ଜାତୀୟ କ୍ରୀଡ଼ା ଦିବସ ୨୦୨୬ ପାଳନ ଅବସରରେ ଆସନ୍ତା ୨୭ ତାରିଖରେ ଦେଶବ୍ୟାପୀ ବୃହତ୍ ଯୁବ ଭାଗିଦାରୀ ପଦକ୍ଷେପ ‘ଖେଲୋ ଇଣ୍ଡିଆ ଡାଏଲଗ୍ - ଖେଲ୍ କି ବାତ୍, ପ୍ରଧାନମନ୍ତ୍ରୀ ମୋଦୀ କେ ସାଥ୍’ ଆୟୋଜିତ ହେବ। ଏହି ପଦକ୍ଷେପ ଅଧୀନରେ ଦେଶର ୧,୫୦୦ରୁ ଅଧିକ ସ୍ଥାନରେ ଯୁବବର୍ଗ, କ୍ରୀଡ଼ାବିତ୍ ଓ ଶିକ୍ଷାନୁଷ୍ଠାନଗୁଡ଼ିକ ଅଂଶଗ୍ରହଣ କରି କ୍ରୀଡ଼ା, ଯୁବ ନେତୃତ୍ୱ ଓ ରାଷ୍ଟ୍ର ନିର୍ମାଣ ସମ୍ପର୍କିତ ବିଷୟରେ ଆଲୋଚନା କରିବେ।

ଏହି ଦେଶବ୍ୟାପୀ ପଦକ୍ଷେପ ଉଦୀୟମାନ ଯୁବ ଆଥଲେଟ୍‌ମାନଙ୍କ ପାଇଁ ଭାରତର କ୍ରୀଡ଼ା ଏବଂ ଯୁବ ବ୍ୟବସ୍ଥାର ଭବିଷ୍ୟତ ସମ୍ପର୍କରେ ସେମାନଙ୍କର ବିଚାର, ପରାମର୍ଶ ଏବଂ ନୂତନ ଚିନ୍ତାଧାରା ପାଇଁ ଏକ ପ୍ରତ୍ୟକ୍ଷ ମଞ୍ଚ ସୃଷ୍ଟି କରିବ। ଏହି କାର୍ଯ୍ୟକ୍ରମରେ ଅଂଶଗ୍ରହଣ କରୁଥିବା ଶିକ୍ଷାନୁଷ୍ଠାନଗୁଡ଼ିକ ମଧ୍ୟରେ ଆଇଆଇଟି, ଆଇଆଇଏମ୍‌, ଏନ୍‌ଆଇଟି, ଏମ୍ସ, ପ୍ରମୁଖ ମେଡିକାଲ କଲେଜ ଏବଂ ବିଶ୍ୱବିଦ୍ୟାଳୟଗୁଡ଼ିକ ସାମିଲ ରହିବେ।

ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଭର୍ଚୁଆଲ ମାଧ୍ୟମରେ ଉପସ୍ଥିତ ଅଂଶଗ୍ରହଣକାରୀଙ୍କୁ ସମ୍ବୋଧନ କରିବେ। ପ୍ରଧାନମନ୍ତ୍ରୀଙ୍କ ସମ୍ବୋଧନ ପରେ ସମସ୍ତ କାର୍ଯ୍ୟକ୍ରମସ୍ଥଳୀରେ ଏକ ସମୟରେ ପ୍ରତ୍ୟକ୍ଷ କାର୍ଯ୍ୟକ୍ରମ ଆରମ୍ଭ ହେବ।

ଏହି କାର୍ଯ୍ୟକ୍ରମ ଯୁବାବର୍ଗଙ୍କ ଆକାଂକ୍ଷା, ସେମାନଙ୍କର ତୃଣମୂଳ ସ୍ତରର ଅଭିଜ୍ଞତା ଏବଂ ଆବଶ୍ୟକ ନୀତି ନିର୍ଦ୍ଧାରଣ ମଧ୍ୟରେ ସମ୍ପର୍କକୁ ସୁଦୃଢ଼ କରିବାକୁ ଲକ୍ଷ୍ୟ ରଖିଛି। ଯୁବ ଅଂଶଗ୍ରହଣକାରୀମାନେ ଚାରୋଟି ମୁଖ୍ୟ ବିଷୟବସ୍ତୁ ଉପରେ ଆଲୋଚନା କରିବେ। ଏଗୁଡ଼ିକ ହେଲା: କ୍ରୀଡ଼ା ବ୍ୟବସ୍ଥାକୁ ସୁଦୃଢ଼ କରିବା ଏବଂ ତୃଣମୂଳ ସ୍ତରରେ ସୁବିଧା, କୋଚିଂ ଓ ସୁଯୋଗର ସମ୍ପ୍ରସାରଣ; ବୈଜ୍ଞାନିକ ଉପାୟରେ ପ୍ରତିଭା ଚିହ୍ନଟ ଏବଂ ଆଥଲେଟ୍‌ ବିକାଶ ମାଧ୍ୟମରେ ୨୦୩୬ ଅଲିମ୍ପିକ୍ସ ପାଇଁ ପ୍ରତିଭା ଗଢ଼ିବା; ଯୁବ ନେତୃତ୍ୱ ଏବଂ ଶାସନରେ ସେମାନଙ୍କର ଭାଗିଦାରୀ ବୃଦ୍ଧି କରିବା; ଏବଂ ଭବିଷ୍ୟତ-ଉପଯୋଗୀ ଦକ୍ଷତା, ସ୍ୱେଚ୍ଛାସେବୀ ମନୋଭାବ ଓ ରାଷ୍ଟ୍ର ନିର୍ମାଣ ସୁଯୋଗ ମାଧ୍ୟମରେ ଯୁବବର୍ଗଙ୍କୁ ସଶକ୍ତ କରିବା।

