদোক্লদুনা, শ্রী গোয়ালনা হায়খি মদুদি মালেমগী মেনুফেকচরিং, তেক্নোলোজি অমসুং শেন থাদবগী মফম অমা ওইনবা মাইকৈদা চঙশিল্লিবা লৈবাক অসিগী খোঙচত্ত ভারতনা জপান থাজবা য়ারবা মরুপ অমা ওইনা লৌরি। ইন্তেলেকচ্যুএল প্রোপর্তি প্রোতেক্সন, মগুন লৈবা মীওইশিং ফংহন্নবা, থৌশিল অওনবা পুরক্নবা অমসুং ললোন-ইতিক পাংথোকপা নুংঙাইবা ফিবম অমা শেমগৎনবা ভারতনা থবক পায়খৎলে।

মখোয়না ভারতকা থবক তৌমিন্নবা হেনগৎলক্লিবা অদু জপানগী শেন-থুমগী ইন্সতিতসনশিংনা ফোঙদোকখি অমসুং লৈবাক অসি মতম শাংনা চাউখৎনবগী লৈরিবা খুদোংচাবশিংদা অকনবা থাজবা ফোঙদোকখি। শ্রীরাম ফাইনান্সতা য়ু.এস.দি বিল্লিয়ন ৪ থাদখিবা অদু এম.য়ু.এফ.জিনা ফোঙদোকখি অমসুং রিন্যুএবল ইনর্জি অমসুং হায়দ্রোজেনগী হিরমশিংদা শেন শেন থাদনিংবগী অপাম্বা ফোঙদোকখি। দি.বি.জেনা ভারতকী অখন্নবা লাল্লোং অমসুং লম শেমগৎপা, ভেঞ্চর কেপিতেল অমসুং অতোপ্পা মতম শাংনা শেন থাদনবগী খুদোংচাবশিংদা থৱায় য়াওবা হেনগৎলকপা অদু ফোঙদোকখি।

ভারত্ত থবক তৌরিবা জপানগী কম্পেনিশিংগী শেন্দোং হেনগৎলক্লিবা অমসুং পুনেদা লৈবা মসিগী গ্লোবেল কেপাবিলিতি সেন্তর য়াওনা মসিনা ভারত্ত পায়খৎলিবা থবকশিং পাকথোক-চাউথোকপা হেনগৎলকপগী মতাংদা মিজুহোনা ফোঙদোকখি। মোর্গান ষ্টেনলিনা ফোঙদোকখি মদুদি ইমপ্লোইয়ি ১৯,০০০ হেন্না লৈদুনা, ভারত অসি মখোয়গী খ্বাইদগী মরুওইবা মালেমগী মফমশিংগী মনুংদা অমনি অমসুং মসিনা ভারত্ত পায়খৎলিবা থবকশিং, য়াম্লবা শেনফমগী কেপিতেল মার্কেতশিং অমসুং শেন-থুমগী থবকশিংগী অওনবশিং ফোঙদোকখি। 

নোমুরানা মতম শাংনা ভারত্ত থবক তৌরকপা অমসুং এ.আই অমসুং সাইবরসেকুরিতিগুম্বা হিরমশিংদা তেক্নোলোজিগী খুৎথাং য়াওনা, জপান অমসুং মালেমগী উদ্যোগশিং ভারতকী খুদোংচাবশিং লৌনবা মসিনা লৌরিবা থৌদাং ফোঙদোকখি। মতম শাংবা “পেসেন্ত কেপিতেল”গী মরুওইবগী মতাংদা নিপোন লাইফনা ফোঙদোকখি অমসুং মসিগী ভারত্ত পাংথোক্লিবা থবকশিংনা শেন্দোং য়াম্না তানখিবা অদু পনখি।

জপানগী ইন্সতিতুসনশিংনা মখা তানা ভারত্ত শেন থাদবা হেনগৎহন্নবা পাম্বৈশিংশু মখোয়না খন্নখি। শেন্দোং অমুক হন্না পুখিবগী থবক লাইহনবগী মরুওইবা, ভারতকী কেপিতেল মার্কেতশিং লাইনা ফংহনবা অমসুং মতম শাংনা শেন থাদবশিংগী অফবা চৎন-কাংলোনশিং শেম্বগী মরুওইবগী মতাংদা মীফম অদুদা শরুক য়াখিবশিংনা ফোঙদোকখি।

জপানগী ইন্সিতুসনশিংনা অমুক হন্না ফোঙদোকখি মদুদি ভারত্ত মখোয়না য়েংলিবা মতম শাংবা মীৎয়েং ফজনা লেংদনা লৈরি, লোয়ননা করেন্সি পুথোক-পুশিন অমসুং অকক্নবা চৎন-কাংলোন অমসুং থৌশিলনা অতেনবা মতমগী শেন থাদনবা ৱারেপশিংদা ইথিল পীগনি। মখোয়না ফোঙদোরকপা ৱাফমশিং শ্রী গোয়ালনা তরাম্না ওকখি অমসুং ললোন-ইতিক্কী থবকশিং লাইহনবা মখা তানা হেনগৎহন্নবা অমসুং শেন থাদবা হেন্না নুংঙাইবা ফিবম অমা শেমগৎনবা সরকারগী থাজবা অমুক হন্না পীখি।

গিফ সিতিনা ভারত্ত মালেমগী কেপিতেল চঙলক্নবা থোঙ্গাল অমা ওইনবা অমসুং জপান অমসুং ভারতকী মরক্ত শেন হেন্না থাদনবা মফম অমা ওইনা থবক তৌনবা ওইথোকপা য়াবশিং মীফম অদুদা খন্নখি।

শ্রী গোয়ালনা হায়খি ভারতনা কেপিতেল থিবা খক নত্তনা তেক্নোলোজি, ইন্নোবেসন, মেনুফেকচরিং, থবক অমসুং মালেমগী ভেলু চেনশিং পুরক্নবা মতম শাংনা চৎনগদবা মরী শেমগৎনবা থিরি। অনৌবা অমসুং নৌনা থোক্লকপা সেক্তরশিং অনিমক্ত খুদোংচাবশিং লৈরি অমসুং মমাংদা লিংখৎখ্রবা ললোন-ইতিক্কী থবকশিং মতমগা চুন্নবা শেমগৎপা অমসুং তেক্নোলোজি ফগৎহনবা দরকার ওইরি।

মথং চহি ১০ দা লনাই ওইনা জপান্না য়েন ত্রিল্লিয়ন ১০ থাদনবা ভারত-জপানগী পান্দমগী মরুওইবা মখোয়না খন্নখি। জপানগী মরুওইবা শেন-থুমগী ইন্সতিতুসনশিংনা মতম শাংনা ভারত্ত শেন থাবদা থম্লিবা অচেৎপা থাজবা মীফম অদুদা অমুক হন্না ফোঙদোকখি অমসুং নাকল অনিমক্না শেন থাদবা, তেক্নোলোজি অমসুং ললোন-ইতিক্কী মরীশিংগী পাকথোক-চাউথোকহনবগী মতাংদা খন্নখি।

মীফম অসি ভারত-জপানগী শেন-থুমগী মরী হেন্না ফগৎনবা অমসুং ভারতকী মথংগী তাঙ্কক্কী চাউখৎপদা মতম শাংনা জপানগী ইন্সিতুসনশিংনা শেন থাদনবা খুদোংচাবা পীনবা মাইকৈদা থাংজিনবা অতোপ্পা মরুওইবা খোঙথাং অমনি।

***