کھیلوں کے قومی دن 2026 کے موقع پر ملک بھر میں نوجوانوں کو بڑے پیمانے پر جوڑنے کی ایک اہم پہل کے تحت 27 اگست 2026 کو ’’کھیلو انڈیا ڈائیلاگ – کھیل کی بات، پردھان منتری مودی کے ساتھ‘‘ کا انعقاد کیا جائے گا۔ اس پروگرام کے ذریعے ملک بھر میں 1,500 سے زائد مقامات پر نوجوانوں، کھلاڑیوں اور تعلیمی اداروں کو ایک مشترکہ پلیٹ فارم پر لایا جائے گا۔

ملک گیر اس اقدام کے ذریعے ابھرتے ہوئے نوجوان کھلاڑیوں کو ایک ایسا براہِ راست پلیٹ فارم فراہم کیا جائے گا، جہاں وہ ہندوستان کے کھیلوں اور نوجوانوں کے ایکو نظام کے مستقبل کے بارے میں اپنے خیالات، تجاویز اور اختراعی تصورات پیش کر سکیں گے۔ اس پروگرام میں آئی آئی ٹی، آئی آئی ایم، این آئی ٹی، ایمس، معروف میڈیکل کالجوں اور یونیورسٹیوں سمیت متعدد اہم تعلیمی ادارے شرکت کریں گے۔

اس پروگرام میں وزیر اعظم نریندر مودی کا ورچوئل خطاب ہوگا۔ وزیر اعظم کے خطاب کے فوراً بعد تمام شریک مقامات پر زمینی سطح کے پروگرام بیک وقت شروع کیے جائیں گے۔

اس پروگرام کا مقصد نوجوانوں کی امنگوں اور زمینی سطح پر ان کے تجربات کو پالیسی سازی کے عمل سے مزید مضبوطی سے جوڑنا ہے۔ نوجوان شرکا چار اہم موضوعات پر تبادلۂ خیال کریں گے-کھیلوں کے ماحولیاتی نظام کو مزید مضبوط بنانا اور بنیادی سطح پر کھیلوں کی سہولیات، کوچنگ اور مواقع کو وسعت دینا، سائنسی طریقے سے باصلاحیت کھلاڑیوں کی شناخت اور ان کی تربیت و ترقی کے ذریعے 2036 کے اولمپکس کے لیے کھیلوں کے ٹیلنٹ کو تیار کرنا، نوجوانوں میں قیادت کی صلاحیتوں کو فروغ دینا اور حکمرانی کے عمل میں ان کی شرکت کو بڑھانا،نوجوانوں کو مستقبل کے تقاضوں سے ہم آہنگ کرنا ہنرمندی، رضاکارانہ سرگرمیوں اور قوم کی تعمیر میں مؤثر کردار ادا کرنے کے مواقع کے ذریعے بااختیار بنانا۔

اس اقدام کی ایک اہم خصوصیت کھیلوں میں دلچسپی رکھنے والے نوجوانوں اور ہندوستان کے معروف کھلاڑیوں اور تمغہ جیتنے والے اسپورٹس اسٹارز کے درمیان براہِ راست تبادلۂ خیال ہوگا۔ دِیپا کرماکر، سائنا نہوال، گگن نارنگ، سری جیش، میری کوم، بائچنگ بھوٹیا، گوپی چند، انجُو بوبی جارج، کرنم ملیشوری، میرابائی چانو اور پی ٹی اوشا سمیت کئی نامور کھلاڑیوں کے ساتھ معروف کرکٹرز بھی نوجوانوں سے بات چیت کریں گے اور انہیں اپنے کھیل کے سفر، درپیش چیلنجز اور ذاتی تجربات سے آگاہ کریں گے۔

اس پروگرام میں صرف کھلاڑی ہی نہیں بلکہ ارکانِ پارلیمنٹ، ارکانِ قانون ساز اسمبلی، مرکزی وزرا، وزرائے مملکت اور ریاستی وزرائے کھیل بھی نوجوانوں کے ساتھ براہِ راست رابطہ کریں گے اور چار مقررہ موضوعات پر ان کی آرا، تجاویز اور خیالات حاصل کریں گے۔

اس اقدام کے تحت ’وِکست بھارت ینگ لیڈرز ڈائیلاگ کوئز‘ بھی منعقد کیا جائے گا۔ اس کے علاوہ نوجوان شرکا کو ’مائی بھارت پورٹل‘ پر رجسٹریشن کی ترغیب دی جائے گی، تاکہ ایک روزہ پروگرام کے اختتام کے بعد بھی نوجوانوں کی مسلسل اور بامقصد شمولیت کے لیے ایک مؤثر پلیٹ فارم دستیاب رہے۔

’’کھیلو انڈیا ڈائیلاگ – کھیل کی بات، پردھان منتری مودی کے ساتھ‘‘ کا مقصد اس تصور کو مزید مضبوط بنانا ہے کہ ہندوستان میں کھیلوں کے شعبے کی تبدیلی اور ترقی کی اصل قوت ملک کے نوجوان ہیں۔ نوجوانوں کی امنگوں، کھلاڑیوں کے عملی تجربات اور پالیسی سازوں کے نقطۂ نظر کو ایک مشترکہ پلیٹ فارم پر لا کر اس اقدام کا مقصد نوجوانوں کو ملک میں کھیلوں اور نوجوانوں کی ترقی کے مستقبل کی تشکیل میں ایک بامعنی آواز فراہم کرنا ہے۔

*****

ش ح۔ ک ح۔ ج ا

U.No. 2524