దీర్ఘకాలిక పెట్టుబడులను బలోపేతం చేయటం, పెట్టుబడి భాగస్వామ్యాన్ని పెంపొందించటం, భారతదేశ అభివృద్ధి ప్రయాణంలో జపాన్ భాగస్వామ్య విస్తరణపై ఆ దేశంలోని ప్రముఖ ఆర్థిక, పెట్టుబడి సంస్థల సీనియర్ నేతలతో కేంద్ర వాణిజ్య, పరిశ్రమల శాఖ మంత్రి శ్రీ పీయూష్ గోయల్ ఇవాళ టోక్యోలో చర్చలు జరిపారు.

ఎంయూఎఫ్‌జీ, డెవలప్‌మెంట్ బ్యాంక్ ఆఫ్ జపాన్ (డీబీజే), మిజుహో, మోర్గాన్ స్టాన్లీ, నోమురా, నిప్పన్ లైఫ్ సంస్థల సీనియర్ ప్రతినిధులు ఈ సమావేశంలో పాల్గొన్నారు. భారతదేశ ఆర్థిక దృక్పథం, నూతన పెట్టుబడి అవకాశాలు, భారత్‌లో జపాన్ సంస్థాగత పెట్టుబడులను మరింత సులభతరం చేసే చర్యలపై ఈ చర్చలు దృష్టి సారించాయి.

భారత ఆర్థిక వ్యవస్థ బలాన్ని, స్థిరత్వాన్ని శ్రీ పీయూష్ గోయల్ స్పష్టం చేశారు. ప్రపంచ అనిశ్చితుల మధ్య గతేడాది భారత్‌ 7.7 శాతం వృద్ధి రేటును సాధించిందని, 2047 నాటికి 30 ట్రిలియన్ డాలర్ల ఆర్థిక వ్యవస్థగా మారేందుకు కృషి చేస్తోందని తెలిపారు. బలమైన భారత బ్యాంకింగ్ రంగం, పటిష్ఠమైన పెట్టుబడుల సామర్థ్యం, తగ్గిన మొండి బకాయిలు, పెరుగుతున్న మధ్యతరగతి వర్గం, పెరుగుతున్న వ్యక్తిగత ఆదాయాలు, నిలకడైన ఆర్థిక వృద్ధికి కీలక శక్తి అని తెలిపారు.

సెమీకండక్టర్లు, కృత్రిమ మేధ, డేటా సెంటర్లు, పునరుత్పాదక ఇంధనం, గ్రీన్ హైడ్రోజన్, అధునాతన తయారీ, డిజిటల్ మౌలిక సదుపాయాల రంగాల్లోని గణనీయమైన అవకాశాలను జపాన్ పెట్టుబడిదారులకు మంత్రి వివరించారు. ఇంధన వినియోగం ఎక్కువగా ఉండే డిజిటల్ పరిశ్రమల అభివృద్ధికి భారతదేశంలో పెరుగుతున్న పునరుత్పాదక ఇంధన సామర్థ్యం, జాతీయ విద్యుత్ గ్రిడ్ కీలక ఆధారంగా నిలుస్తున్నాయని... తయారీ, సాంకేతిక రంగాల్లో ఇండియా సెమీకండక్టర్ మిషన్ నూతన అవకాశాలను సృష్టిస్తోందని తెలిపారు.

భారత్-జపాన్ సంబంధాల వ్యూహాత్మక, సమగ్ర స్వభావాన్ని తెలియజేస్తూ... తయారీ, సాంకేతికత, పెట్టుబడి రంగాల్లో ప్రపంచ కేంద్రంగా మారే ప్రయాణంలో జపాన్‌ను విశ్వసనీయ భాగస్వామిగా భారత్‌ భావిస్తోందని శ్రీ పీయూష్ గోయల్ తెలిపారు. మేధో సంపత్తి హక్కుల పరిరక్షణ, అత్యుత్తమ ప్రతిభావంతులను కలిగి ఉండటం, విధానపరమైన సంస్కరణలు, మరింత అనుకూలమైన వ్యాపార వాతావరణాన్ని సృష్టించేందుకు భారత్ కట్టుబడి ఉందని వెల్లడించారు.

భారత్‌తో పెరుగుతున్న భాగస్వామ్యాన్ని పంచుకుంటూ... దీర్ఘకాలిక వృద్ధి అవకాశాలపై జపాన్ ఆర్థిక సంస్థలు బలమైన విశ్వాసాన్ని వ్యక్తం చేశాయి. శ్రీరామ్ ఫైనాన్స్‌లో సుమారు 4 బిలియన్ డాలర్ల పెట్టుబడితో పాటు పునరుత్పాదక ఇంధనం, హైడ్రోజన్ వంటి రంగాల్లో పెట్టుబడులకు ఆసక్తితో ఉన్నట్లు ఎంయూఎఫ్‌జీ పేర్కొంది. భారత వ్యూహాత్మకత, రియల్ ఎస్టేట్ అభివృద్ధి, వెంచర్ క్యాపిటల్, ఇతర దీర్ఘకాలిక పెట్టుబడి అవకాశాలపై పెరుగుతున్న ఆసక్తిని డీబీజే వివరించింది.

భారతదేశంలో కార్యకలాపాలు నిర్వహిస్తున్న జపనీస్ కంపెనీల లాభం పెరుగుతోందని, పుణేలోని గ్లోబల్ కేపబిలిటీ సెంటర్‌తో సహా భారత్‌లో కార్యకలాపాలను విస్తరిస్తున్నట్లు మిజుహో వెల్లడించింది. తమ కంపెనీకి అత్యంత కీలకమైన ప్రపంచ కేంద్రాల్లో భారత్‌ ఒకటని మోర్గాన్ స్టాన్లీ తెలిపింది. ఇక్కడ 19,000 మందికి పైగా ఉద్యోగులు ఉన్నారని, భారత్‌లోని కంపెనీ కార్యకలాపాలు అధిక విలువ గల మూలధన మార్కెట్లు, ఆర్థిక సేవల కార్యకలాపాల దిశగా ఎదుగుతున్నట్లు స్పష్టం చేసింది.

భారతదేశంలో దీర్ఘకాలిక ఉనికిని, జపాన్ కంపెనీలను, గ్లోబల్ పరిశ్రమలను భారతీయ అవకాశాలతో అనుసంధానించటంలో కీలక పాత్ర పోషించినట్లు నోమురా సంస్థ స్పష్టం చేసింది. కృత్రిమ మేధ, సైబర్ సెక్యూరిటీ వంటి సాంకేతిక సామర్థ్యాల ద్వారా కూడా ఇది సాధ్యమవుతోందని వెల్లడించింది. "దీర్ఘకాలిక పెట్టుబడి" ప్రాముఖ్యతను నిప్పన్ లైఫ్‌ స్పష్టం చేసింది. భారత్‌లో తమ సంస్థ కార్యకలాపాల ద్వారా అత్యధిక రాబడులు పొందుతున్నట్లు తెలిపింది.