ଏହି ପଦକ୍ଷେପର ଏକ ପ୍ରମୁଖ ଆକର୍ଷଣ ହେବ କ୍ରୀଡ଼ା ପ୍ରତି ଆଗ୍ରହୀ ଯୁବବର୍ଗଙ୍କ ସହ ଦେଶର ଅଗ୍ରଣୀ କ୍ରୀଡ଼ାବିତ୍ ଓ ପଦକ ବିଜେତାମାନଙ୍କର ସିଧାସଳଖ ଆଲୋଚନା। ଦୀପା କର୍ମାକର, ସାଇନା ନେହୱାଲ, ଗଗନ ନାରଙ୍ଗ, ଶ୍ରୀଜେଶ, ମେରୀ କମ୍, ବାଇଚୁଙ୍ଗ ଭୁଟିଆ, ଗୋପୀଚାନ୍ଦ, ଅଞ୍ଜୁ ବବି ଜର୍ଜ, କର୍ଣ୍ଣମ ମଲ୍ଲେଶ୍ୱରୀ, ମୀରାବାଇ ଚାନୁ ଓ ପି.ଟି. ଉଷାଙ୍କ ସମେତ ପ୍ରମୁଖ କ୍ରୀଡ଼ାବିତ୍ ଏବଂ ଖ୍ୟାତନାମା କ୍ରିକେଟରମାନେ ଯୁବବର୍ଗଙ୍କ ସହ ଆଲୋଚନା କରି ନିଜର କ୍ରୀଡ଼ା ଯାତ୍ରା, ସମ୍ମୁଖୀନ ହୋଇଥିବା ଆହ୍ୱାନ ଓ ଅଭିଜ୍ଞତା ବାଣ୍ଟିବେ।

ଏହି ଭାଗିଦାରୀ କେବଳ ଆଥଲେଟ୍‌ମାନଙ୍କ ମଧ୍ୟରେ ସୀମିତ ରହିବ ନାହିଁ; ସାଂସଦ, ବିଧାୟକ, କେନ୍ଦ୍ରମନ୍ତ୍ରୀ, ରାଜ୍ୟମନ୍ତ୍ରୀ ଏବଂ ରାଜ୍ୟ କ୍ରୀଡ଼ାମନ୍ତ୍ରୀମାନେ ମଧ୍ୟ ଯୁବବର୍ଗଙ୍କ ସହ ଆଲୋଚନା କରିବେ ଏବଂ ନିର୍ଦ୍ଧାରିତ ଚାରୋଟି ବିଷୟବସ୍ତୁ ଉପରେ ସେମାନଙ୍କର ବିଚାର ଓ ପରାମର୍ଶ ଲୋଡ଼ିବେ।

ଏହି ପଦକ୍ଷେପରେ "ବିକଶିତ ଭାରତ ୟଙ୍ଗ ଲିଡର୍ସ ଡାଏଲଗ୍ କୁଇଜ୍" ସାମିଲ ରହିବ ଏବଂ ଏହା ଯୁବ ଅଂଶଗ୍ରହଣକାରୀମାନଙ୍କୁ ମାଇଁ ଭାରତ ପୋର୍ଟାଲରେ ପଞ୍ଜୀକରଣ କରିବାକୁ ଉତ୍ସାହିତ କରିବ, ଯାହା ଏହି ଦିନିକିଆ କାର୍ଯ୍ୟକ୍ରମ ପରେ ମଧ୍ୟ ନିରନ୍ତର ଭାବେ ଯୁବ ସଂଯୋଗ ପାଇଁ ଏକ ମାଧ୍ୟମ ସୃଷ୍ଟି କରିବ।

“ଖେଲୋ ଇଣ୍ଡିଆ ଡାଏଲଗ୍ – ଖେଲ୍‌ କି ବାତ୍‌, ପ୍ରଧାନମନ୍ତ୍ରୀ ମୋଦୀ କେ ସାଥ୍‌” ଏହି ବିଚାରକୁ ଦୋହରାଇବାକୁ ଚାହେଁ ଯେ ଭାରତର କ୍ରୀଡ଼ା ରୂପାନ୍ତରଣ ଶେଷରେ ଏହାର ଯୁବବର୍ଗଙ୍କ ଦ୍ୱାରା ହିଁ ସଞ୍ଚାଳିତ। ଯୁବକମାନଙ୍କ ଆକାଂକ୍ଷା, କ୍ରୀଡ଼ା ଅଭିଜ୍ଞତା ଏବଂ ନୀତିଗତ ଦୃଷ୍ଟିକୋଣକୁ ଏକ ସାଧାରଣ ମଞ୍ଚକୁ ଆଣି, ଏହି ପଦକ୍ଷେପର ଲକ୍ଷ୍ୟ ହେଉଛି ଦେଶର କ୍ରୀଡ଼ା ଏବଂ ଯୁବ ବିକାଶର ଭବିଷ୍ୟତକୁ ରୂପ ଦେବାରେ ଯୁବବର୍ଗଙ୍କୁ ଏକ ଅର୍ଥପୂର୍ଣ୍ଣ ସ୍ୱର ପ୍ରଦାନ କରିବା ଏହି କାର୍ଯ୍ୟକ୍ରମର ଏକ ପ୍ରମୁଖ ଉଦ୍ଦେଶ୍ୟ।

--